Pagkaligtas Pasiring sa Bagong Daga
Kapitulo 11: “Dumulag Kamo sa Tahaw nin Babilonya”
1. (a) Paano niato maaaraman kun anong klaseng pagsamba an ikinaoogma nin Dios? (b) Saen kita pinadudulag nin Dios?
DAKOL an nagpabarobalyo nin relihiyon, na naghahanap nin nakakokontentong simbag sa saindang mga hapot manongod sa buhay. May naheheling sindang pagkakaparareho sa mga paniniwala asin gibo, saka nin dakol na pagkalaenlaen. Alagad ta solamente paagi sa paggamit sa sadiring Tataramon nin Dios bilang giya na maseseguro nin saro kun arin na mga simbag an totoo asin kun anong mga gibo an talagang ikinaoogma nin Dios. Paagi sa Biblia, ipinamimidbid sato kan Kaglalang an saiyang sadiri asin an saiyang katuyohan. Ibinubuyagyag man nia an mga ginikanan nin falsong pagsamba. Sa paggibo kaiyan, pinatatanidan nia kita tumang sa inaapod niang “Dakulang Babilonya” asin sinasadol kita na “dumulag” sa tahaw kaiyan. Kinuyog na daw nindo an patanid na iyan?—Kapahayagan 18:4, 21; Jeremias 51:6.
2. Ano an “Dakulang Babilonya”?
2 Ano an “Dakulang Babilonya”? Sa pangkagabsan, an gabos na relihiyon na nagsusuportar sa mga kaisipan, paniniwala o gibo na gikan sa relihiyon nin suanoy na Babilonya minakompuwesto sa Dakulang Babilonya. Kun siring an nagpapamidbid na mga karakteristiko kaiyan maaaraman paagi sa pagsiyasat sa ginikanan asin relihiyon kan suanoy na Babilonya mismo.
3. (a) Paano nagpoon an suanoy na Babilonya, asin anong espiritu an pinukaw kan kagpundar dian? (b) Sa anong mga paagi na naririsa an espiritung iyan sa mga relihiyon ngonyan?
3 Pakalihis nin labing sarong siglo poon kan Baha kan aldaw ni Noe, an siudad nin Babel (sa huri inapod na Babilonya) itinogdok sa palibot nin sarong torre—sarong proyekto na an promotor si Nimrod. Pinukaw kan Nimrod na ini sa saiyang kairiba an espiritu nin pagrebelde tumang ki Jehova asin an pagmawot na humanap nin kabantugan para sa sainda man sana. (Genesis 10:9, 10; 11:1-9) Namamasdan daw nindo an espiritung iyan ngonyan—an dai pagmangno sa Tataramon nin Dios, pati kan mga naghihingakong relihiyoso, asin an paggamit sa relihiyon tanganing apodon an atension sa sadiri o tanganing magin bantog?
4. Paano biniribid kan relihiyon nin Babilonya an katotoohan manongod sa Dios mismo?
4 An mga trinidad nin mga dios lataw sa relihiyon nin Babilonya. Yaon an trinidad na kompuwesto ni Anu, Bel asin Ea; an saro man si Sin, Shamash asin Ishtar. Dugang pa, an mga ladawan nakapano sa mga lugar nin pagsamba sa Babilonya. Ini gabos nakaparayo kan atension sa bagay na saro sana an tunay na Dios, na an ngaran si Jehova. (Deuteronomio 4:39; Juan 17:3) An mga kuwalidad asin gawe na iinatribuwir sa saindang mga dios, kaiba an paggamit sa daing buhay na mga ladawan, nagtao sa dakol nin biribid na punto-de-vista manongod sa Kaglalang.—Jeremias 10:10, 14; 50:1, 38; 1 Corinto 10:14, 19-22.
5. (a) Paano an paniniwala nin Babilonya manongod sa kagadanan sa katotoohan dagdag na sana sa kaputikan ni Satanas ki Eva? (b) Ini naggiya sa ano pang ibang katokdoan?
5 An mga taga-Babilonya nagtubod na an kagadanan pagbalyo sana sa ibang klaseng buhay, alagad ta ini kontra sa isinabi nin Dios sa satong enot na mga magurang. Dinagdagan nin mga pilosopong Griego an ideyang ini, na sinasabi na an mga tawo igwa nin inmortal na kalag. An enot na kaputikan kan Diablo iyo na kun si Adan asin Eva magmasinuway sa Dios, sinda ‘dai nanggad magagadan’ sa laman. Ngonyan sinasabihan an mga tawo na an nabubuhay sagkod lamang iyo an sarong kabtang ninda sa laog na dai ninda naheheling. An falsong katokdoan na ini nagbunga kan paniniwala sa impiernong may kalayo, purgatoryo, pagsamba sa mga apoon asin dakol pang iba.—Genesis 3:1-5; Eclesiastes 9:5, 10; Ezequiel 18:4.
6. (a) Ano pang ibang gibo na uso ngonyan an guminikan sa relihiyon nin Babilonya? (b) Gurano kaseryoso kaini?
6 Kaiba man sa relihiyon nin Babilonya an astrolohiya, pagtoodtood, mahika asin panraratak, na paagi kaiyan an mga tawo naghanap nin labi sa natural na paggiya na magagamit tanganing makapagpayaman sinda asin mapamogolan an iba. (Daniel 2:27; Ezequiel 21:21) Lakop nanggad an mga gibong ini ngonyan, minsan ngani iyan gabos ipinatatanid sa Biblia! Sa paggibo kaiyan, an mga tawo naholog sa kamot nin mga espiritung demonyo, na naghahagad nin maringis na bayad sa mga pabor na itinatao ninda.—Deuteronomio 18:10-12; Isaias 8:19; Gibo 16:16; Kapahayagan 18:21, 23.
7. Ano an naheheling nindong ebidensia na an Dakulang Babilonya (a) may inmoral na relasyon sa politikal na mga namomoon? (b) may dakulang kayamanan? (c) may paninimbagan sa pagpabolos nin dugo?
7 Sa orog pang pagpamidbid sa Dakulang Babilonya, isinasabi kan Biblia an saiyang inmoral na relasyon sa politikal na mga namomoon, an saiyang kayamanan asin an saiyang paninimbagan sa pagpabolos nin dugo, pati kan tunay na mga lingkod nin Dios. (Kapahayagan 17:1-6; 18:24) Aram na gayo an rekord kan mga relihiyon sa kinaban sa mga bagay na ini.
Gurano Kadakula kan Saindong Pagkamoot sa Katotoohan?
8. Siisay an tunay na Dios kan Dakulang Babilonya?
8 Kun an saro kaayon sa ano man na kabtang kan Dakulang Babilonya, nakiiiba sa saiyang mga selebrasyon o nag-aarog sa saiyang mga dalan, siisay an natatawan nin onra? Bakong si Jehova. Imbes, an tawong iyan garo man sana naghuhuruhod sa “dios kan palakaw na ini nin mga bagay,” an buminuta sa isip nin katawohan.—2 Corinto 4:4.
9. Paano nagin posible para ki Satanas na dayaon an kadakol na tawo sa relihiyosong paagi?
9 Alagad paano nangyari na kadakol kan nadaya sa paaging ini? An Biblia minasimbag na sinda nabiktima kan siod ni Satanas “huli ta dai ninda inako an pagkamoot kan katotoohan.” (2 Tesalonica 2:9-12) Ini dai niato maninigong ipagngalas. Pira an midbid nindo na perming nagsasabi kan katotoohan—sa harong, sa negosyo, kun ipinaheheling sainda an saindang mga pagkukulang? Kun ipinaheheling sainda an sinasabi kan Biblia, an tataramon nin katotoohan nin Dios, pira an gustong talikdan an saindang dating mga paniniwala o ugale, liwaton pa ngani an saindang pamumuhay, tanganing makaoyon dian? Kamo daw iyo?
10. (a) Anong klaseng tawo an hinahanap ni Jehova? (b) Paano niato ikapaheheling na kita arog kaiyan na tawo?
10 Hinahanap ni Jehova an mga tawo na igwa nin siring na pagkamoot sa katotoohan. Sia mismo “Dios nin katotoohan.” (Salmo 31:5) An mga katokdoan kan saiyang Tataramon bakong imahinasyon sana. Iyan katotoohan. Sa sarong babaeng taga-Samaria, si Jesus nagsabi: “An tunay na mga parasamba masamba sa Ama sa espiritu asin katotoohan, huli ta, sa katunayan, hinahanap kan Ama an mga siring na magsamba sa saiya. An Dios Espiritu, asin idtong nagsasamba saiya kaipuhan na magsamba saiya sa espiritu asin sa katotoohan.” (Juan 4:23, 24) Boot daw nindong magin siring na tawo?
An Probisyon nin Dios Para sa Katalingkasan
11. (a) Ano an ihinula sa Isaias 49:8, 9? (b) Kasuarin iyan enot na naotob? (c) Taano iyan ta interesante para sa sato?
11 Tanganing matawan kita nin paggiya, haloy nang ipinasurat ni Jehova sa Biblia an panuga nin katalingkasan sa mapan-aping pamamahala nin Babilonya. Iyan naotob kan kaldahon ni Cirong Dakula an mga Judio, saka an bakong Israelitang mga Netinim, tangani sindang makabuwelta sa Jerusalem sa pagtogdok giraray sa templo ni Jehova. Alagad bako sana iyan. An nangyari kaidto nagtokdo sa saro pang kaligtasan paagi sa Orog Kadakulang Ciro, an Kagurangnan na Jesu-Cristo. An pagkuyog niato sa saiyang mga pagdirehir nagpoprotehir sato na dai madaya nin mga tawo na an hinahanap sana kabantugan para sa saindang sadiri. Ki Jesus partikularmente minaaplikar an hula na nagsasabi: “Ini an isinabi ni Jehova: ‘Sa panahon nin pag-ako sinimbag taka, asin sa aldaw nin kaligtasan tinabangan taka; asin iningatan taka tanganing ikatao taka bilang tipan para sa banwaan, tanganing hirahayon an daga, tanganing papangyarihon an pagkasadiri giraray sa ginabang mga pamana, tanganing magsabi sa mga nabibilanggo, “Luwas kamo!” sa mga nasa kadikloman, “Pahelingan an saindong sadiri!”’” (Isaias 49:8, 9) Paano ini naotob ki Jesus?
12. (a) Paano naotob ki Jesus an hulang iyan? (Lucas 4:16-18) (b) Ano an itinatao kaining pagpakosog sa sato?
12 Sinimbag ni Jehova an mga pamibi ni Jesus. Tunay na tinabangan Nia asin iningatan an saiyang Aki mantang si Jesus mapusong ibinubuyagyag an relihiyosong kaputikan asin ipinahahayag an ‘katotoohan na makabubutas sa mga tawo.’ (Juan 8:32) Sa ibong kan mga paghihingoa ni Satanas na laglagon si Jesus, iningatan ni Jehova na buhay an saiyang Aki sagkod na matapos an saiyang gibohon sa daga. Dangan binuhay nia liwat si Jesus sa inmortal na buhay sa langit, tanganing ipadagos duman an saiyang gibohon nin pagtao nin katalingkasan. Itinao sia nin Dios bilang “tipan,” o garantiya, na mangyayari an pagkakalda nin mga tawo sa kaoripnan sa Dakulang Babilonya. Kun paanong segurado na igwa nin binuhay liwat asin pinamuraway na Jesu-Cristo sa langit, segurado man na an mga tawong may matanos na puso kakaldahon sa relihiyosong kadikloman nin Dakulang Babilonya. Makikinabang daw kamo sa pagliligtas na iyan?
13. Poon kan 36 C.E., paano si Jesus nagin “ilaw kan mga nasyon”?
13 Manongod sa sokol kan pagtao nin katalingkasan, ihinula ni Jehova: “Siring man itinao takang ilaw kan mga nasyon, tanganing an sakuyang pagliligtas mapasa kaporoporohi kan daga.” (Isaias 49:6) Kaya, kan 36 C.E. an mga Hentil, o mga tawo hale sa mga nasyon na bakong Judio, pinonan na palaogon sa kongregasyon nin espirituwal na Israel. Minsan siring, an pagdagdag kan mga Hentil sa linahidan nin espiritung kongregasyon Kristiano bakong iyo na an kalubosan kan paglilingkod ni Jesus bilang “ilaw kan mga nasyon.”
14. (a) Para kiisay pa hale sa “mga nasyon” na si Jesus magigin ilaw? (b) An mga ini ipinanganino kan anong mga grupo na naghale sa suanoy na Babilonya? (c) Anong espirituwal na mga bendisyon an nakakamtan na ninda, bilang kaotoban kan Isaias 49:10?
14 Aram ni Jesus na may titiponon man siang “ibang karnero” na magkakamit nin buhay na daing sagkod digdi sa daga. (Juan 10:16) Ipinanganino sinda kan bakong Israelitang mga Netinim asin kan mga aki kan mga oripon ni Salomon na uminiba sa mga Judio kan 537 B.C.E. sa saindang pagluwas sa Babilonya. (Esdras 2:1, 43-58) Ngonyan pa an dakulang kadaklan kaini sa modernong mga panahon nagkuyog sa pagboot na “lumuwas” sa Dakulang Babilonya. Nakakamtan na ninda ngonyan an nakababasog na espirituwal na mga bendisyon na ihinula sa Isaias 49:10: “Dai sinda magugutom, ni mapapaha pa man sinda, ni tatamaan sinda nin nakapapahang init o aldaw. Huli ta an Saro na naheherak sa sainda gigiyahan sinda, asin sa mga burabod nin tubig dadarahon nia sinda.” Sa Kapahayagan 7:9, 16, 17, an mga bendisyon na ini tamang iinaaplikar sa “dakulang kadaklan” nin “ibang karnero.”
“Lumuwas Kamo Saiya, Banwaan Ko”
15. Taano ta sinasadol kan Biblia an mga magigin banwaan nin Dios na lumuwas sa Dakulang Babilonya?
15 Sa sarong ipinasabong na bisyon ipinaheling ki apostol Juan an magigin kahulogan kan paghokom nin Dios para sa Dakulang Babilonya. Huli sa kasiertohan kaiyan, an sarong anghel hale sa langit, na nagtataram para sa Dios, nagsadol: “Lumuwas kamo saiya, banwaan ko, kun habo nindong makikabtang sa saiyang mga kasalan, asin kun habo nindong mag-ako nin kabtang kan saiyang mga damat. Huli ta an saiyang mga kasalan nakaabot na sagkod sa langit, asin ginirumdom na nin Dios an saiyang mga karatan.”—Kapahayagan 18:4, 5.
16. Ano an puwedeng magparisa kun baga talagang kinuyog na niato an pagboot na iyan?
16 An mga miembro kan espirituwal na Israel nagkuyog sa pagboot na iyan, asin ngonyan sinasadol ninda an iba na gumibo man kaiyan. Aram ninda na kun isinasalak nin saro an tunay na pagsamba sa falso, dai sia makapaoogma sa Dios. Kun an siisay man nakiiiba sa mga Saksi ni Jehova pero dai pa pinuputol an koneksion nia sa Dakulang Babilonya, paano nia masasabi na sia bakong kabtang kaini? Dawa kun sia noarin man dai nag-aatender sa relihiyosong mga serbisyo kaiyan, pero kun sia nakikakabtang sa relihiyosong mga kapiyestahan kaini sa saiyang pinagtatrabawohan o kaiba kan saiyang mga paryentes, sia minadotdot pa man giraray sa bagay na maati. (Isaias 52:11) Kun sia nakikakabtang sa mga tradisyon kan pamilya na nagpaparisa nin paniniwala sa inmortalidad kan kalag o superstisyosong pagkatakot sa maraot na mga espiritu, sia nakikakabtang pa sa mga kasalan kaini. Dai kita puwedeng tumukaw sa ibabaw kan kudal. Kun kita nagtutubod na si Jehova an tunay na Dios, kun siring kita dapat na maglingkod sana sa saiya.—1 Hade 18:21.
17. (a) Arog kan ipinaheheling sa Kapahayagan 14:6, 7, an mga tawo sa gabos na lugar inaagdang gibohon an ano? (b) Tanganing masamba si Jehova nin tama, ano pang ibang pagboot an dapat nindang kuyugon?
17 Sa mga tawo hale sa gabos na nasyon asin tribo asin tataramon itinatao an nakaaagyat na pag-agda: Umiba kamo sa pagsamba ki Jehova, an solamenteng tunay na Dios! (Kapahayagan 14:6, 7) Tanganing magibo iyan, kaipuhan man na arogon nindo an suanoy na mga lingkod nin Dios na nagkuyog sa pagboot na: “Dumulag kamo sa tahaw nin Babilonya, asin iligtas kan lambang saro an saiyang sadiring kalag.”—Jeremias 51:6.