Pagkaligtas Pasiring sa Bagong Daga
Kapitulo 12: May Midbidan Para sa Kalaglagan o Kaligtasan?
1. Anong mga hapot an dinadagka kitang horophoropon kan leksion na ini?
AN RELIHIYOSONG kamugtakan ngonyan naghahagad sato na ipaheling kun ano an talagang nasa satong puso. Talaga daw na namomotan niato si Jehova asin an saiyang mga dalan? Kapareho daw kita kan saiyang Aki, si Jesu-Cristo, na sa saiya isinabi: “Namoot ka sa katanosan asin naongis ka sa karatan”? (Hebreo 1:9) Andam daw kitang ipaheling ini nin hayag tanganing maaraman nin iba kun ano an satong paninindogan? An rekord kan Biblia manongod ki Jehu asin Jonadab na aki ni Recab nakatatabang sato na siyasaton an satong kamugtakan.
2. Siisay si Jehu asin Jonadab?
2 Kan ikasampulong siglo B.C.E., si Jehu linahidan na magin hade sa sampulong tribong kahadean nin Israel, na an kabesera sa Samaria. Isinugo sia na laglagon an gabos na kaiba sa maraot na harong ni Hadeng Acab, pati si Reyna Jezabel, na nagpalakop kan pagsamba ki Baal sa Israel asin naghingoa na paraon an pagsamba ki Jehova. Si Jonadab, sarong Quenita (kun siring, bakong Israelita), sierto na nakaaaram sa gigibohon na pangadan ni Jehu kan sia lumuwas sa pagsabat ki Jehu. Alagad ta gurano kakosog kan pagkamoot ni Jonadab ki Jehova? Hayag daw niang ipamimidbid an saiyang sadiri na saro na marigon na nagtutubod na solamente si Jehova, an tunay na Dios, an maninigong sambahon?
“An Puso Mo daw Matanos Kaiba Ko?”
3. Paano ipinaheling ni Jonadab sa publiko an saiyang paninindogan manongod sa pagsamba ki Jehova?
3 Pakatapos na mataratara kan duwa an lambang saro, hinagad ni Jehu ki Jonadab na liwanagon an saiyang paninindogan. “An puso mo daw matanos kaiba ko,” an hapot ni Jehu, “siring kan sakong puso sa saimong puso?” Daing pag-alangan na nagsimbag si Jonadab: “Iyo.” “Kun iyo, tawan sako an saimong kamot,” an simbag ni Jehu. Kaya pinasakat nia si Jonadab sa saiyang karuwahe asin nagsabi: “Umiba ka sa sakuya asin helingon mo an dai ko pagtogot na may makaribal si Jehova.” Si Jonadab dai nag-alangan na may pagkatakot.—2 Hade 10:15, 16; helingon an Deuteronomio 6:13-15.
4, 5. (a) Sa anong paagi na pinapangyari ni Jehu na ipamidbid kan mga parasamba ki Baal an saindang sadiri? (b) Ano an sumunod na ginibo ni Jehu, asin saen kaidto si Jonadab? (c) Ano an reaksion nindo sa paglaglag na idto sa mga parasamba ki Baal?
4 Pag-abot sa Samaria, ginibo ni Jehu an paagi na mag-oobligar sa gabos na nagsasamba ki Baal na ipamidbid an saindang sadiri. An mga propeta, an mga padi asin an gabos na parasamba ki Baal inapod sa sarong dakulang pag-atang sa harong ni Baal. Pinaisi sinda na an siisay man na dai umatender mawawaran kan saindang buhay. Ipinagboot ni Jehu na tawan nin gubing na isusulot an gabos na parasamba ki Baal tangani sindang mamidbid nin maliwanag. An siisay man na naghihingakong nagsasamba man ki Jehova pinapagtuga kun siisay an talagang pinaglilingkodan ninda. Garo baga idto mamuraway na oras para ki Baal asin para ki Satanas na Diablo, an falsong dios na sa katotoohan iyo an ipinagrerepresentar ni Baal.
5 Ini bakong lugar para sa tunay na mga parasamba ki Jehova. Ginibo an pagrekisa tanganing siertohon na mga parasamba sana ki Baal an yaon. Dangan nagpadagos an seremonya. Mientras tanto, sa luwas, an mga tawohan ni Jehu nag-andam, asin sa senyal nia sinda naghiro. “Gadana nindo sinda! Dai nindo pagpaluwason an minsan saro,” an pagboot nia. An lambang parasamba ki Baal nalaglag. Ginaba an harong ni Baal. “Sa siring pinoho ni Jehu si Baal sa Israel.” Si Jonadab kataed ni Jehu tanganing maheling an mga pangyayaring iyan. (2 Hade 10:18-28) Ano an personal na reaksion nindo sa nangyari? Minsan ngani mayo sa sato na ikinaoogma an kagadanan nin iba, minsan an mga maraot, nasasabotan daw niato kun taano idto ta kaipuhan asin kun taano iyan ta isinurat sa Biblia tanganing mabasa niato ngonyan?—Ikomparar an Ezequiel 33:11.
6. (a) Paano lalaglagon an Dakulang Babilonya? (b) Kan nasa daga, paano ipinaheling ni Jesus na dai nia itinotogot na may makaribal si Jehova?
6 An tala dai nag-aautorisar sato na laglagon an mga edipisyo nin relihiyosong mga grupo o an mga tawo na dusay sa falsong pagsamba. Ninombrahan ni Jehova, bakong an saiyang mga saksi sa modernong aldaw, kundi an pinamuraway na si Jesu-Cristo, bilang an Orog Kadakulang Jehu, na iyo an magtao kan Saiyang matanos na mga paghokom. Paagi sa pagtogot sa iribang politikal na mga kapangyarihan na ipahayag an saindang pagkaongis sa Dakulang Babilonya, papangyayarihon kan langitnon na Hade an pagkapoho kan pankinaban na imperyo nin falsong relihiyon. (Kapahayagan 6:2; 17:16; 19:1, 2) Kan nasa daga, si Jesus nagsayumang gumibo minsan sarong akto nin pagsamba na magtatao nin onra sa Diablo. Kinondenar nia an pagpaorog kan tradisyon nin tawo sa Tataramon ni Jehova asin an paggamit sa pagsamba sa Dios para sa komersial na ganansia. Dai nia itinogot na may makaribal si Jehova.—Lucas 4:5-8; Mateo 15:3-9; 21:12, 13.
7. (a) Ano an pirang ebidensia nin Baalismo sa modernong aldaw? (b) Taano ta itinogot ni Cristo na Hade an mga bagay na ini?
7 Kun siring, taano ta tinotogotan ni Cristo, na ngonyan naghahade na sa tahaw kan saiyang mga kaiwal, na garo baga mag-oswag an modernong Baalismo? Taano ta tinotogotan nia an mga tawo na garo baga makalibre sa pagtao nin onra sa dios kan palakaw na ini nin mga bagay paagi sa pagbinongog sa mga kahagadan ni Jehova? Taano ta pinababayaan nia an paggawe ninda na garo baga daing reklamo an Dios sa saindang seksuwal na inmoralidad, sa saindang pagpamuraway sa materyalistikong pamumuhay, sa saindang paggibo nin espiritistikong mga gawe mantang naghihingakong Kristiano, asin sa saindang pagtotokdo nin Babilonikong mga doktrina na garo ini an tataramon nin Dios? An suanoy na drama nagpapaheling na ini sa katuyohan na baloon an mga tawo, tanganing ikapaheling ninda kun siisay an saindang sinasamba, asin sa siring kun baga sinda maninigong iligtas o gadanon.
8. Anong seryosong mga hapot an kaipuhan na ihapot niato sa satong sadiri?
8 Ano an pinili nindo? Tinalikdan na daw nindo an gabos na gibo na tibaad magpamidbid saindo bilang paragibo nin modernong Baalismo? Isiniblag na daw nindo an saindong sadiri sa kinaban asin nanindogan na bilang tunay na parasamba ki Jehova?—2 Corinto 6:17.
9. (a) Kun kita talagang arog ni Jonadab, ano an gigibohon niato? (b) Paano idinodoon kan sitadong mga teksto an halaga kan mga bagay na ini?
9 Si Jonadab, bilang bakong Israelitang parasamba ki Jehova, nanganino sa “ibang karnero” na ngonyan tinitipon na may paglaom sa buhay na daing sagkod digdi sa daga. Ipinaheheling daw nindo an espiritu ni Jonadab? Andam daw kamong ipamidbid an sadiri sa publiko kaiba kan Orog Kadakulang Jehu asin kaiba kan saiyang linahidan na mga parasunod sa daga na nagbabalangibog kan nagdadangadang na “aldaw nin pamalos kan satong Dios”? Nakiiiba daw kamo sa sainda sa apretadong gibohon na iyan? (Isaias 61:1, 2; Lucas 9:26; Zacarias 8:23) Itinatao daw nindo ki Jehova an saindong daing kasalak na debosyon, na dai tinotogotan an ano man na mamugtak sa lugar na maninigo sa saiya sa saindong puso? (Mateo 6:24; 1 Juan 2:15-17) Ipinaheheling daw kan saindong pamumuhay na an saindong relasyon sa saiya iyo an pinakamahalaga nindong kayamanan, na an gabos nakapalibot dian?—Salmo 37:4; Talinhaga 3:1-6.
Igwa daw Kamo kan Tanda?
10. Paano ipinaheheling kan Biblia na an mga parasamba sana ki Jehova an makaliligtas?
10 Dakulang sala an isipon na kun an saro naghihingoang magin “marahay” an pamumuhay asin kun likayan nia an mga relihiyon na naggigibo nin mga bagay na malinaw na kinokondenar sa Tataramon nin Dios, mayo na nin ibang hinahagad sa saiya. An gabos na naglalaom na makaligtas pasiring sa “bagong daga” kaipuhan man na mamidbid nin daing pagduda bilang mga parasamba ki Jehova. (Kapahayagan 14:6, 7; Salmo 37:34; Joel 2:32) An mensaheng ini itinao sa sarong bisyon na itinao ki propeta Ezequiel bago laglagon an Jerusalem kan 607 B.C.E.
11. (a) Iladawan an bisyon na nasusurat sa Ezequiel 9:1-11. (b) Ano an sekreto para sa kaligtasan?
11 Nadangog ni Ezequiel na inapod ni Jehova an mga ninombrahan na lumaglag sa daing kaimbodan na Jerusalem asin sa mga nag-eerok dian. Naheling nia an anom na lalaki na may mga armas na panlaglag, asin igwa man nin sarong lalaki na nakagubing nin lino, na may tintero nin sekretaryo sa saiyang habayan. Enot sa nakalinong lalaki si Jehova nagsabi: “Umagi ka sa tahaw kan siudad, sa tahaw nin Jerusalem, asin bugtakan mo nin tanda an angog kan mga tawo na nag-aaragagha asin nag-aaragrangay huli sa gabos na makababaldeng bagay na ginigibo sa tahaw kaiyan.” Dangan sa anom sia nagsabi: “Umagi kamo sa tahaw kan siudad na kasunod nia asin manggadan kamo. An saindong mga mata dai magmondo, asin dai kamo maherak. An gurang, soltero asin daraga asin sadit na aki patin mga babae maninigo nindong gadanon—sagkod na maubos. Alagad sa siisay man na igwa nin tanda dai kamo magrani, asin maninigo kamong magpoon sa sakong santuaryo.” Naheling ni Ezequiel sa bisyon an suminunod na panlaglag—mahiwason na garo baga linalaglag an bilog na Israel na yaon pa sa daga. (Ezequiel 9:1-11) Ano an sekreto para sa kaligtasan? An tanda na ibinubugtak sa angog kan lalaki na may tintero nin sekretaryo.
12. (a) Ano an mga makababaldeng bagay na huli dian an mga may tanda “nag-aaragagha asin nag-aaragrangay”? (b) Taano ta ikinabalde ni Jehova an mga bagay na iyan?
12 An mga tawo sana na “nag-aaragagha asin nag-aaragrangay huli sa gabos na makababaldeng bagay” na ginigibo sa Jerusalem an tinandaan para sa kaligtasan. Ano an mga “makababaldeng bagay” na idto? Lima an nalilista: (1) Sarong “tanda nin pag-imon” sa tata palaog sa panlaog na patyo kan templo ni Jehova. Ano man an porma kaiyan, an bagay na ini tinatawan kan debosyon na utang kan mga Israelitas ki Jehova. (1 Hade 14:22-24) (2) Mga inukit sa lanob na nagkakanap na mga bagay asin mga hayop, na sa atubangan kaiyan idinodolot an insenso duman mismo sa laog kan templo. (3) Mga babae na ipinananangis an kagadanan kan dios na si Tammuz, na ibang ngaran ni Nimrod, an rebelde tumang ki Jehova. (Genesis 10:9) (4) Mga lalaki na nagpapaheling nin labi-labing paglapastangan paagi sa pagtalikod sa templo ni Jehova asin paghuruhod sa aldaw. (Deuteronomio 4:15-19) (5) Bilang ultimong insulto, an mga tawo na pinapano an daga nin kadahasan saka iiniitaas an sarong “supang,” posibleng simbolo sa sekso, sa dongo ni Jehova. Nasasabotan daw nindo kun taano ta ikinababalde sinda ni Jehova?—Ezequiel 8:5-17.
13. (a) Saro-saro sana, komentohan an mga gibo sa modernong aldaw na kaagid kan mga “makababaldeng bagay” na idto. (b) Ano an saboot nindo manongod sa mga gibong ini?
13 Ano an personal nindong reaksion sa modernong mga gibo kan Kakristianohan na kaagid kan mga “makababaldeng bagay” na ini? (1) Yaon sa dakol niang simbahan an mga ladawan na dian minahuruhod an mga tawo sa pagsamba, minsan ngani an Biblia nagpapatanid tumang sa paggibo kaiyan. (1 Corinto 10:14; ikomparar an 2 Hade 17:40, 41.) (2) Minaiba sia sa tendensia na isalida sa paglalang nin Dios an pag-ebolusyon nin tawo hale sa mga hayop; nakikakabtang man sia sa pagpaheling nin malaad na debosyon sa mga representasyon nin hayop asin gamgam na ginagamit bilang simbolo nin mga nasyon. (3) Sa saiyang pagsamba itinatampok nia an krus, na poon kan suanoy sarong relihiyosong simbolo ni Tammuz, asin nakiaayon sia sa mga seremonya tanganing ipagmondo an mga nagadan sa nagpapabolos nin dugong mga guerra na nagpapaheling kan espiritu ni Nimrod. (Alagad helingon an Juan 17:16, 17.) (4) Tinatalikdan nia an sinasabi nin Dios paagi sa saiyang Tataramon asin, imbes, pinipili an “kaliwanagan” na itinatao nin modernong siensia asin pilosopiya nin tawo. (1 Timoteo 6:20, 21; ikomparar an Jeremias 2:13.) (5) Garo baga kulang pa iyan, nagsusuportar sia sa rebolusyon sa nagkapirang lugar asin kinokonsinte nia an seksuwal na inmoralidad, mantang naghihingakong nagtataram sa ngaran nin Dios. (2 Pedro 2:1, 2) Ibinibilang nin nagkapira na liberal an mga tendensiang ini. Tibaad dai sinda oyon sa gabos na iyan, pero tibaad makikabtang sinda sa iba o kisuerra konsintihon iyan. Ano an saboot nindo manongod sa siring na naglalanghad sa Dios na mga gibo na nagpapatalikod kan mga tawo sa Kaglalang nin tawo?
14. Taano an bagay na an saro nawaran na nin gana sa mga iglesya ta dai man nangangahulogan na sia makaliligtas?
14 An dakol nawaran na nin gana sa mga iglesya asin dai na nagsisimba. Tibaad nahahadit man na gayo sinda manongod sa kadahasan asin pandadaya sa kinaban. Alagad dai iyan nangangahulogan na sinda may tanda para sa kaligtasan. Sinda kaipuhan na tandaan kan ‘lalaki na may tintero nin sekretaryo.’ Ipinaheheling kan mga katunayan na an grupong “maimbod asin madonong na oripon” an naggigibo kan pagtandang iyan ngonyan.—Mateo 24:45-47.
15. (a) Ano an tanda? (b) Paano iyan nakukua nin saro?
15 An gabos na boot na matandaan bilang igwa kan pag-oyon nin Dios kaipuhan na umako sa instruksion na itinatao ni Jehova paagi sa grupong “oripon” na iyan asin magin tunay na mga parasamba ki Jehova. Kaipuhan na bako sindang mga tawo na nag-oomaw ki Jehova sa saindang ngoso alagad an totoo namomoot sa mga dalan kan kinaban. (Isaias 29:13, 14; 1 Juan 2:15) Kaipuhan na kamotan ninda si Jehova asin an saiyang mga pamantayan asin magmondo nin odok sa puso, “nag-aaragagha asin nag-aaragrangay,” huli sa mga katokdoan asin gibo na naglalanghad sa saiya. Mayo nin mabugtak nin literal na tanda sa saindang angog. Alagad kun sinda igwa kan simbolikong tanda magigin hayag sa gabos na, bilang nagdusay, bautisadong mga Kristiano, isinolog na ninda “an bagong pagkatawo” na sinasabi sa Efeso 4:24. Igwa sinda nin buhay na pagtubod. Sa publiko asin sa pribado naghihingoa sindang gibohon an makaoomaw ki Jehova. Bako sanang an mga minaluwas sa Kakristianohan kundi an gabos, ano man an pinaghalean, na naglalaom na makaligtas pasiring sa “bagong daga” bilang kairiba kan grupong linahidan kaipuhan na magkaigwa kan tandang ini.
16. Taano an bisyon na ini ta partikularmenteng mahalaga para sa mga aki asin sa saindang mga magurang?
16 Partikularmenteng makahulogan an bagay na an mga paragadan ni Jehova sinabihan na an edad, sekso, pagigin daing agom o may agom bakong dahelan na iligtas an sarong parakasala tumang ki Jehova. An tawong may agom kaipuhan na may sadiring tanda tanganing maligtas. Kun an mga magurang nagsasayumang matandaan an saindang mga aki o kun dai ninda sinda mapadakula bilang mga lingkod ni Jehova, kaipuhan na sinda an manimbag sa mangyayari sa mga aking iyan. Minsan ngani an makinuyog na mga aki nin diosnon na mga magurang ibinibilang na “banal” ni Jehova, an mga rebelde dai. (1 Corinto 7:14; Salmo 102:28; Talinhaga 20:11; 30:17) Kun an mga aki nasa edad na tanganing magin bautisadong mga Kristiano pero habong mag-otob sa mga kahagadan, baga man sinda bautisado o dai, an saindang edad dai magbubunga kan pagkaligtas ninda. Kaya, napakahalaga na an kada indibiduwal na nasa responsable nang edad matandaan nin malinaw bilang tawong nagdusay sa Dios asin nag-ootob sa saiyang kabotan!
17. Ano an nanodan niato digdi manongod sa pagkaherak ni Jehova?
17 Si Jehova nagpaheling nin dakulang pagkaherak sa katawohan paagi sa pagsugo kan saiyang mga saksi na patanidan sinda manongod sa nagdadangadang na kalaglagan asin itokdo an dalan pasiring sa kaligtasan. Alagad aram niang gayo an rekord nin falsong relihiyon asin an lapang bunga kaiyan. Kun laglagon an Dakulang Babilonya, daing pagkaherak na ipaheheling sa siisay man na nag-iinsister na magdanay dian. Tanganing makaligtas sa nagdadangadang na paghokom nin Dios, kaipuhan kitang sumunod sa lakad ni Jesu-Cristo bilang tunay na mga parasamba ki Jehova, an Kaglalang kan langit asin daga.