Mapungaw daw an Ngapit Para sa mga Gurang?
“AKO nagin hoben man,” sabi ni Hadeng David. “Asin naggurang man.” (Salmo 37:25) Kaidtong mga panahon kan Biblia an mga gurang sarong minoriya na iginagalang. Alagad kun magpapadagos an presenteng dalagan nin mga pangyayari, tibaad dai mahahaloy an mga gurang magin nang bakong minoriya ni iginagalang man.
Sa Estados Unidos sana, igwa nin kinakarkulong 26 milyones katawo na labi nang 65 anyos an edad. Sa taon 2040 puwedeng matriple an kabilangan na ini! Sono sa magasin na Asiaweek, an nagkapirang nasyon sa Asia “linalaoman na an kabilangan kan saindang mga gurang magdoble sa maabot na dekada.” Alagad ta an paglaom na an mga gurang haros makalabi sa mga hoben bakong marahay para sa mga gurang. Ngonyan pa, kadakol na kan dukha asin daing harong. An iba pinababayaan sa mga ospital o nursing home—nagsosolo, dai binibisita, asin dai inaataman. An nakakukubhan na mga kaso nin kapabayaan asin pag-abusar nababareta minsan sa mga nasyon na an mga magurang dati iginagalang.
Si G. M. Ssenkoloto nagsurat para sa magasin na World Health: “Bilang kaugalean sa kadaklan na nasyon sa Aprika, asin an totoo sa kadaklan kan Ikatolong Kinaban, an kada pamilya nag-aasikaso sa mga gurang na babae ninda. An babae na mayo nin mga aki na mag-aataman sa saiya inaasikaso kan pagtaraed o kan baryo sa kabilogan.” Alagad sia nagbabareta: “Nagliliwat an suanoy na mga pamantayan. An maraot na mga puwersa ekonomiko, an napasalang paggamit sa kayamanan, an pagmawot sa materyal na mga bagay, an paghihingoa para sa kabantugan asin posisyon—an gabos na ini nakadadaog sa tradisyonal na positibong pamantayan kun dapit sa pagsuportar sa mga gurang.”
Kaya an mga tataramon kan parasurat sa Biblia na si Agur nagigin totoo sa dakol na lugar: “Igwa nin kapag-arakian na nagsusumpa sa ama kaiyan asin dai nag-oomaw pati sa ina kaiyan.” (Talinhaga 30:11) Iyo, an mga gurang hinahale sa posisyon na may onra na dati namumugtakan ninda. An dakol ibinibilang sindang sosyal na mga pagabat imbes na kayamanan. Sa kadaklan, an saindang ngapit garo baga mapungaw.
Alagad, ano an pagheling nin tunay na mga Kristiano sa mga gurang? Pinapagdadanay daw ninda an “tradisyonal na positibong pamantayan” manongod sa sainda?