Nagkakasararo sa Pagsamba sa Iyo Sanang Tunay na Dios
Kapitulo 7: Kun Ano an Manonodan Niato sa Pagtogot nin Dios sa Karatan
1. (a) Kun ginadan tolos ni Jehova an mga rebelde sa Eden, paano kita kaiyan naapektaran kutana? (b) Imbes, anong mamomoton na mga probisyon an itinao sa sato ni Jehova?
ANO man an kasakitan na dumatong sa satong buhay, an pagkamundag niato bakong inhustisya sa parte nin Dios. Tinawan nia an enot na mga tawo nin pagkasangkap asin itinao sainda an Paraiso bilang saindang erokan. Kun ginadan tolos nia sinda pagkatapos na sinda magrebelde, mayo kutana nin rasa nin tawo na siring sa aram niato kaiba an helang, pagtios asin krimen kaiyan. Alagad huli sa pagkaherak tinogotan ni Jehova si Adan asin Eva na makapaluwas nin sarong pamilya bago sinda magadan, dawa ngani an mga ini magmamana nin pagkabakong sangkap. Paagi ki Cristo ginibo nia an probisyon tanganing an mga gikan ni Adan na may pagtubod magkamit kan iwinara ni Adan—an buhay na daing sagkod sa irarom nin mga kamugtakan na nagpapagin posible sa kadarudakulaing pagkaogma sa buhay.—Deut. 32:4, 5; Juan 10:10.
2. Ini daw gabos ginibo sana para sa satong kaligtasan?
2 Dai masokol an mga pakinabang kaini sa sato personalmente. Alagad gikan sa rekord kan Biblia maaaraman niato na may napapalabot na sarong bagay na mas mahalaga ki sa satong personal na kaligtasan.
Huli sa Saiyang Dakulang Ngaran
3. Ano an nakataya may koneksion sa kaotoban kan katuyohan ni Jehova para sa daga asin katawohan?
3 An ngaran ni Jehova, an saiyang reputasyon bilang Unibersal na Soberano asin an Dios nin katotoohan, napapalabot sa kaotoban kan saiyang katuyohan manongod sa daga asin katawohan. Huli sa kamugtakan ni Jehova, an katoninongan asin marahay na kamugtakan kan bilog na uniberso naghahagad na an saiyang ngaran tawan kan bilog na paggalang na maninigo dian asin na an gabos magkuyog sa saiya.
4. Ano man nanggad an kaiba sa katuyohan na iyan?
4 Pakalalanga ki Adan asin Eva, tinawan nia sinda nin sarong asignasyon na ootobon. Liniwanag nia na an katuyohan nia bako sanang sakopon an bilog na daga, sa siring pinahihiwas an mga sagkodan kan Paraiso, kundi panoon iyan nin mga gikan kan enot na lalaki asin babae, si Adan asin Eva. (Gen. 1:28) An katuyohan daw na ini masusudya huli sa saindang kasalan, na may ibubungang paglanghad sa ngaran nin Dios?
5. (a) Sono sa Genesis 2:17, noarin magagadan an siisay man na nagkakan sa kahoy nin pakamidbid kan marahay asin maraot? (b) Paano iyan inotob ni Jehova, mantang iginagalang man an saiyang katuyohan manongod sa pagkapano sa daga?
5 Pinatanidan ni Jehova si Adan na kun sia masumbikal na kumakan sa kahoy nin pakaaram kan marahay asin maraot sia magagadan nanggad “sa aldaw” kan saiyang pagkakan. (Gen. 2:17) Totoo sa tataramon nin Dios, sa mismong aldaw kan pagkakasala ni Adan siningil ni Jehova an mga parakasala asin itinao an sentensiang kagadanan. An penalidad dai madudulagan. Sa hudisyal na paagi, sa punto-de-vista nin Dios, si Adan asin Eva nagadan kan aldaw na idto. (Ikomparar an Lucas 20:37, 38.) Alagad tanganing maotob an saiyang ipinahayag na katuyohan manongod sa pagpano sa daga, tinogotan sinda ni Jehova na mangaki nin sarong pamilya bago sinda literal na magadan. Minsan siring, sa punto-de-vista nin pagbilang nin Dios sa 1,000 taon bilang sarong aldaw, kan an buhay ni Adan matapos sa edad na 930, ini nasa laog nin sarong “aldaw.” (Gen. 5:3-5; ikomparar an Salmo 90:4; 2 Pedro 3:8.) Kaya an pagkasadiosan ni Jehova napatunayan kun dapit sa panahon na itatao an kastigo, asin an saiyang katuyohan na panoon an daga kan mga aki ni Adan dai naolang. Alagad idto nangahulogan na, sa kadikit na panahon, an makasalan na mga tawo tinogotan na mabuhay.
6, 7. (a) Ano an ipinaririsa kan Exodo 9:15, 16 dapit sa kun taano ta tinotogotan ni Jehova an maraot na magpadagos sa halipot na panahon? (b) Sa kaso ni Faraon, paano ipinaheling an kapangyarihan ni Jehova asin paano nabantog an Saiyang ngaran? (c) Kaya ano an magigin resulta sa katapusan kan presenteng maraot na palakaw?
6 An isinabi ni Jehova sa hade nin Egipto kan kaaldawan ni Moises nagpaparisa pa kun taano ta tinogotan nin Dios an mga maraot na mabuhay sa kadikit na panahon. Kan ipangalad ni Faraon an paghale sa Egipto kan mga aki ni Israel, dai sia tolos ginadan ni Jehova. Sampulong damat an pinaabot sa daga, na ipinaheheling an kapangyarihan ni Jehova sa makangangalas asin laen-laen na paagi. Kan ipinatatanid an ikapito, sinabihan ni Jehova si Faraon na pasil sana kutana na pinara nia si Faraon asin an saiyang banwaan sa ibabaw nin daga. “Alagad, sa katotoohan,” sabi ni Jehova, “huli kaini pinapagdanay ta ka, tanganing ipaheling ko saimo an sakong kapangyarihan asin tanganing an sakong ngaran ikapahayag sa bilog na daga.”—Ex. 9:15, 16.
7 Kan iligtas ni Jehova an Israel, an saiyang ngaran tunay na nabantog. Ngonyan, haros 3,500 na taon na an nakaagi, an saiyang ginibo dai pa nalilingawan. Bako sana na an personal na ngaran na Jehova ikinapahayag kundi siring man an katotoohan manongod sa Saro na nagdadara kan ngaran na iyan. Ini nagparigon sa reputasyon ni Jehova bilang sarong Dios na nag-ootob sa saiyang mga tipan asin minahiro para sa saiyang mga lingkod. Ipinaheling kaiyan na huli sa saiyang makakamhan sa gabos na kapangyarihan mayo nin ano man na makakaolang sa saiyang katuyohan. Orog pang makangangalas an nagdadangadang na kalaglagan kan bilog na maraot na palakaw, naheheling asin dai naheheling. An pagpaheling na iyan nin makakamhan sa gabos na kapangyarihan asin an kamurawayan na dadarahon kaiyan sa ngaran ni Jehova noarin man dai malilingawan sa kasaysayan kan uniberso. An mga pakinabang kaiyan daing katapusan!—Ezeq. 38:23; Kap. 19:1, 2.
‘O an Rarom kan Kadonongan nin Dios!’
8. Anong dugang pang mga bagay an isinasabi sato ni Pablo na konsideraron?
8 Sa saiyang surat sa mga taga-Roma, pinalataw ni apostol Pablo an hapot: “Igwa daw nin kabikoan sa Dios?” Dangan sia suminimbag paagi sa pagdodoon sa pagkaherak nin Dios asin sa pagsambit sa sinabi ni Jehova ki Faraon. Ipinagigirumdom man nia an bagay na kitang mga tawo garo dalipay sa kamot nin sarong paragibo nin koron. An dalipay daw nagrereklamo dapit sa ginagamitan dian? Idinugang pa ni Pablo: “Ngonyan, kun an Dios, minsan ngani boot nang ipaheling an saiyang kaanggotan asin ipamidbid an saiyang kapangyarihan, nagtogot na may dakulang pakatios sa mga lalagan nin kaanggotan na angay sa kalaglagan, tanganing ipaaram nia an kayamanan kan saiyang kamurawayan sa mga lalagan nin pagkaherak, na patienot na inandam para sa kamurawayan, arin na baga, kita, na saiyang inapod bako sanang sa tahaw nin mga Judio kundi sa tahaw man kan mga nasyon, maano man?”—Roma 9:14-24.
9. (a) Sairisay an “mga lalagan nin kaanggotan na angay sa kalaglagan”? (b) Taano si Jehova ta nagpaheling nin dakulang pakatios sa atubang kan saindang pagtumang, asin paano an ultimong resulta magigin para sa karahayan kan mga namomoot sa saiya?
9 Poon kan gibohon ni Jehova an makahulang kapahayagan na nasusurat sa Genesis 3:15, si Satanas asin an saiyang banhi nagin “mga lalagan nin kaanggotan na angay sa kalaglagan.” Sa bilog na panahon na iyan si Jehova nagmamatinios. Pinag-olog-olog kan mga maraot an saiyang mga dalan; pinaglamag ninda an saiyang mga lingkod, ginadan pa ngani an saiyang Aki. Alagad ta si Jehova nagpaheling nin dakulang pagpopogol, na may daing sagkod na pakinabang sa saiyang mga lingkod. An gabos na linalang nagkaigwa nin oportunidad na maheling an kapahapahamak na mga resulta nin pagrebelde tumang sa Dios. Kadungan kaiyan, an kagadanan ni Jesus nagtao kan paagi na ikaligtas an makinuyog na katawohan asin ‘malaglag an mga gibo kan Diablo.’—1 Juan 3:8; Heb. 2:14, 15.
10. Taano ta padagos na tinotogotan ni Jehova an mga maraot sa nakaaging 1,900 na taon?
10 Sa laog kan labing 1,900 na taon poon kan pagkabuhay liwat ni Jesus tinogotan pa ni Jehova an “mga lalagan nin kaanggotan,” na idinidigson an paglaglag sa sainda. Taano? Huli ta inaandam nia an ikaduwang kabtang kan banhi kan babae, an mga makakaibanan ni Jesu-Cristo sa saiyang langitnon na Kahadean. (Gal. 3:29) An mga ini, 144,000 an kabilangan, iyo an “mga lalagan nin pagkaherak” na sinasabi ni apostol Pablo. Enot, an mga indibiduwal hale sa mga Judio an inimbitaran na kumompuwesto sa grupong ini. Dangan an tinuring mga Samaritano idinugang asin, sa katapustapusi, an mga tawo hale sa mga nasyon na Hentil. Paagi sa dakulang pakatios inotob ni Jehova an saiyang katuyohan, na mayo nin siisay man na pinipirit na maglingkod sa saiya, alagad nagtatao nin dakulang bendisyon sa mga nag-aapresyar sa saiyang mamomoton na mga probisyon. Ngonyan an pag-andam kan langitnon na grupong iyan haros tapos na.
11. Ano pang ibang grupo an nakikinabang ngonyan sa pakatios ni Jehova?
11 Alagad kumusta man an mga mag-eerok sa daga? Sa itinalaan na panahon nin Dios bubuhayon liwat an binilyon bilang daganon na mga sakop kan Kahadean. Siring man, partikularmente poon kan 1935 C.E. pinapangyari kan pakatios ni Jehova an pagtipon sa sarong “dakulang kadaklan” hale sa gabos na nasyon para sa saindang ikaliligtas.—Kap. 7:9, 10; Juan 10:16.
12. (a) Bilang resulta, ano an nanodan niato manongod ki Jehova mismo? (b) Ano an reaksion nindo sa ginibo ni Jehova sa mga bagay na ini?
12 May kabikoan daw sa gabos na ini? Mayo nanggad! Kun idigson nin Dios an paglaglag sa mga maraot, sa “mga lalagan nin kaanggotan,” tanganing sia makapagpaheling nin pagkaherak sa iba kaoyon sa saiyang katuyohan, paano tamang makakapagreklamo an siisay man? Imbes, mantang namamasdan niato an pagkaotob kan saiyang katuyohan, dakula an nanonodan niato manongod ki Jehova mismo. Pinagngangalasan niato an nahayag na mga kabtang kan saiyang personalidad—an saiyang hustisya, an saiyang pagkaherak, an saiyang pakatios, an pagkalaenlaen kan saiyang kadonongan. An madonong na pagkapot ni Jehova sa isyu sagkod lamang na magigin patotoo sa bagay na an saiyang paagi nin paghade iyo an pinakamarahay. Kaiba ni apostol Pablo kita minasabi: “O an rarom kan mga kayamanan asin kadonongan patin kaaraman nin Dios! Dai nanggad marorop an saiyang mga paghokom asin dai nanggad masusog an saiyang mga dalan!”—Roma 11:33.
Oportunidad na Ipaheling an Satong Debosyon
13. (a) Kun kita minaagi sa personal na kasakitan anong oportunidad an itinatao sa sato? (b) Ano an makakatabang sato na makahiro nin madonong?
13 May mga kamugtakan na napapalabot an tunay na personal na kasakitan huli ta dai pa linalaglag nin Dios an mga maraot asin pinapangyayari an ihinulang pagbabalik nin katawohan sa pagkasangkap. Ano an reaksion niato dian? Naheheling daw niato iyan bilang mga oportunidad na makikabtang sa paghale kan paglanghad sa ngaran ni Jehova asin pagpatunay na an Diablo putikon? Kita mapakokosog na gayo na gibohon iyan paagi sa paggirumdom sa hatol na: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.” (Tal. 27:11) Si Satanas, an saro na nagduduhagi ki Jehova, nagsahot na kun an mga tawo mapierde sa materyal o masakitan sa pisikal babasulon ninda an Dios, susumpaon pa ngani sia. (Job 1:9-11; 2:4, 5) Nagtatao kita nin kaogmahan sa puso ni Jehova kun, paagi sa satong kaimbodan sa Dios sa atubang nin mga kasakitan, ipinaheheling niato na iyan bakong totoo sa kaso niato. Kita lubos na nagsasarig na si Jehova may pagpadangat sa saiyang mga lingkod asin na, arog sa kaso ni Job, pag-abot nin panahon babalosan kita ni Jehova kun kita magmaimbod.—Sant. 5:11; Job 42:10-16.
14. Kun kita may pagsarig ki Jehova kun kita minaagi sa mga pagbalo, ano pang ibang mga pakinabang an makakamtan niato?
14 Kun may pagkompiar kitang magsasarig ki Jehova kun kita nag-aagi sa masakit na mga pagbalo, mapapatalubo niato an daing kaagid sa halagang mga kuwalidad. Bilang resulta kan mga tinios ni Jesus, sia “nakanood nin pagkuyog” sa paagi na dai pa nia aram kaidto. Kita man puwedeng makanood—na pinatatalubo an pakatios, pakatagal asin orog na pag-apresyar sa matanos na mga dalan ni Jehova. May pakatios daw niatong aakoon an pagpatood na iyan?—Heb. 5:8, 9; 12:11; Sant. 1:2-4.
15. Mantang may pakatios niatong tinatagalan an kasakitan, paano puwedeng makinabang an iba?
15 Mamamasdan nin iba an satong mga ginigibo. Huli sa satong inaagihan dahelan sa satong pagkamoot sa katanosan, tibaad pag-abot nin panahon an iba sa sainda makasabot kun siisay an tunay na “mga tugang” ni Cristo ngonyan, asin paagi sa pakikiiba sa saiyang “mga tugang” sa pagsamba sinda puwedeng makalinya sa mga maako kan mga bendisyon nin buhay na daing sagkod. (Mat. 25:34-36, 40, 46) Boot ni Jehova asin kan saiyang Aki na sinda magkaigwa kan oportunidad na iyan. Boot man daw niato? Andam daw kitang tioson an mga kasakitan tanganing iyan gibohon na posible?
16. Paano an satong punto-de-vista manongod sa siring na personal na kasakitan konektado sa bagay manongod sa pagkasararo?
16 Marahayon nanggad kun ibinibilang niato minsan an masakit na mga kamugtakan sa buhay bilang mga oportunidad na ipaheling an satong debosyon ki Jehova saka makikabtang sa pag-otob sa saiyang kabotan! An paggibo niato kaiyan makapagtatao nin ebidensia na kita tunay na pasiring sa pakikisumaro sa Dios asin ki Cristo na ipinamibi ni Jesus para sa gabos na tunay na Kristiano.—Juan 17:20, 21.
Pagrerepaso
● Mantang itinotogot an karatan, paano si Jehova tamang nagpaheling nin tunay na paggalang sa saiyang sadiring ngaran?
● Paano an pagtogot nin Dios sa “mga lalagan nin kaanggotan” nagpangyari sa saiyang pagkaherak na makaabot sagkod sa sato?
● Ano an maninigong pagmaigotan niatong maheling sa mga situwasyon na may kaibang kasakitan na personal niatong inaagihan?