Nagkakasararo sa Pagsamba sa Iyo Sanang Tunay na Dios
Kapitulo 8: ‘Pakikipaglaban Tumang sa Maraot na Espiritung mga Puwersa’
1. Taano an aktibidad nin maraot na mga espiritu ta may partikular na halaga sa sato?
An mga tawo na may kaisipan na materyalistiko tibaad pagngisihan an ideya nin maraot na mga espiritu. Alagad ta iyan bakong makangingisi. Baga man sinda nagtutubod dian o dai, an aktibidad nin demonyo nakaiimpluwensia sa gabos. An mga parasamba ki Jehova bakong ligtas. Sa katunayan, sinda an pinakapunteriya. Pinatatanidan kita ni apostol Pablo manongod sa pakikipaglaban na ini, na sinasabi: “Kita nakikipaglaban, bakong tumang sa dugo asin laman, kundi tumang sa mga gobyerno [na mayo sa lugar nin dugo asin laman], tumang sa mga autoridad, tumang sa mga poon kan kinaban sa kadikloman na ini, tumang sa maraot na espiritung mga puwersa sa langitnon na mga lugar.” (Efe. 6:12) Sa satong aldaw an pangigipit nakaabot na sa pinakamakosog huli ta si Satanas ihinolog sa langit asin naaanggot, sa pakaaram na halipot na an saiyang panahon.—Kap. 12:12.
2. Paano niato mahihimo na makipaglaban na may kapangganahan tumang sa mga espiritung mas makosog sa tawo?
2 Paano daw puwedeng manggana an siisay man sa sato sa pakikipaglaban tumang sa mas makosog sa tawong espiritung mga puwersa? Solamente paagi sa lubos na pagsarig ki Jehova. Kaipuhan kitang maghinanyog sa saiya asin magkuyog sa saiyang Tataramon. Paagi sa paggibo kaiyan, kita makaliligtas sa pisikal, moral, emosyonal asin mental na danyos na naeksperyensiahan kan mga nasa pamomogol ni Satanas.—Efe. 6:11; Sant. 4:7.
Mga Poon kan Kinaban sa Langitnon na mga Lugar
3. Ano asin siisay an tinutumang ni Satanas?
3 Buhay na ilinaladawan sato ni Jehova an situwasyon kan kinaban siring sa pakaheling nia dian gikan sa saiyang halangkaw na kamugtakan sa kalangitan. Tinawan nia si apostol Juan nin sarong bisyon na dian si Satanas ilinaladawan bilang “sarong dakulang mapulang dragon” na andam na halonon, kun puwede, an Mesiyanikong Kahadean nin Dios oras na iyan mamundag sa langit kan 1914 C.E. Huling nasudya dian, pinapangyari ni Satanas an baha nin maisog na pagtumang kontra sa naheheling na mga representante kan Kahadean na iyan, an segundang kabtang kan banhi kan “babae” nin Dios.—Kap. 12:3, 4, 13, 17.
4. (a) Sa anong bagay manongod sa ginigikanan nin kapangyarihan kan mga gobyerno nin tawo nagpapatanid sato an Biblia? (b) Sa ano tinitipon ngonyan an gabos na politikal na namomoon, asin niisay?
4 An ginigikanan kan kapangyarihan asin autoridad nin mga gobyerno nin tawo ihinayag man sa kapahayagan na iyan ki Juan. Pinahelingan sia nin sarong mabangis na hayop, na may 7 payo asin 10 sungay, hayop na may autoridad “sa lambang tribo asin banwaan asin tataramon patin nasyon.” Ini nagrerepresentar, bako sanang sa sarong gobyerno, kundi sa panglobong politikal na sistema. Sinabi ki Juan na “an dragon [si Satanas na Diablo] nagtao sa hayop kan kapangyarihan asin kan trono kaiyan patin dakulang autoridad.” (Kap. 13:1, 2, 7; ikomparar an Lucas 4:5, 6.) Sa ibong nin ano man na relihiyosong paghihingako kan politikal na mga namomoon, mayo sa mga miembrong nasyon kan “hayop” an nagpapasakop sa soberaniya ni Jehova asin sa saiyang linahidan na Hade, si Jesu-Cristo. Sinda gabos nagmamaigot na pangaptan an sadiri nindang soberaniya. Ngonyan, arog kan ipinaheheling kan Kapahayagan, “an mga tataramon na ipinasabong nin mga demonyo” tinitipon sinda gabos sa “ralaban kan dakulang aldaw nin Dios na Makakamhan sa gabos” sa Har–Magedon. (Kap. 16:13, 14, 16) Tunay nanggad, arog kan isinurat ni apostol Pablo, an “mga poon kan kinaban” bakong ordinaryong mga tawo kundi “maraot na espiritung mga persona sa langitnon na mga lugar.” (Efe. 6:12) An gabos na magpapatunay na sinda tunay na mga parasamba ki Jehova kaipuhan na makasabot sa bilog na kahulogan kaiyan.
5. Taano ta kaipuhan an pagmamaan tanganing kita makalikay na maniobrahon na magsuportar sa palakaw ni Satanas?
5 Aroaldaw an satong buhay apektado nin mga iriwal na minalaglag sa pamilya nin tawo. Uso para sa mga tawo na makikampi, sa berbal man o bako, sa mga nasyon, tribo, tataramon o sosyal na grupo na nabibilangan ninda. Dawa kun an saindang partikular na grupo sa sosyedad bakong direktang napapalabot sa sarong presenteng iriwal, tibaad marisa ninda na sinda nakikikampi sa sarong lado o sa ibong. Alagad ano man an hinanakit, siisay man an tawo o ano man an katuyohan na saindang sinusuportaran, ano an talagang sinusuportaran ninda? An Biblia malinaw na nagsasabi na “an bilog na kinaban namumugtak sa kapangyarihan kan maraot.” (1 Juan 5:19) Kun siring, paano malilikayan nin saro na madaya kaiba kan iba pa sa katawohan? Solamente paagi sa pagtatao kan saiyang bilog na pagsuportar sa Kahadean nin Dios asin pagpapadanay nin lubos na neutralidad kun dapit sa iriwal sa pag-oltanan nin mga grupo kan kinaban.—Juan 17:15, 16.
Tusong mga Paagi kan Maraot
6. Ano an kabilang sa mga paagi na ginamit ni Satanas tanganing patalikodon an mga tawo sa tunay na pagsamba?
6 Sa gabos na panahon sa kasaysayan si Satanas naggamit nin berbal asin pisikal na paglamag tanganing patalikodon an mga indibiduwal sa tunay na pagsamba. Alagad ta sia naggamit man nin mas sekretong mga paagi—madayang mga gibo asin tusong mga paagi.
7. Paano an pagigin madonong ni Satanas ipinaheheling sa saiyang paggamit sa falsong relihiyon?
7 Madonong niang pinapagdanay sa kadikloman an dakulang kabtang kan katawohan paagi sa falsong relihiyon, na pinapaghohona sinda, kun gusto ninda, na sinda naglilingkod sa Dios. Huling mayo nin tunay na pagkamoot sa katotoohan, tibaad sinda madara nin mistiko asin emosyonal na mga relihiyosong serbisyo o humanga sa makangangalas na mga gibo. (2 Tes. 2:9, 10) Alagad pinatatanidan kita na, minsan sa tahaw kan mga nasa tunay na pagsamba, “an nagkapira masuhay . . . na nagtatao nin atension sa mapandayang ipinasabong na mga tataramon asin katokdoan nin mga demonyo.” (1 Tim. 4:1) Paano iyan puwedeng mangyari?
8. Paano nadara ni Satanas sa falsong relihiyon minsan an nagkapira na dati nagsasamba ki Jehova?
8 Tuso na pinupukaw kan Diablo an mga kaluyahan nin sarong tawo. Sia daw kontrolado pa nin pagkatakot sa tawo? Kun iyo, tibaad sia madara sa impluwensia nin mga paryentes o pagtaraed na umayon sa mga gibo na an ginikanan sa falsong relihiyon. Mapalangkaw daw an saro? Kun siring tibaad sia maanggot kun hinahatolan o kun dai inaako nin iba an mga ideya na saiyang pinalalakop. (Tal. 29:25; 15:10; 1 Tim. 6:3, 4) Ano kun an saiyang pakikikabtang sa ministeryo sa langtad bakong huli sa pagkamoot? Imbes na ibagay an saiyang punto-de-vista tanganing makaoyon sa halimbawa ni Cristo, tibaad magustohan nia an mga ‘pinagigirok an saiyang talinga’ paagi sa pagsabi na an pagbasa sana sa Biblia asin pamumuhay nin “marahay” igo na. (2 Tim. 4:3) Bakong mahalaga ki Satanas kun baga sia aktuwal na umayon sa ibang relihiyosong grupo o mangapot sana sa saiyang sadiring relihiyon, basta dai sia sumamba ki Jehova sa paagi na sinasabi nin Dios paagi sa saiyang Tataramon asin sa saiyang organisasyon.
9. Paano tusong ginagamit ni Satanas an sekso tanganing maotob an saiyang mga katuyohan?
9 Si Satanas tuso man na pinasasagad an mga tawo na panigoan an normal na mga kamawotan sa salang mga paagi. Ginibo nia ini sa kamawotan para sa sekso. Sa pagsikwal sa moralidad kan Biblia, an dakol sa kinaban ibinibilang an pagdodorog nin mga bakong kasal na lehitimong kaogmahan o bilang paagi na patunayan na sinda nasa edad na. Asin kumusta man an mga may agom? Bakong pambihira para sa mga kinabanon na nagkakaproblema sa agom na kumua nin diborsio asin mag-agom nin iba o sumuhay sana asin makisaro sa iba. Kun namamasdan niato an pamumuhay na ini, iniisip daw niato na may nawawara sa sato, na an Kristianong dalan sobra kaestrikto? An tusong paagi ni Satanas papag-isipon an saro na si Jehova may ipinangunguring bagay na marahay. Sinasadol nia kita na isipon an kaogmahan na makakamtan niato ngonyan—bakong an maabot na epekto sa sato asin sa iba, asin tunay na bakong an satong relasyon ki Jehova asin sa saiyang Aki.—Gal. 6:7, 8; 1 Cor. 6:9, 10.
10. Paagi sa ano na pinagmamaigotan ni Satanas na raoton an satong kaisipan manongod sa kadahasan?
10 An saro pang natural na kamawotan iyo an pag-aling-aling. Kun marahay, iyan puwedeng makapagtao nin kaginhawahan sa pisikal, mental asin emosyonal. Alagad ano an reaksion niato kun tusong ginagamit ni Satanas an mga okasyon nin pag-aling-aling tanganing probaran na irayo an satong kaisipan sa kaisipan nin Dios? Halimbawa, aram niato na ikinaoongis ni Jehova an mga namomoot sa kadahasan. (Sal. 11:5) Alagad kun iyan ipinasasale nin mga pelikula sa telebisyon o sa sinehan, kita daw minatukaw sana asin inaako iyan gabos? O kun iyan iinaatubang sa ngaran nin karawat, inaako daw niato iyan asin tibaad nagkukurahaw pa sa pagsadol sa mga partisipante?—Ikomparar an Genesis 6:13.
11. Sa anong mga paagi puwedeng masiod minsan an saro na nakakaaram kan katotoohan manongod sa espiritismo kun dai sia mag-aalisto?
11 Aram man niato na an mga naggigibo nin ano man na porma nin espiritismo—an dibinasyon, panraratak o pakikipagkomunikar sa gadan—“bagay na nakababalde ki Jehova.” Dai niato iisipon man lamang na makihumapot sa mga patagolainan asin tunay na dai niato sinda iistimaron sa satong harong tanganing gibohon an saindang mga gibong sa demonyo. Alagad kita daw naghihinanyog sa sainda asin nagheheling na garo nagagayuma kun sinda lumuwas sa satong telebisyon? Minsan ngani noarin man dai niato aakoon an pagbolong nin parasantiguar, posible daw na sulotan niato nin pulseras na tursido an satong omboy na bagong mamundag sa paghona na tibaad iyan magprotehir sa aki sa maraot? O, sa pakaaram na kinokondenar kan Biblia an ‘pag-engkanto,’ totogotan daw niato an sarong hipnotista na makontrol an satong isip, dawa temporaryo sana?—Deut. 18:10-12; Gal. 5:19-21.
12. (a) Paano ginagamit an musika tanganing madara kita na umako nin mga ideya na aram niatong sala? (b) Paano an gubing, estilo nin buhok o pagtataram nin saro magpaparisa nin paghanga sa mga tawo na an pamumuhay dai inooyonan ni Jehova? (c) Ano an hinahagad sa sato tanganing malikayan niato na dai mabiktima kan tusong mga paagi ni Satanas?
12 Nabasa niato sa Kasuratan na ‘an pakikisaro asin karigsokan dai ngani maninigong masambitan sa tahaw niato, na may salang motibo.’ (Efe. 5:3-5) Alagad ano kun an siring na mga tema tusong iniibanan nin musika na may magayon na tono, nakadadarang kumpas o mapuwersang kumpas? Posible daw na sa dai niato pakarisa kita pumoon nang awiton an mga awit na nag-oomaw sa sekso na dai kasal, paggamit nin droga para sa kaalingan asin iba pa? O, minsan ngani aram niato na dai niato maninigong arogon an pamumuhay nin mga tawo na naggigibo nin siring na mga bagay, may tendensia daw kitang makipareho sa sainda paagi sa pag-arog sa saindang paggubing, sa estilo kan saindang buhok o sa saindang pagtataram? Tuso nanggad si Satanas! Madaya nanggad an mga paagi na saiyang ginagamit tanganing mapasagad an mga tawo na umarog sa saiyang maraot na isip! (2 Cor. 4:3, 4) Tanganing dai mabiktima kan saiyang tusong mga paagi, kaipuhan na likayan niato an pakikiiba sa kinaban. Kaipuhan na isipon niato kun siisay an “mga poon kan kinaban sa kadikloman na ini” asin maigot na makipaglaban tumang sa saindang impluwensia.—Efe. 6:12; 1 Ped. 5:8.
Nasangkapan na Magin mga Ganador
13. Paano nagigin posible para sa siisay man sa sato, na may mga bakong pagkasangkap, na madaog an kinaban na pinaghahadean ni Satanas?
13 Bago nagadan si Jesus sia nagsabi sa saiyang mga apostol: “Magin mapuso kamo! Nadaog ko an kinaban.” Kaya sinda man puwedeng magin mga ganador; asin pakalihis nin labing 60 taon si apostol Juan nagsurat: “Siisay an nakakadaog sa kinaban kundi an may pagtubod na si Jesus iyo an Aki nin Dios?” (Juan 16:33; 1 Juan 5:5) An siring na pagtubod ipinaheheling kan satong pagkuyog sa mga pagboot ni Jesus asin pagsarig sa Tataramon nin Dios, arog kan ginibo nia. Ano pa an hinahagad? Na kita magdanay na harani sa kongregasyon na sia an payo. Kun kita nagkakasala, kaipuhan na kita odok sa pusong magsolsol asin humagad kan kapatawadan nin Dios basado sa atang ni Jesus. Sa paaging ini, sa ibong kan satong mga pagkabakong sangkap, kita puwede man na magin mga ganador.
14. (a) Basahon an Efeso 6:13-18. (b) Gamiton an mga hapot asin teksto na itinao bilang pasisikadan sa pag-oolay sa mga pakinabang gikan sa lambang kabtang kan espirituwal na pangalasag.
14 Tanganing magin mapanggana, kaipuhan na isolog niato an “bilog na pangalasag hale sa Dios,” na dai linilingawan an ano man na kabtang kaiyan. Tabi bukasan an saindong Biblia sa Efeso 6:13-18 asin basahon an pagkaladawan sa pangalasag na iyan. Dangan, paagi sa pagsimbag sa mga hapot na nasa ibaba, horophoropon kun paano kamo makikinabang sa proteksion na itinatao kan lambang kabtang kan pangalasag.
“Habayan nahahagkosan nin katotoohan”
Minsan pa aram niato an katotoohan, paano an regular na pag-adal, paghorophorop sa katotoohan kan Biblia asin pag-atender sa pagtiripon nagpoprotehir sa sato? (Fil. 3:1; 4:8, 9; 1 Cor. 10:12, 13; 2 Cor. 13:5; 1 Ped. 1:13, Kingdom Interlinear)
“Takop sa daghan na katanosan”
Kiisay na pamantayan sa katanosan ini? (Kap. 15:3)
Iilustrar kun paano an pagmasumbikal sa mga pagboot ni Jehova, huli sa dai pakapagpatalubo nin pagkamoot sa saiyang mga dalan, makapagdadara sa saro sa grabeng espirituwal na kapahamakan. (Helingon an 1 Samuel 15:22, 23; Deuteronomio 7:3, 4.)
“An saindang bitis nasasapinan kan kasangkapan kan maogmang bareta nin katoninongan”
Paano nagigin proteksion para sa sato na papagdanayon na sibot an satong mga bitis sa pagdara sato sa pakikipag-olay sa mga tawo manongod sa mga probisyon nin Dios para sa katoninongan? (Roma 10:15; Sal. 73:2, 3; 1 Tim. 5:13)
“Dakulang kalasag nin pagtubod”
Kun kita may pagtubod na marigon an pundasyon, ano an magigin reaksion niato sa atubang nin mga paghihingoa na an katuyohan papagdudahon kita o patakoton? (Ikomparar an 2 Timoteo 1:12; 2 Hade 6:15-17.)
“Takop sa payo na kaligtasan”
Paano an paglaom sa kaligtasan nakatatabang sato na malikayan an pagkasiod sa sobrang pag-asikaso sa materyal na mga rogaring? (1 Tim. 6:7-10, 19)
“Minasbad kan espiritu”
Ano an maninigo niatong perming sarigan kun pinaglalabanan an mga pagsalakay tumang sa satong espirituwalidad o nin iba? (Sal. 119:98; Tal. 3:5, 6; ikomparar an Mateo 4:3, 4.)
Kaoyon dian, sa Efeso 6:18, 19, ano pa an ipinaheheling na mahalaga tanganing magin mapanggana sa espirituwal na pakikipaglaban? Gurano kaparate iyan na gagamiton? Para kiisay?
15. (a) Personal sana daw na espirituwal na pakikipaglaban an ginigibo niato gabos? (b) Paano kita puwedeng sumalakay sa pakikipaglaban?
15 Bilang Kristianong mga soldados kita kabtang nin sarong dakulang hukbo na nasa espirituwal na pakikipaglaban. Kun kita magdadanay na puka asin gagamiton an bilog na pangalasag hale sa Dios, dai kita magigin mga biktima kan ralaban na ini. Imbes, kita magigin nakapagpapakosog na tabang sa mga kapwa niato lingkod nin Dios. Kita magigin andam asin maigot na sumalakay, na ilinalakop an maogmang bareta kan Mesiyanikong Kahadean nin Dios, an gobyerno na tinutumang na gayo ni Satanas.
(Ipagpapadagos sa masunod na luwas.)
Pagrerepaso
● Taano an mga parasamba ki Jehova ta naghihingoa na mapagdanay an lubos na neutralidad kun dapit sa mga iriwal kan mga elemento kan kinaban?
● Ano an nagkapira sa tusong mga paagi na ginagamit ni Satanas tanganing ipahamak sa espirituwal an mga Kristiano?
● Paano an pangalasag na itinao nin Dios nagpoprotehir sato sa mga paagi na mahalaga sa espirituwal na pakikipaglaban na ini?