Matutubod daw Nindo an Biblia?
“LIGTAS nanggad na sabihon na kun nakanompong kamo nin tawong naghihingakong dai nagtutubod sa ebolusyon, an tawong iyan ignorante, patal o rungaw.” Paano nakaaapektar saindo an mga tataramon na ini kan biologong si Richard Dawkins? Kun nagtutubod kamo sa Biblia, posibleng nagtutubod kamo sa paglalang imbes na sa teoriya nin ebolusyon. Nangangahulogan daw iyan na, bilang nagtutubod sa ignorante, patal, o rungaw kamo?
Konsideraron man, an pahayag na ini: “Inestablisar kan mga iskolar kan Bagong Tipan na mayong pagdududahan na an Jesus sa enot na mga dokumentong Kristiano sa nagkapirang kamugtakan eroestorya kan Kristianong imahinasyon.” An mga tataramon na ini sa The Weekend Australian itinaram ni Dr. Robert W. Funk, propesor sa unibersidad sa relihiyosong mga pagsiyasat asin autor nin nagkapirang libro dapit sa relihiyosong mga interpretasyon.
Si Dr. Funk nagpundar nin sarong proyekto na midbid bilang an Jesus Seminar, sarong grupo nin labing sanggatos na iskolar sa Biblia na iribang nagsiyasat kan mga tataramon ni Jesus na nakasurat sa Biblia. Orog sa gabos, nagin konklusyon ninda na an Pamibi kan Kagurangnan bakong ginibo ni Jesus; na dai sinabi ni Jesus na an mga mahoyo magmamana kan daga o na an mga parapatoninong aapodon na mga aki nin Dios; asin na dai nia sinabing: “Ako iyo an pagkabuhay liwat asin an buhay. An naggigibo nin pagtubod sa sako . . . dai noarin man magagadan.”—Juan 11:25, 26; Mateo 5: 5, 9; 6:9, 10.
Minsan siring na tibaad mabigla kamo sa saindang mga konklusyon, bako sindang pambihira. Resulta ini kan modernong Biblikal na kritisismo, asin an kaagid na mga ideya haloy nang itinotokdo sa relihiyosong mga seminaryo. Tibaad pinatagas nindo an saindong sadiri sa pagdangog sa mga siyentistang nagkokontra sa Biblia. Alagad kun an relihiyosong mga lider nagkaigwa nin pagduwaduwa sa katotoohan kan rekord kan Biblia, tibaad isipon nindong ini an panahon na konsideraron liwat an saindong paninindogan. Rasonable daw na magtubod sa Biblia mantang an dakol na gayong madodonong sa langtad nin relihiyon maliwanag na dai nagtutubod?