Kapahayagan—An Mamuraway na Kulminasyon Kaiyan Harani Na!
Kapitulo 32: An Kaanggotan nin Dios Tinapos
1. Ano an nangyari na kun tapos nang iula an pitong mangko, asin anong mga hapot an minalataw ngonyan manongod sa mga mangko?
1 Ikinaintrodusir na ni Juan an mga anghel na isinugong mag-ula kan pitong mangko. Sinasabi nia sato na “an mga ini an huri, huli ta paagi sa sainda an kaanggotan nin Dios tatapuson.” (Kapahayagan 15:1; 16:1) An mga damat na ini, na nagpapahayag kan mga padusa ni Jehova sa karatan digdi sa daga, kaipuhan na iula sagkod na matapos. Kun iyan tapos na, nagibo naman an mga paghokom nin Dios. Mayo na an kinaban ni Satanas! Ano an ipinaririsa kan mga damat na ini para sa katawohan asin sa mga namomoon sa presenteng maraot na palakaw? Paano an mga Kristiano makalilikay na madamat kaiba kan nakatalagang malaglag na kinaban na ini? Ini mahahalagang hapot, asin ngonyan iyan sisimbagon. An gabos na nagmamawot sa kapangganahan nin katanosan magkakaigwa nin makosog na interes sa sumunod na naheling ni Juan.
An Kabangisan ni Jehova Tumang sa “Daga”
2. Ano an resulta kan pag-ula kan enot na anghel sa saiyang mangko sa daga, asin ano an isinisimbolo kan “daga”?
2 An enot na anghel huminiro! “Asin an enot nagduman asin iinula an saiyang mangko sa daga. Asin an makolog asin nakagagadan na lugad napasa mga tawo na igwa kan tanda kan mabangis na hayop asin nagsasamba sa ladawan kaiyan.” (Kapahayagan 16:2) Arog kaidtong enot na tanog nin trumpeta, an “daga” digdi nagsisimbolo sa garo baga masarig na politikal na palakaw na pinonan na itogdok ni Satanas digdi sa daga kaidtong panahon ni Nimrod, labi nang 4,000 na taon an nakalihis.—Kapahayagan 8:7.
3. (a) Paano hinahagad nin dakol na gobyerno an garo man sana pagsamba sa saindang mga sakop? (b) Ano an ilinuwas kan mga nasyon bilang karibay kan Kahadean nin Dios, asin ano an epekto sa mga nagsasamba dian?
3 Sa huring mga aldaw na ini, an dakol na gobyerno naghagad nin garo man sana pagsamba sa saindang mga sakop, na nag-iinsister na an Estado dapat na ilangkaw sa Dios o sa ano pa man na tinatawan nin kaimbodan. (2 Timoteo 3:1; ikomparar an Lucas 20:25; Juan 19:15.) Poon 1914 uso nang piriton nin mga nasyon an saindang mga barobata na magsoldados tangani sindang lumaban, o magin andam na lumaban, sa guerra na nakapano nin dugo sa mga pahina nin modernong kasaysayan. Sa aldaw kan Kagurangnan, ilinuwas man kan mga nasyon, bilang karibay kan Kahadean nin Dios, an ladawan kan hayop—an Liga de Naciones asin an kasalihid kaiyan, an Naciones Unidas. Kanigoan na paglanghad na sabihon, arog kan ginibo nin bago pa sanang mga papa, na an gibong-tawong organisasyon na ini iyo an solamenteng paglaom kan mga nasyon para sa katoninongan! Iyan marigon na nagtutumang sa Kahadean nin Dios. An mga nagsasamba dian nagigin maramog sa espirituwal, may lugad, kun paanong an mga Egipcio na nagtumang ki Jehova kan aldaw ni Moises dinamat nin literal na mga pugsa asin lugad.—Exodo 9:10, 11.
4. (a) Ano an makosog na idinodoon kan mga laog kan enot na mangko kan kaanggotan nin Dios? (b) Ano an pagheling ni Jehova sa mga nag-aako kan tanda kan mabangis na hayop?
4 An mga laog kan mangkong ini makosog na nagdodoon kan pagpipilian nin mga tawo. Kaipuhan na tioson ninda magsalang an dai pag-oyon kan kinaban o an kaanggotan ni Jehova. An katawohan pinirit na umako kan tanda kan mabangis na hayop, na an intension “mayo nin siisay man na makakabakal o makakapabakal apuwera sa tawo na igwa kan tanda, an ngaran kan mabangis na hayop o an bilang kan ngaran kaiyan.” (Kapahayagan 13:16, 17) Pero igwa ini nin bayad! Ibinibilang ni Jehova an mga nag-ako kan tanda na may “makolog asin nakagagadan na lugad.” Poon 1922 sinda tinandaan sa publiko na nagsikwal sa nabubuhay na Dios. An saindang politikal na mga pakana daing kapangganahan, asin sinda nagtitios nin kasakitan. Sa espirituwal, sinda maramog. Kun dai sinda magsosolsol, an “makolog” na helang na ini ikagagadan, ta ngonyan aldaw nin paghokom ni Jehova. Mayo nin neutral na lugar sa pag-oltanan kan pagigin kabtang kan palakaw nin mga bagay kan kinaban asin paglilingkod ki Jehova sa lado kan saiyang Cristo.—Lucas 11:23; ikomparar an Santiago 4:4.
An Dagat Nagin Dugo
5. (a) Ano an nangyari kan iula an ikaduwang mangko? (b) Ano an pagheling ni Jehova sa mga nag-eerok sa simbolikong dagat?
5 An ikaduwang mangko kan kaanggotan nin Dios kaipuhan nang iula ngonyan. Ano an magigin kahulogan kaiyan para sa katawohan? Sinasabi sato ni Juan: “Asin an ikaduwa nag-ula kan saiyang mangko sa dagat. Asin iyan nagin dugo na siring sa hale sa nagadan na tawo, asin lambang nabubuhay na kalag nagadan, iyo, an mga bagay na nasa dagat.” (Kapahayagan 16:3) Kapareho kan ikaduwang tanog nin trumpeta, an mangkong ini tumang sa “dagat”—an nagkakariribok, rebeldeng masa nin katawohan na siblag ki Jehova. (Isaias 57:20, 21; Kapahayagan 8:8, 9) Sa mata ni Jehova, an “dagat” na ini garo dugo, dai puwedeng mabuhayan nin mga linalang. Iyan an dahelan na an mga Kristiano dapat na bakong kabtang kan kinaban. (Juan 17:14) An pag-ula kan ikaduwang mangko kan kaanggotan nin Dios nagpapahayag na an gabos na tawo na nag-eerok sa dagat na ini gadan sa pagheling ni Jehova. Huli sa paninimbagan kan bilog na komunidad, an katawohan nagkasala nin grabeng pagpabolos nin dugong daing sala. Kun dumatong na an aldaw nin kaanggotan ni Jehova, sinda literal na magagadan sa kamot kan saiyang mga hukbong parapadusa.—Kapahayagan 19:17, 18; ikomparar an Efeso 2:1; Colosas 2:13.
Pagpainom sa Sainda nin Dugo
6. Ano an nangyari kan iula an ikatolong mangko, asin anong mga tataramon an nadangog hale sa anghel asin sa altar?
6 An ikatolong mangko kan kaanggotan nin Dios, kapareho kan ikatolong tanog nin trumpeta, may epekto sa mga burabod nin tubig na tabang. “Asin an ikatolo nag-ula kan saiyang mangko sa mga salog asin sa mga burabod nin tubig. Asin sinda nagin dugo. Asin nadangog ko an anghel na nasa ibabaw kan tubig na nagsasabi: ‘Ika, an Saro na iyo ngonyan asin iyo kaidto, an Maimbod, matanos, huli ta ginibo mo an mga paghokom na ini, huli ta pinabolos ninda an dugo nin mga banal asin nin mga propeta, asin tinawan mo sinda nin dugo na iinomon. Iyan maninigo sa sainda.’ Asin nadangog ko an altar na nagsabi: ‘Iyo, Jehova Dios, an Makakamhan sa gabos, totoo asin matanos an saimong mga paghokom.’”—Kapahayagan 16:4-7.
7. Ano an ilinaladawan kan “mga salog asin . . . mga burabod nin tubig”?
7 An “mga salog asin . . . mga burabod nin tubig” na ini naglaladawan sa presko daang mga burabod nin paggiya asin kadonongan na inaako kan kinaban na ini, arog kan politikal, ekonomiko, sientipiko, edukasyonal, sosyal, asin relihiyosong mga pilosopiya na naggigiya sa mga gawe asin desisyon nin tawo. Imbes na maglaom ki Jehova, an Burabod nin buhay, para sa nagtataong-buhay na katotoohan, an mga tawo ‘nagkotkot para sa sainda man sana nin raot na mga bobon’ asin nag-inom nin dakol sa “kadonongan kan kinaban na ini [na] karungawan sa Dios.”—Jeremias 2:13; 1 Corinto 1:19; 2:6; 3:19; Salmo 36:9.
8. Sa anong mga paagi na an katawohan nagkasala sa dugo?
8 An maating “tubig” na iyan naggiya sa mga tawo na magkasala sa dugo, halimbawa, sa pagsadol sainda na magpabolos nin kadakoldakol na dugo sa mga guerra sa siglong ini, na ngonyan labi nang sanggatos na milyon na buhay an kinua. Partikularmente sa Kakristianohan, na dian puminutok an duwang guerra mundial, na an mga tawo “naghihidale sa pagpabolos nin dugong daing sala,” asin kabale digdi an dugo kan mismong mga saksi nin Dios. (Isaias 59:7; Jeremias 2:34) An katawohan nagkasala man sa dugo paagi sa salang paggamit sa kadakoldakol na dugo para sa pagsasalin, na naglalapas sa matanos na mga pagboot ni Jehova. (Genesis 9:3-5; Levitico 17:14; Gibo 15:28, 29) Huli kaini, inani na ninda an kamondoan huli sa paglakop, paagi sa pagsasalin nin dugo, kan AIDS, hepatitis, asin iba pang helang. An bilog na padusa sa gabos na pagkakasala sa dugo madali nang umabot kun an mga parakasala magbayad na kan pinakahalangkaw na penalidad, an pagronot sa sainda sa “dakulang ligisan kan kaanggotan nin Dios.”—Kapahayagan 14:19, 20.
9. Ano an kaiba sa pag-ula kan ikatolong mangko?
9 Kan aldaw ni Moises, kan gibohon na dugo an Salog nin Nilo, an mga Egipcio nabuhay paagi sa paghanap nin ibang burabod nin tubig. (Exodo 7:24) Alagad, ngonyan, sa panahon kan espirituwal na damat, mayo nin lugar sa kinaban ni Satanas na an mga tawo makakanompong nin nagtataong-buhay na tubig. An pag-ula kan ikatolong mangkong ini kaiba an pagbalangibog na an “mga salog asin . . . mga burabod nin tubig” kan kinaban na ini siring sa dugo, na nagtatao nin espirituwal na kagadanan sa gabos na uminom kaiyan. Kun an mga tawo dai madolok ki Jehova, aanihon ninda an saiyang silot.—Ikomparar an Ezequiel 33:11.
10. Ano an ipinaiisi kan “anghel na nasa ibabaw kan tubig, asin anong patotoo an idinadagdag kan “altar”?
10 “An anghel na nasa ibabaw kan tubig,” an boot sabihon, an anghel na nag-uula kan mangkong ini sa mga tubig, nag-oomaw ki Jehova bilang Unibersal na Hokom, na an matanos na mga desisyon absoluto. Kun siring, sinasabi nia manongod sa paghokom na ini: “Iyan maninigo sa sainda.” Daing duwa-duwa, personal na naheling kan anghel an dakol sa pagpabolos nin dugo asin panriringis na isinutsut sa nag-aging rinibong taon kan falsong mga katokdoan asin pilosopiya kan maraot na kinaban na ini. Kaya, aram nia na tama an paghokom ni Jehova. Minsan an “altar” nin Dios nagtataram. Sa Kapahayagan 6:9, 10, an kalag kan mga ginadan sinasabi na yaon sa ibaba kan altar na iyan. Kaya “an altar” nagdadagdag nin makosog na patotoo kun dapit sa hustisya asin katanosan kan mga desisyon ni Jehova.a Tunay nanggad, maninigo na an mga nagpabolos asin naggamit nin sala sa kadakol na dugo piriton na painomon nin dugo, bilang simbolo kan pagsentensia sa sainda ni Jehova sa kagadanan.
(Ipagpapadagos sa masunod na luwas.)
[Nota sa Ibaba]
a Para sa mga halimbawa nin mga bagay na daing buhay na naglilingkod bilang saksi o nagpapatotoo, ikomparar an Genesis 4:10; 31:44-53; Hebreo 12:24.
[Kahon sa pahina 28]
“Sa Daga”
An grupong Juan ipinublikar an kaanggotan ni Jehova tumang “sa daga” paagi sa mga kapahayagan na arog kan minasunod:
“Pakalihis nin dakol na siglo nin paghihingoa, pinatunayan nin mga partido politiko an kadaihan ninda nin kakayahan na maatubang an presenteng mga kamugtakan asin resolberan an masakit na mga problema. An mga ekonomista asin estadista, na pinag-aadalan nin maimbod an problema, nakadiskobre na mayo man lamang sinda nin magigibo.”—Millions Now Living Will Never Die, 1920, pahina 61.
“Mayo ni sarong gobyerno sa daga ngonyan na nakatatao nin pagkakontento sa arin man na rasonableng proporsion kan kinaban. An dakol na nasyon pinamamahalaan nin mga diktador. An bilog na kinaban haros bangkarote na.”—A Desirable Government, 1924, pahina 5.
“An pagtapos sa palakaw na ini nin mga bagay . . . iyo an solamenteng paagi na mahale sa kinaban na ini an karatan asin matawan nin lugar na umoswag an katoninongan asin katanosan.”—“This Good News of the Kingdom,” 1954, pahina 25.
“An presenteng areglo sa kinaban nagpamidbid paagi sa naggagrabeng kasalan, karatan asin pagrebelde tumang sa Dios asin sa saiyang kabotan. . . . Iyan dai na mababakle. Kaya, iyan kaipuhan na mawara!”—The Watchtower, Nobyembre 15, 1981, pahina 6.
[Kahon sa pahina 28]
“Sa Dagat”
An minasunod pira sana sa mga kapahayagan na ipinublikar kan grupong Juan sa nag-aging mga taon sa pagbalangibog kan kaanggotan nin Dios tumang sa maribok, rebeldeng “dagat” nin maraot na mga tawo na siblag ki Jehova:
“An kasaysayan nin lambang nasyon nagpapaheling na an nangyari pagdaogan nin mga grupo. An nangyari pipira tumang sa dakol. . . . An pagdaogan na ini nagbunga nin dakol na rebolusyon, grabeng pagsakit, asin dakol na pagpabolos nin dugo.”—Government, 1928, pahina 244.
Sa bagong kinaban, “an simbolikong ‘dagat’ kan maribok, rebelde, maraot na mga tawo na hale sa sainda tuminunga an simbolikong mabangis na hayop kaidto pa tanganing gamiton kan Diablo mawawara na.”—The Watchtower, Setyembre 15, 1967, pahina 567.
“An presenteng sosyedad nin tawo may espirituwal na minamate asin kahelangan. Iyan dai ikaliligtas kan siisay man sa sato, huli ta ipinaheheling kan Tataramon nin Dios na an helang kaiyan pasiring sa kagadanan.”—Tunay na Katoninongan asin Katiwasayan—Saen daw Magikan?, 1973, pahina 129 (sa Ingles, pahina 131).
[Kahon sa pahina 29]
“Sa mga Salog Asin sa mga Burabod nin Tubig”
An ikatolong damat ibinuyagyag an “mga salog asin . . . mga burabod nin tubig” paagi sa mga kapahayagan na arog kan minasunod:
“An klero, na naghihingakong mga paratokdo kan mga doktrina [ni Cristo], pinakangbanal an guerra asin ginibo iyan na sarong sagradong bagay. Ikinaogma ninda na an saindang mga retrato asin estatuwa ieksibir kataed nin madugong mga parapakilaban.”—The Watch Tower, Setyembre 15, 1924, pahina 275.
“An espirituwalismo [espiritismo] napapasikad sa dakulang kaputikan, an kaputikan manongod sa pagdadanay na buhay pagkagadan asin inmortalidad kan kalag nin tawo.”—What Do the Scriptures Say About “Survival After Death?,” 1955, pahina 51.
“An mga pilosopiya nin tawo, teorista politikal, sosyal na mga organisador, mga parahatol sa ekonomiya asin mga paratokdo nin relihiyosong tradisyon daing ibinungang tunay na nagtataong-buhay na kaginhawahan . . . An siring na mga tubig nagdara pa ngani sa mga nag-inom kaiyan sa paglapas sa pagboot kan Kaglalang mapadapit sa kabanalan nin dugo asin sa paggibo nin relihiyosong mga paglamag.”—Resolusyon na inaprobaran sa “Daing Katapusan na Maogmang Bareta” na Internasyonal na Kombension, 1963.
“Bakong an sientipikong kaligtasan, kundi an kalaglagan kan rasa nin tawo iyo an malalaoman sa tawo mismo. . . . Dai niato malalaoman an gabos na sikologo asin sikiyatrista kan kinaban na liwaton an kaisipan nin mga tawo . . . Dai niato masasarigan an arin man na internasyonal na pulisiya na maorganisar . . . asin gibohon na ligtas na istaran an dagang ini.”—Saving the Human Race—In the Kingdom Way, 1970, pahina 5.