Kapahayagan—An Mamuraway na Kulminasyon Kaiyan Harani Na
Kasumpay kan Kapitulo 39: An Guerrero-Hade Nanggana sa Armagedon
An mga Kapwa Guerrero ni Jesus
10, 11. (a) Paano ipinaheheling ni Juan na si Jesus dai nagsosolo sa pakilaban? (b) Ano an ipinaririsa kan bagay na an mga kabayo maputi asin an mga nangangabayo nagugubingan nin “maputi, malinig, pinong lino”? (c) Siisay an minakompuwesto sa langitnon na “mga hukbo”?
10 Dai nagsosolo si Jesus sa pakikipaglaban na ini. Sinasabi sato ni Juan: “Siring man, an mga hukbo na yaon sa langit nagsusurunod sa saiya na nangangabayo sa maputing mga kabayo, asin sinda nagugubingan nin maputi, malinig, pinong lino.” (Kapahayagan 19:14) An bagay na “maputi” an mga kabayo nagpaparisa nin matanos na ralaban. An “pinong lino” angay sa mga nangangabayo kan Hade, asin an makintab, malinig na kaputian kaiyan nagpaparisa nin malinig, matanos na kamugtakan sa atubangan ni Jehova. Kun siring, siisay an minakompuwesto sa “mga hukbong” ini? Daing duwa-duwa, kaiba dian an banal na mga anghel. Sa kapinonan kan aldaw kan Kagurangnan na ihinolog ni Miguel asin kan saiyang mga anghel si Satanas asin an saiyang mga demonyo hale sa langit. (Kapahayagan 12:7-9) Saro pa, “an gabos na anghel” naglilingkod ngonyan ki Jesus mantang sia nagtutukaw sa saiyang mamuraway na trono asin naghohokom sa mga nasyon asin tawo sa daga. (Mateo 25:31, 32) Tunay na, sa pangultimong guerra, kun gibohon na an paghokom nin Dios sagkod na matapos, si Jesus iibanan giraray kan saiyang mga anghel.
11 May iba man na kalabot. Kan ipinadara an saiyang mensahe sa kongregasyon sa Tiatira, si Jesus nanuga: “An makadaog asin nag-ootob kan sakong mga gibo sagkod sa katapusan tatawan ko nin kapangyarihan sa mga nasyon, asin papastoran nia an mga tawo paagi sa sogkod na batbat kaya sinda magkakaparasa siring sa mga koron, siring kan inako ko sa sakong Ama.” (Kapahayagan 2:26, 27) Daing duwa-duwa, pag-abot kan panahon, an mga tugang ni Cristo na dati nang yaon sa langit magkakaigwa nin kabtang sa pagpastor sa mga tawo asin nasyon paagi sa sogkod na batbat.
12. (a) Makikikabtang daw an mga lingkod nin Dios digdi sa daga sa pakikilaban sa Armagedon? (b) Paano kalabot sa Armagedon an banwaan ni Jehova sa daga?
12 Alagad, kumusta man an mga lingkod nin Dios digdi sa daga? An grupong Juan dai magkakaigwa nin aktibong kabtang sa pakikilaban sa Armagedon; ni an maimbod na kairiba kaiyan, an mga tawo hale sa gabos na nasyon na burunyog na nagraralaog sa espirituwal na harong nin pagsamba ni Jehova. An matoninong na mga tawong ini dinaragopdop na an mga minasbad na magin mga tarom nin arado. (Isaias 2:2-4) Pero, kalabot nanggad sinda! Arog kan nasabi na, an garo baga daing depensang banwaan ni Jehova an maringis na sasalakayon ni Gog asin kan gabos niang kaburunyogan. Iyan an senyal tanganing an Guerrero-Hade ni Jehova, na suportado kan mga hukbo sa langit, pumoon na makipaglaban sa sarong guerra nin pagpara tumang sa mga nasyon. (Ezequiel 39:6, 7, 11; ikomparar an Daniel 11:44–12:1.) Bilang mga paramasid, an banwaan nin Dios sa daga magigin interesado nanggad. An Armagedon mangangahulogan kan saindang kaligtasan, asin sinda mabubuhay sagkod lamang bilang mga nakaheling mismo kan dakulang ralaban sa pagbindikar ki Jehova.
13. Paano niato naaaraman na an mga Saksi ni Jehova bakong tumang sa gabos na gobyerno?
13 Ini daw nangangahulogan na an mga Saksi ni Jehova tumang sa gabos na gobyerno? Bako man! Kinukuyog ninda an hatol ni apostol Pablo: “An lambang kalag magpasakop sa haralangkaw na kapangyarihan.” Aram ninda na sagkod na nagdadanay an presenteng palakaw, an “haralangkaw na kapangyarihan” nag-eeksister sa pagtogot nin Dios para sa pagpapadanay sa kadikit na areglo sa sosyedad nin tawo. Kaya, an mga Saksi ni Jehova nagbubuhis, nagkukuyog kan mga ley, iginagalang an mga ordinansa sa trapiko, nag-ootob sa mga pagparehistro, asin iba pa. (Roma 13:1, 6, 7) Saro pa, nagkukuyog sinda sa mga prinsipyo kan Biblia sa pagigin sadiosan asin honesto; pagpaheling nin pagkamoot sa kataed; pagtogdok nin makosog, moral na pamilya; asin pagtotokdo sa saindang mga aki na magin arogan na mga siudadano. Sa paaging ini itinatao ninda “ki Cesar an ki Cesar, alagad sa Dios an sa Dios.” (Lucas 20:25; 1 Pedro 2:13-17) Mantang ipinaheheling kan Tataramon nin Dios na temporaryo an mga kapangyarihan sa gobyerno kan kinaban na ini, an mga Saksi ni Jehova nag-aandam ngonyan para sa mas kompletong buhay, an tunay na buhay, na sa madali na makakamtan sa pagsakop kan Kahadean ni Cristo. (1 Timoteo 6:17-19) Minsan dai sinda makikikabtang sa pagpabagsak sa mga kapangyarihan kan kinaban na ini, an mga Saksi nakakamate nin magalang na paghanga sa sinasabi kan ipinasabong na Tataramon nin Dios, an Banal na Biblia, manongod sa paghokom na gigibohon ni Jehova sa Armagedon.—Isaias 26:20, 21; Hebreo 12:28, 29.
Abante sa Ultimong Ralaban!
14. Ano an isinisimbolo kan “matarom na halabang espada” na nagluluwas sa ngoso ni Jesus?
14 Sa anong autoridad na tatapuson ni Jesus an saiyang pandaog? Sinasabi sato ni Juan: “Asin sa saiyang ngoso nagluluwas an sarong matarom na halabang espada, tanganing ipanlugad nia sa mga nasyon, asin sia magpapastor sa sainda paagi sa sogkod na batbat.” (Kapahayagan 19:15a) An “matarom na halabang espada” na iyan nagrerepresentar sa itinao nin Dios na autoridad ni Jesus na magtao nin mga pagboot sa paggadan sa gabos na habong sumuportar sa Kahadean nin Dios. (Kapahayagan 1:16; 2:16) An buhay na simbolismong ini nakaaagid sa mga tataramon ni Isaias: “Ginibo nia [ni Jehova] an sakong ngoso na siring sa matarom na espada. Sa anino kan saiyang kamot itinago nia ako. Asin luway-luway ginibo nia akong makintab na pana.” (Isaias 49:2) Digdi ipinanganino ni Isaias si Jesus, na nagbabalangibog kan mga paghokom nin Dios asin ginigibo iyan, na garo paagi sa panang daing salto.
15. Sa panahon na ini, siisay na an nabuyagyag asin nahokoman tangani na magtanda kan kapinonan nin ano?
15 Sa panahon na ini, si Jesus nakahiro na bilang kaotoban kan mga tataramon ni Pablo: “Dangan, sa katotoohan, an tampalasan mabubuyagyag, na gagadanon kan Kagurangnan na Jesus paagi sa espiritu kan saiyang ngoso asin tutunawon paagi sa kapahayagan kan saiyang presensia.” Iyo, an presensia (sa Griego, pa·rou·siʹa) ni Jesus ikinapaheling poon 1914 padagos paagi sa pagbuyagyag asin paghokom sa tawo nin katampalasanan, an klero nin Kakristianohan. An presensiang iyan biyong ikapaheheling kun an sampulong sungay kan mapulang mabangis na hayop gibohon na an paghokom na iyan asin laglagon an Kakristianohan, kaiba an iba pang kabtang kan Dakulang Babilonya. (2 Tesalonica 2:1-3, 8) Iyan an magigin kapinonan kan dakulang kahorasaan! Pakalihis kaiyan, ibibirik ni Jesus an saiyang atension sa natatada pa sa organisasyon ni Satanas, kaoyon kan hula: “Lulugadon nia an daga sa sogkod kan saiyang ngoso; asin sa espiritu kan saiyang mga ngabil gagadanon nia an maraot.”—Isaias 11:4.
16. Paano ilinaladawan kan Salmo asin Jeremias an gigibohon kan nombradong Guerrero-Hade ni Jehova?
16 An Guerrero-Hade, bilang nombrado ni Jehova, paglalaenon an mga makaliligtas asin an mga magagadan. Si Jehova, sa makahulang pagtaram sa Aki nin Dios na ini, nagsasabi: “Sinda [an mga namomoon sa daga] saimong papasaon nin setrong batbat, siring sa lalagan kan paragibo nin koron roronoton mo sinda.” Asin kinakaolay ni Jeremias an maraot na mga namomoon sa gobyerno asin an saindang mga kampon, na sinasabi: “Pag-urungal kamo, mga pastor, asin pagtarangis kamo! Asin pagturubog kamo, mga pinakamahal sa kahayopan, huli ta natapos na an saindong mga aldaw para sa pagbono asin sa saindong pagkawararak, asin dapat kamong mapukan na siring sa magayon na lalagan!” Minsan pa gurano kagayon kan mga namomoon na iyan sa pagheling nin maraot na kinaban, an sarong tama kan setrong batbat kan Hade mapara sa sainda, na garo rinoronot an sarong magayon na lalagan. An mangyayari siring sa ihinula ni David manongod sa Kagurangnan na Jesus: “An sogkod kan saimong kakosogan ipapadara ni Jehova gikan sa Sion, na nagsasabi: ‘Mandaog ka sa tahaw kan saimong mga kaiwal.’ Si Jehova mismo sa saimong too paparasaon an mga hade sa aldaw kan saiyang kaanggotan. Sia maghohokom sa mga nasyon; papanoon nia iyan nin mga bangkay.”—Salmo 2:9, 12; 83:17, 18; 110:1, 2, 5, 6; Jeremias 25:34.
17. (a) Paano ilinaladawan ni Juan an paghokom kan Guerrero-Hade? (b) Isaysay an pirang hula na nagpapaheling kun gurano magigin kapahapahamak kan aldaw kan kaanggotan nin Dios para sa mga nasyon.
17 An makapangyarihan na Guerrero-Hadeng ini naglataw liwat sa sumunod na naheling sa bisyon: “Binabatayan man nia an ligisan kan kaanggotan kan kabangisan nin Dios na Makakamhan sa gabos.” (Kapahayagan 19:15b) Sa sarong naenot na bisyon, naheling na ni Juan an pagbatay sa “ligisan kan kaanggotan nin Dios.” (Kapahayagan 14:18-20) Ilinaladawan man ni Isaias an sarong ligisan na pangadan, asin an ibang propeta nagsasaysay kun gurano magigin kapahapahamak kan aldaw kan kaanggotan nin Dios para sa gabos na nasyon.—Isaias 24:1-6; 63:1-4; Jeremias 25:30-33; Daniel 2:44; Sofonias 3:8; Zacarias 14:3, 12, 13; Kapahayagan 6:15-17.
18. Ano an ipinahahayag ni propeta Joel kun dapit sa paghokom ni Jehova sa gabos na nasyon?
18 Iinaasosyar ni propeta Joel an ligisan nin arak sa pagdatong ni Jehova “tanganing hokoman an gabos na nasyon sa palibot.” Asin si Jehova an nagboboot, daing duwa-duwa sa saiyang katabang na Hokom, si Jesus, asin sa saiyang langitnon na mga hukbo: “Tigpasan an kagot, ta hinog na an anihon. Madia kamo, hilig kamo, ta an ligisan nin arak pano na. Naglilipwas an mga tangke kan ligisan; huli ta dakol an saindang karatan. Igwa nin mga kadaklan, kadaklan sa hababang kaplanodohan kan desisyon, ta an aldaw ni Jehova harani na sa hababang kaplanodohan nin desisyon. An aldaw asin bulan madiklom, asin an mismong mga bitoon hahaleon an saindang liwanag. Asin hale sa Sion si Jehova mag-uungal, asin hale sa Jerusalem ipadadangog nia an saiyang tingog. Asin magkukunogkunog an langit asin daga; alagad ta si Jehova magigin pailihan kan saiyang banwaan, asin kuta para sa mga aki ni Israel. Asin kamo makakamidbid na ako si Jehova na saindong Dios.”—Joel 3:12-17.
19. (a) Paano sisimbagon an ihinapot sa 1 Pedro 4:17? (b) Anong ngaran an nasusurat sa pan-ibabaw na gubing ni Jesus, asin taano iyan ta magigin angay?
19 Iyan magigin nanggad aldaw nin kapahamakan sa sumbikalan na mga nasyon asin tawo pero aldaw nin kaginhawahan para sa gabos na nagpaili ki Jehova asin sa saiyang Guerrero-Hade! (2 Tesalonica 1:6-9) An paghokom na nagpoon sa harong nin Dios kan 1918 natapos na sa panahon na iyan, na sinisimbag an hapot sa 1 Pedro 4:17: “Ano an mangyayari sa mga bakong makinuyog sa maogmang bareta nin Dios?” Sa panahon na iyan binatayan na kan mamuraway na Ganador an ligisan sagkod na matapos, na ipinaheheling na sia an Sarong ilinangkaw na manongod sa saiya si Juan nagsasabi: “Asin sa saiyang pan-ibabaw na gubing, minsan sa saiyang paa, igwa sia nin ngaran na nasusurat, Hade nin mga hade asin Kagurangnan nin mga kagurangnan.” (Kapahayagan 19:16) Pinatunayan nia na sia mas makapangyarihan nanggad kisa siisay man na daganon na namomoon, kisa siisay man na tawong hade o kagurangnan. An saiyang dignidad asin kamurawayan daing kaagid. Sia nagsakay “para sa katotoohan asin kapakumbabaan patin katanosan” asin nanggana sia sagkod lamang! (Salmo 45:4) Nasusurat sa saiyang nawirikan nin dugong gubing an ngaran na itinao sa saiya kan Soberanong Kagurangnan na Jehova, na sia an Parabindikar!
An Dakulang Pamanggihan nin Dios
20. Paano ilinaladawan ni Juan an “dakulang pamanggihan nin Dios,” na nagpapasabong nin anong mas naenot, pero nakaaagid, na hula?
20 Sa bisyon ni Ezequiel, pagkalaglag kan kaburunyugan ni Gog, an mga gamgam asin layas na hayop inagda sa sarong bangkete! Hinale ninda sa ibabaw kan daga an mga bangkay paagi sa pagkakan sa gadan na mga kaiwal ni Jehova. (Ezequiel 39:11, 17-20) An sumunod na mga tataramon ni Juan ipinasasabong nin buhay an mas naenot na hulang iyan: “Nakaheling man ako nin sarong anghel na nagtitindog sa aldaw, asin sia nagkurahaw sa makosog na tingog asin nagsabi sa gabos na gamgam na naglalayog sa kahiwasan: ‘Madia kamo, magtiripon kamo sa dakulang pamanggihan nin Dios, tanganing kakanon nindo an laman nin mga hade asin an laman nin mga kapitan asin an laman nin mga makosog na tawo asin an laman nin mga kabayo asin kan mga nakasakay sa sainda, asin an laman nin gabos, nin mga may libertad asin nin mga oripon patin kan saradit asin darakula.”—Kapahayagan 19:17, 18.
21. Ano an ipinaririsa kan (a) ‘pagtindog sa aldaw’ kan anghel? (b) bagay na an mga gadan iwawalat sa ibabaw kan daga? (c) lista kan mga an bangkay pababayaan na nahuhutad sa daga? (d) mga tataramon na “dakulang pamanggihan nin Dios”?
21 An anghel “nagtitindog sa aldaw,” sarong nakaaapod nin atension na kamugtakan tanganing maapodan an mga gamgam. Inaagda nia sinda na magin andam na magpakabasog sa laman kan mga gagadanon kan Guerrero-Hade asin kan saiyang langitnon na hukbo. An bagay na an mga gadan iwawalat sa ibabaw kan daga nagpaparisa na sinda magagadan na may kasopganan sa atubangan nin publiko. Kapareho ni Jezabel kan suanoy, dai sinda tatawan nin kagalang-galang na lobong. (2 Hade 9:36, 37) An lista kan mga an bangkay pababayaan na nahuhutad nagpapaheling kun sairisay an lalaglagon: mga hade, kapitan, makokosog, may libertad, asin oripon. Daing libre. An pinakahuring gira kan rebeldeng kinaban na tumang ki Jehova hahaleon. Pakalihis kaini, mayo na nin dai mapamugtak na dagat nin ribaraw na katawohan. (Kapahayagan 21:1) Ini an “dakulang pamanggihan nin Dios,” ta si Jehova an nag-aagda sa mga gamgam na makikabtang dian.
22. Paano sinusumaryo ni Juan an dalagan kan ultimong ralaban?
22 Sinumaryo ni Juan an dalagan kan ultimong ralaban: “Asin naheling ko an mabangis na hayop asin an mga hade kan daga asin an saindang mga hukbo na nagkatiripon tanganing makipaglaban sa saro na nangangabayo asin sa saiyang hukbo. Asin dinakop an mabangis na hayop, asin kaibanan kaiyan an falsong propeta na naggibo sa atubang kaiyan nin mga tanda tanganing dayaon idtong mga nag-ako kan tanda kan mabangis na hayop asin idtong mga nagsasamba sa ladawan kaiyan. Mantang buhay pa, sinda iinapon sa danaw nin kalayo na naglalaad nin asupre. Alagad an iba pa ginaradan sa halabang espada kan saro na nangangabayo, na nagluluwas sa saiyang ngoso. Asin an gabos na gamgam nagkabarasog sa laman ninda.”—Kapahayagan 19:19-21.
23. (a) Sa anong sentido na an “ralaban kan dakulang aldaw nin Dios na Makakamhan sa gabos” pinaglabanan sa “Armagedon”? (b) Anong patanid an dai nakuyog kan “mga hade kan daga,” asin ano an resulta?
23 Pakabubuan kan ikaanom na mangko kan kabangisan ni Jehova, ibinareta ni Juan na “an mga hade sa daga asin sa bilog na kinaban” tiniripon nin sa demonyong propaganda sa “ralaban kan dakulang aldaw nin Dios na Makakamhan sa gabos.” Ini paglalabanan sa Armagedon—bakong literal na lugar, kundi an panglobong situwasyon na naghahagad kan paggibo kan paghokom ni Jehova. (Kapahayagan 16:12, 14, 16, King James Version) Ngonyan naheheling na ni Juan an hampangan na mga hukbo. Yaon duman, nakikihampang tumang sa Dios, an gabos na “mga hade kan daga asin an saindang mga hukbo.” Sinda may katagasan nin payong nagsayuma na pumasakop sa Hade ni Jehova. Tinawan nia sinda nin patanid sa ipinasabong na mensahe: “Maghadok sa aki, tanganing [si Jehova] dai maanggot asin dai kamo mapara.” Huling dai nagpasakop sa paghade ni Cristo, kaipuhan sindang magadan.—Salmo 2:12.
24. (a) Anong paghokom an gigibohon sa mabangis na hayop asin falsong propeta, asin sa anong sentido na sinda “buhay pa”? (b) Taano ta seguradong piguratibo an “danaw nin kalayo”?
24 An may pitong payo, sampulong sungay na mabangis na hayop hale sa dagat, na nagrerepresentar sa politikal na organisasyon ni Satanas, paparaon, asin kaiba kaiyan an falsong propeta, an ikapitong kapangyarihan pankinaban. (Kapahayagan 13:1, 11-13; 16:13) Mantang “buhay pa,” o nagpupunsionar pa sa saindang sararong pagtumang sa banwaan nin Dios digdi sa daga, sinda iaapon sa “danaw nin kalayo.” Ini daw literal na danaw nin kalayo? Bako, kun paanong an mabangis na hayop asin an falsong propeta bakong literal na mga hayop. Imbes, iyan simbolo nin kompleto, pangultimong kalaglagan, lugar na dai na nin balikan. Digdi iaapon sa huri an kagadanan asin Hades, saka an Diablo mismo. (Kapahayagan 20:10, 14) Tunay na iyan bakong impiernong may kalayo para sa daing sagkod na pagpasakit sa mga maraot, ta an mismong ideya nin siring na lugar makababalde para ki Jehova.—Jeremias 19:5; 32:35; 1 Juan 4:8, 16.
25. (a) Sairisay an mga “ginaradan sa halabang espada kan saro na nangangabayo”? (b) Lalaoman daw niato na an siisay man sa “ginaradan” bubuhayon liwat?
25 An gabos na iba pa na bakong direktang kabtang nin gobyerno pero dai nagsosolsol na kabtang kan maraot na kinaban na ini nin katawohan “ginaradan sa halabang espada kan saro na nangangabayo.” Ipahahayag sinda ni Jesus na maninigo sa kagadanan. Mantang sa kaso ninda dai nasasambitan an danaw nin kalayo, lalaoman daw niato na sinda bubuhayon liwat? Mayo nin sinasabi sato na an mga gagadanon kan Hokom ni Jehova sa panahon na iyan bubuhayon liwat. Arog kan sabi mismo ni Jesus, an gabos na bakong “karnero” maduman sa “daing katapusan na kalayo na inandam para sa Diablo asin sa saiyang mga anghel,” an boot sabihon, “sa pagkaparang daing katapusan.” (Mateo 25:33, 41, 46) Tinatapos kaini an “aldaw nin paghokom asin kalaglagan kan maraot na mga tawo.”—2 Pedro 3:7; Nahum 1:2, 7-9; Malaquias 4:1.
26. Isabi sa halipot an resulta kan Armagedon.
26 Sa paaging ini, an bilog na daganon na organisasyon ni Satanas matatapos. An “dating langit” nin politikal na pamamahala nakalihis na. An “daga,” an garo baga permanenteng palakaw na itinogdok ni Satanas sa nag-aging mga siglo, ngonyan biyo nang nalaglag. An “dagat,” an masa nin maraot na katawohan na tumang ki Jehova, mayo na. (Kapahayagan 21:1; 2 Pedro 3:10) Alagad ta ano an tagama ni Jehova para ki Satanas mismo? Sinabi sato ni Juan.