An Ultimong Paghokom

“KUN ika magadan an saimong kalag padudusahan nin solo; iyan magigin impierno para kaiyan: pero sa aldaw nin paghokom an saimong hawak masaro sa saimong kalag, dangan magkakaigwa ka nin dobleng impierno, an saimong kalag manunuro nin dugo, asin an saimong hawak mapapano nin makuring kasakitan.”

AROG kaini an pagkaladawan kan pastor kan ika-19 siglo na si C. H. Spurgeon sa punto-de-vista kan klero sa aldaw nin paghokom asin sa mga pagsakit kan mga kondenado. An Italianong pintor na si Michelangelo may nakaaagid na makatatakot na paniniwala, arog kan maheheling sa ipininta niang “An Ultimong Paghokom” (na an sarong kabtang ipinaheheling sa itaas), sa lanob kan kapilyang Sistine sa Roma. An The New Encyclopædia Britannica nagsasabi manongod sa ipinintang ini: “An Cristo sa Paghokom sarong nandedenunsiar na dios imbes na Kristianong paraligtas, na mas tinatawan nin atension an pagkondenar sa rasa nin tawo kisa pagsabat kan mga mapalad sa langit.”

Doktrina kan Kakristianohan

Kan nakaaging mga siglo, an aldaw nin paghokom asin impiernong may kalayo paboritong mga tema para sa mga sermon. Gikan sa saindang mga pulpito, an mga pastor na arog ni C. H. Spurgeon nagtaram sa makosog asin bombastikong paagi na may mga paglaladawan pa kan makatatakot na mga padusang naghahalat sa mga parakasala. Ngonyan, an siring na mga sermon bihira nang madangog. Pero an impiernong may kalayo asin an ultimong paghokom sagkod ngonyan opisyal na mga katokdoan kan kadaklan na iglesya.

An kadaklan na relihiyon sa Kakristianohan minaoyon sa katokdoan na Romano Katoliko na an mga paghokom nin Dios may duwang tangga. Enot, yaon an “partikular na paghokom.” Pagkagadan nin tawo, an ipinamumugtak na inmortal niang kalag tolos na hinohokoman asin idinidestino sagkod lamang magsalang sa impierno o sa langit.a Dangan maabot an ultimo, o pankagabsan, na paghokom sa katapusan kan panahon na sa panahon na iyan an hawak kan mga gadan bubuhayon liwat asin isasaro liwat sa saindang inmortal na kalag.

Sa aldaw na ini nin paghokom, an mga kalag sa langit magdadanay duman asin isasaro liwat sa mga hawak na ginibong daing kalapaan. An mga nagsasakit sa impierno magdadanay man duman, asin an saindang kalag isasaro man sa binuhay liwat, daing kalapaan na mga hawak. Sono sa nagkapira, ginigibo kaining mas makolog an saindang pagsakit. An mga buhay pa bilang tawo dai magagadan. Sinda hohokoman mantang buhay pa asin maduman, “hawak asin kalag,” diretso sa langit o impierno.

Huli sa posibilidad na magtios nin dai ikasabing padusa sa impiernong may kalayo an bilog na tema kan ultimong paghokom sa kamot ni Jesu-Cristo nagin makatatakot na isip-isipon. Huli kaini, mapapangalas daw kamong maaraman na, sa katotoohan, an mga paghokom nin Dios parateng ginigikanan nin kagayagayahan asin na an Aldaw nin Paghokom magigin saro sa pinakamaogmang panahon sa bilog na kasaysayan nin tawo? Paano ini mangyayari?

[Mga Nota sa Ibaba]

[Picture Credit Line sa pahina 3]

Random/Sipa Icono