Sambahon an Siisay na Dios?

BAKONG arog nin mga hayop, kitang mga tawo may kapasidad na sumamba. Ini kaiba kan satong naturalesa poon pagkamundag. Igwa man kita nin moral na sentido, sarong konsensia na magiya sato sa kun ano an tama asin kun ano an sala. Sa laen-laen na paagi kita gabos nagsusunod sa konsensiang iyan, asin sa paggibo kaiyan, dakol an naglalaom sa sarong dios o mga dios para sa giya.

Sa nakaaging saro o duwang siglo, an nagkapirang kinabanon na intelektuwal kinokontra an pag-eksister nin sarong makakamhan sa gabos na Dios asin Kaglalang. Kan 1844, ipinahayag ni Karl Marx an relihiyon na “opyo kan banwaan.” Pagkatapos, pinalataw ni Charles Darwin an teoriya nin ebolusyon. Dangan nagdatong an rebolusyon na Bolshevik. Sa Sirangan na Europa, an ateismo nagin opisyal na palakaw kan estado, asin sinabi na an relihiyon mapapara kaiba kan kapag-arakian nin 1917. Alagad ta dai mababago kan mga ateistang idto an pagkagibo sa tawo. Ini maririsa sa paglataw liwat nin relihiyon sa Sirangan na Europa ngonyan.

Minsan siring, arog kan sabi kan Biblia, dakol na “inaapod na ‘mga dios,’ baga man sa langit o sa daga, kun paanong igwa nin dakol na ‘mga dios’ asin dakol na ‘mga kagurangnan.’” (1 Corinto 8:5) Sa nag-aging mga panahon sinamba nin katawohan an kadakol na dios. May mga dios sa pangangaki, sa pagkamoot, sa guerra, asin sa arak saka maribok na pag-oroogma. Sa relihiyon sanang Hindu minilyon an dios.

Tuminubo an trinidad na mga dios sa Babilonya, Asiria, asin Egipto, saka sa kadagaan na Budhista. An Kakristianohan igwa man nin “banal” na Trinidad. An Islam, sa pagsikwal sa Trinidad, “mayo nin dios kundi si Allah.” Saro pa, minsan an mga nagtutuya sa ideya nin dai naheheling, makakamhan sa gabos na Dios may sadiri man na mga dios. Halimbawa, sa Filipos 3:​19, sinasabi kan Biblia manongod sa mga tawo na nasiod nin materyalistikong mga paghihingoa: “An saindang dios iyo an saindang tulak.”

An kadaklan na tawo sinasamba an dios o mga dios kan nasyon o sosyedad na dian sinda namundag. Ini nagpapalataw nin mga hapot. An gabos daw na klase nin pagsamba pasiring sa saro sanang lugar​—na siring sa mga dalan patukad sa alitoktok nin bukid? O an dakol daw sa mistikong mga dalan nin relihiyon pasiring sa kapahamakan​—na siring sa mga dalan pasiring sa ampas? Igwa daw nin dakol na tamang paagi nin pagsamba o saro sana? Igwa daw nin dakol na dios na maninigong omawon o igwa daw nin saro sanang Makakamhan sa gabos na Dios na maninigong tawan kan satong daing kasalak na debosyon asin pagsamba?

An Paglataw nin Falsong mga Dios

An mga hapot sa enotan maninigong siyasaton niato nin maingat. Taano? Huli ta an kagurang-guranging autoridad manongod sa relihiyon, an Biblia, nagsasaysay kun paano an sarong falsong dios, na naghihiro paagi sa sarong halas, sinugotan an enot niatong mga apoon pasiring sa dalan na kapahapahamak. Naeeksperyensiahan niato an makamomondong mga bunga kan saiyang estratehiya sagkod ngonyan. (Genesis 3:​1-13, 16-19; Salmo 51:5) Si Jesus, “an Aki nin Dios,” inapod an rebeldeng dios na iyan na “poon kan kinaban na ini.” An saro sa mga apostol ni Jesus inapod siang “dios kan palakaw na ini nin mga bagay.” (Juan 1:34; 12:31; 16:11; 2 Corinto 4:4) Sa Kapahayagan kapitulo 12, bersikulo 9, inaapod siang “an enot na halas, an inaapod Diablo asin Satanas, na nandadaya sa bilog na ineerokan na daga.” An pankinaban na imperyo nin falsong relihiyon nasa pamomogol ni Satanas.

Si Satanas pangenot na paradaya. (1 Timoteo 2:14) Tuso niang kinakasangkapan an natural na kamawotan nin tawo na sumamba paagi sa pagpalakop sa dakol na klaseng dios​—mga espiritu nin apoon, idolo, imahen, Nuestra Señora. Sinusuportaran pa ngani nia an pagsamba sa mga dios na tawo, arog baga nin makapangyarihan na namomoon, mapangganang mga heneral, asin mga sikat na artista asin parakawat. (Gibo 12:​21-23) Marahay na kita magmaan, na desididong hanapon asin sambahon an solamente asin tunay na Dios, na sa katotoohan “bakong harayo sa lambang saro sa sato.”​—Gibo 17:27.

Kun siring, siisay an solamenteng Dios na ini na maninigo niatong sambahon? Mga 3,000 na taon na an nakaagi, inaapod sia kan salmista sa Biblia na “Kaharohalangkawe . . . , Makakamhan sa gabos na Saro . . . , sakuyang Dios, na sakuyang pananarigan,” asin inapod sia sa saiyang bantog na ngaran​—“Jehova.” (Salmo 91:​1, 2) Bago kaini, si Moises nagsabi manongod sa saiya: “Si Jehova na satuyang Dios sarong Jehova.” (Deuteronomio 6:4) Asin si propeta Isaias kinotar mismo an Dios na nagsasabi: “Ako si Jehova. Iyan an sakong ngaran; asin dai ko itatao sa iba an sakong kamurawayan, ni an sakong kaomawan sa mga imahen.”​—Isaias 42:8.

Katuyohan ni Jehova Dios na haleon sa saiyang ngaran an gabos na langhad na iminantsa dian kan falsong dios na si Satanas. Ipinag-ilustrar nia kun paano nia gigibohon ini kan taon 1513 B.C.E., kan gamiton nia an propeta niang si Moises sa pagkalda kan banwaan nin Israel sa pan-aapi nin Egipto. Sa okasyon na idto, ikinonektar nin Dios an saiyang ngaran na Jehova sa mga tataramon na: “Patutunayan kong ako an patutunayan kong ako.” (Exodo 3:​14, 15) Ibibindikar nia an saiyang sadiri tumang sa Faraon nin Egipto, pero enot sinabihan nia an maraot na poon na idto: “Huli kaini pinapagdanay taka, tanganing ipaheling ko saimo an sakong kapangyarihan asin tanganing an sakong ngaran ikapahayag sa bilog na daga.”​—Exodo 9:16.

An situwasyon nakaaagid ngonyan. Arog ni Faraon kan suanoy, an dios kan kinaban na ini, si Satanas, tinutumang si Jehova Dios asin tusong nakikilaban sa espirituwal tumang sa mga tawo na namomoot sa katanosan asin katotoohan. (Efeso 6:​11, 12, 18) Katuyohan liwat nin Dios na pamurawayon an saiyang ngaran sa atubangan kan pagtumang ni Satanas. Minsan siring, bago ipaheling an saiyang kapangyarihan paagi sa paglaglag ki Satanas asin sa gabos niang gibo, isinusugo ni Jehova an saiyang mga parasamba na ipahayag an Saiyang ngaran sa bilog na daga. An pananaksing ini sa saiyang ngaran mahalagang kabtang nin tunay na pagsamba.

Tama sana, sinabi mismo nin Dios na an mga parasambang ini magigin saiyang mga saksi, mga Saksi ni Jehova, “an banwaan na ginibo ko para sa sakuyang sadiri, tanganing isaysay ninda an sakong kaomawan.” (Isaias 43:​10-12, 21) Paano ninda isinasaysay an kaomawan ni Jehova? Sinda naghuhulit asin nagtotokdo sa publiko asin sa harong-harong, na ipinahahayag an maogmang bareta na an Kahadean ni Jehova, na paghahadean kan saiyang Aki, si Jesu-Cristo, matao nin daing sagkod na mga bendisyon sa makinuyog na katawohan sa dagang ini. Kaya, saindang sinasamba an Dios na “dai nin ontok,” arog kan tunay na mga Kristiano kan enot na siglo. (Gibo 5:42; 20:​20, 21)