An Biblia—Tataramon nin Dios o nin Tawo?

Kasumpay kan Kapitulo 8: Siensia: Napatunayan daw Kaiyan na Sala an Biblia?

An Katawohan Dai Nalingaw

37, 38. Paano ipinaheheling nin sarong sientista na, sono sa ebidensia, an Baha posibleng nangyari, asin paano niato naaaraman na iyan talagang nangyari?

³⁷ An propesor sa geolohiya na si John McCampbell sarong beses nagsurat: “An pundamental na mga pagkakalaen kan katastropismo [Baha] kan Biblia asin kan ebolusyonaryong unipormitaryanismo bakong sa totoong impormasyon nin geolohiya kundi sa mga interpretasyon sa impormasyon na iyan. An pinipiling interpretasyon dependeng gayo sa ginikanan asin dating mga paghona kan indibiduwal na estudyante.”

³⁸ Na an Baha talagang nangyari maheheling sa bagay na nungka iyan na nalingawan nin katawohan. Sa bilog na kinaban, sa mga lugar na magkakarayo arog kan Alaska asin mga Isla sa Timog na Dagat, may suanoy na mga estorya manongod dian. An propio, bago-ki-Columbus na mga sibilisasyon sa Amerika, saka an enot na mga tawo sa Australia, gabos may mga estorya manongod sa Baha. Minsan ngani nagkakalaen sa detalye an pirang estorya, an pundamental na bagay na nalantopan an daga asin pipira sanang tawo an naligtas sa sarong sakayan na gibo nin tawo minaluwas sa haros gabos na bersion. An solamenteng paliwanag sa siring kalakop na paniniwala iyo na an Baha nangyari sa kasaysayan.a

39. Ano pang dugang na pruweba an naheling niato sa bagay na an Biblia tataramon nin Dios, bakong nin tawo?

³⁹ Kaya, sa mahahalagang kabtang an Biblia kaoyon nin modernong siensia. Kun nagkakatumang an duwa, kustionable an ebidensia kan mga sientista. Kun sinda nagkakaoyon, parate na eksaktong marhay an Biblia kaya napipiritan kitang maniwala na nakua kaiyan an impormasyon sa sarong labi sa tawong intelihensia. Tunay nanggad, an pagkakaoyon kan Biblia sa probadong siensia nagtatao nin dugang pang ebidensia na iyan tataramon nin Dios, bakong nin tawo.

[Nota sa Ibaba]