Siisay an Pinapaboran nin Dios?
KITA gabos boot na magustohan kan satong kairiba. Para sa sarong Kristiano an mas makosog na kamawotan paboran nin Dios. Manongod ki Jehova Dios, sinasabi sa Salmo 84:11: “Pabor asin kamurawayan an saiyang itinatao. Si Jehova mismo dai isasayuma an ano man na marahay sa mga naglalakaw sa katotoohan.” Kan mamundag si Jesus, an magayagayang kurahaw kan langitnon na mga anghel nanuga nin “katoninongan sa daga para sa mga tawong pinapaboran nia!”—Lucas 2:14, Moffatt.
Alagad ta siisay an pinapaboran nin Dios? Kapareho daw kan sa tawo an mga pamantayan nin Dios? Siyempre, bako, arog kan ipinaheling kan paliwanag sa sinusundan na artikulo. An totoo, mantang an mga Kristiano sinasadol na “magin kamong mga paraarog sa Dios,” an kada saro sato marahay na maghapot, Pinapaboran ko daw an mga pinapaboran nin Dios, o may tendensia daw akong sumunod sa kinabanon na mga pamantayan sa sakong paghusgar sa mga tawo? (Efeso 5:1) Tanganing kamtan an pabor asin pag-oyon ni Jehova, dapat na kita mag-ingat na helingon an mga bagay sa saiyang punto-de-vista.
An Mas Halangkaw na mga Pamantayan nin Dios
“An Dios daing ipinaoorog,” sabi ni apostol Pedro, “kundi sa lambang nasyon an tawo na natatakot sa saiya asin naggigibo nin katanosan saiyang inaako.” Saro pa, pinatunayan ni apostol Pablo na “ginibo [nin Dios] hale sa sarong tawo an gabos na nasyon kan mga tawo.” (Gibo 10:34, 35; 17:26) Kun siring, rasonableng isipon na an gabos na tawo pantay sa pagheling nin Dios ano man an saindang pisikal na mga karakteristiko. Mantang siring, bakong maninigo sa Kristiano na paboran nin sobra an saro huli sana ta an sarong iyan gikan sa sarong partikular na lugar o may sarong kolor nin kublit o hale sa ibang rasa. Imbes, marahay na arogon nia an saiyang Arogan, si Jesu-Cristo, na manongod saiya pati an mga kaiwal nag-admitir na sia daing ipinaorog.—Mateo 22:16.
An mga tataramon sa Ingles na “skin-deep” (sa literal na Bicol, “sagkod sana sa kublit”) kun beses ginagamit para sa sarong bagay na hababaw o bakong mahalaga. An kolor nin kublit siring sana kaiyan; iyan sagkod sana sa kublit. An kolor kan kublit nin saro dai nagpaparisa kan saiyang personalidad o panlaog na mga kuwalidad. Pag-abot sa pagpili kun siisay an makaiibaiba, makakaiba sa pagkakan, o aabrasahon, maninigo na bakong an kolor nin kublit an partikular niatong helingon. Girumdoma, an daraga na nakainspirar kan nagkapira sa pinakamagayon asin romantikong bersong isinurat nagsabi manongod sa saiya man sana: “Ako maitom na daraga, pero magayon, . . . ako kayumanggi, huli ta tinorohokan ako kan aldaw.” (Awit ni Salomon 1:5, 6) An rasa o kolor pareho bakong tamang basihan sa pagpaheling nin pabor. An mas mahalaga kun baga an saro natatakot sa Dios asin naggigibo nin katanosan.
Ano an saboot nin Dios manongod sa pagkaigwa nin materyal na kayamanan? Sa gabos na namomotan asin pinapaboran nin Dios, an saiyang Aki, si Jesu-Cristo, an pangenot. Pero, kan yaon digdi sa daga, si Jesus “dai nin mahihigdaan.” (Mateo 8:20) Mayo sia nin sadiring mga daga, harong, oma, namumungang kahoy, o hayop. Pero, tinawan sia nin onra ni Jehova asin ilinangkaw sia sa sarong katongdan na mas halangkaw sa gabos pang iba sa uniberso apuwera sana sa Dios.—Filipos 2:9.
Si Jesu-Cristo pinaboran nin Dios huli ta sia mayaman bakong sa materyal na mga bagay kundi sa marahay na mga gibo. (Ikomparar an 1 Timoteo 6:17, 18.) Sinadol nia an saiyang mga parasunod: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Kundi, magtipon kamo nin mga kayamanan sa langit, na duman an polilya ni takla dai nakararaot, asin an mga parahabon dai nananalakat asin dai naghahabon.” (Mateo 6:19, 20) Kaya, imbes na magpaheling sana nin pabor sa mga mayaman sa mga rogaring sa kinaban na ini, an mga Kristiano dai magpapalaenlaen basado sa kinabanon na mga rogaring. Hahanapon ninda an mga mayaman sa Dios baga man sinda mayaman o dukha sa materyal na paagi. Nungkang paglingawan na “pinili nin Dios an mga dukha dapit sa kinaban tanganing magin mayaman sa pagtubod asin mga paramana kan kahadean.” (Santiago 2:5) Kun pinapagdadanay nindo an punto-de-vista nin Dios, nungka kamong mahoholog sa usong ugale nin pagpabor o paglanalana sa mayayaman sa materyal.
Kun dapit sa edukasyon, malinaw na ipinaheheling kan Biblia na sinasadol kita nin Dios na hanapon an kaaraman asin kadonongan asin na si Jesu-Cristo an kadarudakulaing paratokdo na naglakaw sa ibabaw kan daga. (Talinhaga 4:7; Mateo 7:29; Juan 7:46) Alagad ta bakong kinabanon na kadonongan o edukasyon an nakakukua kan pabor nin Dios. Al kontraryo, sinasabi sato ni Pablo na “bakong dakol na madonong sa laman an inapod, . . . kundi pinili nin Dios an mga rungaw sa kinaban, tanganing sopogon nia an mga madonong.”—1 Corinto 1:26, 27.
Pinapaboran nin Dios an mga edukado, bakong sa sekular na mga leksion na itinotokdo sa mga kolehiyo asin unibersidad, kundi sa “malinig na tataramon” nin katotoohan na yaon sa saiyang Tataramon, an Biblia. (Sofonias 3:9) An totoo, si Jehova mismo tinotokdoan an saiyang banwaan ngonyan paagi sa sarong edukasyonal na programa na sagkod sa hararayong parte kan daga. Siring sa ihinula ni propeta Isaias, an mga tawo hale sa gabos na nasyon minasimbag paagi sa pagsabi: “Magtukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.” Kaya, imbes na pamurawayon an sekular na edukasyon, an hahanapon nin mga Kristiano an mga pinatutunayan paagi sa saindang mga tataramon asin gibo na sinda talagang “mga tawong tinokdoan ni Jehova.” Sa paggibo kaiyan, kakamtan ninda an ‘abundang katoninongan’ na itinatao nin Dios.—Isaias 2:3; 54:13.
Puwede Niatong Kamtan an Pabor nin Dios
Iyo, an mga pamantayan nin Dios sa pagtao nin pabor sa iba laen na marhay kan sa tawo. Minsan siring, kaipuhan na kita maghingoang pagiya sa saiyang mga dalan kun boot niatong magkamit nin pabor sa saiyang pagheling. Iyan nangangahulogan na dapat na makanood kitang helingon an iba sa punto-de-vista nin Dios asin bakong sono sa mga pamantayan nin tawo, na tibaad impluwensiado nin kapasloan asin kaanggotan na daing binabasaran. Paano niato magigibo iyan?
Sinisiyasat ni Jehova Dios an puso nin tawo asin pinapaboran an mga nagpapaheling nin mga kuwalidad na arog nin pagkamoot, karahayan, kabootan, asin pakatios. Maninigong gibohon man niato an siring. (1 Samuel 16:7; Galacia 5:22, 23) Kaipuhan na helingon niato an tawo sa laog, sagkod sa makakaya niato bilang tawo, asin bakong an kolor kan kublit nia o an saiyang ginikanan na rasa. Imbes na hanapon an mayayaman sa materyal na mga bagay, marahay na isaisip niato an pagheling nin Dios sa kayamanan asin pagmaigotan na “magin mayaman sa marahay na mga gibo, magin matinao, andam na magwaras.” (1 Timoteo 6:18) Tanganing kamtan an pabor nin Dios, dapat na ipadagos niato an paghanap nin tamang kaaraman sa Dios asin sa saiyang Aki, si Jesu-Cristo, na nagigin edukado sa malinig na tataramon nin katotoohan. (Juan 17:3, 17) Sa paggibo nin siring, kita mapabibilang man sa mga pinapaboran nin Dios.