Taano ta Dapat na Maglingkod ki Jehova?
“AN ALDAW ni Jehova haranihon na! An ‘dakulang kahorasaan’ harani na, asin dai kamo makaliligtas kun dai nindo paglingkodan an Dios.” Kun may magsabi kaiyan saindo, ano an reaksion nindo?—Sofonias 2:2, 3; Mateo 24:21.
Totoo, maninigong perming isaisip niato an aldaw ni Jehova, asin an pakaligtas sa nagdadangadang nang dakulang kahorasaan depende nanggad sa maimbod na paglilingkod sa Dios. Pero an mga katunayan daw na ini an maninigong magin pangenot na mga rason kun taano ta itinatao niato an banal na paglilingkod ki Jehova Dios? Taano ta naglilingkod kamo ki Jehova?
Pangangaipo nin Tamang Motibo
Kun an sarong tawo dai naglilingkod sa Dios na may tamang motibo, tibaad pumondo sia kun an saiyang mga linalaoman dai mangyari sa laog nin sarong talaan na panahon. Halimbawa, an nagkapirang tawo naglaom na mabuwelta si Jesu-Cristo kan 1843 o 1844, mga petsa na luminihis na mayo nin nangyari sa saindang mga paglaom. Interesante dapit digdi an sinurat ni George Storrs, kagpublikar kan Bible Examiner asin dai nahaloy nakamidbid ni Charles Taze Russell, an enot na presidente kan Watch Tower Society. Sa Bible Examiner kan Setyembre 1846, nagsurat si Storrs:
“An obligasyon na paglingkodan an Dios mas halangkaw an basihan kisa sa katunayan sana na an aldaw patapos na. . . . An reaksion na mangyayari kun an ’46 asin ’47 lumihis sana, na dai naheheling an pagdatong, magigin grabe kisa pinaghonahona. Pinatutunayan ini nin eksperyensia—an boot kong sabihon an eksperyensia kan ’43 asin ’44. Haen na an mayoriya kaidtong naghingako na ‘napahiro na paglingkodan an Dios’ siring sa maninigo paagi sa kurahaw na panahon na para sa pagdatong kan Kagurangnan? Asin an aniningal nagsasabi—HAEN!!! Haros saro na sana sa kada sampulo sa sainda an nanompongan na nagtutubod pa tanganing tawan nin onra an saindang pagigin Kristiano. Taano ta dai? Pinahiro sinda nin salang motibo. An saindang kapasloan an pangenot na naakit asin napukaw. Garo sinda an parakasala na naghohonang haranihon na sa kagadanan sa higdaan nin helang o sa sarong bagyo sa dagat. Kun sia kaipuhan na magadan, magigin sia Kristiano. Kun aram niang harayo sia sa peligro, sia magigin indiperente arog kan dati.”
Paglilingkod na May Tamang Motibo
An kapasloan asin pagkatakot sa kalaglagan tibaad magpahiro sa iba na gibohon an kabotan ni Jehova sa mekanikal na paagi. An iba tibaad naaakit na marhay sa paglaom na buhay sa Paraiso kaya sinda maglilingkod sa Dios huli sana sa rason na iyan. Alagad, kun an mga tawo na pangenot na napahihiro kan siring na motibo naghohona na an aldaw ni Jehova asin an dakulang kahorasaan bako pang haranihon na marhay, tibaad dai sinda magkainteres na paglingkodan nin maigot an Dios.
Siyempre, bako man paslo na mag-ogma sa mga panuga nin Dios asin sa ihinulang mga bendisyon. Boot nia na magin maogma kita dapit sa mga paglaom na nasa atubangan niato bilang mga parasunod kan saiyang Aki, si Jesu-Cristo. “Maggayagaya sa paglaom,” an sinabi ni apostol Pablo, na idinudugang: “Magtagal sa kasakitan. Magmaigot sa pamibi.” (Roma 12:12) Sinasabayan nin pamibi, “an kagayagayahan ni Jehova” nagtatabang sato na tagalan an mga pagbalo asin mapasensiang halaton an kaotoban kan mga panuga nin Dios. (Nehemias 8:10) Mientras tanto, kadakol kitang rason na paglingkodan si Jehova. Ano an nagkapira sa mga iyan?
Paninimbagan Asin Pribilehiyo
Bilang an Unibersal na Soberano, si Jehova angay sa asin naghahagad nin esklusibong debosyon. (Exodo 20:4, 5) Kaya an lambang Kristiano may pararehong sokol nin obligasyon sa Dios baga man an dakulang kahorasaan mapoon sa aga, sa sunod na taon, o haloy pa. Obligado sia na paglingkodan si Jehova na daing kapasloan huli sa pagkamoot sa Dios sa bilog niang puso, kalag, isip, asin kosog. (Marcos 12:30) An ibang enot na Kristiano naghona na an aldaw ni Jehova nagdadangadang na, pero an saindang linalaoman dai nangyari, asin nagkagaradan sinda na dai naheling an pangyayaring iyan. (1 Tesalonica 5:1-5; 2 Tesalonica 2:1-5) Minsan siring, kun sinda maimbod sagkod sa kagadanan, idtong mga linahidan na parasunod ni Cristo sa katapustapusi nag-ako nin balos na pagkabuhay liwat sa langit.—Kapahayagan 2:10.
An bautisadong mga Saksi ni Jehova maninigong maimbod na maglingkod saiya huli ta gikan sa boot nindang inako an obligasyon na gibohon an saiyang kabotan. Isip-isipa nanggad! Arog sa banal na mga anghel, puwede tang gibohon an kabotan kan Unibersal na Soberano. (Salmo 103:20, 21) Pinahalagahan nin marhay ni Jesus an siring na pribilehiyo na sia nagsabi: “An sakong kakanon iyo an sakong paggibo kan kabotan nia na nagsugo sako asin pagtapos kan saiyang gibohon.” (Juan 4:34) Kun igwa kita nin kaparehong espiritu, maigot niatong ipahahayag an mga pag-omaw ki Jehova asin isasabi sa iba an saiyang mga katuyohan, siring sa ihinahayag sa Kasuratan. Sa paaging ini, nagkakapribilehiyo man kita na tabangan an iba sa espirituwal. Asin sierto, an paggibo kan kabotan nin Dios huli sa pagkamoot sa saiya sarong magayonon na pribilehiyo, maski na kun noarin pa mapoon an aldaw ni Jehova.
An Pagpasalamat Nagmomotibar
An pagpasalamat sa pagkamoot nin Dios sa pagtagama kan pantubos na atang kan saiyang Aki maninigong magpahiro man sato na paglingkodan si Jehova. Sa sarong panahon kita suhay ki Jehova Dios huli sa kasalan. Alagad, si Jesus nagsabi: “An Dios namoot na gayo sa kinaban [nin katawohan] na itinao nia an saiyang aking bugtong, tanganing an lambang maggibo nin pagtubod sa saiya dai mapahamak kundi magkaigwa nin buhay na daing katapusan.” (Juan 3:16) Sa sadiring kabotan na ginibo ni Jehova an bagay na ini, siring sa isinurat ni Pablo: “Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato.” (Roma 5:8) An pagpasalamat sa kapahayagan na ini kan pagkamoot nin Dios maninigong magpahiro sato na paglingkodan sia nin bilog na puso.
An pag-apresyar sa espirituwal asin materyal na mga probisyon ni Jehova nagtatao sato nin orog pang rason na paglingkodan sia na may kaimbodan. An Tataramon nin Dios sarong eksaktong giya—sarong ilawan sa satong dalan. An mga publikasyon na itinatagama paagi sa “maimbod asin madonong na oripon” nagtatabang sato na ioyon an satong buhay sa banal na kabotan. (Mateo 24:45-47; Salmo 119:105) Asin huli ta inienot niato an Kahadean, si Jehova nagtatagama man sato sa materyal. (Mateo 6:25-34) Ipinaheheling daw nindo an saindong pag-apresyar sa mga bagay na ini?
An pagpasalamat sa itinao nin Dios na katalingkasan sa falsong relihiyon nagtatao sato nin saro pang rason na paglingkodan si Jehova na may kaimbodan. An relihiyosong patotot na Dakulang Babilonya “nagtutukaw sa dakol na katubigan,” na nangangahulogan nin “mga banwaan asin mga kadaklan asin mga nasyon patin mga tataramon.” (Kapahayagan 17:1, 15) Alagad, dai sia nagtutukaw sa mga lingkod ni Jehova, na relihiyoso na iniimpluwensiahan asin pinopogolan sinda. Halimbawa, dai ninda inaako an falsong relihiyosong doktrina na an kalag nin tawo inmortal. Aram ninda na an tawo linalang na “buhay na kalag,” na an mga gadan ‘mayo man lamang nin pakaaram,’ asin na magkakaigwa nin pagkabuhay liwat. (Genesis 2:7; Eclesiastes 9:5, 10; Gibo 24:15) Kaya dai sinda natatakot o nagsasamba sa mga gadan. An pagpasalamat daw sa siring na espirituwal na katalingkasan nagpapahiro saindo na tumangon an apostasiya asin magdanay sa dalisay na pagsamba ki Jehova?—Juan 8:32.
An pag-apresyar sa aroaldaw na suporta ni Jehova maninigong magpakosog sa satong determinasyon na paglingkodan sia na may kaimbodan. Ipinahayag kan salmistang si David: “Pag-omawon si Jehova, na sa aroaldaw dinadara an pasan para sa sato.” (Salmo 68:19) Sa iba pang lugar an salmista nagsabi: “Kun bayaan ako kan sakong ama asin kan sakong ina, si Jehova mismo an maampon sa sako.” (Salmo 27:10) Iyo, an sarong tawo na maimbod na naglilingkod ki Jehova puwedeng itao an saiyang piguratibong pasan, arog kan mga kahaditan asin mga pagbalo, sa Dios. Ipinaheheling daw nindo an saindong pag-apresyar sa dai nasusudyang tabang ni Jehova paagi sa paglilingkod saiya na may kaimbodan?—Salmo 145:14.
Pamurawayon si Jehova Asin an Saiyang Paghade
An pagmawot na pamurawayon si Jehova maninigong magpahiro man sato na paglingkodan sia. An mga linalang sa langit ilinaladawan na nagpapamuraway sa Dios sa mga tataramon na: “Angay ka, Jehova, na samong Dios, na mag-ako kan kamurawayan asin dangog patin kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.” (Kapahayagan 4:11) Si Hadeng David pinamuraway an Dios sa pagsabing: “Saimo, O Jehova, an kadakulaan asin an kakosogan asin an kagayonan asin an kamahalan patin an dignidad . . . Saimo an kahadean, O Jehova . . . An mga kayamanan asin an kamurawayan huli sa saimo, asin ika an kinakagurangnan kan gabos . . . O samuyang Dios, nagpapasalamat kami saimo asin inoomaw niamo an saimong mamurawayon na ngaran.” (1 Cronica 29:10-13) Bilang mga lingkod ni Jehova, dai daw niato namamatean na obligado kitang pamurawayon sia sa tataramon asin sa gibo mantang hinahalat an kaotoban kan saiyang mga panuga?—1 Corinto 10:31.
An makosog na pagmawot na magtaram manongod sa Kahadean nin Dios nagtatao sato nin saro pang dahelan na paglingkodan si Jehova. An siring kagayon na motibo marahay na ipinahayag sa mga tataramon kan salmista: “An gabos mong mga ginibo magrurukyaw sa saimo, O Jehova, asin an saimong mga maimbod mag-oomaw sa saimo. Sinda magtataram dapit sa kamurawayan kan saimong paghade, asin isasabi ninda an dapit sa saimong kapangyarihan, tanganing ipaisi sa mga aki nin mga tawo an saiyang makapangyarihan na mga gibo asin an kamurawayan kan kagayonan kan saiyang paghade. An saimong paghade sarong paghade sa gabos na panahon na daing katapusan, asin an saimong pagsakop sa bilog na panahon kan gabos na sunod-sunod na kapag-arakian.” (Salmo 145:10-13) An paghahayag kan mensahe kan Kahadean iyo an sugo sa Kristiano asin an pinakamahalagang trabaho na ginigibo sa satong panahon. (Mateo 24:14; 28:19, 20) Igwa daw kamo nin malaad na pagmawot na irukyaw si Jehova asin isabi sa iba an dapit sa saiyang Kahadean?
An pagpakangbanal sa ngaran ni Jehova asin pagbindikar sa saiyang soberaniya maninigong magin siring kaiyan kahalaga sato na boot niatong paglingkodan sia na may kaimbodan. Puwede kitang mamibi para sa pagpakangbanal kan ngaran ni Jehova asin para sa pagbindikar kan saiyang soberaniya. (Mateo 6:9) Puwede kitang humiro oyon sa satong mga pamibi paagi sa pakikakabtang nin regular sa Kristianong ministeryo asin paagi sa pagpalakop kan katotoohan dapit sa siring kahalagang mga bagay.—Ezekiel 36:23; 39:7.
An Kagayagayahan Asin Satispaksion
Paagi sa maimbod na paglilingkod ki Jehova, igwa kita kan satispaksion na napaoogma an saiyang puso asin napatutunayan na an Diablo putikon. Minsan ngani si Satanas nagsasabi nin sala na an mga tawo naglilingkod sa Dios huli sa paslong mga dahelan, an satong maimbod na paglilingkod ki Jehova, na ginigibo huli sa pagkamoot, nagpapatunay na an sahot kan paraduhagi sala. (Job 1:8-12) Nagtatao ini sato nin marahay na dahelan na gibohon an sinasabi sa Talinhaga 27:11: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.” Dugang pa, kun kita maimbod na naglilingkod ki Jehova sa ibong kan gabos na ginigibo ni Satanas na olangon kita, an satong pagdadanay sa integridad siertong makaparirigon sa mga kapagtubod.—Filipos 1:12-14.
An kagayagayahan asin satispaksion sa pakikakabtang sa espirituwal na pag-ani maninigong magpahiro man sato na paglingkodan si Jehova na may kaimbodan. Si Jesus nakanompong nin kaogmahan sa pagtabang sa mga tawo, nangorogna sa espirituwal na mga paagi. An sabi kan Mateo 9:35-38: “Si Jesus naglibot sa gabos na siudad asin baryo, na nagtotokdo sa saindang mga sinagoga asin naghuhulit kan maogmang bareta kan kahadean asin nagpapaomay sa gabos na klase nin kahelangan asin gabos na klase nin kamatean. Kan maheling nia an kadaklan naherak sia sainda, huli ta sinda maniwang asin nagkakaralagalag siring sa mga karnero na mayong pastor. Dangan sinabi nia sa saiyang mga disipulo: ‘Iyo, an anihon mahiwas, alagad an mga paraani kakadikit. Kaya makimaherak kamo sa Kagurangnan kan anihon na magsobol nin mga paraani sa saiyang anihon.’” Kun an pag-ani mahahaloy pa kisa linalaoman niato, magtatao ini sato nin orog pang oportunidad na magkamit nin kagayagayahan asin satispaksion sa pagtabang sa iba sa espirituwal. Saro man ining paagi na ipaheling an pagkamoot sa kataraed na linalaoman sa sato.—Mateo 22:39.
Taano ta Pinaglilingkodan Nindo an Dios?
Kinonsiderar niato an nagkapira sana sa kadakol na nakapahihirong rason na paglingkodan si Jehova na may kaimbodan. Marahay na mapagngayongayong horophoropon niato an satong personal na mga rason sa paglilingkod sa Dios, huli ta an kada saro sa sato maninimbag sa saiya. (Roma 14:12; Hebreo 4:13) Asin idtong mga nagpapadagos sa pagkaigwa sana nin paslong mga motibo dai magkakamit nin banal na pag-oyon.
Ano an malalaoman kun pangenot na pinagmamakolgan niato an pagpakangbanal kan ngaran ni Jehova asin naggigibo kita nin banal na paglilingkod sa Dios na bakong paslo an motibo? Tara, si Jehova bebendisyonan kita asin an satong ministeryo! (Talinhaga 10:22) Magkakamit man kita nin buhay na daing sagkod huli ta pinaglingkodan ta si Jehova na may kaimbodan.
[Ritrato sa pahina 9]
Rinibo an naglilingkod ki Jehova sa Hapon
[Ritrato sa pahina 10]
Paglilingkod ki Jehova sa Côte d’Ivoire
[Picture Credit Line sa pahina 8]
SIX SERMONS, ni George Storrs (1855)