An mga Akto nin Pagliligtas ni Jehova Ngonyan
AN BIBLIA sinasabi sato ini manongod ki Jehova: “Dakol nanggayod an mga kalamidad kan matanos, alagad sa gabos na iyan ililigtas sia ni Jehova” asin, “si Jehova tataong magligtas sa mga tawong may diosnon na debosyon hale sa pagbalo.”—Salmo 34:19; 2 Pedro 2:9.
Paano si Jehova minatabang sa saiyang banwaan kun sinda nasasakitan? Bakong paagi sa milagrosong pagpasibog sa mga puwersa nin naturalesa o paagi sa iba pang akto na lihis sa natural, arog kan iniisip nin dakol na tawo na kaipuhan niang gibohon, kundi paagi sa ibang puwersa na dai talaga nasasabotan kan kadaklan na tawo—an pagkamoot. Iyo, namomotan ni Jehova an saiyang banwaan, asin pinatalubo nia sa tahaw ninda an marigon na gayong pagkamoot sa kada saro na nagigibo nia para sa sainda an garo baga haros milagroso.—1 Juan 4:10-12, 21.
May tibaad mangatanosan na sa panahon nin emerhensia, an kaipuhan iyo an pagkakan, bolong, asin kagamitan—bakong pagkamoot. Siyempre, mahalaga an pagkakan, bolong, asin kagamitan. Minsan siring, si apostol Pablo nangangatanosan nin arog kaini: “Kun yaon sa sako an gabos na pagtubod tanganing mapabalyo an mga bukid, alagad mayo nin pagkamoot, ako dai nin halaga. Asin kun itao ko an gabos kong rogaring tanganing pakakanon an iba, asin kun idolot ko an sakong hawak, tanganing ako makapaghambog, alagad mayo ako nin pagkamoot, mayo man lamang ako nin pakinabang.”—1 Corinto 13:2, 3.
Parateng nakakabasa kita manongod sa ayudang estangkado sa mga doongan na nalalapa sana o kinakakan nin mga hayop na nagngangatngat mantang an mga tawong nangangaipo nagagadan huli sa helang asin gutom. O grabe pa, an siring na suplay tibaad mamugtak sa mga kamot nin mahanab asin daing konsensiang mga tawo na personal na naggaganansia dian. Kaya, sarong bagay an pagkakaigwa nin mga suplay, alagad tunay na laen na bagay na siertohon na an mga nasasakitan nakikinabang dian. Tunay na pagkamoot asin pagmakolog an puwedeng makaliwat sa kamugtakan.
Pagkamoot na Ginigibo
Kan Setyembre 1992, tinamaan kan Bagyong si Iniki an isla nin Kauai sa Hawaii, na 55,000 an populasyon. May darang doros na 210 kilometros por ora asin naghuhuyop sagkod sa 260 kilometros por ora, ginadan kaiyan an 2 katawo asin nalugadan an 98, rinaot an 75 porsiento kan mga harong, binayaan na mayong harong an 8,000 katawo, asin nagcausa nin kinakarkulong $1 bilyon na halaga nin naraot. Kaibanan sa mga nag-iistar sa sadit na islang ini an kisuerra 800 na Saksi ni Jehova sa anom na kongregasyon. Ano an nagin kamugtakan ninda?
Bago aktuwal na tuminama si Iniki, an mga magurang kan kongregasyon, sa pagdirehir kan nagbibiyaheng paraataman, kinontak na an gabos na miembro kan mga kongregasyon sa pagsierto na ligtas asin tiwasay sinda, na andam para sa pagsalakay. An siring na mamomoton na pangangataman nagin paagi na malikayan an grabeng pagkalugad o kagadanan sa tahaw kan mga Saksi.—Ikomparar an Isaias 32:1, 2.
Minsan ngani naraot na gayo an komunikasyon asin transportasyon, an tolong representante kan sangang opisina kan Watch Tower Bible and Tract Society sa Honolulu kabale sa mga pinakaenot na nag-abot sa lugar pagkatapos kan bagyo, na tinawan nin espesyal na pagtogot kan depensa sibil na lumayog pa-Kauai. Tolos-tolos, kinontak ninda an mga Saksi sa lokal asin, kan sumunod na aga, inorganisar an miting tanganing planohon an paagi para sa ayuda. Guminibo nin komite para sa ayuda sa pagsiyasat sa mga pangangaipo asin sa pagkua nin kinakaipuhan na materyales paagi sa sangang opisina sa Honolulu. Sa beinte-kuwatro oras na pagtrabaho, giniyahan ninda an trabahong pagkua nin mga suplay para sa mga nangangaipo saka paglinig patin paghirahay kan mga harong na naraot.
An mga Saksi sa ibang mga isla tuminabang man tolos-tolos sa saindang mga tugang na nangangaipo. Pakabukasi tolos kan aero puerto sa Kauai, 70 Saksi an luminayog tanganing tumabang. Ipinadara an mga suplay na ayuda na nagkakahalagang $100,000, kabale na an mga generator, saradit na kalan, ilawan, asin pagkakan. An saro sa mga Kingdom Hall sa isla ginamit na bodega; pero, may pagkatakot na tibaad habonan iyan. Dangan may pirang trak kan Hukbo na luminaog sa paradahan kan Kingdom Hall, asin naghapot an mga nagmamaneho kun puwede sindang makiparada kan saindang mga trak duman. An mga soldados na nagbantay tanganing protehiran an mga trak nakahale man kan problema nin paghabon sa mga suplay na ayuda.
Dinara kan mga tugang an mga generator sa kada harong, na pinaaandar iyan sa kada harong sa laog nin duwa o tolong oras sa pagtabang sa mga tawo na padagos na magamit an saindang mga freezer. Nagpadara nin grupo-grupong mga tugang sa laen-laen na harong sa pagtabang na maglinig asin maghirahay kan danyos. Kan sinda magtrabaho sa harong kan sarong tugang na babae na an agom na lalaki makuring kinontra sia kan nakaagi, napahirong gayo an agom na lalaki na an naginibo na sana nia mag-obserbar asin maghibi. An sarong bisita na hale sa kontinente na naheling na nagtatrabaho an saro pang grupo nin mga Saksi naghangang marhay sa saindang gawe asin organisasyon na dinolok nia sinda asin hinapot kun ano an guminibo sainda na napapalaen na marhay. Kan ipaliwanag nin sarong tugang na lalaki na iyan huli sa saindang pagkamoot sa Dios asin sa saindang mga kapwa Kristiano, an lalaki nagsimbag: “Paano ko mamimidbid an Dios?” (Mateo 22:37-40) Dangan idinugang nia: “Organisado kamong marhay kaya seguro may sasabihan na kamong maghalat sa sako sa pag-uli ko sa Florida!”
Sa kabilogan, an mga Saksi ni Jehova nagtabang sa paglinig asin paghirahay nin 295 harong sa Kauai. Sa mga ini, 207 an kinaipuhan an dikit na paghirahay, pero 54 an naraot na gayo, asin 19 an biyong nagaba. Kaiba man sa saindang gibohon an pagsongko sa lambang midbid na Saksi sa isla tanganing seguradohon na an kada saro naaataman. Kan darahon an mga suplay sa sarong tugang na babae, nagsabi an kataed na Budista na dai ngani sia nakaresibi minsan sarong pakete nin tsa hale sa saiyang grupo. An saro pang misis, na lininigan an harong kan grupo nin mga Saksi nagsabi: “Haloy na kamong nagpaparadigdi sa sakong pinto, asin ibinilang ko kamong marahay na mga kataed, alagad an kapahayagan na ini nin pagkamoot sa kataed nagpapaheling sako kun ano talaga an saindong organisasyon. Salamat sa gabos nindong kapagalan.”
Apuwera sa pag-asikaso sa materyal na mga pangangaipo kan gabos nindang kapwa Kristiano, an mga nangangataman sa ayuda kapareho man an pag-asikaso dapit sa saindang espirituwal na kakosogan. Mayo pang duwang aldaw pakalihis kan bagyo, nagkapirang kongregasyon an nagtiripon na. Tolos-tolos, an sadit na mga grupo sa pag-adal sa libro nagpupunsionar na liwat. Sampulong magurang hale sa ibang isla an nagduman sa Kauai sa pagtabang sa mga magurang sa lokal tanganing magibo an pagpapastor sa lambang Saksi sa isla. Kan sumunod na Domingo, an gabos na anom na kongregasyon nagkaigwa nin Pag-adal sa Torrengbantayan, 30-minutos na pahayag manongod sa mga prosedimiento sa ayuda kan sarong miembro kan Komite sa Ayuda, asin pantapos na 30-minutos na pahayag kan sarong miembro kan Komite kan Sanga na nagduman hale sa Honolulu para sa katuyohan na ini. An bareta nin sarong paramasid nagsasabi: “An gabos naranga sa itinaong marahay na paggiya asin nakamateng andam sa espirituwal na atubangon an saindang natatada pang mga problema. Kadakol sa mga nagdadangog an naghiribi mantang patapos na an programa, asin an urupakan gikan sa boot.”
Sarong Pankinaban na Asosasyon nin Magturugang
An siring na pagkamoot asin pagmakolog sarong tanda kan banwaan ni Jehova sa bilog na kinaban. Kan dalaganan kan Buhawing si Val an Solnopan na Samoa mga saro nang taon an nakaagi, nagcausa iyan nin kadakol na danyos, alagad an mga Saksi ni Jehova sa ibang kabtang kan kinaban tolos-tolos na tuminabang sa saindang mga tugang duman. Dai nahaloy, kan magtao nin pondo an gobyerno para sa gabos na relihiyon—kaiba na an mga Saksi ni Jehova—sa paghirahay kan saindang mga palibot, iinuli kan mga Saksi an pondo na may kaibang surat na nagsasabing an gabos na danyos sainda nahirahay na, asin na an pondo puwedeng gamiton sa paghirahay kan mga edipisyo nin gobyerno. An saindang ginibo ibinareta sa sarong diaryo sa lokal. Sa pakarisa kaini, sinabihan nin sarong opisyal nin gobyerno an sarong Saksi na ikinasosopog logod nia an saiyang sadiring iglesya huli ta inako ninda an kuwarta hale sa gobyerno minsan ngani an gabos nindang edipisyo na naraot durante kan buhawi binayadan kan seguro.
Siring man, kan Setyembre 1992, kan an Salog Ouvèze sa timog-sirangan nin Pransia binaha asin linantopan an Vaison-la-Romaine asin an 15 nakapalibot na komunidad, an mga Saksi tolos-tolos na naghiro. Magdamlag, kinua kan baha an 40 buhay, ginaba an 400 na harong, rinaot an ginatos pang iba, asin binayaan an rinibong pamilya na mayo nin tubig o elektrisidad. Amay kan sumunod na aga, an mga Saksi sa mga kongregasyon sa lokal an pinakaenot na tuminabang sa mga biktima nin baha. An mga nangangaipo nin madadagusan mamomoton na pinadagos sa harong kan mga pamilyang Saksi sa rehiyon. Ginatos na Saksi an nag-arabot hale sa harayo asin haraning mga lugar tanganing mag-alok nin tabang. Guminibo nin komite sa ayuda sa haraning siudad nin Orange sa pagkoordinar kan mga paghihingoa nin apat na grupo nin mga boluntaryo, na naghale kan laboy asin naglinig nin mga harong, naglaba kan kadakoldakol na malaboyon na gubing, saka nag-andam patin nagdara nin pagkakan asin inomon sa bilog na apektadong lugar. Nagboluntaryo pa ngani sinda na linigan an sarong eskuwelahan sa lokal asin pirang edipisyo kan munisipyo. An saindang daing kapagalan na mga paghihingoa pinahalagahan kan saindang mga tugang asin siring man kan mga tawo sa komunidad.
Sa dakol pang ibang lugar, nagtios an mga Saksi ni Jehova nin mga kalamidad, arog baga nin mga baha, bagyo, asin linog, kun paanong nagtios man an iba. Huli sa pakasabot na an mga ini an resulta nin nagkanorongod o dai maoolang na mga pangyayari, dai ninda binabasol an Dios o an siisay man. (Eclesiastes 9:11) Imbes, nagsasarig sinda na an mapagsakripisyo sa sadiring pagkamoot kan saindang mga kapagtubod masokoro sa sainda ano man an makamomondong mga kamugtakan na tibaad umabot sainda. An siring na mamomoton na mga gibo resulta kan pagtubod na igwa sinda gabos. An disipulong si Santiago nagpapaliwanag: “Kun an sarong tugang na lalaki o babae huba asin kulang nin pagkakan sa aroaldaw, alagad an saro sa saindo nagsasabi sa sainda: ‘Lakaw kamo sa katoninongan, magpakahimbong kamo asin magpakabasog kamo,’ alagad dai man nindo sinda tinatawan kan mga pangangaipo para sa saindang hawak, ano an pakinabang kaiyan? Siring man an pagtubod, kun dai nin gibo, gadan sa saiya man sana.”—Santiago 2:15-17.
An Gikanan nin Tunay na Proteksion
Imbes na maglaom nin mga milagro sa porma nin sarong klase nin pakikilabot nin Dios, narerealisar kan mga Saksi ni Jehova na an proteksion makukua sa saindang pankinaban na Kristianong asosasyon nin magturugang. Sa katunayan, an nagiginibo kan asosasyon nin magturugang na iyan sa mga panahon nin kasakitan haros milagroso na. Nagigirumdoman ninda an mga tataramon ni Jesus na yaon sa Mateo 17:20: “Kun kamo igwa nin pagtubod na siring kadakula kan pisog nin mustasa, masasabihan nindo an bukid na ini, ‘Bumalyo ka hale digdi pasiring duman,’ asin iyan mabalyo, asin mayo nin ano man na dai nindo magigibo.” Iyo, nawawara an garo-bukid na mga kaolangan kun an tunay na Kristianong pagtubod, na pinapadisan nin pagkamoot, minahiro.
Namamatean kan banwaan ni Jehova sa bilog na kinaban an mapagprotehir na kamot kan saindang Dios sa daing kasegurohan asin delikadong mga panahon na ini. Namamatean ninda an siring kan sa salmista: “Sa katoninongan ako mahigda asin matotorog, huli ta ika sana, O Jehova, an nagpapaontok sa sako sa katiwasayan.” (Salmo 4:8) May pagsarig, isinisentro ninda an saindang atension sa presenteng gibohon: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Asin may kasiertohan na naglalaom sinda sa kaotoban kan panuga ni Jehova na sarong matoninong, matanos na bagong kinaban, na dian dai na ninda maeeksperyensiahan an ano man na klase nin mga kalamidad, gibo nin tawo o natural.—Miqueas 4:4.
[Mga ritrato sa pahina 12]
An mga Saksi nag-abot hale sa harayo asin haraning mga lugar sa pagtabang sa mga biktima nin baha