Bareta kan mga Parabalangibog kan Kahadean
An Karigonan Nagtatao nin Mayayaman na Balos
SI Jesus naghula na an saiyang mga parasunod paglalamagon, asin iyo man si apostol Pablo, arog kan pagkasabi sa 2 Timoteo 3:12: “Sa katotoohan, an gabos na nagmamawot na mamuhay na may diosnon na debosyon kaibahan ni Cristo Jesus paglalamagon man.” Pero an karigonan sa paglilingkod ki Jehova Dios nagtatao nin mayayaman na balos.
◻ Nagin totoo ini sa sarong banwaan sa amihanan-sirangan na baybayon nin Malaysia. Minsan ngani sia maimbod na Budhista na nagpaparasermon na marhay sa saiyang mga aki, sarong ama an dai nahimong olangon an saiyang tolong aking babae asin tolong aking lalaki sa pag-adal sa Biblia kaiba kan mga Saksi ni Jehova. Pati an saiyang agom nagpaheling nin interes sa katotoohan. Dangan sarong aldaw tinuya an lalaki kan sarong kataed: “Paano ka nawaran nin pamomogol sa saimong mga aki asin nagtogot na sinda magin mga Saksi ni Jehova? An gabos kong aki nagdadanay sa sako asin sa satong suanoy na Budhistang relihiyon. Makaheherak ka!”
An ama naghidali pasiring sa harong na hinuhumang hampakon an tugang na babae na nagkokondukta kan pag-adal sa saiyang mga aki. Minsan siring, pinakalma sia kan mga aki asin sinda nagpadagos na mag-adal sa Biblia kaiba kan mga Saksi ni Jehova asin mag-atender sa mga pagtiripon na may suporta kan saindang ina.
Alagad, sa kahurihurihi, inapod kan ama an bilog na pamilya na umatubang sa saiya. “Pumili kamo,” an pagboot nia, “ako asin pagdanay digdi sa harong o pagin mga Kristiano asin paglayas sa harong.” An pinakamatuang aking lalaki, sarong suabeng magtaram na aki, tolos na nag-impake tanganing humale. “Dai!” an kurahaw kan ama. “Huling kamo gabos rebeldeng aki, mas marahay pang magadan na ako.” Dangan naghidali sia paluwas sa harong, lapag kan pamilya, na nakikimaherak sa saiya na dai maghugot. Naghanga sa saindang mga pakimaherak, puminuli sia sa harong.
Nag-agi an panahon. Nagpoon na marisa kan ama an marahay na epekto kan katotoohan sa Biblia sa ugale kan saiyang mga aki. Sarong aldaw nanompongan nia an saiyang katood na nanunuya, na ngonyan saro nang mamondong tawo, na nagsabi: “Nadidisganar akong marhay sa sakong mga aki. Dinadaya ninda ako asin iniikitan ako.” Alagad an ama na an mga aki nag-aadal kaiba kan mga Saksi ni Jehova nagsabi: “A, laen an sakong mga aki! Mabooton sinda sa sako asin tinabangan pa ngani akong mabayadan an sakong utang sa kotse mientras na ako mayong trabaho.”
Ngonyan, an tolong aking babae asin an ina gabos bautisado na. An sarong aking lalaki espesyal payunir. Asin an dating maimbod asin anggot na ama? Makikatood na sia ngonyan asin nag-atender na nin Memorial.
Binalosan ni Jehova an aking lalaki asin an saiyang tolong tugang na babae siring man an saindang ina huli sa saindang karigonan sa Saiya. Ngonyan sinda maigot na mga parahulit kan Kahadean, na pinaoogma an puso ni Jehova.—Talinhaga 27:11.