Bareta kan mga Parabalangibog kan Kahadean
“An Ngaran ni Jehova Makosog na Torre”
NABUBUHAY kita sa mga panahon na daing kasegurohan. An satong garo baga tiwasay na buhay puwedeng maliwat nin bigla, asin mayo nin patanid may mga nanompongan an saindang sadiri na nasa dakulang peligro bago ninda narealisar iyan. An peligro puwedeng gumikan sa politikal na grabeng kariribokan, madahas na nananalakay, natural na kalamidad, o grabeng helang. Ano man an kamugtakan, saen maninigong dumolok an Kristiano kun namemeligro an saiyang buhay?
Si David, sarong misyonero na nag-eerok sa saro sa mga sanga kan Watch Tower Society, nanodan an simbag sa hapot na iyan gikan sa makatatakot na eksperyensia. Sarong asignadong drayber, sia luminuwas na amay sarong aga tanganing hapiton an pirang puli-puling taga-Bethel (mga boluntaryo na nag-iistar sa luwas kan sanga). Madiklom pa kaidto. Nahapit na nia si Rosalía asin minaagi sia sa istasyon nin pulis kan madangog nia an enot na putok nin badil.
Dangan marikas an mga nangyari. Nakadangog sia nin ribok na siring sa dakulang paputok asin narealisar na nagsisiwit an aire sa saro sa mga ruweda. Bigla na sanang naheling nia an sarong soldados na nagtitindog sa tahaw kan tinampo na direktang ipinupunteriya an riple sa saiya. Tolo an nangyaring haros durungan: Tinadtad nin sunod-sunod na putok nin badil an gilid kan Dyip, na puminasa sa mga bintana; luminukob si David asin Rosalía; pinaputokan kan soldados an salming sa atubangan na tangod kan mata.
Mantang paorootrong tinatamaan nin bala an Dyip, nagpreno si David sa bilog niang makakaya mientras na nakalukob pa. Si David asin Rosalía pareho naghona na magagadan sinda. Namibi sinda nin makosog ki Jehova, na hinahagad saiya na bantayan sinda. Kan huri sinabi ni Rosalía na kan mga oras na idto inisip nia kun ano an magigin reaksion kan saiyang pamilya kun mabaretaan ninda an saiyang kagadanan!
Buhay Pa!
An ribok nin mga putok asin nagkakaparasang salming sa katapustapusi puminondo, asin hineling ni David si Rosalía. Kan maheling nia an sadit, bilog na mantsa nin dugo sa likod kaini, haros puminondo an saiyang puso. Kapidaso man sanang naglayog na salming, bakong bala, an nakatadom duman. Nagdudugo an saiyang mga tuhod huli ta nalugadan nin nagkaparasang salming, alagad garo baga marahay man sia.
An mga lalaki na de-unipormeng panmilitar na may puting mga bogkos sa takyag duminolok sa Dyip asin pinagbotan sindang lumuwas na nakaitaas an saindang mga kamot. An saro, na garo baga mas halangkaw an ranggo, hinampang an sarong soldados asin nagsabi: “Sinabihan ko kamo na dai pagbadilon an mga sibilyan.” Nanarahotan an soldados, na nagsasabing nakadangog sia nin mga putok asin naghona na idto hale sa Dyip.
Kan ipamidbid ni David si Rosalía asin an saiyang sadiri bilang mga Saksi ni Jehova, nagin magayon an reaksion. Ipinaliwanag nia an ginigibo nia, pero gusto pa kan mga soldados na pogolon sinda. An nangyari, sa amay na mga oras kan aga, an sarong grupo militar guminibo nin kudeta, asin inaagaw kan mga soldados na ini an istasyon nin pulis kan si David asin Rosalía umagi sakay sa Dyip.
Natakot na gayo si Rosalía alagad mapusong nagdanay na kalmado mantang nakikimaherak si David na butasan sinda. Sa kahurihurihi tinogotan sindang humale—na dai dara an Dyip. Kinaipuhan nindang maglakaw pasiring sa haraning abenida asin sumakay sa sarong awto pasiring sa sangang opisina, kun saen binolong si Rosalía sa infirmary.
An Puwersa nin Pamibi
May nanodan si David gikan sa eksperyensiang iyan—nungka na menuson an puwersa nin odok sa boot na pamibi, asin nungka na lingawan na an mapusong pagpamidbid bilang saro sa mga Saksi ni Jehova parateng proteksion. Puwedeng literal na totoo na “an ngaran ni Jehova makosog na torre. Dian minadalagan an matanos asin tinatawan nin proteksion.”—Talinhaga 15:29; 18:10; Filipos 4:6.
[Picture Credit Line sa pahina 19]
Fotografía de Publicaciones Capriles, Caracas, Venezuela