Anong Pakinabang an Puwedeng Ibunga kan Pag-orolay sa Relihiyon?
AN MGA magurang galagang hinahalat an enot na mga tataramon kan saindang omboy. Kun nadadangog ninda an inoorootrong silaba mantang nakikiurak, na tibaad “Mama” o “Dada,” napapano nin kaogmahan an saindang puso. Tolos-tolos na ibinabareta ninda ini sa mga katood asin siring man sa kataraed. An enot na pakikikomunikar nin omboy tunay nanggad na maogmang bareta na nagtatao nin kaogmahan.
An mga tanog, tanawon, asin parong na inaako kan mga pakamate nin sadit na aki nakakapukaw nin reaksion. Siyempre, laen-laen an reaksion. Pero kun, pakalihis nin sarong peryodo nin panahon, daing reaksion an omboy sa mga pampahirong ini, tama sanang mahadit an mga magurang na tibaad may diperensia an pagtalubo kan saindang aki.
Pinakamarahay an reaksion nin mga omboy sa mga tawo na midbid ninda. Kun kinukulkol nin ina an omboy, sarong biyong paghuyom an parateng minaresulta. Minsan siring, an pagdotdot nin sarong nagsosongkong paryente puwedeng ponan nin paghibi, pati nin makosogon na pagsayuma na kargahon kan sarong iyan. An kadaklan na paryentes na nakakaeksperyensia kaini dai minasuko. Mantang orog sindang namimidbid kan omboy, naoogma sinda kun mawara na an olang nin pagkabakong kamidbid kan omboy, asin luway-luway na minahuyom an omboy.
Kaagid kaiyan, dakol na adulto an nag-aalangan na ipakipag-olay nin hayag an saindang relihiyosong pagtubod sa saro na bako pang kamidbid sa haloy na panahon. Tibaad dai ninda masabotan kun taano an sarong estranyo ta boot na makipag-olay dapit sa sarong personal na bagay—an relihiyon. An resulta iyo na tinotogotan nindang magkaigwa nin olang sa pag-oltanan ninda asin kan mga nakikipag-olay manongod sa Kaglalang. Nagsasayuma pa ngani sindang pag-olayan an, sa katotoohan, minanang karakteristiko nin katawohan, an pagmawot na sumamba.
An totoo, maninigo kitang magin interesado sa pakanood manongod sa satong Kaglalang, asin an pakikipag-olay sa iba puwedeng pangyarihon kita na makanood. Iyan huli ta an Dios haloy nang konektado sa hayag na pakikikomunikar. Helingon ta kun paano iyan.
‘Maghinanyog Asin Makanood’
An enot na pakikikomunikar nin Dios sa tawo iyo an ki Adan sa tatamnan nin Eden. Pero, pakatapos na magkasala si Adan asin Eva, mas ginusto nindang magtago kan sinda apodon nin Dios, kan boot niang makikomunikar pa sa sainda. (Genesis 3:8-13) Alagad, nakatala sa Biblia an mga detalye manongod sa mga lalaki asin babae na inako an pakikikomunikar gikan sa Dios.
Nakikomunikar an Dios ki Noe dapit sa nagdadangadang na kalaglagan kan maraot na kinaban kan saiyang kaaldawan, kaya si Noe nagin “sarong parahulit nin katanosan.” (2 Pedro 2:5) Bilang parataram nin Dios sa saiyang kapag-arakian, si Noe dai sana nagpaheling nin pagtubod sa mga pakikiiba nin Dios sa tawo kundi ipinahayag man sa publiko an saiyang sadiri na nasa kampi ni Jehova. Anong reaksion an naobserbaran ni Noe? Makamomondo nanggad, an kadaklan sa saiyang mga katemporanyo ‘dai nagmangno sagkod na magdatong an baha asin iinanod sinda gabos.’ (Mateo 24:37-39) Pero makaoogma nanggad para sa sato, pitong miembro kan pamilya ni Noe an naghinanyog, nagkuyog kan mga instruksion nin Dios, asin nakaligtas na buhay sa panglobong Delubyo. Guminikan sa sainda an gabos na tawong buhay ngonyan.
Kan huri, nakikomunikar an Dios sa sarong bilog na nasyon, an suanoy na Israel. Paagi ki Moises, itinao nin Dios sa sainda an Sampulong Togon asin mga 600 na iba pang kapareho sa puwersang pagboot. Linaoman ni Jehova na kuyogon kan mga Israelita an gabos na iyan. Ipinagboot ni Moises na kada pitong taon, durante kan taonan na Kapiyestahan nin mga Payag-payag, dapat na basahon nin makosog an Pagboot nin Dios. “Tiponon mo an banwaan,” an pagboot nia, “an mga lalaki asin an mga babae asin an saradit patin an nakikihimanwa na nasa laog kan saimong daga.” Sa anong katuyohan? “Tanganing sinda maghinanyog asin tanganing sinda makanood, huli ta kaipuhan sindang matakot ki Jehova na saindong Dios asin mag-ingat na otobon an gabos na tataramon kan pagboot na ini.” An gabos kaipuhan na maghinanyog asin makanood. Imahinara nanggad an saindang kaogmahan sa pag-orolay sa saindang nadangog!—Deuteronomio 31:10-12.
Pakalihis nin labing limang siglo, an hade sa Judea na si Josafat nag-organisar nin mga prinsipe asin Levita sa kampanya na ikabalik an dalisay na pagsamba ki Jehova. Nagbiyahe an mga lalaking ini sa gabos na siudad nin Juda na tinotokdoan sa mga pagboot ni Jehova an mga nag-iistar duman. Paagi sa pag-orolay kaini sa publiko, ipinaheling kan hade an saiyang kapusoan para sa dalisay na pagsamba. Kun manongod sa saiyang mga nasasakopan, dapat sindang maghinanyog asin makanood.—2 Cronica 17:1-6, 9.
Pagpapatotoo Paagi sa Pag-orolay
Isinugo nin Dios an saiya mismong Aki, si Jesus, digdi sa daga tanganing maglingkod bilang Saiyang Parataram. (Juan 1:14) Mantang hiniheling kan tolong disipulo an pagliwat kan lalauogon ni Jesus sa atubangan ninda, nadangog ninda na nagpahayag an mismong boses nin Dios: “Ini an sakong Aki, an namomotan, na sakong inooyonan; maghinanyog kamo saiya.” (Mateo 17:5) Tolos sindang nagkuyog.
Kapareho kaiyan, pinagbotan ni Jesus an saiyang mga apostol na ipahayag sa iba an mga katuyohan nin Dios. Alagad kan mga anom na bulan na sana an natatada sa ministeryo digdi sa daga, ipinaaram ni Jesus na an paghuhulit kan Kahadean kan kalangitan mahiwason kaya dakol pang disipulo an kaipuhan. Tinokdoan nia an 70 sa sainda kun paano ipakikipag-olay sa mga estranyo an Kahadean nin Dios dangan isinugo sinda na ilakop an mensaheng iyan sa publiko. (Lucas 10:1, 2, 9) Dai nahaloy bago sia bumuwelta sa saiyang Ama sa langit, dinagka ni Jesus an saiyang mga parasunod na mag-enot sa pakikipag-olay sa iba manongod sa mensaheng ini, na pinagbobotan pa ngani sinda: “Paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” (Mateo 28:19, 20) Sa bilog na kinaban, an tunay na mga Kristiano ngonyan inootob an sugong iyan paagi sa pakikipag-olay sa saindang mga kataed kan maogmang bareta manongod sa Kahadean nin Dios. An mga pag-orolay na ini pinangyayari sindang makapagpatotoo sa katotoohan dapit sa Kaglalang, si Jehova.—Mateo 24:14.
Matoninong, Nakakapakosog na mga Pag-orolay
Sa anong paagi kaipuhan na ipakipag-olay kan mga disipulo ni Jesus sa iba an saindang pagtubod? Dai ninda dapat na paanggoton an mga paratumang, ni na dapat sindang makipag-argumento sa mga paratumang. Imbes, kaipuhan nindang hanapon an mga nag-aako kan maogmang bareta dangan iatubang an Makakasuratan na ebidensia sa pagsuportar dian. Siyempre, inoobserbaran nin Dios an reaksion kan mga nakakaolay kan mga disipulo kan saiyang Aki, siring ngani sa pagkapahayag ni Jesus: “An minaako sa saindo minaako man sa sako, asin an minaako sa sako minaako man sa saiya na nagsugo sa sako.” (Mateo 10:40) Abaa kakuring pagsikwal idto kan an kadaklan sa katemporanyo ni Jesus isinikwal an saiyang mensahe!
“An oripon nin Kagurangnan dai maninigong makipag-iwal,” nagsadol an Kristianong apostol na si Pablo. Imbes, sia “maninigong magin maboot sa gabos, angay na magtokdo, padagos na nagpopogol sa irarom nin karatan, nagtotokdo na may kahoyoan duman sa mga minatumang; ta tibaad sinda tawan nin Dios nin pagsolsol na magiya sa tamang kaaraman kan katotoohan.” (2 Timoteo 2:24, 25) An paagi kan pagkabalangibog ni Pablo kan maogmang bareta sa mga taga-Atenas, Grecia, nagtatao nin marahay na halimbawa. Nangatanosan sia sa mga Judio sa saindang sinagoga. Aroaldaw sa sadan nakipag-olay sia “sa mga nasosompongan nia.” Minsan ngani an nagkapira, daing duda, gusto sanang maghinanyog sa bagong mga ideya, si Pablo nagtaram nin direkta asin sa maboot na paagi. Ipinakipag-olay nia sa mga nagdadangog sa saiya an mensahe nin Dios, na naghahagad sa sainda na magsolsol. An saindang reaksion kaparehong gayo kan sa mga tawo ngonyan. “An nagkapira nagpoon na magtuya, mantang an iba nagsabi: ‘Madangog liwat kami saimo dapit kaini sa ibang panahon.’” Dai ipinirit ni Pablo na palawigon an orolay. Pakapaghulit kan saiyang mensahe, sia “naghale sa tahaw ninda.”—Gibo 17:16-34.
Dai nahaloy, sinabihan ni Pablo an mga miembro kan Kristianong kongregasyon sa Efeso na sia ‘dai nagpogol sa pagsabi kan ano man na bagay na kapakipakinabang ni sa pagtokdo sa publiko asin sa pagharongharong.’ Saro pa, saiyang ‘lubos na ipinakipag-olay kapwa sa mga Judio asin Griego an pagsolsol sa atubangan nin Dios asin pagtubod ki Jesu-Cristo.’—Gibo 20:20, 21.
An Makakasuratan na mga halimbawang ini naghahayag kun paano an relihiyon ipinakipag-olay kan maimbod na mga lingkod nin Dios kan mga panahon sa Biblia. Siring man ngonyan, an mga Saksi ni Jehova makinuyog na ipinakikipag-olay an relihiyon sa saindang kataraed.
Mga Pag-orolay na Mabungang Marhay
‘Dangoga an Tataramon nin Dios.’ ‘Hinanyoga an saiyang mga pagboot.’ Parate nanggad na minalataw an siring na mga sadol sa Biblia! Puwede kamong maghimate sa mga instruksion na ini sa Biblia sa sunod na makipag-olay sa saindo an mga Saksi ni Jehova. Maghinanyog sa mensahe na dinadara ninda sa saindo gikan sa Biblia. An mensaheng ini bakong politikal kundi sinusuportaran an sarong langitnon na gobyerno nin Dios, an saiyang Kahadean. Ini an paagi nin Dios sa paghale kan mga causa nin pag-iriwal sa presenteng aldaw. (Daniel 2:44) Pakalihis kaiyan an pamamahalang ini nin Dios gikan sa langit iaareglo na an bilog na daga magin sarong paraiso arog kan tatamnan nin Eden.
An sarong dating sekretang pulis parateng nagsasayumang maghinanyog kun nakikipag-olay sa saiya dapit sa Biblia an mga Saksi ni Jehova. Alagad huli sa pagdakol nin krimen na kaipuhan niang atubangon, nadisganar sia sa buhay. Kaya sinabihan nia an sunod na Saksi na nagsongko na sisiyasaton nia an ebidensia sa mensahe kan Biblia. Suminunod an regular na mga pag-orolay. Maski ngani an pulis buminalyo nin istaran nin nagkapirang beses, sia maogmang hinanap kan mga Saksi sa kada bagong lokasyon tanganing ikapadagos an pag-orolay. Sa katapustapusi minidbid kan pulis: “An ebidensiang hinahanap ko dati nang yaon sa Banal na Kasuratan. Kun an mga Saksing idto dai nagmaigot sa pakikipag-olay sa sako, yaon pa kutana ako sa kinaban na naghohorophorop kun ano an kahulogan kan buhay. An totoo, nanodan ko na an katotoohan, asin gagamiton ko an natatada ko pang mga aldaw sa paghanap sa iba na naghahanap sa Dios siring sa sako kaidto.”
An interesadong mga paradangog tunay na boot na makaaram nin orog pa. Tama sanang maglaom sinda nin mga rason para sa iinaatubang na mga tinutubod. (1 Pedro 3:15) Kun paanong an sadit na aki parateng naghahapot sa saiyang mga magurang asin naglalaom na sumimbag sinda, tama sanang laoman nindo an mga Saksi na tatawan kamo nin marigon na mga simbag. Makakaseguro kamo na maogma sindang mabalik asin ipakikipag-olay saindo nin orog pa an mensahe kan Biblia.
Tibaad may aram na kamong kadikit manongod sa Biblia. Marerealisar nindo na an linalaoman saindo nin Dios maghahagad nin nagkapirang pagbabago sa paagi kan saindong pamumuhay. Dai mag-alangan na magpadagos huli sa pagkatakot na magigin dakulaon an sakripisyo nindo sa mga kahagadan nin Dios. Magtatao sana iyan nin tunay na kaogmahan. Masasabotan nindo ini mantang padagos kamong nag-ooswag nin tangga-tangga.
Enot sa gabos, horophoropa kun siisay si Jehova, kun ano an linalaoman nia sa saindo, asin kun ano an iinaalok nia. Hagadon sa mga Saksi na ipaheling sa saindo an sinasabi kan Biblia manongod kaini. Helingon an sinasabi ninda sa saindo mismong kopya kan Biblia. Sa pakaaram na an mga Saksi makatanosan sa ipinipresentar nindang katotoohan dapit sa relihiyon, mayong duwa-duwa na bobooton nindong siyasaton an dakol pang marahay na bagay na puwede nindang ikahiras sa saindo hale sa Kasuratan.—Talinhaga 27:17.
Iniimbitaran kamo na obserbaran an mga Saksi sa saindang lokal na pinagtitiriponan, an Kingdom Hall. Duman madadangog nindo an kapakipakinabang na pag-orolay sa Tataramon nin Dios. Maheheling nindo kun gurano kaogmang nag-oorolay an mga presente manongod sa mga katuyohan nin Dios. Togotan an mga Saksing ini na tabangan kamong manodan an katotoohan dapit sa kabotan nin Dios para sa sato ngonyan. Maghimate sa imbitasyon nin Dios na pag-olayan an tunay na pagsamba asin akoon an saiyang huyom nin pag-oyon, pati an buhay na daing sagkod sa Paraiso.—Malaquias 3:16; Juan 17:3.
[Retrato sa pahina 5]
Si Noe hayag na nagtaram manongod sa katuyohan nin Dios
[Mga retrato sa pahina 7]
Arog kan ginibo ni Pablo sa suanoy na Atenas, an mga Saksi ni Jehova itinotokdo sa iba an mga katotoohan sa Biblia