Bareta kan mga Parabalangibog kan Kahadean
“Nagpadagos Sinda na Dai nin Ontok”
MAGPOON sa kaaldawan ni Jesu-Cristo asin kan saiyang mga apostol, an mga namomoon sa relihion ginamit an maski anong medyos posibles sa saindang mga pagmamaigot na olangon an paghuhulit kan maogmang bareta kan Kahadean nin Dios. An mga apostol paorootro asin depinidong ‘pinagbotan’ kan lokal na mga autoridad sa Jerusalem na “mag-ontok sa pagtaram basado sa ngaran ni Jesus.” (Gibo 5:27, 28, 40) Minsan siring, an tala kan Biblia nagsasaysay na “an tataramon nin Dios padagos na nag-oswag, asin an bilang nin mga disipulo padagos na nagdakol na marhay sa Jerusalem.”—Gibo 6:7.
Pakalihis nin duwang milenyo kita makanonompong pa nin mga namomoon sa relihion sa Israel na nag-iimpluwensia sa lokal na mga autoridad na olangon an gibohon kan tunay na mga Kristiano sa nasyon na iyan. Sa irarom nin pangigipit nin radikal na relihiosong mga elemento, kan Nobyembre 1987, an lokal na mga autoridad sa Tel Aviv, Israel, nag-orden sa mga Saksi na umontok sa pagkaigwa nin Kristianong mga pagtiripon sa Kingdom Hall na yaon sa sangang opisina kan Watch Tower Society. An orden ipinasunod kan Oktubre 1989. Bilang pagkuyog, an mga Saksi nagtiripon sa inarkilang mga pasilidad sa palibot sa laog nin tolong taon mantang an saindang Kingdom Hall haros dai nagagamit.
Mientras tanto, an bagay dinara sa atension kan Korte Suprema de Hustisya sa Israel. An opisina kan abogado kan estado rinepaso an argumentong iprenesentar kan mga Saksi asin idineklarar na mayong posibleng depensa tumang sa saindang apelasyon sa liwanag kan napalabot na lataw na bakong makatanosan na diskriminasyon sa relihion. Huli kaiyan, an lokal na mga autoridad napiritan na baliktadon an saindang desisyon, asin an mga Saksi ni Jehova maogmang nagbaralik sa saindang Kingdom Hall.
Nanluya daw an paghuhulit nin mga katotoohan sa Biblia durante kan mga taon na idto? Dai nanggad! Sa panahon kan pagpasirra kan Kingdom Hall, igwa nin duwang kongregasyon sa Tel Aviv asin sarong separadong grupo sa pag-adal sa Biblia sa haraning banwaan nin Lod. Pakalihis nin tolong taon, kan binukasan liwat an Kingdom Hall, an mga Saksi ni Jehova duminakol na sagkod sa apat na kongregasyon, asin sarong bagong grupo sa pag-adal sa Biblia an nagtitiripon sa Beerseba.
An pag-oswag sa Israel bako sanang sa prinsipal na mga grupo nin lenguahe, an Arabe asin Hebreo. Nagkakaigwa nin lagduan na paglaog nin mga emigrante hale sa dating Unyon Sobyet, kaya an mga Saksi ni Jehova na nakatataram nin Ruso sibot ngonyan sa paghiras kan maogmang bareta sa sainda. An nagkapirang pagtiripon sa lenguaheng Ruso ginigibo sa tolong kongregasyon; labi sa sanggatos katawo an nagtiripon dai pa sana nahahaloy para sa sarong asamblea sa Ruso.
Dai mapagdududahan, an mga relihionista na may bakong makatanosan na diskriminasyon mapadagos sa saindang kampanya tumang sa tunay na pagsamba. Alagad an mga parabalangibog kan Kahadean padagos na inaarog an mga Kristiano kan enot na siglo na, sa ibong nin oposisyon, “nagpadagos . . . na dai nin ontok sa pagtokdo asin pagpahayag kan maogmang bareta dapit sa Cristo, si Jesus.”—Gibo 5:42.