May mga Anghel daw sa Tahaw Niato?
Marikason an pangyayari. Hararom an iniisip asin dai nagmamangno sa saiyang palibot, si Marilynn nakaabot sa riles sa paglakawlakaw. Bigla na sana siang nakadangog nin makosog na urog-udog. Tuminangad sia, asin naheling nia na sia nagtitindog sa mismong aagihan nin nagdadangadang na tren! Dai nakahiro si Marilynn, na naparalisar sa takot. Haranihon na an tren kaya naheheling na nia an asul na mga mata asin an grabe an pagkatakot na lalauogon kan makinista. Nungkang nalingawan ni Marilynn an sunod na nangyari. “Garo baga may higanteng nagtuldang sako sa likod,” an sabi nia. “Tuminaltal ako hale sa riles asin naholog sa mga uring sa ibong kaiyan.” Nabakrusan nin kadikit, tuminindog si Marilynn tanganing pasalamatan an nagligtas sa saiya—alagad mayo siang naheling! An saiyang konklusyon? “Ilinigtas an buhay ko kan sakong anghel de la guardia,” sabi ni Marilynn. “Siisay pa idto?”
AN SARONG mapagdudang kinaban garo baga biglang nabangkag sa mga anghel. Sa dai pa sana nahahaloy na mga taon, an langitnon na mga linalang nagin tema nin mga programa sa telebisyon, sine, asin pati nin sarong drama sa Broadway. An mga libro manongod sa mga anghel nasa enotan kan mga lista nin pinakamabentang relihiosong mga babasahon. Igwa nin mga asosasyon, seminar, asin bareta dapit sa mga anghel. May inorganisar na mga programa sa pagtotokdo tanganing tabangan kamo—siring kan pagkasabi nin sarong artikulo—na mapaluwas an “saindong ‘panlaog na anghel.’”
Nan-aaprobetsar sa mobimiento para sa mga anghel an oportunistang mga negosyante na nagpapabakal nin kadakoldakol na produkto. “Maganansia an ano man na may nakabugtak na anghel,” sabi nin sarong kasosyo sa tindahan sa Estados Unidos. Apuera sa pagpabakal nin dakol na libro, nasa lista nia an “anghel na mga estatuwa, pantadik, munyika, T-shirt, kartel asin kard na pantaratara”—na gabos nagtitipon kan inaapod nin sarong peryodista na “langitnon na mga ganansia.”
Alagad ini bako sanang sarong uso, an pag-insistir kan mga promotor nin anghel. Tanganing suportaran an saindang sinasabi, may iinaatubang sindang dakol na testimonyo—“tunay na buhay” na mga pakatupar nin mga anghel. An iba nagsasabi na sinda nakaheling nin anghel na kabaing nin tawo. An iba nakaheling nin liwanag, nakadangog nin boses, nakamate nin presensia, o nakamate nin kamawotan na, sa pagtubod ninda, hale sa anghel. Dakol, arog ki Marilynn, an nagsasabi na an saindang buhay ilinigtas nin sarong anghel.
Ano an nangyayari? “Sa paghona ko igwa nin pagkabuhay giraray nin espirituwalidad,” sabi ni Joan Wester Anderson, na nagsurat nin duwang libro dapit sa “lihis sa natural” na mga pakatupar. Si Alma Daniel, na katabang na autor nin saro pang libro, nagtatao nin dugang pang paliwanag. Sinasabi nia na an mga anghel “pinagbobotan ngonyan na magpamidbid tanganing mas dakol pang tawo an maabot. An dahelan na dakol kitang naheheling manongod sa sainda iyo na iyan an gusto ninda. Ginigibo ninda iyan.”
Totoo man nanggad daw ini? O may iba pang nasa likod kan presenteng pagkawili sa mga anghel? Tanganing maaraman iyan, dapat niatong siyasaton an Tataramon nin Dios. Nasa Biblia an katotoohan manongod sa mga anghel, siring kan satong maheheling.
[Pasasalamat para sa pinagkuanan kan retrato sa pahina 2]
Pahina 3 asin 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.