Masakit na mga Panahon Para sa mga May Edad Na
SI Nanay Oniyan, na 68 anyos na, nag-iistar sa sarong mayor na siudad sa Solnopan na Aprika. Kan sia hoben pa, pinangarap nia na paggurang nia maretiro sia na trangkilo, kaibaiba kan saiyang mga aki asin makoapo. Imbes sia aroaldaw na nagtitinda nin malipot na inomon na tubig na nababalad sa tropikong saldang. An kadikit niang ganansia an nakatatabang sa saiya na mabuhay. An duwa niang aking lalaki nag-iistar sa ibang nasyon na harayo. Haloy nang panahon na sia dai ninda pinadarahan nin kuarta.
Kan nakaaging mga panahon, halangkaw an pagheling sa mga may edad na sa Aprika. Iginagalang sinda huli sa saindang eksperyensia asin kaaraman, kaiba kan kadonongan asin pakamansay na parateng kadungan kaiyan. Nagtatabang sinda sa pagpadakula sa mga makoapo. An mga hoben naghingoang kamtan an saindang sadol asin pag-oyon. An mga tawo namuhay sono sa hatol kan Biblia: “Tumindog ka sa atubangan nin may uban, asin magpaheling ka nin konsiderasyon sa persona nin gurang [na lalaki o babae].”—Levitico 19:32.
Iba na an mga panahon. Huli sa kadukhaan, implasyon, kadaihan nin trabaho, asin pagbalyo nin kadakol na tawo sa mga siudad an dakol na may edad na kaipuhan na magsarosadiri. An direktor kan HelpAge Kenya, si Camillus Were, nagsasabi: “An tradisyon na pagsustento asin pag-ataman sa mga may edad na paluya nang paluya.”
Siempre, an pagluya kan bogkos nin pamilya bako sanang sa mga nasyon sa Aprika nangyayari. Mapadapit sa Hapon, an Guardian Weekly nagbabareta: “An debosyon kan aki sa magurang dati iyo an pasisikadan nin mga prinsipyo sa buhay sa Hapon na ipinamana nin Confucianismo, alagad nawara iyan kadungan kan urbanisasyon asin pagluya kan bogkos nin pamilya: ngonyan, an 85 porsiento kan mga Hapon nagagadan sa mga ospital o sa mga klinika para sa pag-ataman sa mga gurang.”
Ano man an situwasyon, an mga may tunay na pagmawot na paogmahon an Dios nagmamaigot na tawan nin onra an saindang mga magurang. Kinukuyog ninda an hatol kan Biblia: “Tawan mo nin onra an saimong ama asin an saimong ina . . . tanganing iyan ikarahay mo asin ika magdanay nin haloy sa daga.” (Efeso 6:2, 3) Minsan ngani bakong perming pasil an pagtao nin onra asin pag-ataman sa may edad nang mga magurang, iyan puedeng magtao nin mayaman na mga balos.