Kun Taano an Iba ta Riniribayan an Saindang Relihion

Para sa dakol, an relihion saro sanang tatak. Iyan tibaad magparisa kun saen nagduduman an saro paminsanminsan kun Domingo, kun saen sia ikinasal, asin kun saen sia ilolobong. Alagad dai kaiyan sinasabi kun anong klaseng tawo sia o kun ano an saiyang naaaraman asin pinaniniwalaan. Halimbawa, an sarong surbey naghayag na 50 porsiento kan naghihingakong mga Kristiano an dai aram kun siisay an nagpahayag kan Sermon sa Bukid. Tara, dawa an bantog na namomoon sa India na si Mohandas Gandhi, na sarong Hindu, aram iyan!

MAKANGANGALAS daw na an mga tawo ianod parayo sa mga relihion mantang an kadakol sa sainda kakadikit an aram manongod sa saindang pagtubod? Bako nanggad. Minsan siring, iyan bako man na dai malilikayan. An mga nag-ako nin tabang tanganing makanood sa Biblia sa parate nasosorpresa na manompongan an dakulang pakinabang ninda dian. An Biblia mismo nagsasabi: “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan.”​—Isaias 48:17.

Ano an maninigong gibohon kan mga dai naninigoan an espirituwal na pagkagutom? Dai maninigo na humabo na sinda sa paglilingkod sa Dios! Imbes, sinda maninigong magsiyasat sa Biblia asin helingon kun ano an iinoopresir sa sainda nin Dios mismo.

Mga Simbag sa Depisil na mga Hapot

Sa edad na siete anyos, naheling ni Bernd kan magadan an saiyang ina.a Sa bilog niang pagkaaki, sia nag-isip, ‘Yaon saen an sakong ina? Taano ta kaipuhan kong magdakula na mayo sia?’ Kan sia tinedyer pa, si Bernd aktibong miembro nin iglesia. Huling may pagmalasakit sa pagdusa kan katawohan, gusto niang magtrabaho sa pag-ayuda sa ibang nasyon. Pero, sia napurisaw sa mga hapot na mayong nakakokontentong simbag an saiyang iglesia.

Dangan nakipag-olay si Bernd sa sarong kaeskuela na saro palan sa mga Saksi ni Jehova. An hoben na ini ipinaheling ki Bernd sa Biblia na an saiyang ina daing pag-aram, natotorog sa kagadanan. Nanodan ni Bernd an dakol na teksto sa Biblia na nagpapaliwanag kaini, siring kan Eclesiastes 9:​5: “Kun dapit sa mga gadan, mayo man lamang sinda nin pakaaram.” Kaya si Bernd mayo nin dahelan na mahadit kun baga an saiyang ina nagdudusa sa sarong klase nin purgatoryo​—o mas grabe pa. Minsan ngani an doktrina kan inmortal na kalag itinotokdo sa kadaklan na relihion, nasabotan ni Bernd sa Biblia na an kalag nin tawo iyo man sana an tawo. Kun an tawo magadan, an kalag nagagadan. “An kalag na nagkakasala​—iyan mismo magagadan.”​—Ezequiel 18:4.

Nanodan man ni Bernd an makangangalas na oportunidad para sa mga gadan. Nabasa nia mismo sa libro kan Biblia na Gibo: “Magkakaigwa nin pagkabuhay liwat kapwa an mga matanos asin an mga bakong matanos.” (Gibo 24:15) Abaa kaogma nia na maaraman na an pagkabuhay liwat na ini mangyayari digdi sa daga, na ibabalik nin Dios na magin sarong paraiso!​—Salmo 37:29; Kapahayagan 21:​3, 4.

Dai nahaloy nanigoan an espirituwal na mga pangangaipo ni Bernd paagi sa tunay na kaaraman sa Biblia. Dai hinaboan ni Bernd an relihion. Imbes, binayaan nia an iglesia na dai nakapanigo sa saiyang pagkagutom asin inako an sarong porma nin pagsamba na marigon na basado sa Biblia. Sinabi nia: “Iyan kaidtong 14 taon na an nakaagi, asin nungka akong nagbasol sa lakdang na iyan. Ngonyan aram ko na an Kaglalang dai nagkacausa nin pagdusa. Si Satanas an dios kan palakaw na ini, asin sia an dapat basolon sa mga kamugtakan sa palibot niato. Alagad sa dai na mahahaloy ikokorehir nin Dios an gabos na danyos na ginibo kan kinaban ni Satanas. An sakong ina mabalik man sa pagkabuhay liwat. Abaa kagayagaya kaiyan!”

Kulibat palan, naabot ni Bernd an saiyang pasohan na magtrabaho sa ibang nasyon tanganing magtabang sa iba. Sia nagtatrabaho sa ibang nasyon na tinatabangan an iba na makanood manongod sa Kahadean nin Dios, an tunay na solusyon sa saindang kasakitan. Kapareho ni Bernd, minilyon an nakanood na tataposon nin Dios an pagdusa nin tawo sa dai na mahahaloy. Sinda naoogma na manompongan na igwa nin sarong relihion na nakapaninigo sa saindang espirituwal na pangangaipo.​—Mateo 5:3.

Ano an Katuyohan nin Buhay?

Mantang an kinaban sa Solnopan paorog nang paorog na nagigin sekularisado, an dakol naghahapot, ‘Ano an katuyohan nin buhay?’ An simbag manonompongan sa Biblia, siring kan naaraman ni Michael. Sa katangaan kan mga taon nin 1970, gusto ni Michael na mag-ayon sa sarong grupo nin mga terorista. Saro sana an saiyang kamawotan sa buhay​—puntahon an mga tawo na para sa saiya iyo an responsable sa mga inhustisya sa sistemang kapitalista. “Nungka akong minahale sa harong na dai ko dara an sakong badil,” an sabi nia. “An plano ko gadanon an pinakadakol na haralangkaw na politiko asin kapitalista sagkod sa posible. Puedeng ikinatao ko an sakong buhay para sa katuyohan na iyan.”

Parateng nagsisimba si Michael, alagad mayo sa saiyang iglesia an nakapaliwanag kan tunay na katuyohan nin buhay. Kaya kan sumongko an Mga Saksi ni Jehova sa saiyang harong asin ipinaheling sa saiya an simbag kan Biblia sa saiyang mga hapot, si Michael maingat na naghinanyog. Sia nagpoon nang mag-atender sa mga pagtiripon para sa pagsamba sa lokal na Kingdom Hall kan Mga Saksi ni Jehova.

An mga katood ni Michael gustong makaaram manongod sa saiyang bagong manompongan na interes sa Biblia. “Magduman kamo sa pagtiripon sa maabot na Domingo,” an sadol ni Michael sa sainda. “Magdanay kamo nin halipot. Kun dai nindo magustohan an saindong nadadangog, dangan pumuli kamo.” Siring nanggad an nangyari, pakalihis nin 45 minutos na pahayag na basado sa Biblia, an kadaklan sa saiyang mga katood naghale sa hall. Alagad may saro​—si Susan—​na natada. An hoben na babaeng ini nagkainteres sa saiyang nadangog. Kan huri si Michael asin si Susan nagin mag-agom patin nabautismohan bilang mga Saksi ni Jehova. “Ngonyan aram ko na kun taano ta uya kita digdi sa daga,” an sabi ni Michael. “Linalang kita ni Jehova. An tunay na katuyohan niato sa buhay iyo na mamidbid sia asin gibohon an saiyang kabotan. Iyan an nagtatao nin tunay na pagkakontento!”

Minilyon an igwa kan kombiksion na arog kan ki Michael. Isinasapuso ninda an mga tataramon sa Biblia: “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”​—Eclesiastes 12:13.

Pag-atubang sa mga Problema sa Buhay

Naeeksperyensiahan niato gabos an kaotoban kan hula na manonompongan sa 2 Timoteo 3:1: “Sa huring mga aldaw maabot an delikadong mga panahon na masakit pakibagayan.” Dai madudulagan nin siisay man an mga problema sa “delikadong mga panahon” na ini. Alagad an Biblia tinatabangan kita na atubangon an mga iyan.

Estudyare an mag-agom na si Steven asin Olive. Kan sinda magpoon na mag-adal sa Biblia kaiba nin Mga Saksi ni Jehova, sinda, kapareho nin kadakol na iba pa, may mga problema nin mag-agom. “Kami luway-luway na nagsusuhay,” an paliwanag ni Steven. “Magkalaen an samong mga pasohan asin interes.” Ano an nakatabang sa sainda na magdanay na magkaiba? “An Mga Saksi ni Jehova ipinaheling sa samo kun paano mi iaaplikar an mga prinsipyo sa Biblia sa samong buhay,” an idinugang ni Steven. “Sa kaenot-enote, nanodan mi kun ano an kahulogan nin pagigin bakong maimot asin mapagmakolog. An pag-aplikar kan mga prinsipyo sa Biblia marigon na nagbogkos sa samo. Ngonyan igwa kami nin maogma, marigon na pag-agoman.”

Sarong Dayupot na Relasyon sa Dios

Oyon sa sarong dai pa sana nahahaloy na surbey na Gallup, 96 porsiento kan mga Amerikano an naniniwala sa Dios, asin an kadaklan sa mga ini namimibi sa saiya. Pero an sarong suhay na surbey nagpaheling na an mga nagsisimba asin nagduduman sa mga sinagoga pinakakadikit ngonyan sa laog nin kabangang siglo. Mga 58 porsiento kan mga Amerikano an nagsasabi na sinda nagsisimba sarong beses kada bulan o mas bihira pa. Malinaw nanggad, an relihion dai nagpadayupot sa sainda sa Dios. Asin an problemang ini bako sanang sa Estados Unidos.

Si Linda nagdakula sa Bavaria. Sia aktibong Katoliko asin regular na namimibi. Kadungan kaiyan, sia natatakot sa ngapit. Mayo siang kaaram-aram manongod sa katuyohan nin Dios para sa tawo. Kan sia 14 anyos pa sana, nanuparan ni Linda an Mga Saksi ni Jehova, asin sia nagbabareta: “Interesante an saindang sinabi, kaya inako ko an duwang pantabang sa pag-adal sa Biblia asin tolos-tolos na binasa iyan.” Pakalihis nin duwang taon, si Linda nagpoon na mag-adal sa Biblia kaiba nin Mga Saksi ni Jehova. “An gabos na nanodan ko sa Biblia manongod sa Dios rasonable,” an sabi nia. Si Linda nagdimitir sa saiyang iglesia asin nabautismohan bilang sarong Saksi ni Jehova sa edad na 18.

Ano an nagpahiro ki Linda na ribayan an saiyang relihion? Ipinaliwanag nia: “An sakong iglesia tinabangan ako na masabotan na igwa nin Dios, asin nanodan kong maniwala sa saiya. Alagad sia bakong persona asin harayo. An pag-adal ko sa Biblia bako sanang pinatunayan an sakong paniniwala sa Dios kundi siring man tinabangan ako na mamidbid asin kamotan sia. Ngonyan igwa na ako nin mahal na marhay na personal na relasyon sa Dios, sarong bagay na mas mahalaga kisa sa ano pa man.”

An Tunay na Relihion Kapakipakinabang!

An saindong relihion daw nagtatao sa saindo nin espirituwal na paggiya asin ipinaheheling sa saindo kun paano an Biblia makatatabang sa saindo na atubangon an mga problema sa buhay? Iyan daw nagtotokdo kan paglaom para sa ngapit na nasa Biblia? Iyan daw nagpapangyari sa saindo na magkaigwa nin dayupot, personal na relasyon sa Kaglalang, basado sa tamang kaaraman sa Biblia? Kun dai, dai kamo mawaran nin paglaom. Imbes na bayaan an relihion, hanapon an porma nin pagsamba na marigon na basado sa Biblia. Dangan kamo magigin arog kan mga ihinula sa libro kan Biblia na Isaias: “Iyo ini an isinabi kan Soberanong Kagurangnan na Jehova: ‘Uya! An sakong mga lingkod makarakan . . . An sakong mga lingkod mairinom . . . An sakong mga lingkod maggagayagaya . . . An sakong mga lingkod magkukururahaw sa kagayagayahan huli sa marahay na kamugtakan kan puso.’”​—Isaias 65:​13, 14.

[Nota sa Ibaba]

[Mga retrato sa pahina 4, 5]

An Biblia tinatabangan kita na mamidbid asin kamotan an Dios