Taano ta Binabayaan Ninda an Relihion?
SA KATANGAAN kan ika-19 siglo, haros dai nadangog na an sarong taga-Prusia (na ngonyan amihanan na Alemania) magsabi na sia mayong ano man na partikular na relihion. Sa katunayan, an pagkakombertir sana hale sa sarong mayor na relihion pasiring sa sarong disidenteng iglesia puedeng magpangyari sa saiya na manmanan nin mga pulis. Kanigoan na pagbabago kan mga situwasyon!
Ngonyan, kadakol na Aleman an nagdidimitir sa mga iglesia. Oyon sa report, 1 sa 4 an naghihingako na mayo talaga nin relihion. An kaagid na tendensia maheheling sa Austria asin Switzerland. Kun an mga miembro an dugo na nagtatao nin buhay sa sarong relihion, kun siring, arog kan pagkasabi kan Aleman na parasurat na si Reimer Gronemeyer, “an mga iglesia sa Europa inaawasan sagkod na mautsan.”
Kun Taano ta Hinahaboan Ninda an Relihion
Taano ta hinahaboan nin dakol an organisadong relihion? Sa parate, huli sa pinansial na mga dahelan, nangorogna sa kadagaan na an mga miembro obligadong magbayad nin buhis sa iglesia. Dakol an naghahapot, ‘Taano ta maninigong mapasa iglesia an sakuyang pinagalan na kuarta?’ An nagkapira nauuyam sa dakulaon na kayamanan asin kapangyarihan kan iglesia. Posibleng minaoyon sinda ki Kardinal Joachim Meisner nin Colonia, Alemania, na nagsabi na an kayamanan kan iglesia tibaad iyo an nakaimpluwensia dian na magtao nin sobrang atension sa materyal na mga bagay asin “dai igong seryosohon an pagtubod ki Cristo.”
An nagkapira binabayaan an saindang iglesia huli ta naheheling ninda na iyan nakasusuya, bakong interesante, dai nakapaninigo sa saindang espirituwal na pagkagutom. Namamatean ninda an gutom na ihinula kan propetang si Amos, “sarong gutom, bakong sa tinapay, asin pagkapaha, bakong sa tubig, kundi sa pagdangog kan mga tataramon ni Jehova.” (Amos 8:11) Huling sinda haros mayong probisyon na inaako hale sa saindang relihion, hinahaboan na ninda iyan.
Mantang tunay an mga problema na inaatubang, an paghabo daw sa gabos na relihion an tamang reaksion? Imahinara nindo an sarong gutom na lalaki na may naheheling na garo tinapay. Minsan siring, kan pinoprobaran niang kakanon iyan, naaraman nia na iyan gibo sa kusot. Habo na daw niang mag-isip na kumakan asin panigoan an saiyang pagkagutom? Dai, sia mahanap nin tunay na kakanon. Kaagid kaiyan, kun an sarong relihion dai nakapaninigo sa espirituwal na pagkagutom kan mga miembro kaiyan, maninigo daw na haboan na ninda an relihion? O sinda daw magigin mas madonong na humanap nin paagi na mapanigoan an saindang espirituwal na pagkagutom? Iyan an ginibo nin dakol, siring kan ipinaheheling sa minasunod na artikulo.