‘An Sakong Relihiyon Igo Na Para sa Sako!’
NAGRASON na daw kamo nin siring na mga tataramon kun an mga Saksi ni Jehova minasongko sa saindong harong? Tibaad magsabi pa kamo: ‘Nanigoan na kaiyan an sakong mga magurang asin an sakong mga apoon. Kaya taano ta magpara-intindi pa sa ibang relihiyon?’
Siyempre, nakikinabang kitang marhay sa kadonongan asin eksperiyensia kan satuyang mga magurang. Alagad talaga daw na madonong na basihan iyan tanganing sunodon an sarong relihiyon? Siyempre dai niato inaarog an satong mga magurang asin an satong mga apoon sa gabos niatong ginigibo. Taano ta dai? Huli ta nagkaigwa nin pag-oswag sa kaaraman asin pakasabot.
Sa pag-ilustrar: Labi nang 40 taon an nakaagi kan an mga tawo nagkakahelang, basta na sana sinda nagagadan huli ta dai nin makukuang igong bolong. Poon 1943, an mga antibiotiko makukua na asin nagligtas nin dakol na mga buhay. Nagsasayuma daw kita na gumamit nin antibiotiko huli ta an satong mga apoon dai aram iyan? Dai, binubuksan niato an satong isip asin tinitimbang an mga pakinabang kan bagong mga nadiskubre. An siring na saboot madonong kun dapit sa relihiyon.
An kaso ni apostol Pablo orog na nag-ilustrar na an relihiyon kan satong mga ginikanan bakong perming tunay na pagsamba na nakakaoyon sa Dios. Bago si Pablo nakubirtir sa Kristianidad, an saiyang reaksion sa Kristianong “Dalan” sobra karingis, huli ta saiyang “pinaglamag nin makuri an simbahan nin Dios asin linaglag iyan.” Alagad taano? Huli ta sia ‘maigot para sa mga tradisyon kan saiyang mga magurang.’ An saiyang sinserong pagsunod sa saiyang dating relihiyon nagpogol saiya na midbidon an katotoohan dapit ki Cristo Jesus—asin dai nakapa-oyon sa Dios.—Gibo 9:1, 2; Galacia 1:13, 14.
An Saindong Relihiyon—Bunga nin Pagpili o Pagkanorongod?
Sa kadaklan na kaso, an relihiyon nin sarong tawo tunay na pagkanorongod sana. Sa anong sentido? Tibaad dian ka na namundag bilang sarong Katoliko, Protestante, Hindu, Taostita, o sarong Budhista huli ta iyan iyo an relihiyon kan saindong mga magurang. Alagad ipamugtak niatong kamo namundag sa sarong nasyon o pamilya. Tibaad kamo ngonyan seryosong naghihingako nin nalalaen na relihiyon. Kun siring, makatanosan daw na sabihon na an saindong relihiyon na nagimatan iyo na an tunay?
Namundag man kamo sa saindong relihiyon o dai, hohonaon pa giraray nindo na iyan igo na para sa saindo. Alagad an tama daw na relihiyon bagay sanang personal na opinyon o naooyonan? Iyan daw sarong masasarigan na giya?
Tibaad ikaka-ilustrar niato ini sa pagkakan. Hapota an sarong aki asin papilia kun arin an mas gusto nia—sarong pidasong mamon o gulay. Siyempre pipilion nia an mamon. Alagad an pinili daw na iyan iyo an pinakamasustansiya? Arog kaiyan, an katunayan na an relihiyon na nakakaoyon sa saindong personal na gusto dai perming nangangahulogan na iyan an pinakamarahay saindo para sa espirituwal.—Ikomparar an Roma 10:2, 3.
An relihiyon bakong basta bagay na emosyonal na opinyon. Napapalabot dian an pagsamba sa Dios, kaya iyan kaipuhan makapaoyon saiya. Kun siring, an mahalagang hapot bakong, Igo na daw sa sako an sakong relihiyon? Imbes, ini, Talaga daw na nakakapaoyon sa Dios an sakong relihiyon?