Paano Nindo Mapoprotehiran an Saindong mga Aki?

PAKAPAG-ESKUELA nin dakol na taon sa sarong eskuelahan sa harani, pinonan ni Wernera an mas halangkaw na gradong kurso sa São Paulo, Brazil, kaiba nin mga 3,000 na iba pang hoben. Sa kaenot-enote, namasdan nia an mga kapwa estudyante na nagpapabakal asin naggagamit nin droga. Huling sadit sana, sia madaling nabiktima nin makasosopog asin peligrosong mga seremonya sa pag-ako sa bagohan na gibo nin mas matuang mga estudyante.

Nagkaproblema man an tugang ni Werner na si Eva. Gustong gibohon an pinakamakakaya nia, nag-adal sia nin seryosong marhay kaya sia nakamate nin pagkapundido asin karibarawan nin isip. Arog nin ibang hoben, kaipuhan ni Werner asin Eva an pisikal asin emosyonal na pagprotehir. Anong klaseng tabang an kaipuhan kan saindong mga aki? Paano nindo sinda maaandam para sa buhay nin nasa edad na? Sa katunayan, anong ngapit an gusto nindo para sa saindong mga aki?

Bako Sanang Sustento an Kaipuhan Ninda

Isipa sa kadikit na panahon an angat na inaatubang nin mga magurang sa pagprotehir sa saindang mga aki ngonyan. Huli sa pagruro kan kualidad kan buhay pampamilya asin pag-orog nin kadukhaan, sa dakol na nasyon nagdadakol an aki na nag-iistar sa kalye. An pagkua nin mga trabahador na aki resulta nin dai pakaprotehir sa mga hoben sa pag-aprobetsar. Rinaraot man nin pagdodroga an dakol na hoben. Halimbawa, kan an sarong tinedyer na taga-Brazil magin adikto sa droga, nawara an katoninongan sa saiyang harong. Apuera sa emosyonal na sakit na inagihan kan saiyang mga magurang, yaon man an maigot na paghihingoa na may magasto sa saiyang pagpaomay, asin dinudumanan sinda nin daing herak na mga negosyante nin droga na naghahagad nin bayad.

Minsan siring, sa ibong kan mga sakit sa buhay, an dakol na magurang ipinagpapadagos an maigot na paghihingoa na tawan an saindang mga aki bako sanang nin kakanon, gubing, asin istaran kundi nin pagprotehir man sa kadahasan, pagdodroga, asin iba pang problema. Ini nobleng paghihingoa, alagad igo na daw iyan? Paano man an pagprotehir sa emosyonal asin espirituwal na kapahamakan? Aram nin dakol na kaiba sa mapangganang pagpadakula sa aki an pag-atubang sa mga angat na may labot sa pinipili kan saindang mga aki na mga amigo asin pag-aling-aling. Pero paano malilikayan nin mga magurang an pagigin magsalang sobra kaparasurog o sobrang magpasunod? Imbitado kamo na estudyaran an mga simbag na yaon sa kasunod na artikulo.

[Nota sa Ibaba]