Anong Ngapit an Gusto Nindo Para sa Saindong mga Aki?

IBINIBILANG daw nindo an saindong mga aki na sarong pamana na dakula an halaga? (Salmo 127:3) O an pagmansay daw nindo sa pagpadakula sa sainda pinansial na pagabat na mayo nin garantiya na magin mapanggana? Imbes na magtao nin ganansiang kuarta, an pagpadakula sa mga aki magasto sagkod na kaya na nindang sustentohan an sadiri. Kun paanong nagkakaipo nin marahay na pagplano an pagkapot sa minanang kayamanan, iyo man an mapangganang pagpadakula sa aki.

An mga magurang na may pagmakolog gustong tawan nin marahay na kapinonan sa buhay an saindang mga aki. Minsan nangyayari an maraot asin makamomondong mga bagay sa kinaban na ini, dakula an magigibo nin mga magurang tanganing maprotehiran an saindang aki. Estudyare an kamugtakan ni Werner asin Eva, na nasambitan sa sinusundan na artikulo.a

Kun Talagang May Pagmakolog an mga Magurang

Sinasabi ni Werner na imbes na pabayaan an mga bagay, an saiyang mga magurang nagpaheling nin tunay na interes sa nangyayari sa eskuelahan. “Inapresyar kong marhay an praktikal na mga suhestion na itinao ninda sa sako, asin namatean ko na sinda may pagmakolog sa sako saka sinusuportaran ako. Bilang mga magurang, sinda dai basta-basta maliliwat an isip, alagad aram ko na sinda an tunay kong mga katood.” Asin kan si Eva maaburidong marhay sa saiyang mga leksion kaya sia nagkadepresyon asin nagkaproblema sa pagtorog, an saiyang mga magurang, si Francisco asin Inez, awad-awad man na oras an inubos sa pakikipag-olay sa saiya asin pagtabang sa saiya na mabawi an panimbang sa mental asin espirituwal.

Paano hiningoa ni Francisco asin Inez na protehiran an saindang mga aki asin andamon sinda para sa buhay nin nasa edad na? Bueno, poon kan omboy pa an mga aki, an mamomoton na mga magurang na ini pirme sindang ilinalabot sa saindang mga aktibidad sa aroaldaw. Imbes na makitipontipon sana sa saindang mga katood na nasa edad na, iiniba ni Inez asin Francisco an mga aki saen man sinda magduman. Bilang mamomoton na mga magurang, tinawan man ninda nin tamang paggiya an saindang aking lalaki asin babae. Sabi ni Inez: “Tinokdoan niamo sinda na asikasohon an harong, mag-ekonomiya, asin asikasohon an sadiri nindang gubing. Asin tinabangan niamo an lambang saro sa sainda na pumili nin opisyo asin pagtimbangon an saindang mga paninimbagan asin an espirituwal na mga interes.”

Abaa kahalagang marhay na midbidon an saindong mga aki asin itao an paggiya nin mga magurang! Siyasaton niato an tolong langtad na dian magigibo nindo ini: (1) Tabangan an saindong mga aki na pumili nin tamang klase nin sekular na trabaho; (2) andamon sinda na makaya an emosyonal na tension sa eskuelahan asin sa pinagtatrabawohan; (3) itokdo sa sainda kun paano mapaninigoan an saindang espirituwal na mga pangangaipo.

Tabangan Sinda na Pumili nin Angay na Trabaho

Mantang an sekular na trabaho nin saro bako sanang nakaaapektar sa saiyang pinansial na kamugtakan kundi nakauubos man kan dakol niang oras, kaiba sa marahay na pagpadakula sa aki an pag-estudyar sa mga pinagkakainteresan asin abilidad kan lambang aki. Mantang mayo nin tawong sadiosan na gustong magin pagabat sa iba, maninigo na seryosong isipon nin mga magurang kun paano maaandam an saindang aki na sustentohan an sadiri asin an sarong pamilya. Kaipuhan daw na may manodan na hanap-buhay an saindong aking lalaki o babae tangani na makakua nin igong pagbuhay? Bilang magurang na talagang may pagmakolog, gumibo nin daing liwat-liwat na mga paghihingoa na tabangan an saindong aki na makapatalubo nin mga kualidad na arog baga kan kamawotan na magtrabaho nin mahigos, pagigin andam na makanood, asin kan abilidad na makapakiibaiba nin marahay sa iba.

Estudyare si Nicole. Sabi nia: “Pinapagtrabaho ako kan sakong mga magurang kaiba ninda sa saindang trabahong paglinig. Isinuherir ninda na itao ko an sarong kabtang kan sakong ginaganar para sa mga gastos mi sa harong asin sarayon an tada para sa sadiri kong paragastos o tipon. Tinawan ako kaini nin orog na pakamate nin paninimbagan na nagin kapakipakinabang na marhay sa huri.”

An Tataramon nin Dios, an Biblia, dai nagsasabi nin eksakto kun anong klaseng sekular na trabaho an maninigong pilion nin saro. Alagad iyan nagtatao nanggad nin madonong na giya. Halimbawa, si apostol Pablo nagsabi: “Kun an siisay man habong magtrabaho, dai man sia pagpakakanon.” Sa pagsurat sa mga Kristiano sa Tesalonica, sia nagsabi man: “Nababaretaan niamo na an nagkapira bakong toltol an paglakaw dian sa tahaw nindo, na dai man lamang nagtatrabaho kundi nag-aatom sa mga bagay na daing labot sa sainda. Sa siring na mga tawo itinatao niamo an pagboot asin sadol dian sa Kagurangnan na Jesu-Cristo na paagi sa pagtrabaho nin toninong maninigo sindang magkakan nin kakanon na ginanar mismo ninda.”​—2 Tesalonica 3:​10-12.

Pero an pakakua nin trabaho asin pagkakuarta bakong iyo sana an kaipuhan sa buhay. Sa kahurihurihi, an mga sobra kaambisyoso posibleng marhay na magin diskontento asin tibaad makarisa na sinda ‘naglalapag sa doros.’ (Eclesiastes 1:14) Imbes na sadolon an saindang mga aki na pag-aaboton an pagrekonoser kan publiko asin an prosperidad, marahay na an mga magurang tumabang sa sainda na masabotan an kadonongan kan mga tataramon ni apostol Juan na ipinasabong nin Dios: “Dai kamo mamoot sa kinaban o sa mga bagay kan kinaban. Kun an siisay man namomoot sa kinaban, an pagkamoot kan Ama mayo sa saiya; huli ta an gabos na nasa kinaban​—an horot kan laman asin an horot kan mga mata asin an pagpaabaw-abaw kan kaya sa buhay—​bakong gikan sa Ama, kundi gikan sa kinaban. Apuera kaini, an kinaban maagi sana asin siring man an horot kaiyan, alagad an naggigibo kan kabotan nin Dios magdadanay sagkod lamang.”​—1 Juan 2:​15-17.

Paano Nindo Mapaninigoan an Saindang Emosyonal na mga Pangangaipo?

Bilang magurang, taano ta dai magin siring sa parasanay sa mga atleta? Sia dai sana nagkokonsentrar sa pagpatalubo sa mga atletang ataman nia nin pisikal na kakayahan na dumalagan nin mas marikas o lumukso nin mas harayo. Posibleng marhay, hinihingoa man nia na tabangan sinda na mahale an ano man na negatibong aktitud, sa siring dinudugangan nin puersa an saindang emosyonal na kakosogan. Sa kaso nindo, paano nindo maparirigon an boot, mapakokosog, asin mamomotibar an saindong mga aki?

Estudyare si Rogério, sarong 13 anyos na hoben. Apuera sa grabeng karibarawan sa isip bilang resulta nin mga pagbago sa hawak, nag-agi sia nin emosyonal na tension huli sa dai pagkasararo asin kakulangan nin pag-asikaso kan saiyang mga magurang. Ano daw an magigibo para sa mga hoben na arog nia? Minsan ngani imposible na protehiran an saindong mga aki sa gabos na kahaditan asin maraot na impluwensia, nungka nindong butasan an saindong kabtang bilang magurang. Dai man nagigin sobra kaparasurog, disiplinahon an saindong aki na may pagsabot, na pirmeng ginigirumdom na an lambang aki daing kapareho. Paagi sa pagpaheling nin kabootan asin pagkamoot, dakula an magigibo nindo na magin tiwasay an pagmate nin sarong hoben. Ikaeebitar man sia kaini sa pagdakula na mayo nin kompiansa asin paggalang sa sadiri.

Gurano man kamapanggana kan sadiri nindong mga magurang sa pagpanigo sa saindong emosyonal na mga pangangaipo, tolong bagay an makatatabang sa saindo na magin mapanggana bilang magurang na talagang nakatatabang: (1) Likayan na maubos an panahon sa sadiri nindong mga problema na dai na nindo iniintindi an garo baga saradit na problema kan saindong mga aki; (2) hingoahon na magkaigwa nin nakaoogma asin makahulogan na komunikasyon sa sainda aroaldaw; (3) paoswagon an positibong aktitud mapadapit sa kun paano reresolberan an mga problema asin pakiiibanan an mga tawo.

Sa paggirumdom sa mga taon na sia tinedyer, sinasabi ni Birgit: “Kinaipuhan kong manodan na dai mo mababago an mga tawo na magin arog kan gusto mo. Nakipangatanosan sa sako an sakong ina na kun may naheling ako sa iba na dai ko nagustohan, an magigibo ko likayan na magin arog ninda. Sinabi man nia na an pinakamarahay na panahon na bagohon ko an sakong ugale mantang ako hoben pa.”

Pero bako sanang trabaho asin emosyonal na karigonan an kaipuhan kan saindong mga aki. Hapota an saindong sadiri, ‘Minamansay ko daw an pagpadakula sa aki na paninimbagan na itinao nin Dios?’ Kun iyo, bobooton nindong asikasohon an espirituwal na mga pangangaipo kan saindong mga aki.

Mga Paagi na Ikatao an Saindang Espirituwal na mga Pangangaipo

Sa saiyang Sermon sa Bukid, sinabi ni Jesu-Cristo: “Maogma idtong mga nakamamate kan saindang espirituwal na pangangaipo, huli ta an kahadean kan kalangitan sadiri ninda.” (Mateo 5:3) Ano an kalabot sa pagpanigo sa espirituwal na mga pangangaipo? Dakula an pakinabang nin mga aki kun an mga magurang nagtatao nin marahay na halimbawa sa pagpaheling nin pagtubod ki Jehova Dios. Si apostol Pablo nagsurat: “Kun dai nin pagtubod imposible na mapaogma [an Dios] nin marhay, huli ta an minadolok sa Dios kaipuhan na magtubod na sia iyo nanggad asin na sia nagigin an parabalos sa mga maigot na naghahanap sa saiya.” (Hebreo 11:6) Minsan siring, tanganing magkaigwa nin tunay na kahulogan an pagtubod, kaipuhan an pamibi. (Roma 12:12) Kun rinerekonoser nindo an sadiri nindong espirituwal na pangangaipo, mahagad kamo nin paggiya nin Dios, arog kan ginibo kan ama kan aki na nagin an bantog na si Hokom Samson nin Israel. (Hokom 13:8) Kamo dai sana mamimibi kundi mapatabang man sa ipinasabong na Tataramon nin Dios, an Biblia.​—2 Timoteo 3:​16, 17.b

Sa ibong kan gabos na mapagal na trabaho na kalabot sa pagtao nin madonong na paggiya, emosyonal na suporta, asin espirituwal na tabang, puedeng magin nakakokontento an pagpadakula sa aki. An ama nin duwang aki sa Brazil nagkokomento: “Dai ko ngani maimahinar na mayo sa sako an sakong mga aki. Kadakol kan karahayan na ikahihiras niato sa sainda.” Sa pagpaliwanag kun taano ta marahay man an mga aki, idinugang kan ina: “Pirme kaming iribaiba, asin hinihingoa niamo na gibohon na magayagaya asin maogma an mga bagay. Asin, pinakamahalaga, pirme niamong ipinamimibi an mga aki.”

Nagigirumdoman ni Priscilla an pagkamoot asin pagpapasensia na ipinaheling sa saiya kan saiyang mga magurang basta may problema. “Sinda an tunay kong mga katood asin tinabangan ninda ako sa gabos na bagay,” sabi nia. “Bilang aki, totoong namatean ko kaidto na ako tinatratar bilang ‘mana hale ki Jehova.’” (Salmo 127:3) Arog kan dakol na magurang, taano ta dai mag-iskedyul nin oras kaiba kan saindong mga aki tangani na iriba nindong mabasa an Biblia asin an Kristianong mga publikasyon? An pag-estudyar sa mga pagkasaysay asin prinsipyo sa Biblia sa sarong positibong kamugtakan makatatabang sa saindong mga aki na magin kompiado asin magkaigwa nin tunay na paglaom sa ngapit.

Panahon na Magigin Tiwasay an Gabos na Aki

Minsan ngani garo malumlom an ngapit para sa dakol na aki ngonyan, iginagarantiya kan Tataramon nin Dios na dai na mahahaloy an daga magigin tiwasay na istaran para sa katawohan. Isip-isipa an panahon sa ipinanuga nin Dios na bagong kinaban na an mga magurang dai na maghahadit manongod sa pagigin ligtas sa peligro kan saindang mga aki! (2 Pedro 3:​13) Probareng imahinaron an marahayon na kaotoban kan hulang ini: “An lobo mag-eerok sa kadikit na panahon na kasaro kan kordero, asin an leopardo maghihigdang kadorog kan ogbon na kanding, asin an ogbon na baka asin an may bunday na ogbon na leon saka an hayop na basog nag-iiriba; asin sarong aking sadang an mangengenot sa sainda.” (Isaias 11:6) Ngonyan pa, an espirituwal na katiwasayan na ilinaladawan sa mga tataramon na ini may piguratibong kaotoban sa tahaw kan mga naglilingkod ki Jehova. Sa tahaw ninda, mamamatean nindo an mamomoton na pagmakolog nin Dios. Kun kamo nagpapaheling nin pagkamoot sa Dios, makasisierto kamo na nasasabotan nia an saindong mga saboot bilang magurang asin tatabangan nia kamo na makaya an mga kahaditan asin kasakitan na tibaad agihan nindo. Adalan an saiyang Tataramon asin maglaom sa saiyang Kahadean.

Tabangan an saindong mga aki na mapasa dalan pasiring sa buhay na daing sagkod paagi sa pagtao nin marahay na halimbawa. Kun kamo mapaili ki Jehova Dios, an ngapit nindo asin kan saindong mga aki puedeng lumabi sa gabos nindong linalaoman. Puedeng mapasaindo an kompiansa na arog kan sa salmista na nag-awit: “Magkaigwa nin labi-labi nanggad na pagkakontento dian ki Jehova, asin itatao nia sa saimo an mga kahagadan kan saimong puso.”​—Salmo 37:4.

[Mga Nota sa Ibaba]