Si Tiquico—Sarong Pinagtitiwalaan na Kapwa Oripon
SA MANLAENLAEN na okasyon, si Tiquico nagbiahe kaiba ni apostol Pablo asin nagin saiyang mensahero. Sia sarong sugo na puedeng pagkatiwalaan nin kuarta asin nin mga paninimbagan sa pangangataman. Mantang itinatampok kan Kasuratan an saiyang pagigin mapagtitiwalaan—sarong kualidad na mahalagang marhay pa-ra sa gabos na Kristiano—seguro gusto nindong orog pa siang mamidbid.
Si Tiquico ilinadawan ni Pablo bilang saiyang “namomotan na marhay na tugang asin fiel na ministro patin kapwa oripon sa Kagurangnan.” (Colosas 4:7) Taano ta arog kaiyan an pagheling sa saiya kan apostol?
An Misyon na Pag-ayuda sa Jerusalem
Nagkaigwa nin materyal na pangangaipo an mga Kristiano sa Judea kaidtong mga 55 C.E. Sa tabang kan mga kongregasyon sa Europa asin Asia Minor, nag-organisar si Pablo nin pangongolekta tanganing tabangan sinda. Si Tiquico, na taga distrito nin Asia, nagkaigwa nin kabtang sa misyon na pag-ayuda.
Pakatao nin mga instruksion sa kun paano gigibohon an arambagan na ini, isinuherir ni Pablo na an mapagtitiwalaan na mga lalaki isugo sa Jerusalem o magduman kaiba nia, na dara an bilog na halagang naako. (1 Corinto 16:1-4) Kan tumulak sia sa harayong biahe hale sa Grecia pasiring sa Jerusalem, kaiba nia an nagkapirang lalaki, na an saro minalataw na si Tiquico. (Gibo 20:4) Tibaad kinaipuhan an siring kadakulang pag-iriba ta dara ninda an kuarta na ipinagkatiwala sa sainda nin nagkapirang kongregasyon. Tibaad lataw na dahelan an pangangaipo nin pag-iingat sa pagprotehir, ta peligroso an biahe huli sa mga parahipa.—2 Corinto 11:26.
Mantang si Pablo inibanan ni Aristarco asin Trofimo pa-Jerusalem, hinohona nin nagkapira na posibleng marhay na iyo man iyan an ginibo ni Tiquico asin kan iba pa. (Gibo 21:29; 24:17; 27:1, 2) Huli ta kalabot si Tiquico sa pag-ayudang ini, saro sia sa nagkapira na isinusuherir na iyo an “tugang” na nagtabang ki Tito sa Grecia na areglaron an pangongolekta asin ‘ninombrahan kan mga kongregasyon na magin kaiba ni Pablo sa pagbiahe may labot sa maboot na regalong ini.’ (2 Corinto 8:18, 19; 12:18) Kun an enot na sugo na inotob ni Tiquico magabat an paninimbagan, iyo man an ikaduwa.
Hale sa Roma Pasiring sa Colosas
Pakalihis nin lima o anom na taon (60-61 C.E.), naglalaom si Pablo na makaluwas sa enot na pagkabilanggo nia sa Roma. Kaiba nia si Tiquico, ginatos na kilometro an rayo sa sadiring lugar. Ngonyan pabalik na si Tiquico sa Asia. Pinapangyari kaini si Pablo na makapadara nin mga surat sa Kristianong mga kongregasyon sa lugar na iyan asin papulion sa Colosas an naglayas na oripon ni Filemon, si Onesimo. Dinara ni Tiquico asin Onesimo an kisuerra tolong surat na ngonyan kabtang na kan Biblia—saro sa mga taga Efeso, saro sa mga taga Colosas, asin saro ki Filemon. Tibaad may dinara man na surat sa kongregasyon sa Laodicea, sarong siudad na mga 18 kilometros hale sa Colosas.—Efeso 6:21; Colosas 4:7-9, 16; Filemon 10-12.
Si Tiquico bako sanang kartero. Sia pinagtitiwalaan na personal na mensahero, ta si Pablo nagsurat: “An gabos kong agi-agi si Tiquico, an sakong namomotan na marhay na tugang asin fiel na ministro patin kapwa oripon sa Kagurangnan, an magsasabi sa saindo. Para sa mismong katuyohan na maaraman nindo an mga bagay na may labot sa samo asin tanganing maranga nia an saindong puso, isinusugo ko sia sa saindo.”—Colosas 4:7, 8.
Sinasabi kan intelektuwal na si E. Randolph Richards na an paradara nin surat “sa parate personal na koneksion sa pag-oltanan kan autor asin kan mga nag-ako apuera sa nasusurat na koneksion. . . . [An sarong dahelan] sa pangangaipo nin mapagtitiwalaan na paradara [iyo na] sa parate may dara siang dagdag na impormasyon. An surat puedeng isaysay sa halipot an situwasyon, na sa kadaklan igwa kan paghusgar kan autor, alagad an paradara linalaoman na idetalye an gabos para sa nag-ako.” Minsan ngani an surat tibaad mapadapit sa mga katokdoan asin importanteng mga bagay, an ibang bagay berbal na ipaaabot nin sarong mensaherong pinagtitiwalaan.
An mga surat sa mga taga Efeso, taga Colosas asin ki Filemon kadikit an sinasabi manongod sa kun kumusta na si Pablo. Sa siring kaipuhan na ipaabot ni Tiquico an personal na impormasyon, ipaliwanag an kamugtakan ni Pablo sa Roma, asin saboton nin igo an mga kamugtakan sa mga kongregasyon tangani na makatao nin pagparigon sa boot. An mga mensahe asin paninimbagan na arog kaini ipinagkakatiwala sana sa mga masasarigan na fiel na irepresentar an nagpadara. Arog kaiyan si Tiquico.
Pangangataman sa Hararayong Destino
Kan makaluwas na sa pagkabilanggo sa sadiring harong sa Roma, plinano ni Pablo na isugo ki Tito magsalang si Tiquico o si Artemas sa isla nin Creta. (Tito 1:5; 3:12) Kaidtong ikaduwang pagkabilanggo ni Pablo sa Roma (mga 65 C.E. gayod), si Tiquico isinugo giraray kan apostol sa Efeso, na posible na tanganing salidahan si Timoteo, na kun siring makabibiahe na tanganing makaibanan ni Pablo.—2 Timoteo 4:9, 12.
Bakong malinaw kun baga si Tiquico nagduman sa Creta asin sa Efeso kan panahon na ini. Minsan siring, an mga pagkasambit na arog kaini nagsusuherir na sia nagdanay na saro sa dayupot na kaibaiba ni Pablo sagkod sa huring mga taon kan ministeryo kan apostol. Kun iniisip ni Pablo na isugo sia sa magabat an paninimbagan asin tibaad depisil na mga misyon imbes na si Timoteo asin Tito, malinaw na si Tiquico nagin nang maygurang na paraataman na Kristiano. (Ikomparar an 1 Timoteo 1:3; Tito 1:10-13.) Huli sa pagigin andam nia na magbiahe asin gamiton sa hararayong destino, sia nagin kapakipakinabang ki Pablo asin sa bilog na kongregasyon Kristiano.
Ngonyan, an mapagsakripisyong mga Kristiano gikan sa boot na naglilingkod sa Dios sa lokal na mga kongregasyon nin Mga Saksi ni Jehova o nagpepresentar na paoswagon an intereses kan Kahadean sa ibang lugar. Rinibo an maogmang nag-ako nin mga asignasyon bilang misyonero, nagbibiaheng paraataman, internasyonal na lingkod sa mga proyekto nin pagtogdok, sa pambilog na kinaban na opisina prinsipal kan Watch Tower Society, o sa saro kan mga sangang opisina kaiyan. Arog ni Tiquico, sinda bakong risang-risa, alagad sinda mahigos, ‘fiel na mga ministro’ na mahal nin Dios asin namomotan nin ibang Kristiano bilang mapagtitiwalaan na mga “kapwa oripon sa Kagurangnan.”