Ano an Katuyohan nin Buhay?—Paano Nindo Manonompongan Iyan?
Kasumpay kan Kapitulo 3: Daing Kaagid na Gikanan nin Nakalalabing Kadonongan
Naotob na Hula
32-34. Ano an yaon sa Biblia na mayo sa ibang libro?
32 Dugang pa, an Biblia igwa kan tanda nin pagpasabong nin Dios sa daing kaagid na lataw na paagi: Iyan libro nin mga hula na nagkaigwa asin padagos na nagkakaigwa nin kaotoban na daing salto.
33 Halimbawa, an pagkalaglag kan suanoy na Tiro, an pagbagsak kan Babilonya, an pagtogdok liwat kan Jerusalem, asin an pagkosog sa kapangyarihan saka pagbagsak kan mga hade sa Medo-Persia saka Grecia ihinula nin detalyadong marhay sa Biblia. An mga hula eksaktong marhay kaya an nagkapirang kritiko nagprobar na sabihon, nin daing kamanungdanan, na an mga iyan isinurat pagkaagi kan mga pangyayari.—Isaias 13:17-19; 44:27–45:1; Ezequiel 26:3-6; Daniel 8:1-7, 20-22.
34 An mga hula na itinao ni Jesus manongod sa pagkalaglag kan Jerusalem kaidtong 70 C.E. naotob nin eksakto. (Lucas 19:41-44; 21:20, 21) Asin an mga hula manongod sa “huring mga aldaw” na itinao ni Jesus asin ni apostol Pablo detalyadong naootob sa sato mismong panahon.—2 Timoteo 3:1-5, 13; Mateo 24; Marcos 13; Lucas 21.
35. Taano an hula sa Biblia ta solamente sa Kaglalang puedeng maghale?
35 Mayo nin isip nin tawo, gurano man katali, na eksaktong marhay na masasabi nin patienot an mga mangyayari sa ngapit. Solamente an isip kan makapangyarihan sa gabos asin madonong sa gabos na Kaglalang kan uniberso an makagigibo kaiyan, arog kan mababasa niato sa 2 Pedro 1:20, 21: “Daing hula nin Kasuratan na hale sa ano man na sadiring pakahulogan. Huli ta an hula dai kasuarin man dinara paagi sa kabotan nin tawo, kundi an mga tawo nagtaram hale sa Dios mantang sinda pinahihiro kan banal na espiritu.”
Itinatao Kaiyan an Simbag
36. Ano an sinasabi sa sato kan Biblia?
36 Huli kaini, sa dakol na paagi, an Biblia igwa kan ebidensia nin pagigin ipinasabong na Tataramon kan Supremong Persona. Bilang siring, sinasabi kaiyan kun taano an mga tawo ta yaon digdi sa daga, kun taano ta grabe an pagdusa, kun pasaen kita, asin kun paano marahay an mga kamugtakan. Ihinahayag kaiyan sa sato na igwa nin supremong Dios na naglalang sa mga tawo saka sa dagang ini na may katuyohan asin na an saiyang katuyohan maootob. (Isaias 14:24) Ihinahayag man sa sato kan Biblia kun ano an tunay na relihion asin kun paano niato manonompongan iyan. Sa siring, iyan an solamenteng gikanan nin nakalalabing kadonongan na makapagsasabi sa sato kan katotoohan manongod sa gabos na mahahalagang hapot sa buhay.—Salmo 146:3; Talinhaga 3:5; Isaias 2:2-4.
37. Ano an dapat na ihapot manongod sa Kakristianohan?
37 Minsan ngani abunda an prueba kan pagkamasasarigan asin pagigin totoo kan Biblia, an gabos daw na nagsasabing tinutubod ninda iyan nagsusunod sa mga tokdo kaiyan? Halimbawa, estudyare an mga nasyon na naghihingakong nagsasagibo nin Kristianismo, an boot sabihon, an Kakristianohan. Dakol nang siglo na sinda nakababasa kan Biblia. Alagad an sainda daw na kaisipan asin mga gawe-gawe talagang nagpapabanaag kan nakalalabing kadonongan nin Dios?