Ano an Katuyohan nin Buhay?—Paano Nindo Manonompongan Iyan?
Kasumpay kan Kapitulo 6: Taano ta Grabe an Pagdusa Asin Inhustisya?
Kun Ano an Nagkadiperensia
6, 7. Ano an nangyari ki Adan asin Eva kan lapason ninda an ley nin Dios?
6 Sa enot na rekord kan Biblia, nanonodan niato na bakong katuyohan nin Dios na an tawo magdusa o magadan. An enot niatong mga magurang, si Adan asin Eva, nagadan sana huli ta nakisuway sinda sa Dios. (Genesis, kapitulo 2 asin 3) Kan sinda makisuway, dai na ninda ginigibo an kabotan nin Dios. Huminale sinda sa pag-asikaso nin Dios. Garo man sana pinutol ninda an saindang koneksion sa Dios, “an gikanan nin buhay.”—Salmo 36:9.
7 Kapareho nin makina na minaluya asin minapondo kun putol an koneksion sa koryente, luminuya an saindang hawak asin isip. Bilang resulta, si Adan asin Eva luminuya, naggurang, asin sa kahurihurihi nagadan. Ano na an nangyari? Nagbuelta sinda sa saindang pinaghalean: “Ika kabokabo asin sa kabokabo ka man mabalik.” Pinatanidan sinda nin Dios na kagadanan an magigin resulta nin pakisuway sa saiyang mga ley: “Ika siertong magagadan.”—Genesis 2:17; 3:19.
8. Paano nakaapektar sa pamilya nin tawo an kasalan kan enot niatong mga magurang?
8 Bako sanang nagadan an enot niatong mga magurang kundi an gabos na gikan ninda, an enterong rasa nin tawo, ipinasakop man sa kagadanan. Taano? Huli ta segun sa mga ley nin henetika, an mga aki nagmamana kan mga karakteristiko kan saindang mga magurang. Asin an namana kan gabos na aki kan enot niatong mga magurang pagkabakong sangkap asin kagadanan. Sinasabi sa sato kan Roma 5:12: “Paagi sa sarong tawo [si Adan, an apoon kan katawohan] an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala [paagi sa pakamana nin pagkabakong sangkap, an boot sabihon, makasalan na mga tendensia].” Asin mantang an aram sana nin mga tawo kasalan, pagkabakong sangkap, asin kagadanan, an pagheling dian nin nagkapira natural asin dai malilikayan. Pero, an orihinal na mga tawo linalang na igwa kan kakayahan asin kamawotan na mabuhay sagkod lamang. Iyan an dahelan na para sa kadaklan na tawo nakapanluluyang marhay sa boot an posibilidad na an saindang buhay pahahalipoton nin kagadanan.
Taano ta Haloyon?
9. Taano ta itinogot nin Dios na magpadagos an pagdusa nin haloyon na?
9 Taano ta tinogotan nin Dios an mga tawo na masunod an gusto ninda nin haloyon na? Taano ta itinogot niang magkaigwa nin pagdusa sa nag-aging dakol na siglong ini? An sarong mahalagang marhay na dahelan iyo na may ibinangon na mahalagang marhay na isyu: Siisay an may diretsong mamahala? An Dios daw an maninigong magin Namamahala sa mga tawo, o kaya daw nindang pamahalaan an saindang sadiri sa mapangganang paagi na siblag sa saiya?
10. Anong abilidad an itinao sa mga tawo, na may anong paninimbagan?
10 An mga tawo linalang na may libreng kabotan, an boot sabihon, may abilidad na pumili. Dai sinda ginibo na arog nin mga robot o arog nin mga hayop, na sa pangenot ginigiyahan nin natural na tendensia. Kaya an mga tawo makapipili kun siisay an saindang paglilingkodan. (Deuteronomio 30:19; 2 Corinto 3:17) Sa siring, an Tataramon nin Dios naghahatol: “Magin kamong siring sa mga tawong talingkas, alagad pinangangaptan an saindong katalingkasan, bakong bilang pantahob sa karatan, kundi bilang mga oripon nin Dios.” (1 Pedro 2:16) Minsan siring, minsan ngani an mga tawo igwa kan marahayon na balaog na libreng pagpili, dapat na akoon ninda an mga resulta kan pinipili nindang igawe.
11. Ano an solamenteng paagi na maaraman kun baga puedeng magin mapanggana an dalan na independiente sa Dios?
11 Sala an pinili kan enot niatong mga magurang. Pinili ninda an dalan nin independensia sa Dios. Totoo, puede kutanang ginadan tolos nin Dios an enot na rebeldeng mag-agom pakagamita ninda sa sala kan saindang libreng kabotan. Alagad dai kutana kaiyan nahusay an hapot mapadapit sa diretso nin Dios na mamahala sa mga tawo. Mantang gusto nin independensia sa Dios an enot na mag-agom, dapat na masimbag an hapot na: An dalan daw na iyan puedeng magbunga nin maogma, mapangganang buhay? An solamenteng paagi na maaraman iyan pabayaan an satong enot na mga magurang saka an saindang mga gikan na gibohon an gusto ninda, mantang iyan an pinili ninda. An panahon an mapaheling kun baga an mga tawo linalang na magin mapanggana sa pamamahala sa sainda man sana na independiente sa saindang Kaglalang.
12. Ano an pagtasar ni Jeremias sa pamamahala nin tawo, asin taano ta siring kaini?
12 Aram kan kagsurat sa Biblia na si Jeremias kun ano an ibubunga. Ginigiyahan kan makapangyarihan na banal na espiritu, o puersa aktiba, nin Dios, sia onestong nagsurat: “Aram kong marhay, O Jehova, na bakong sadiri nin daganon na tawo an saiyang dalan. Mayo sa tawong naglalakaw an kakayahan na giyahan man lamang an saiyang lakad. Tanosan ako, O Jehova.” (Jeremias 10:23, 24) Aram nia na an tawo dapat na may paggiya kan langitnon na kadonongan nin Dios. Taano? Huli sana ta an tawo dai linalang nin Dios na magin mapanggana na siblag sa saiyang paggiya.
13. Ano an dai nang kadudaduda na ipinaheling kan mga bunga kan rinibong taon na pamamahala nin tawo?
13 An mga bunga kan rinibong taon na pamamahala nin tawo nagpapaheling nin dai nang kadudaduda na mayo sa tawo an pagdirehir sa sadiri nindang gibo-gibo na siblag sa saindang Kaglalang. Mantang naprobaran na iyan, sadiri sana ninda an mababasol ninda para sa kapahapahamak na mga ibinunga. Linilinaw ini kan Biblia: “An Gapo [an Dios], sangkap an saiyang gibo, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia. Sinda guminawe nin kapahapahamak sa sadiri ninda; sinda bako niang mga aki, an kasalan sadiri ninda.”—Deuteronomio 32:4, 5.
Madali Nang Mag-interbenir an Dios
14. Taano ta dai na pahahaloyon nin Dios an saiyang pag-interbenir sa gibo-gibo nin tawo?
14 Mantang pinabayaan na an bastanteng prueba kan pagkasudya kan pamamahala nin tawo sa laog nin mga siglo, an Dios puede na ngonyan na mag-interbenir sa gibo-gibo nin tawo asin papondohon an pagdusa, pagkamondo, helang, asin kagadanan. Mantang pinabayaan na an mga tawo na makaabot sa pinakahalangkaw na grado kan saindang mga nagibo sa siensia, industriya, medisina, asin ibang langtad, dai na kaipuhan na an Dios magtao pa nin mga siglo tanganing ikapaheling nin mga tawo na independiente sa saindang Kaglalang kun baga kaya nindang papangyarihon an matoninong, paraisong kinaban. Dai ninda iyan nagibo asin dai ninda iyan kayang gibohon. An independensia sa Dios nagbunga nin makanoson, maongison, nakagagadan na kinaban.
15. Anong hatol kan Biblia an marahay na himateon niato?
15 Minsan ngani nagkaigwa nin sinserong mga namamahala na nagmawot na tumabang sa katawohan, dai nagin mapanggana an saindang mga paghihingoa. Sa gabos na lugar ngonyan may ebidensia nin pagkatumpag kan pamamahala nin tawo. Iyan an dahelan na ihinahatol kan Biblia: “Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan.”—Salmo 146:3.