Ano an Katuyohan nin Buhay?—Paano Nindo Manonompongan Iyan?
Kapitulo 7: An Katuyohan nin Dios Madali Nang Maotob
1, 2. Taano ta masisierto niato na an Dios mahiro tanganing taposon an karatan asin pagdusa?
Minsan ngani sa punto de vista nin tawo haloy nang tinogotan nin Dios an pagkabakong sangkap asin pagdusa, dai nia pababayaan na magpadagos nin daing talaan na panahon an maraot na mga kamugtakan. Sinasabi sa sato kan Biblia na an Dios igwa nin espesipikong lawig nin panahon para sa pagtogot na mangyari an mga bagay na ini.
2 “Para sa gabos na bagay igwa nin itinalaan na panahon.” (Eclesiastes 3:1) Kun matapos na an isinenyalar nin Dios na panahon para sa pagtogot sa karatan asin pagdusa, dangan sia mainterbenir sa gibo-gibo nin tawo. Saiyang tataposon an karatan saka pagdusa asin ootobon an saiyang orihinal na katuyohan na an daga mapano nin sangkap, maogmang pamilya nin tawo na may lubos na katoninongan asin katiwasayan sa pagbuhay sa tahaw nin Paraisong mga kamugtakan.
An mga Paghokom nin Dios
3, 4. Paano ilinaladawan kan librong Talinhaga an mga resulta kan pag-interbenir nin Dios?
3 Mangnoha an pira sana sa dakol na hula sa Biblia na nagsasabi kun ano an madali nang magin kahulogan para sa pamilya nin tawo kan pag-interbenir nin Dios, an boot sabihon, kan mga resulta kan saiyang mga paghokom:
4 “An mga tanos iyo an mag-eerok sa daga, asin an mga daing kanawayan iyo an matatada dian. Kun dapit sa mga maraot, sinda popohoon sa mismong daga; asin kun manongod sa mga madaya, sinda hahaleon dian.”—Talinhaga 2:21, 22.
5, 6. Paano ipinaheheling kan Salmo 37 kun ano an mangyayari kun an Dios mag-interbenir na?
5 “An mga paragibo nin maraot mismo popohoon, alagad idtong mga naglalaom ki Jehova iyo an mga makasasadiri kan daga. Asin dai na mahahaloy, asin ta an maraot mawawara na . . . Alagad an mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan.”—Salmo 37:9-11.
6 “Maglaom ki Jehova asin otobon an saiyang dalan, asin ika ilalangkaw nia na makasadiri kan daga. Kun pohoon na an mga maraot, maheheling mo iyan. Pagmasdan mo an daing kanawayan asin helingon mo an tanos, huli ta an ngapit kan tawong iyan magigin matoninong. Alagad an mga paralapas mismo tunay na iribang paparaon; an ngapit kan mga maraot tunay na tataposon.”—Salmo 37:34, 37, 38.
7. Anong madonong na hatol an itinatao sa sato kan Tataramon nin Dios?
7 Kun siring, huli sa makangangalas na ngapit na kakamtan kan mga nagmimidbid sa diretso kan makakamhan sa gabos na Kaglalang na mamahala sa sato, kita sinasadol: “Kuyogon logod kan saimong puso an sakong mga togon, huli ta idadagdag sa saimo an lawig nin mga aldaw asin mga taon nin buhay patin katoninongan.” Sa katunayan, buhay na daing sagkod an idadagdag sa mga pinipiling gibohon an kabotan nin Dios! Sa siring, hinahatolan kita kan Tataramon nin Dios: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.”—Talinhaga 3:1, 2, 5, 6.
An Pamamahala nin Dios Hale sa Langit
8, 9. Paagi sa ano na lilinigan nin Dios an dagang ini?
8 Gigibohon nin Dios an paglinig na ini sa daga paagi sa pinakamarahay na gobyerno na puedeng kamtan nin katawohan kasuarin man. Iyan gobyerno na nagpapabanaag nin langitnon na kadonongan huli ta iyan namamahala hale sa langit sa pagdirehir nin Dios. Asin hahaleon sa daga kan langitnon na Kahadean na iyan an gabos na klase nin pamamahala nin tawo. Nungka na an mga tawo magkakaigwa giraray kan opsion na probaran na mamahala na independiente sa Dios.
9 Sa bagay na ini an hula sa Daniel 2:44 nagsasabi: “Sa mga aldaw kan mga hadeng idto [an mga gobyerno na yaon ngonyan] an Dios nin kalangitan mapatindog nin sarong kahadean [sa langit] na dai noarin man malalaglag. Asin an kahadean mismo dai itatao sa arin man na ibang banwaan [an mga tawo nungka na totogotan giraray na mamahala na independiente sa Dios]. Iyan an maronot asin matapos kan gabos na ining kahadean [na nag-eeksister ngonyan], asin iyan mismo magdadanay sagkod sa mga panahon na daing talaan.”—Helingon man an Kapahayagan 19:11-21; 20:4-6.
10. Taano ta makasisierto kita na sa pagsakop kan langitnon na Kahadean nin Dios, nungka na magkakaigwa giraray nin karatan sa pamamahala?
10 Sa siring, an katawohan nungka giraray na magkakaigwa nin raot na mga pamamahala, ta pakataposa nin Dios kan palakaw na ini, an pamamahala nin tawo na independiente sa saiya nungka na maeksister giraray. Asin an Kahadean na namamahala hale sa langit dai magigin raot, ta an Dios an Kagtugdas asin Parapreserbar kaiyan. Imbes, iyan mapunsionar para sa pinakaikararahay kan mga sakop kaiyan na tawo. Sa panahon na iyan an kabotan nin Dios gigibohon na sa bilog na daga kun paano sa langit. Iyan an dahelan na natokdoan ni Jesus an saiyang mga disipulo na mamibi sa Dios: “Dumatong logod an kahadean mo. Gibohon logod an boot mo, kun paano sa langit, siring man sa daga.”—Mateo 6:10.
Gurano Na Kita Karani?
11. Saen sa Biblia kita nakanonompong nin mga hula na matabang sa sato na madeterminaran kun gurano na kita karani sa katapusan kan palakaw na ini?
11 Gurano na kita karani sa katapusan kaining dai nakakokontentong palakaw nin mga bagay asin sa pagpopoon kan bagong kinaban nin Dios? An hula sa Biblia malinaw na nagtatao sa sato kan simbag. Halimbawa, ihinula mismo ni Jesus kun ano an hahanapon tanganing madeterminaran niato an satong kamugtakan kun dapit sa, arog kan pagkasabi dian kan Biblia, “pagtatapos kan palakaw nin mga bagay.” Nasusurat ini sa Mateo kapitulo 24 asin 25, Marcos 13, asin Lucas 21. Siring man, arog kan nasusurat sa 2 Timoteo kapitulo 3, ihinula ni apostol Pablo na magkakaigwa nin lawig nin panahon na inaapod na “huring mga aldaw” na orog pang beberepikaron nin manlaenlaen na pangyayari kun saen na kita sa sulog nin panahon.
12, 13. Ano an sinabi ni Jesus asin ni Pablo manongod sa panahon kan katapusan?
12 Sinabi ni Jesus na an lawig nin panahon na ini mapoon sa mga pangyayaring ini: “An nasyon matindog tumang sa nasyon asin an kahadean tumang sa kahadean, asin magkakaigwa nin mga kakulangan nin kakanon asin mga linog sa surunodsunod na lugar.” (Mateo 24:7) Ipinaheheling kan Lucas 21:11 na nasambitan man nia an “sa surunodsunod na lugar mga peste.” Asin nagpatanid man sia manongod sa “pag-orog nin katampalasanan.”—Mateo 24:12.
13 Ihinula ni apostol Pablo: “Alagad aramon mo ini, na sa huring mga aldaw maabot an delikadong mga panahon na masakit pakibagayan. Huli ta an mga tawo magigin mga mamomoton sa sainda man sana, mga mamomoton sa kuarta, mga nagpapasikat sa sadiri, mga maabhaw, mga paralanghad, mga masumbikal sa mga magurang, mga daing utang na boot, mga bakong maimbod, mga dai nin natural na kapadangatan, mga dai maoyonan, mga parapakaraot, mga mayong pagpopogol sa sadiri, mga maringis, mga mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan imbes na mga mamomoton sa Dios, na may porma nin diosnon na debosyon alagad nagpapainda sa kapangyarihan kaiyan . . . An mga maraot asin nandadaya orog na magraraot, na nanlalagalag asin ikinalalagalag.”—2 Timoteo 3:1-5, 13.
14, 15. Paano bineberepikar kan mga pangyayari sa ika-20 siglong ini na kita tunay na yaon na sa huring mga aldaw?
14 Nangyari daw sa satong panahon an mga ihinulang iyan ni Jesus asin ni Pablo? Iyo nanggad. An Guerra Mundial I risang gayo na iyo an pinakagrabeng guerra sagkod kan panahon na idto. Idto an enot na guerra mundial asin an panahon nin dakulang pagbago sa kasaysayan sa presenteng panahon. Kadungan kan guerrang iyan an mga kakulangan nin kakanon, epidemyang helang, asin iba pang kalamidad. An mga pangyayaring idto poon kan 1914 “kapinonan kan mga kolog nin kasakitan,” arog kan pagkasabi ni Jesus. (Mateo 24:8) Pinonan kaiyan an ihinulang lawig nin panahon na inaapod “huring mga aldaw,” an kapinonan kan huring kapag-arakian na itotogot nin Dios an karatan asin pagdusa.
15 Posibleng marhay na pamilyar saindo an mga pangyayari sa ika-20 siglo. Aram nindo an naglataw na biyong pagkataranta. Mga 100 milyones katawo an nagadan sa mga guerra. Ginatos pang milyon an nagadan huli sa pagkagutom asin sa helang. Dai mabilang an ginadan nin mga linog. Nag-oorog an pagbasangbasang sa buhay asin sa rogaring. An takot sa krimen nagin kabtang nin buhay sa aroaldaw. Ipinagilid an mga pamantayan sa moral. An biglang pagdakol kan populasyon nagtatao nin mga problema na dai nareresolberan. An polusyon rinaraot an kualidad nin buhay asin isinasapeligro pa ngani iyan. Totoo nanggad, poon kan 1914 yaon na kita sa huring mga aldaw asin harani na sa kulminasyon kan mga hula sa Biblia may koneksion sa satong panahon.
16. Gurano kalawig an huring mga aldaw?
16 Magigin gurano kalawig an huring mga aldaw na ini? Si Jesus nagsabi mapadapit sa peryodo na makaeeksperyensia kan “kapinonan kan mga kolog nin kasakitan” poon kan 1914: “An kapag-arakian na ini dai noarin man makalilihis sagkod na an gabos na bagay na ini mangyari.” (Mateo 24:8, 34-36) Sa siring, an gabos na bagay na nagpapamidbid kan huring mga aldaw dapat na mangyari sa laog kan pagkabuhay nin sarong kapag-arakian, an kapag-arakian nin 1914. Kaya an nagkapira na buhay kaidtong 1914 buhay pa kun matapos na an palakaw na ini. An kapag-arakian na iyan gurangon na, na nagpaparisa na kadikiton na sana an natatadang panahon bago taposon nin Dios an presenteng palakaw na ini nin mga bagay.
17, 18. Anong hula an nagpapaheling na haranihon na kita sa katapusan kan kinaban na ini?
17 An saro pang hula na nagpapaheling na haranihon na an katapusan kan palakaw na ini itinao ni apostol Pablo, na naghula: “An aldaw ni Jehova madatong na kabaing na gayo nin parahabon kun banggi. Kun noarin sinda nagsasarabi: ‘Katoninongan asin katiwasayan!’ dangan an biglang pagkalaglag maabot tolos sa sainda . . . asin dai sinda makaliligtas minsan sa anong paagi.”—1 Tesalonica 5:2, 3; helingon man an Lucas 21:34, 35.
18 Ngonyan tapos na an Malipot na Guerra, asin tibaad bako nang grabeng peligro an internasyonal na guerra. Kaya tibaad honaon kan mga nasyon na sinda pasiring na sa areglo nin bagong kinaban. Alagad kun sa paghona ninda nagigin mapanggana an saindang mga paghihingoa, iyan mangangahulogan kan kabaliktaran kan iniisip ninda, huli ta iyan an magigin pangultimong senyal na madali na an paglaglag nin Dios sa palakaw na ini. Girumdoma, an politikal na mga negosiasyon asin tratado dai man nagpapangyari nin tunay na mga pagbago sa mga tawo. Dai kaiyan pinapangyayari an mga tawo na magkaminorootmootan. Asin dai napapopondo kan mga namomoon sa kinaban an krimen, ni nahahale man ninda an helang asin kagadanan. Kaya dai kamo magtiwala sa ano man na progreso sa katoninongan saka katiwasayan nin tawo asin isipon na an kinaban na ini madali nang maresolberan an mga problema kaiyan. (Salmo 146:3) An talagang magigin kahulogan kan siring na kurahaw iyo na an kinaban na ini haranihon na sa pagkawara.
Paghuhulit kan Maogmang Bareta
19, 20. Anong hula may koneksion sa paghuhulit sa huring mga aldaw an naheheling niatong naootob?
19 An saro pang hula na nagpapaheling na kita yaon na sa huring mga aldaw poon kan 1914 iyo an itinao ni Jesus: “Sa gabos na nasyon an maogmang bareta kaipuhan na ikahulit nguna.” (Marcos 13:10) O arog kan pagkasabi dian kan Mateo 24:14: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.”
20 Ngonyan na nungka pang nangyari kaidto sa kasaysayan, an maogmang bareta manongod sa katapusan kan kinaban na ini asin sa madatong na Paraisong bagong kinaban na sakop kan Kahadean nin Dios ihinuhulit sa bilog na daga. Niisay? Kan minilyon na Saksi ni Jehova. Sinda naghuhulit sa lambang nasyon sa ibabaw nin daga.
21, 22. Ano, nangorogna, an nagpapamidbid sa Mga Saksi ni Jehova bilang tunay na mga Kristiano?
21 Dugang pa sa saindang paghuhulit manongod sa Kahadean nin Dios, an Mga Saksi ni Jehova minagawe sa paaging nagpapamidbid sa sainda bilang tunay na mga parasunod ni Cristo, ta saiyang sinabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.” Sa siring, an Mga Saksi ni Jehova pinagsararo sa lakop sa globong kasararoan nin magturugang nin dai mapapatod na bogkos nin pagkamoot.—Juan 13:35; helingon man an Isaias 2:2-4; Colosas 3:14; Juan 15:12-14; 1 Juan 3:10-12; 4:20, 21; Kapahayagan 7:9, 10.
22 An Mga Saksi ni Jehova nagtutubod sa sinasabi kan Biblia: “An Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:34, 35) An pagheling ninda sa saindang mga kapwa Saksi sa gabos na nasyon espirituwal na mga tugang na lalaki asin babae, ano man an rasa o kolor. (Mateo 23:8) Asin an katotoohan na an siring na lakop sa globong kasararoan nin magturugang talagang yaon sa kinaban ngonyan nakadudugang sa ebidensia na an katuyohan nin Dios madali nang maotob.