Ano an Katuyohan nin Buhay?—Paano Nindo Manonompongan Iyan?
Kapitulo 8: Mabuhay Sagkod Lamang sa Sarong Paraisong Daga
1, 2. Paano an magigin buhay sa irarom kan pamamahala kan Kahadean nin Dios?
Paano an magigin buhay kun haleon na nin Dios sa daga an karatan saka pagdusa asin iintrodusir na an saiyang bagong kinaban sa irarom kan mamomoton na kontrol kan saiyang langitnon na Kahadean? Ipinanunuga nin Dios na ‘bikladon an saiyang kamot asin panigoan an mawot nin lambang bagay na may buhay.’—Salmo 145:16.
2 Ano an saindong tamang mga kamawotan? Bako daw na iyan maogmang buhay, kapakipakinabang na trabaho, materyal na abundansia, magayon na mga kamugtakan sa palibot, katoninongan sa tahaw kan gabos na tawo, asin katalingkasan sa inhustisya, helang, pagdusa, saka kagadanan? Asin kumusta man an magayagayang espirituwal na punto de vista? An gabos na bagay na iyan madali nang maotob sa irarom kan pamamahala kan Kahadean nin Dios. Mangnoha an sinasabi kan mga hula sa Biblia manongod sa makangangalas na mga bendisyon na maabot sa bagong kinaban na iyan.
An Katawohan May Sangkap na Katoninongan
3-6. Anong garantiya an nasa sato na an mga tawo magkakaigwa nin katoninongan sa bagong kinaban?
3 “Pinaoontok [nin Dios] an mga ralaban sagkod sa kaporoporohi kan daga. An arko saiyang binabari asin pinagpuputolputol an budyak; an mga karro [sa pakikilaban] saiyang sinosolo sa kalayo.”—Salmo 46:9.
4 “Dadaragopdopon ninda an saindang mga espada na magin tarom nin arado asin an saindang mga budyak na magin mga sanggot. An nasyon dai mabingat nin espada tumang sa nasyon, ni mag-aadal pa man sinda sa pakilaban.”—Isaias 2:4.
5 “An mga mahoyo mismo makasasadiri kan daga, asin manonompongan nanggad ninda an saindang nangongorog na dakulang kaogmahan sa nagsosopay na katoninongan.”—Salmo 37:11.
6 “An bilog na daga nahingaloan, nawaran nin karibokan. An mga tawo nag-ogma sa magayagayang mga kurahaw.”—Isaias 14:7.
Matoninong Na an Tawo Asin an mga Hayop
7, 8. Ano an magigin katoninongan sa pag-oltanan nin mga tawo asin hayop?
7 “An lobo totoong mag-eerok sa kadikit na panahon na kasaro kan kordero, asin an leopardo maghihigdang kadorog kan ogbon na kanding, asin an ogbon na baka saka an may bunday na ogbon na leon saka an hayop na basog nag-iiriba; asin sarong aking sadang an mangengenot sa sainda. Asin an baka saka an oso magsasabsab; an saindang mga ogbon maghihirigdang dororog. Asin minsan an leon magkakakan nin dagami kapareho kan torong baka. Asin an aking pasusohon magkakawat nanggad sa lungib kan kobra; asin sa ibabaw kan lungib nin kamandagan na halas totoong ibubugtak nin bagong butason sa pagsuso an saiyang kamot. Dai sinda magibo nin maraot o manraraot.”—Isaias 11:6-9.
8 “Para sa sainda magibo nanggad ako nin tipan sa aldaw na iyan dapit sa mabangis na hayop sa kapatagan asin sa naglalayog na linalang sa kalangitan patin sa nagkakanap sa daga . . . pahihigdaon ko sinda sa katiwasayan.”—Oseas 2:18.
Sangkap na Salud, Buhay na Daing Katapusan
9-14. Iladawan an mga kamugtakan sa salud sa bagong kinaban.
9 “Sa panahon na iyan an mga mata kan mga buta magkakaburuklat, asin an mismong mga talinga kan mga bongog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.”—Isaias 35:5, 6.
10 “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”—Kapahayagan 21:4.
11 “Mayo nin nag-eerok na masabi: ‘Naghehelang ako.’”—Isaias 33:24.
12 “An saiya logod na kublit magin mas lumbod kisa sa kaidtong pagkahoben; bumalik logod sia sa mga aldaw kan saiyang bagsik nin pagkahoben.”—Job 33:25.
13 “An regalo na itinatao nin Dios buhay na daing katapusan paagi ki Cristo Jesus na satong Kagurangnan.”—Roma 6:23.
14 ‘An lambang naggigibo nin pagtubod sa saiya magkakaigwa nin buhay na daing katapusan.’—Juan 3:16.
An mga Gadan Bubuhayon Liwat
15-17. Ano an paglaom para sa mga nagadan na?
15 “Magkakaigwa nin pagkabuhay liwat an mga matanos sagkod an mga bakong matanos.”—Gibo 24:15.
16 “An oras maabot na an gabos na nasa mga lolobngan na girumdoman [memorya nin Dios] makadadangog kan saiyang tingog asin maruluwas.”—Juan 5:28, 29.
17 “Itinao kan dagat an mga gadan na yaon dian, asin itinao kan kagadanan asin kan Hades [an lolobngan] an mga gadan na yaon dian.”—Kapahayagan 20:13.
Daga, Sarong Paraiso na May Abundansia
18-22. Maliliwat an enterong daga na magin ano?
18 “Magkakaigwa nin mga oran nin bendisyon. Asin an kahoy kan kahiwasan dapat na tumao kan bunga kaiyan, asin an daga mismo mapaluwas kan bunga kaiyan, asin sinda aktuwal na mamumugtak sa saindang daga na may katiwasayan.”—Ezequiel 34:26, 27.
19 “An daga mismo magtatao kan bunga kaiyan; an Dios, an satong Dios, mabendisyon sa sato.”—Salmo 67:6.
20 “An kaawagan asin an alang na lugar magpapakagayagaya, saka an desierto maggagayagaya asin mamumurak arog kan azafran.”—Isaias 35:1.
21 “An mismong kabukidan asin mga bolod mag-oogma sa atubangan nindo na may magayagayang kurahaw, asin an mismong mga kahoy kan kapatagan mag-uurupak gabos. Kasalihid kan balagon matubo an kahoy na enebro. Kasalihid kan langaton matubo an mirto.”—Isaias 55:12, 13.
22 “Ika makakaibahan ko sa Paraiso.”—Lucas 23:43.
Marahay na Istaran Para sa Gabos
23, 24. Anong garantiya an nasa sato na magkakaigwa nin igong marahay na istaran para sa gabos?
23 “Sinda siertong magtotogdok nin mga harong asin mag-oontok sinda dian . . . Dai sinda magtotogdok asin iba an mag-oontok; dai sinda matanom asin iba an makakan. . . . An ginibo kan saindang mga kamot lubos na gagamiton kan sakuyang mga pinili. Dai sinda magpapagal na mayong kapakanan, ni mangangaki man sinda para sa karibokan.”—Isaias 65:21-23.
24 “Sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda.”—Miqueas 4:4.
Puede Kamong Mabuhay Sagkod Lamang sa Paraiso
25. Ano an satong makangangalas na paglaom sa ngapit?
25 Abaa kamakangangalas na paglaom sa ngapit! Abaa katunay kan puedeng magin katuyohan nin buhay ngonyan kun napapasikad sa marigon na paglaom na sa bagong kinaban nin Dios an gabos na problema ngonyan sagkod lamang na magigin mga bagay kan nakaagi! “An dating mga bagay dai na magigirumdoman, ni masabong pa iyan sa puso.” (Isaias 65:17) Asin abaa kanakararangang maaraman na sa panahon na iyan an buhay magigin daing sagkod: “Totoong hahalonon [nin Dios] an kagadanan sagkod lamang.”—Isaias 25:8.
26. Ano an nagdedeterminar na bagay sa pagkabuhay sagkod lamang sa bagong kinaban nin Dios?
26 Boot daw nindong mabuhay sagkod lamang sa Paraisong bagong kinaban na iyan na ngonyan haranihon na? ‘Ano an kaipuhan na gibohon ko tanganing kamtan an pabor nin Dios sa katapusan kan kinaban na ini asin magpadagos na mabuhay sa saiyang bagong kinaban?’ tibaad ihapot nindo. Kaipuhan na gibohon nindo an sinabi ni Jesus sa sarong pamibi sa Dios: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”—Juan 17:3.
27. Ano an dapat nindong gibohon tanganing makapakikabtang sa katuyohan nin Dios?
27 Kun siring, kumua kamo nin Biblia, asin patunayan na tama an nabasa nindo sa magasin na ini. Hanapon an iba na nag-aadal asin nagtotokdo kan mga katotoohan na ini sa Biblia. Sumiblag sa mapagsaginsagin na mga relihion na nagtotokdo asin naggigibo nin mga bagay na sarongat sa Biblia. Pag-adalan kun paano kamo, kaiba nin minilyon pang iba na naggigibo na kan kabotan nin Dios, puedeng makikabtang sa katuyohan nin Dios na an mga tawo mabuhay sagkod lamang sa sarong paraisong daga. Asin isapuso an sinasabi kan ipinasabong na Tataramon nin Dios manongod sa harani nang ngapit: “An kinaban maagi sana asin siring man an horot kaiyan, alagad an naggigibo kan kabotan nin Dios magdadanay sagkod lamang.”—1 Juan 2:17.