Bareta kan mga Parabalangibog kan Kahadean
Paghuhulit ‘sa Marahay na Panahon Asin sa Masakit na Panahon’
KAN lumakop an guerra sa nasyon nin Bosnia asin Herzegovina, rinibo an nag-agi nin grabeng kasakitan. Durante kan masakit na panahon na idto, ginibo kan Mga Saksi ni Jehova an gabos na paghihingoa na darahan nin pamparigon sa boot asin paglaom an mga tawo. An minasunod kinua hale sa surat nin sarong Saksi na naglingkod sa laog nin kadikit na panahon sa Sarajevo.
“Depisil an buhay digdi, alagad an mga tawo andam na gayong umako kan katotoohan sa Biblia. An mga Saksi sa lokal makangangalas na halimbawa sa pagmamaigot. Sa materyal, kapos sinda, alagad marahayon an saindang espiritu. Haros gabos na hoben sa kongregasyon nasa bilog na panahon na ministeryo. An bagong mga parahayag naparirigon an boot kan kaigotan na ini, asin bakong pambihira na sinda magdusay nin 60 oras o labi pa sa sambulan sa ministeryo poon mismo sa enot na bulan ninda sa paglilingkod.
“Apuera sa paghuhulit sa harong-harong, prinobaran mi an laen-laen na paagi tanganing maabot an mga tawo. Halimbawa, marahay an nagin bunga niamo sa paghiras nin mga publikasyon sa Biblia sa dakol na sementeryo sa siudad.
“Nakapagpatotoo man sa mga ospital. Sa Departamento nin Kardiolohiya sa sarong ospital sa Sarajevo, an nangengenot na doktor nag-ako kan Disyembre 8, 1996 na Awake!, na igwang tema sa tutob na ‘Heart Attack—What Can Be Done?’ Naghagad sia nin dugang pang kopya tanganing ikahiras nia iyan sa iba pang doktor. Dangan an mga Saksi tinawan nin permiso na sumongko sa gabos na pasyente sa saiyang departamento. Sa siring, pakalihis nin labi sa sarong oras, labing 100 na magasin an ikinawaras sa mga pasyente. Dakol na pasyente an nagsabi na idto an enot na beses na may nagsongko sa sainda sa ospital tanganing magtao nin pamparigon sa boot asin paglaom.
“Sa saro pang pangyayari an Departamento nin Pediatria sinongko dara an mga artikulo sa magasin na angay para sa mga aki. An nangengenot na doktor nag-ako man nin pirang kopya kan My Book of Bible Stories para sa kuarto sa pagbasa. Ngonyan an mga ina na nagsosongko sa saindang mga aki sa ospital binabasahan sinda nin mga estorya sa Biblia aroaldaw. Iinareglo man na songkoon an doktor na ini sa saiyang harong.
“Sa Sarajevo igwa nin rinibong soldados kan NATO [North Atlantic Treaty Organization] na manlaenlaen an nasyonalidad. An mga ini nag-ako man nin lubos na patotoo. Kun beses dinudumanan mi an mga tangke na ginagamit an pulyetong Good News for All Nations kaiba an mga magasin na Watchtower asin Awake! sa laen-laen na lenguahe. Labi sa 200 na magasin an ikinawaras sa mga kuartel kan mga tropang Italiano. Makangangalas nanggad, dakol na Italianong soldados an nagsabi na dai pa sinda noarin man nakapakipag-olay sa Mga Saksi ni Jehova kaidto. Bueno, natagboan mi sinda sa Sarajevo.
“Sarong aldaw may sarong tangke na nakaparada sa gilid kan tinampo. Nagtoktok ako sa tangke paagi kan sakong payong, asin nagluwas an sarong soldados. Inalokan ko sia nin Torrengbantayan na may titulo sa tutob na ‘Mga Mensahero nin Katoninongan—Sairisay Sinda?’ Hineling ako kan soldados asin naghapot, ‘Saro ka sa Mga Saksi ni Jehova, bako daw?’ Kan maaraman nia na ako Saksi, sia nagsimbag, ‘Dai ako makapaniwala; yaon man ika digdi! Ano, igwa pa daw nin lugar sa daga na mayo nin mga Saksi?’”
Si apostol Pablo nagsadol: “Ihulit mo an tataramon, gibohon iyan na may pagkasibot sa marahay na panahon, sa masakit na panahon.” (2 Timoteo 4:2) Arog kan saindang mga kapagtubod sa bilog na kinaban, ginigibo iyan kan Mga Saksi ni Jehova sa Sarajevo, sa mga pasyente asin sa mga nasa tangke pa ngani!