Bareta kan mga Parabalangibog kan Kahadean
Paghuhulit sa Masakit na Panahon
SI APOSTOL Pablo naghula na “sa huring mga aldaw maabot an delikadong mga panahon na masakit pakibagayan.” (2 Timoteo 3:1) Eksakto nanggad an mga tataramon na iyan! An mga tawo sa El Salvador sa Amerika Sentral haloy nang naeksperyensiahan an makolog na katunayan na ini. Sa laog nin labing sarong dekada, an nasyon na iyan nagkaguerra sibil na nagdara nin kasakitan asin kagadanan sa rinibo. Tapos na an guerra ngonyan, pero an kasakitan nagdadanay pa. Biglang luminangkaw an krimen pakatapos kan guerra. An sarong komentarista sa lokal na telebisyon nagsabi dai pa sana nahahaloy: “An kadahasan asin paghabon aroaldaw nang pangyayari ngonyan.”
An mga Saksi ni Jehova dai nakalibre sa pagdakol na ini kan krimen. Linaog kan mga parasalakat an dakol na Kingdom Hall asin hinabon an kasangkapan sa sound. Sa nagkapirang okasyon sinalakay kan mga gang nin armadong mga hobenes an mga Kingdom Hall mientras na may Kristianong mga pagtiripon, na naghabon nin kuwarta, mga relo, asin iba pang mahahalaga sa mga nag-aatender. Mantang ginigibo an saindang pan-aroaldaw na mga aktibidad, nagkapirang Saksi an ginadan pa ngani nin mga parahabon.
Sa ibong kan mga kaolangan na ini, an mga Saksi ni Jehova sa El Salvador padagos na naghihingoa sa paghuhulit kan maogmang bareta. Ginigibo ninda ini bilang pagkuyog sa Makakasuratan na pagboot: “Sa gabos na nasyon an maogmang bareta kaipuhan na ikahulit nguna.” (Marcos 13:10) Igwa pa nin dakol sa nasyon na ini na naghihidaw sa paglaom na Kahadean na itinatao kan Biblia, asin pinagmamaigotan kan mga Saksi na aboton an kada saro sa sainda. An impormal na pagpapatotoo napapatunayan na sarong epektibong paagi nin paghuhulit.
Mantang nagpapabolong sa sarong ospital, ginamit nin sarong Saksi an kada oportunidad na makipag-olay sa ibang pasyente dapit sa mga panuga nin Dios para sa ngapit, siring sa manonompongan sa Biblia. Sarong pasyente na grabe an helang an mamondong nag-agrangay: “Madali na akong magadan!” Alagad an mamondong itsura kan pasyente dai nakapaluya sa boot kan Saksi sa paghiras kan maogmang bareta kan Kahadean nin Dios. Imbes, binasahan nia nin makosog an lalaki gikan sa librong Puwede Kamong Mabuhay Sagkod Lamang sa Paraiso Digdi sa Daga, na ipinublikar kan mga Saksi ni Jehova. Pakalihis nin pirang aldaw, huminale na sa ospital an Saksi, na mamondong nag-iisip-isip na an lalaki naghihigagdan na.
Pakalihis nin apat na taon an Saksi kinaipuhan na magpabolong sa saro pang ospital. Mantang yaon sia duman, sarong pasyente an duminolok sa saiya asin nagsabi: “Nagigirumdoman nindo ako?” Idto an lalaki na nakaolay nia apat na taon na an nakaagi, an lalaki na soboot naghihigagdan na! Kanigoan kagayagayang sorpresa kan kugoson sia kan lalaki asin idinagdag: “Ngonyan saro na man ako sa mga Saksi ni Jehova!” Inako kan lalaki an paglaom sa Biblia para sa ngapit, pinag-adalan an Biblia kaiba kan mga Saksi ni Jehova, asin idinusay an saiyang buhay ki Jehova. Bako sanang saro siang Saksi kundi mga duwang taon na siang nakikikabtang sa pambilog na panahon na ministeryo bilang sarong regular payunir.
Sa kamugtakan na ini, an mga banhi kan katotoohan na isinabwag sa impormal na paagi nakaabot sa sarong mapaghimateng puso. An pribilehiyong ini na pagtabang sa mga tawo na makaaram kan katotoohan pinahihiro an tunay na mga Kristiano na magpadagos sa paghuhulit sa ibong kan ‘delikadong mga panahon na ini na masakit pakibagayan.’