Paghanap sa Paraiso

ISINAYSAY NI PASCAL STISI

Matanga nang marhay, asin an mga tinampo sa banwaan nin Béziers, timog na Pransia, daing katawotawo. Kan maheling an bagong pintahan na lanob nin sarong tindahan nin libro sa relihion, kinuritan mi iyan kan sakong katood nin dakulaon na itom na mga letra kan mga tataramon kan pilosopong Aleman na si Nietzsche: ‘Gadan na an mga dios. Mabuhay si Superman!’ Pero ano an nagtulod sa sako sa gabos na ini?

NAMUNDAG ako sa Pransia kan 1951 sa sarong pamilyang Katoliko na Italiano an ginikanan. Kan ako aki pa, nagbabakasyon kami sa timog na Italia. Duman, an kada baryo igwa nin sadiring imahen ni Birhen Maria. Naglalakaw kaibanan kan sakong lolo, sinundan ko an darakulaon na nagugubingan na mga estatuwang ini na daing katapusan an pagkasurunodsunod pasiring sa kabukidan—alagad dai nanggad ako kombensido dian. Natapos ko an sakong pundamental na edukasyon sa sarong relihiosong eskuelahan na minamanehar kan mga Jesuita. Minsan siring, dai ko magirumdoman na may nadangog akong ano man na talagang nagpatalubo kan sakong pagtubod sa Dios.

Kaidtong lumaog ako sa sarong unibersidad sa Montpellier tanganing mag-adal nin medisina na pinonan kong horophoropon an katuyohan nin buhay. An sakong ama nairido durante kan guerra asin pirmeng may nagbabantay na mga doktor. Bako daw na mas marahay na taposon an guerra imbes na umubos nin kadakol na panahon asin paghihingoa na paomayan an mga tawo sa mga danyos kaiyan? Pero, nasa kasagsagan pa an Guerrang Vietnam. Para sa sako an solamenteng lohikong paagi na mabolong an kanser sa pulmon, halimbawa, iyo an paghale sa pangenot na dahelan kaiyan—an tabako. Asin kumusta man an mga helang na bunga nin malnutrisyon sa nag-ooswag na mga nasyon asin idtong mga bunga nin sobrang pagkakan sa mayayaman na kadagaan? Bako daw na mas marahay na haleon an mga dahelan imbes na hingoahon na remedyohan an makamomondong mga epekto? Taano ta grabe an pagdusa digdi sa daga? Naniwala ako na may depektong marhay an peligroso an buhay na sosyedad na ini, asin para sa sako an mga gobyerno an responsable.

An sakong paboritong libro isinurat nin sarong anarkista, asin kinokopya ko sa mga lanob an mga frase kaiyan. Luway-luway, ako nagin man anarkista, mayo nin pagtubod o mga ley sa moral, na habo na may Dios o kagurangnan. Para sa sako, an Dios asin relihion imbento sana kan mga mayaman asin poderoso tanganing dominaron asin aprobetsaran ninda kami. ‘Magtrabaho kamo nin maigot para sa samuya digdi sa daga, asin dakula an magigin balos sa saindo sa paraiso sa langit,’ an garo baga sinasabi ninda. Alagad tapos na an panahon kan mga dios. An mga tawo kaipuhan na masabihan. An pagsuratsurat sa lanob sarong paagi nin pagsabi sa sainda.

Bilang resulta, nagin segunda sana an sakong mga pag-adal. Mientras tanto nag-enrol ako tanganing mag-adal nin geograpiya asin ekolohiya sa saro pang unibersidad sa Montpellier kun saen nangingibabaw an insureksion. Mientras na orog kong pinag-aadalan an ekolohiya, orog akong nababalde na maheling an pag-ati sa satong magayon na planeta.

Kada taon durante nin bakasyon kun tig-init, nagpaparapakisakay ako, na nagbibiahe nin rinibong kilometro sa bilog na Europa. Mantang nagbibiahe asin nakikipag-olay sa ginatos na tsuper, naheling mismo kan sakong mga mata an karatan asin kalapaan na makuring nagpapasakit sa sosyedad nin tawo. Sarong beses, mantang hinahanap an paraiso, naabot ko an nagkapirang kahangahangang baybayon sa magayon na isla nin Creta asin naheling ko na iyan natatahoban nin krudo. Namondo akong marhay. May natatada pa daw na kabtang kan paraiso saen man digdi sa daga?

Paggamit Giraray kan Daga

Sa Pransia sinusuportaran kan mga ekologo an paggamit giraray kan daga bilang solusyon sa grabeng mga sakit kan sosyedad. Boot kong magtrabaho paagi kan sakong mga kamot. Kaya nagbakal ako nin sarong daan na harong na gibo sa gapo sa sarong sadit na baryo sa pamitisan kan Kabukidan nin Cévennes sa timog na Pransia. Sa pinto, isinurat ko an “Paraiso Ngonyan,” an sarabihon kan Amerikanong mga hippie. An sarong hoben na babaeng Aleman na nagbibiahe sa samong lugar nagin kasaroan ko. Habo ko nanggad na magpakasal sa atubangan kan alkalde, na sarong representante kan gobyerno. Asin sa simbahan? Lingawi na iyan!

Sa kadaklan na panahon, naglalakaw kami na nakabitis, asin halaba an bohok ko patin daing kahusayan an sakong barabas. Nagkainteres ako sa pagtanom nin mga prutas asin gulay. Kun tig-init asul an langit asin naghuhuruni an mga duli-duli. Mahamoton an mga burak sa kapalongpongan, asin matagok na marhay an itinatanom ming mga prutas na Mediterraneo—mga ubas asin higos! Garo baga nanompongan mi na an samong lugar sa paraiso.

Nagimata an Paniniwala sa Dios

Sa unibersidad, nag-adal ako nin biolohiya selular, embriologo, asin anatomiya, asin naghanga akong marhay sa pagkakomplikado asin pagkaoroyon kan gabos na mekanismong ini. Ngonyan na naeestudyaran asin naoobserbaran ko mismo an paglalang aroaldaw, naghahanga ako sa kagayonan asin potensial kaiyan. Kada aldaw, an libro nin paglalang daing ontok na nabibiklad sa atubangan ko. Sarong aldaw durante nin halawig na paglakaw sa kaboboldan asin pakatapos nin odok na paghorophorop sa buhay, nakapagkonklusyon ako na siertong igwa nin Kaglalang. Nagdesisyon ako sa sakong puso na maniwala sa Dios. Dati, nakamate ako nin kadaihan nin halaga sa sakong puso, sarong nakapupurisaw na kapungawan. Kan aldaw na magpoon akong maniwala sa Dios, sinabi ko sa sakong sadiri, ‘Pascal, dai ka na noarin man magsosolo giraray.’ Sarong ekstraordinaryong pakamate idto.

Dai nahaloy pakatapos kaiyan, kami kan sakong kasaroan nagkaaki nin babae—si Amandine. Mahal ko siang marhay. Ngonyan na naniniwala na ako sa Dios, pinonan kong igalang an pirang ley sa moral na aram ko. Nagpondo ako sa paghabon asin pagputik, asin narealisar ko tolos na ini nakatabang sa sako na malikayan an dakol na problema sa mga kaibaiba ko. Iyo, igwa kaming mga problema, asin an sakong paraiso bakong eksaktong kapareho kan linaoman ko. An mga paragibo nin arak sa lokal naggamit nin mga pangadan sa insekto asin doot na nagdara man nin polusyon sa sakong mga pananom. An sakong hapot manongod sa dahelan nin karatan dai pa giraray nasisimbag. Dugang pa, minsan ngani dakol na akong nabasa dapit sa buhay pampamilya, dai kaini naprebentaran an maiinit na pakipag-argumento sa sakong kasaroan. Pira sana an samong katood, asin an mga katood mi falso; an nagkapira nagprobar pa ngani na agyaton an kasaroan ko na lokohon ako. Siertong igwa pa nin mas marahay na paraiso.

An Simbag sa Sakong mga Pamibi

Sa sadiri kong paagi, ako parateng gayo na namibi na logod giyahan ako nin Dios sa buhay. Sarong Domingong aga an sarong makikatood na babae na an ngaran Irène Lopez asin an saiyang sadang na aking lalaki nagduman sa samong harong. Saro sia sa Mga Saksi ni Jehova. Naghinanyog ako sa sasabihon nia asin inako ko an alok na pagsongko sa masunod. Duwang lalaki an nagdatong tanganing makipag-olay sa sako. Sa samong pag-oolay, duwang bagay an natandaan ko—Paraiso asin Kahadean nin Dios. Maingat kong rinimpos sa sakong puso an mga ideyang idto, asin sa pag-agi nin mga bulan, nasabotan ko na pag-abot nin aldaw kaipuhan kong ioyon an sakong buhay sa atubangan nin Dios kun boot kong kamtan an malinig na konsensia asin manompongan an tunay na kaogmahan.

Tanganing ioyon an samong buhay sa Tataramon nin Dios, kan primero gusto kan kasaroan ko na pakasal sa sako. Dangan napaibaiba sia sa maraot na mga tawo na nag-oolog-olog sa Dios asin sa saiyang mga ley. Pagpuli ko sa harong sarong banggi nin tigsoli, grabe an pagkabigla ko. Dai nang tawo an samong harong. Naghale an kasaroan ko, dara an samuyang tres anyos na aking babae. Dakol na aldaw kong hinalat an pagbalik ninda—alagad daing nangyari. Imbes na basolon an Dios, namibi ako sa saiya na logod tabangan ako.

Dai nahaloy pakalihis kaiyan, kinua ko an Biblia, nagtukaw sa tangod kan sakong higuerra, asin nagpoon na magbasa. Sa katunayan, galaga kong ilinaog sa sakong isip an mga tataramon kaiyan. Minsan ngani nabasa ko na an gabos na klaseng libro kan mga sikoanalisador asin sikologo, dai pa ako noarin man nakanompong nin siring na kadonongan. Sierto na ipinasabong nin Dios an librong ini. Labi-labi an sakong pagngalas sa katokdoan ni Jesus asin sa saiyang pagsabot sa naturalesa nin tawo. Naranga ako kan Salmo asin napangalas sa praktikal na kadonongan kan Talinhaga. Tolos-tolos kong narealisar na minsan ngani an pag-adal kan paglalang makatatabang na marhay na ikarani an saro sa Dios, an ikahahayag kaiyan iyo sana “an mga gilid kan saiyang mga dalan.”—Job 26:14.

Winalatan man ako kan mga Saksi kan mga librong An Katotoohan na Minagiya Pasiring sa Buhay na Daing Sagkod asin Making Your Family Life Happy.a Binuksan kan pagbasa kaiyan an sakong mga mata. Tinabangan ako kan librong Katotoohan na masabotan kun taano an tawo ta napapaatubang sa lakop asin kadakol kan apektadong polusyon, mga guerra, nag-oorog na kadahasan, asin peligro nin pagkaparang nuklear. Asin kun paanong an mapulang langit na natanaw ko hale sa sakong hardin nagpaisi nin marahay na kamugtakan nin panahon sa masunod na aldaw, an mga pangyayaring ini nagpatunay na harani na an Kahadean nin Dios. Kun dapit sa librong Family Life, minawot ko na ikapaheling iyan sa sakong kasaroan asin sabihon sa saiya na puede kaming magin maogma paagi sa pagsagibo kan hatol kan Biblia. Alagad bako na idtong posible.

Pag-oswag sa Espirituwal

Dakol pa akong gustong maaraman, kaya hinagad ko ki Robert, sarong Saksi, na songkoon ako. Sa pagkabigla niang marhay, sinabi ko sa saiya na gusto kong magpabautismo, kaya pinonan an pag-adal sa Biblia. Tolos-tolos akong nagpoon na magtaram sa iba manongod sa sakong nanonodan, asin nagpoon akong magwaras kan mga publikasyon na kinua ko sa Kingdom Hall.

Tanganing makapaghanap-buhay, naglaog ako sa kursong pagkantero. Naaaraman an karahayan na magigibo kan Tataramon nin Dios para sa sarong tawo, inaprobetsaran ko an gabos na oportunidad na maghulit nin impormal sa mga kaeskuela asin paratokdo. Sarong banggi, nanuparan ko si Serge sa sarong pasilyo. May kapot siang mga magasin. “Sa heling ko mahilig kang magbasa,” an sabi ko sa saiya. “Iyo, pero nasusuya na ako kaini.” “Gusto mo nin talagang magayon basahon?” an hapot ko sa saiya. Marahayon an nagin pag-oolay mi manongod sa Kahadean nin Dios, na pakatapos kaiyan nag-ako sia nin pirang babasahon sa Biblia. Kan sumunod na semana, nag-iba sia sa sako sa Kingdom Hall, asin naponan an sarong pag-adal sa Biblia.

Sarong aldaw hinapot ko si Robert kun puede akong maghulit sa harong-harong. Nagduman sia sa kloset nia asin ikinua ako nin amerikana. Kan sunod na Domingo, ginibo ko an sakong enot na mga lakdang sa ministeryo kaiba nia. Sa katapustapusi, kan Marso 7, 1981, sinimbolisaran ko sa publiko an sakong pagdusay ki Jehova Dios paagi sa bautismo.

Tabang sa Panahon nin Kapurisawan

Mientras tanto naaraman ko kun saen sa ibang nasyon nag-eerok si Amandine asin an saiyang ina. A, an saiyang ina—paagi sa gabos na legalidad, segun sa mga ley kan nasyon na ineerokan nia—binawalan ako na maheling an sakong aking babae. Biyo akong nanluya. Nag-agom an ina ni Amandine, asin lalo pang suminagad an pagkadesesperar ko kan makaresibi ako nin opisyal na notisya na inampon kan saiyang agom na lalaki an sakong aki—na biyong mayo kan sakong pagtogot. Mayo na ako nin ano man na diretso sa sakong aki. Sa ibong nin aksion legal, dai ako nagkaigwa nin diretso na dalawon sia. An pagmate ko garo 50 kilos an pasan ko, siring kaiyan kakolog an boot ko.

Alagad sinusteniran ako kan Tataramon ni Jehova sa nagkapirang paagi. Sarong aldaw kan grabe an pagkapurisaw ko, inorootro ko an mga tataramon sa Talinhaga 24:10: “Ika daw nanluya an boot sa aldaw nin kasakitan? An saimong kosog magigin kadikit.” Tinabangan ako kan bersikulong ini na dai sumuko. Saro pang beses, pakatapos na daing mangyari sa paghingoang maheling an sakong aki, nagluwas ako sa ministeryo asin kinapotan ko nin higot an kapotan kan sakong bag sagkod na kaya ko. Sa siring na masakit na mga oras, naeksperyensiahan ko an pagigin totoo kan Salmo 126:6, na nagsasabi: “An minalakaw, na nagtatangis, dara an supot nin mga banhi, sierto na mabalik na may maogmang kurahaw, na dara an saiyang mga goygoy.” An importanteng leksion na nanodan ko iyo na kun grabe an kasakitan mo, oras na ginibo mo na an gabos mong makakaya na resolberan iyan, kaipuhan na bayaan mo iyan asin magpadagos ka na may determinasyon sa paglilingkod ki Jehova. Ini an solamenteng paagi na mapagdanay an saimong kagayagayahan.

Paghihingoang Kamtan an Orog Pa Karahay

Naheheling an mga pagbabago ko, an sakong namomotan na mga magurang nag-alok na tabangan akong makapadagos sa sakong pag-adal sa unibersidad. Pinasalamatan ko sinda, alagad ngonyan iba na an pasohan ko. Pinatalingkas ako kan katotoohan sa pilosopiya nin tawo, mistisismo, asin astrolohiya. Igwa na ako ngonyan nin tunay na mga katood na nungkang maggagaradanan sa guerra. Asin sa katapustapusi nakua ko an simbag sa sakong mga hapot manongod sa kun taano ta grabe an pagdusa digdi sa daga. Bilang pagpasalamat boot kong paglingkodan an Dios sa bilog kong kosog. Lubos na idinusay ni Jesus an saiyang sadiri sa saiyang ministeryo, asin boot kong arogon an saiyang halimbawa.

Kan 1983, binutasan ko an sakong negosyong pagkantero tanganing magin bilog na panahon na ministro. Bilang simbag sa sakong mga pamibi, nakakua ako nin por orang trabaho sa sarong parke tanganing masustentohan an sakong sadiri. Kanigoan na kagayagayahan an makaatender sa paadalan para sa mga payunir kaiba si Serge, an hoben na lalaki na pinatotoohan ko sa eskuelahan sa pagkantero! Pakalihis nin tolong taon bilang regular payunir, nakamate ako nin pagmawot na gumibo nin orog pa sa paglilingkod ki Jehova. Sa siring, kan 1986, ninombrahan ako na magin espesyal payunir sa magayon na banwaan nin Provins, harani sa Paris. Sa parate, pagpuli sa harong kun banggi, minaluhod akong namimibi tanganing pasalamatan si Jehova sa marahayon na aldaw ko sa pakikipag-olay sa iba manongod sa saiya. Sa katunayan, an duwang pinakadakula kong kaogmahan sa buhay iyo an pakipag-olay sa Dios asin an pagtaram manongod sa Dios.

An saro pang pinakadakulang kagayagayahan para sa sako iyo an bautismo kan sakong 68 anyos na ina na nag-eerok sa Cébazan, sarong sadit na baryo sa timog na Pransia. Kan ponan kan sakong ina na basahon an Biblia, pinadarahan ko sia nin suskripsion sa Torrengbantayan asin Awake! Saro siang intelihenteng tawo, asin tolos-tolos na narekonoser nia an tanog nin katotoohan sa saiyang nababasa.

An Bethel—Sarong Pambihirang Espirituwal na Paraiso

Kan magdesisyon an Watch Tower Society na inaan an bilang kan mga espesyal payunir, nag-aplay ako para sa Paadalan sa Ministeryal na Pagsasanay asin sa Bethel, an sangang opisina kan Mga Saksi ni Jehova sa Pransia. Boot kong si Jehova an magdesisyon kun paano ko sia mapaglilingkodan sa pinakamarahay na paagi. Pakalihis nin pirang bulan, kan Disyembre 1989, inimbitaran ako sa Bethel sa Louviers, amihanan-solnopan na Pransia. Ini nagin marahayon na resulta, ta an lugar nagpangyari sa sako na matabangan an sakong tugang na lalaki asin kunyada sa pag-ataman sa sakong mga magurang kan magluya nang marhay an saindang salud. Dai ko kutana nagibo ini kun ako nasa pagmimisyonero rinibong kilometro an rayo.

Nagkapirang beses akong sinongko kan sakong ina sa Bethel. Maski ngani sakripisyo para sa saiya na maparayo sa sako, parate niang sinasabi sa sako: “Nonoy, magdanay ka sa Bethel. Naoogma ako na ika naglilingkod ki Jehova sa paaging ini.” Makamomondo, mayo na an sakong mga magurang ngonyan. Kanigoan an pag-antisipar ko na maheling sinda sa sarong daga na ginibo nang literal na paraiso!

Talagang naniniwala ako na kun igwa man nin harong na angay sa paglaladawan na “Paraiso Ngonyan,” iyan an Bethel—an “Harong nin Dios”—huli ta an tunay na paraiso, orog sa gabos, espirituwal, asin an espirituwalidad lataw sa Bethel. Igwa kaming oportunidad na pataluboon an mga bunga kan espiritu. (Galacia 5:22, 23) An mayaman na espirituwal na pagkakan na inaako mi durante kan aroaldaw na pag-orolay sa teksto kan Biblia asin sa pampamilyang pag-adal sa An Torrengbantayan nakatabang na pakosogon ako para sa paglilingkod sa Bethel. Dugang pa, dahelan sa pagkaigwa nin oportunidad na makaasosyar an mga tugang na lalaki asin babae na mapag-isip sa espirituwal na dakol nang dekada na fiel na naglilingkod ki Jehova an Bethel nagin sarong daing kaagid na lugar para sa pagtalubo sa espirituwal. Minsan ngani napasuhay ako sa sakong aking babae sa laog nin 17 taon na ngonyan, nakanompong ako nin kadakol na maigot na hoben sa Bethel, na ibinibilang ko na sakuyang mga aki, asin ikinaoogma ko an saindang pag-oswag sa espirituwal. Sa nag-aging walong taon, nagkaigwa ako nin pitong laen-laen na asignasyon. Minsan ngani bakong pirmeng pasil an mga pagliliwat na ini, an pagsasanay na iyan kapakipakinabang sa katapustapusi.

Nag-aataman ako kaidto nin sarong klase nin antak na namumunga nin mananggatos. Kaagid kaiyan, naeksperyensiahan ko na kun magtanom ka nin maraot, mag-aani ka nin ginatos na beses na mas maraot—asin bako sanang sarong anihan. An eksperyensia garo sarong eskuelahan na mahal na marhay an mga leksion. Mas gusto ko na nungka kutana akong naglaog sa eskuelahan na iyan kundi, imbes, pinadakula kutana sa mga dalan ni Jehova. Kanigoan na pribilehio para sa mga hoben na pinadadakula nin Kristianong mga magurang! Daing duda, mas marahay na magtanom nin marahay sa paglilingkod ki Jehova asin mag-ani nin ginatos na beses na mas dakol na katoninongan asin satispaksion.—Galacia 6:7, 8.

Kan ako payunir, kun beses nag-aagi ako sa tindahan nin mga libro sa relihion na an lanob sinuratan mi kan sarabihon na anarkista. Linaog ko ngani iyan asin kinaolay ko an kagsadiri manongod sa nabubuhay na Dios asin sa saiyang katuyohan. Iyo, an Dios buhay! Orog pa dian, si Jehova, an iyo sanang tunay na Dios, sarong fiel na Ama, na nungkang inaabandonar an saiyang mga aki. (Kapahayagan 15:4) Manompongan logod kan dugang pang kaburunyogan hale sa gabos na nasyon an espirituwal na paraiso ngonyan—asin an maabot na ibinalik na Paraiso—paagi sa paglilingkod asin pag-omaw sa nabubuhay na Dios, si Jehova!

[Nota sa Ibaba]

[Mga retrato sa pahina 26]

Napahiro kan mga ngangalasan kan paglalang, nagdesisyon ako sa sakong puso na maniwala sa Dios. (Sa too) Paglilingkod sa Bethel ngonyan