Namomotan daw Nindo an Buhay?

“PAHELINGAN sako an liwanag.” Ini daa an mga tataramon na sinabi kan Italianong poeta na si Giacomo Leopardi sa mga nag-aasikaso sa saiya kan sia magagadanon na. An mga tataramon na iyan nagsusuherir kan desesperadong pagkamuya nin tawo sa buhay, na irinerepresentar kan liwanag.

An pagkamuya sa buhay sarong mahal na marhay na natural na tendensia na nagpapahiro sa kadaklan na indibiduwal na maglikay sa mga peligro asin gibohon an bilog nindang makakaya na magdanay na buhay. Sa bagay na ini, an tawo daing gayo napapalaen sa mga hayop, na igwa nin makosog na naturalesa na matadang buhay.

Alagad anong klaseng buhay an tunay na maninigo na ipamuhay asin mahalon? Iyan bakong pisyolohikong pag-eksister sana—na naghahangos asin naghihiro sana. Ni an pankagabsan na pagkakontento bunga nin aktitud na pag-aprobetsar sagkod sa mapupuede kan gabos na makukua sa buhay. An pilosopiya na Epicureo, “magkarakan asin mag-irinom kita, huli ta sa aga magagadan kita,” sa parate dai nagtao nin pagkakontento sa mga tawo. (1 Corinto 15:32) Minsan ngani an tawo igwa nin dakol nanggad na pundamental na materyal na mga pangangaipo, interesado man sia sa kultura asin sosyedad nin tawo, dai na baga sambiton pa an espirituwal na mga pangangaipo, na konektado sa pagtubod sa Supremong Persona. Makamomondo, ginatos na milyon, kun bakong bilyon, na tawo an nag-eeksister na sana na mayong-mayo huli sa miserableng mga kamugtakan sosyal asin sa palibot sa dakol na lugar kan globo. An siisay man na linilimitaran an saindang sadiri tanganing sa pangenot panigoan an saindang pisikal na mga pangangaipo—an pagkakan, pag-inom, pagkaigwa nin mga rogaring, o pagpadara sa seksuwal na pagmawot—sa paano man namumuhay para sa laman, na kakadikit kan nakukua nindang pagkakontento. Sa katunayan, dai ninda ginagamit an mas makahulogan na kakayahan na itinatao nin buhay tanganing panigoan an intelihensia asin emosyon nin tawo. Dugang pa, an siisay man na naghihingoang panigoan an sainda sanang egoistikong mga kamawotan bako sanang nasusudyang kamtan an pinakamarahay sa buhay kundi dinadanyaran man an sosyedad na nabubuhayan ninda, asin dai ninda sinusuportaran an intereses kan iba.

Pinatutunayan ini, an sarong huwes na nag-aasikaso sa nagkakasalang mga hoben nagsasabi na “an krisis sa mga pamantayan sa buhay, pagpamuraway sa bakong marahay na mga modelo, asin pag-asenso paagi sa madali asin daing sakit na pagpayaman” nagsusuportar sa “pagpalakop kan sobrang espiritu nin kompetensia.” Minasagkod ini sa gawe-gawe na nakadadanyar sa sosyedad asin nakararaot sa mga hoben, nangorogna kun sinda gumamit nin droga.

Aram nindo na kadakol kan kaakit-akit na bagay sa buhay—pagbakasyon sa kawiliwiling mga lugar, interesanteng pagbasa o pagsiyasat, nakaoogmang pag-iriba, magayon na musika. Asin may iba pang mga aktibidad na nagtatao nin pagkakontento dakula man asin sadit. An mga may hararom na pagtubod sa Dios, asin partikularmente sa Dios kan Biblia, si Jehova, may orog pang mga dahelan na kamotan an buhay. An tunay na pagtubod gikanan nin kosog asin katrangkilohan na makatatabang sa mga tawo na atubangon an masakit na mga panahon. An mga nagtutubod sa tunay na Dios may kompiansang makasasabi: “Si Jehova an sakong paratabang; dai ako matatakot.” (Hebreo 13:6) An mga tawo na nakaaaram kan pagkamoot nin Dios nakamamateng namomotan nia. Naghihimate sinda sa saiyang pagkamoot, na nakakakua nin hararom na kagayagayahan hale dian. (1 Juan 4:7, 8, 16) Puede sindang mamuhay na aktibo asin may daing kapasloan na pagmakolog sa iba na ginigikanan nin pagkakontento. Siring iyan kan sabi ni Jesu-Cristo: “Igwang orog na kaogmahan sa pagtao kisa pag-ako.”—Gibo 20:35.

Makamomondo, may kabaliktaran na aspekto an buhay sa presente. Lakop an pagdusa, inhustisya, kadukhaan, helang, asin kagadanan—sa pagsambit sana nin nagkapira kan makologon na mga kabtang na sa parate nagpapangyari na haros dai matios an buhay. An mayaman, makapangyarihan, asin madonong na si Hadeng Salomon kan suanoy na nasyon nin Israel dai nagkulang sa mga rekurso na puedeng magpaogma sa mga tawo. Pero igwa nin bagay na nakaribok sa saiya—an biyong maaraman na pagkagadan babayaan nia sa iba an gabos na ‘saiyang hinigosan,’ na ginibong “may kadonongan asin may kaaraman patin may kahusayan,” na nakamtan nia.—Eclesiastes 2:17-21.

Arog ni Salomon, an kadaklan nakaaaram kan kahalipotan nin buhay, na marikason na minaagi. An Kasuratan nagsasabi na an Dios ‘ibinugtak an kadaihan nin katapusan sa satong isip.’ (Eclesiastes 3:11, Byington) An pakaaram na ini sa panahon na daing sagkod pinupukaw an boot kan tawo na pensaron an kahalipotan nin buhay. Sa katapustapusi, huli sa dai pakanompong nin nakakokombensir na mga simbag sa kahulogan nin buhay asin kagadanan, an saro puedeng pasakitan nin pakamate nin pesimismo asin kadaihan nin pakinabang. Puede kaining gibohon na mamondo an buhay.

Igwa daw nin mga simbag sa labi-labi kamamondong mga hapot nin tawo? Magkakaigwa pa daw nin mga kamugtakan na mapangyaring magin mas kaakit-akit asin nagdadanay an buhay?