Banal na mga Patood Asin Katuyohan nin Dios
KUN dai aram nin saro an simbag, kun siring saro iyan na angat; pero kun aram nin saro an simbag, kun siring bako iyan na angat. Ano iyan? Sarong patood.
Sa labi-labi kapraktikal na sosyedad ngonyan, puedeng mansayon nin mga tawo an pagpatood bilang sa aki sana, alagad kan suanoy na mga panahon an patood “pagbalo kaidto sa kadonongan,” an paliwanag kan The Interpreter’s Dictionary of the Bible.—Ikomparar an Talinhaga 1:5, 6.
Imbes na sabihon nin sayod an saiyang kabotan o katuyohan, kun beses tinutuyo ni Jehova na itago an saiyang makahulang mga tataramon, na naggagamit nin mga pagbabaing, nakariribaraw na “malibog na mga tataramon,” o mga patood na nakariribong. (Salmo 78:2, King James Version; Bilang 12:8, The Emphasized Bible) Sa katunayan, minsan ngani an Hebreong tataramon para sa patood 17 beses sana na ginamit sa Biblia, sa aktuwal an Kasuratan pano nin mga patood asin talinhaga.
Abunda an mga Patood sa Biblia
Si Hadeng Salomon nakaya daang simbagon dawa an pinakanakariribong na mga hapot, o patood, na inatubang sa saiya. (1 Hade 10:1, nota sa ibaba) Sierto nanggad na resulta ini kan itinao nin Dios na kadonongan. Kun totoo man an mga bareta kan suanoy na mga historyador na si Salomon sarong beses nadaog ni Hadeng Hiram nin Tiro sa labanan nin pagpatood, posibleng marhay na iyan nangyari pakatapos na mawara nia an espiritu ni Jehova bunga kan saiyang apostasiya. Nagpaheling man si Hokom Samson nin pagkahilig sa pagpapatood. Sa sarong okasyon, tinawan nin kapangyarihan kan banal na espiritu, an sarong patood nagtao saiya nin oportunidad na takoton an puso kan mga kaiwal nin Dios.—Hokom 14:12-19.
Pero an dakol na patood sa Biblia direktang kalabot sa mga katuyohan ni Jehova. Estudyare, halimbawa, an Genesis 3:15. An hulang ini mismo, na nagtatao kan basehan para sa tema kan Biblia, masakit saboton, sarong “sagradong hilom.” (Roma 16:25, 26) Apuera kan pagtao saiya nin lihis sa natural na mga bisyon asin kapahayagan, si apostol Pablo man nakaheling nin nagkapirang aspekto kan katuyohan nin Dios sa “malibog” na paagi, o sa literal, “malibog na tataramon.” (1 Corinto 13:12; 2 Corinto 12:1-4) Asin paano man an daing katapusan na pagbanabana na nakapalibot sa misteryosong numero kan mabangis na hayop—“anom na gatos may anom na polo may anom”—na biglang inintrodusir asin mayo nin paliwanag sa Kapahayagan 13:18? Siisay an makareresolber sa banal na mga patood na ini, asin para sa ano an katuyohan kaiyan?
Pagbukas kan Sagradong mga Hilom
Para sa dakol sa sato, an pagheling iyo an pinakamahalagang marhay sa lima niatong sentido. Alagad kun mayo nin liwanag, an pakaheling nin tawo magigin haros daing serbi. Magigin haros buta kita. Arog man kaiyan an isip nin tawo. Igwa iyan nin makangangalas na kakayahan na magkomparar nin mga karakteristiko, mag-aplikar nin lohika, asin sa siring magresolber nin darakulang problema. Alagad ta igwa pang kinakaipuhan tanganing buksan an sagradong mga hilom. Mantang an iba puedeng mag-alok nin simbag sa mga patood na inatubang sa Biblia, solamente an Autor kaiyan, si Jehova, an Dios nin liwanag, an makapaghahayag kan talagang kahulogan kaiyan.—1 Juan 1:5.
Iyo sana iyan ta an mga tawo parateng sobra kamapalangkaw asin independiente na halaton si Jehova para sa mga simbag. Nagngangalas sa misteryo, igwa nin mga, huli sa paghanap nin intelektuwal na pampukaw alagad bako man talagang katotoohan, naghanap nin mga simbag sa luwas kan Tataramon nin Dios. Halimbawa, an Judiong mistisismo saka an Cabala kaiyan pinensar an misteryosong kahulogan nin mga numero asin an mga letra kan Hebreong abakada. Sa ibong na lado, an mga Gnostico kan ikaduwang siglo, ginamit an Hebreo asin Griegong Kasuratan sa pagprobar na kotkoton an sekretong mga kahulogan hale dian.
Minsan siring, an gabos na pagsisiyasat na iyan orog pang nagdara sa sainda sa paganong mga seremonya o superstisyon asin parayo sa katotoohan nin Dios. ‘Tara, kun an kinaban pano nin karatan,’ an pangatanosan kan mga Gnostico, ‘kun siring an Kaglalang kaini, si Yahweh, dai puedeng magin marahay na Dios.’ Ini daw an pinakamarahay na konklusyon na ikatatao ninda? Hababaw nanggad an pangangatanosan nin tawo! Bakong makangangalas na si apostol Pablo, sa pakikilaban sa apostatang mga ideya na sa huri pinatalubo kan Gnosticong mga sekta, marigon na nagpatanid sa saiyang surat: “Dai kamo maglihis sa mga bagay na nasusurat”!—1 Corinto 4:6.
Ihinahayag an “Malibog na mga Tataramon”
Pero, taano an Dios nin liwanag ta magtataram pa nin “malibog na mga tataramon”? An mismong naturalesa nin sarong patood nag-aangat sa imahinasyon asin mga kakayahan nin pangangatanosan nin saro. Kaya, lakop sa bilog na Kasuratan siring sa masisiram na sangkap sa sarong espesyal na kakanon, kun beses ginagamit sana an mga iyan tanganing pukawon an interes kan publiko o tanganing magin mas malinaw an pagpahayag kan mensahe. Sa mga pangyayaring ini, an mga esplikasyon sa parate itinatao tolos-tolos pagkatapos.—Ezequiel 17:1-18; Mateo 18:23-35.
Abundang nagtatao nin kadonongan si Jehova alagad nungkang daing pinipili. (Santiago 1:5-8) Estudyare an libro nin Talinhaga, sarong ipinasabong na koleksion nin dakol na masakit saboton na kasabihan na puedeng mansayon nin nagkapira bilang mga patood. An pagsabot sa mga ini nagkakaipo nin panahon asin paghorophorop. Alagad pira an andam na gumibo kan paghihingoa? An kadonongan na nasa laog kaiyan masasabotan sana kaidtong mga andam na magkotkot kaiyan.—Talinhaga 2:1-5.
Kaagid kaiyan si Jesus naggamit nin mga ilustrasyon tanganing ibuyagyag an aktitud nin puso kan mga naghihinanyog sa saiya. Nagsurusuan an mga kadaklan sa palibot nia. Naogma sinda sa saiyang mga estorya. Nagustohan na marhay ninda an saiyang mga milagro. Alagad ta pira an andam na magbago kan saindang estilo nin pamumuhay asin magsunod sa saiya? Kanigoan na pagkakalaen sa mga disipulo ni Jesus, na paorootrong naghagad na masabotan an mga katokdoan ni Jesus asin andam na paindahan an saindang sadiri tanganing magin saiyang mga parasunod!—Mateo 13:10-23, 34, 35; 16:24; Juan 16:25, 29.
Naglalaom sa Liwanag
“An pagkakainteres sa mga patood,” an komento nin sarong reperensia, “garo nakakadungan sa kapanahonan nin intelektuwal na pagkagimata.” Sa ngonyan labi-labi an satong pribilehio na mamuhay sa panahon na an espirituwal na “liwanag mismo kuminilyab” para sa banwaan nin Dios. (Salmo 97:11; Daniel 12:4, 9) May pasensia daw kitang makapaghahalat ki Jehova na ihayag an saiyang mga katuyohan oyon sa saiyang iskedyul? Mas mahalaga, tolos-tolos daw kitang minahiro tanganing bagohon an satong buhay kun nakamamansay kita kun paano mas lubos na makuyog sa ihinayag na kabotan nin Dios? (Salmo 1:1-3; Santiago 1:22-25) Kun ginigibo niato ini, bebendisyonan ni Jehova an satong mga paghihingoa, tanganing, kun paanong an salming sa mata ikinokorehir an malibog na pakaheling, malinaw na ikapokus kan banal na espiritu an magayon na kompletong ladawan kan katuyohan nin Dios sa mata kan satong isip, na pinaririgmat an satong espirituwal na pakaheling.—1 Corinto 2:7, 9, 10.
Tunay nanggad, an mga patood sa Kasuratan ibinabantog an kadakulaan ni Jehova bilang an “Parahayag nin mga hilom.” (Daniel 2:28, 29) Dugang pa, Parasiyasat man sia nin puso. (1 Cronica 28:9) Dai niato maninigong ikabigla na maaraman na an paghahayag kan liwanag nin katotoohan nin Dios kaidto pa pirmeng progresibo. (Talinhaga 4:18; Roma 16:25, 26) Imbes na hanapon an kaaraman kan hararom na mga bagay nin Dios paagi sa mistisismo o hababaw na kadonongan nin tawo, na masagkod sana sa kadaihan nin pakinabang, kompiado kitang maglaom ki Jehova Dios na pailawon an liwanag nin katotoohan sa saiyang “malibog na mga tataramon,” na ipinahahayag an saiyang makangangalas na mga katuyohan sa fiel na mga lingkod sa saiyang itinalaan na panahon.—Amos 3:7; Mateo 24:25-27.
[Pasasalamat para sa pinagkuanan kan retrato sa pahina 26]
Biblia Hebraica Stuttgartensia, Deutsche Bibelgesellschaft Stuttgart