Nawawaran Na daw nin Kahulogan an Terminong “Kristiano”?
ANO an boot sabihon nin pagigin Kristiano? Ano an isisimbag nindo? An basta na sana piniling mga tawo sa laen-laen na nasyon hinapot kan mismong hapot na iyan, asin uya an sampol kan saindang mga simbag:
“Pagsunod ki Jesus asin pag-arog sa saiya.”
“Pagigin marahay na tawo asin paghiras sa iba.”
“Pag-ako ki Cristo bilang Kagurangnan asin paraligtas.”
“Pag-atender sa Misa, pagrosaryo, asin pag-ako nin Banal na Komunyon.”
“Dai ako naniniwala na kaipuhan mo pang magsimba tanganing magin Kristiano.”
Maski an mga diksionaryo igwa nin nakariribaraw na mga pakahulogan. Sa katunayan, an sarong libro igwa nin sampulong pakahulogan sa terminong “Kristiano,” poon sa “paniniwala o pagigin kabilang sa relihion ni Jesu-Cristo” sagkod sa “sarong disente o presentableng tawo.” Bakong makangangalas na dakol an nasasakitan na ipaliwanag an boot sabihon nin pagigin Kristiano.
Nagigin Liberal na Tendensia
Ngonyan, sa mga naghihingakong Kristiano—dawa sa mga magkasirelihion—an saro makanonompong nin magkaralaenlaen na punto de vista dapit sa mga tema na arog kan pagkapasabong nin Dios sa Biblia, teoriya nin ebolusyon, pakikilabot kan iglesia sa politika, asin paghiras sa iba kan pagtubod nin saro. An mga isyu sa moral, dapit sa mga tema na arog baga nin aborsion, homoseksuwalidad, asin pagsasaro nin mga bakong kasal, sa parate nagigin sentro nin kontrobersia. An dai mamamaluan na tendensia iyo an pagigin liberal.
Halimbawa, an sarong Protestanteng tribuna nin iglesia nagboto kasuarin pa sana na suportaran an diretso nin iglesia na “mag-elehir nin sarong hayag na bakla na magurang sa namamahalang junta kaiyan,” an bareta kan magasin na Christian Century. May mga teologo pa ngani na nagpresentar kan punto de vista na an pagtubod ki Jesus bakong importante sa kaligtasan. Sinda naniniwala na an mga Judio, Muslim, asin iba pa “tibaad may posibilidad man na makalaog sa langit [arog kan mga Kristiano],” an sabi nin sarong bareta sa The New York Times.
Imahinara kun kaya nindo, sarong Marxista na ipinagdedepensa an kapitalismo o sarong demokrata na nagpapalakop nin diktadura o sarong espesyalista sa ekolohiya na sinusuportaran an pagpalod sa mga kadlagan. “An tawong iyan dai nanggad puedeng magin Marxista o demokrata o espesyalista sa ekolohiya,” an sasabihon nindo—asin tama kamo. Pero, kun eestudyaran nindo an pagkalaenlaen nin mga punto de vista nin naghihingakong mga Kristiano ngonyan, maheheling nindo an mga paniniwala na harayoon an kalaenan asin na parateng sarongat sa itinokdo kan Kagpundar nin Kristianismo, si Jesu-Cristo. Ano an sinasabi kaiyan dapit sa saindang tatak na Kristianismo?—1 Corinto 1:10.
An pagmawot na liwaton an Kristianong mga katokdoan tanganing iangay sa aktitud kan panahon igwa nin halawig na kasaysayan, siring kan satong maheheling. Ano an saboot nin Dios asin ni Jesu-Cristo manongod sa siring na mga pagliliwat? An mga iglesia daw na nagsusuportar sa mga katokdoan na bakong gikan ki Cristo tamang apodon an saindang sadiri na Kristiano? An mga hapot na ini eestudyaran sa sunod na artikulo.