Puede daw na Magkaigwa nin Orog na Kahulogan an Saindong Buhay?
AN TUNAY na halaga bakong pirmeng kun ano an naheheling. An pinakadakulang kuartang papel na ilinuwas sa Estados Unidos may nakasurat na kantidad na $10,000. Pero, an papel na inimprentahan kaiyan nagkakantidad sana nin pirang sentimo.
Napag-isip-isip na daw nindo kun baga makakatao nin tunay na kahulogan sa saindong buhay an mga pidaso nin papel na an mismong halaga kakadikit? Dakol na tawo an naghohona na iyo. Minilyon an nagtatrabaho banggi-aldaw tanganing magganar nin dakulang kuarta sagkod sa makakaya ninda. Kun beses an paghanap nin kuarta nangangahulogan na isinasakripisyo ninda an saindang salud, an saindang mga katood, asin an saindang pamilya pa ngani. Na may anong pakinabang? An kuarta daw—o an nababakal ta kaiyan—puedeng magtao nin tunay asin nagdadanay na satispaksion?
Segun sa mga parasiyasat, mientras na kita orog na naghahanap nin satispaksion basado sa materyal na mga rogaring, mas dikit an posibilidad na manompongan ta iyan. An peryodistang si Alfie Kohn nagkonklusyon na “an satispaksion talagang dai nababakal. . . . An mga tawo na kayamanan an ipinaoorog sa buhay may tendensiang makaeksperyensia nin labi sa ordinaryong kahaditan asin depresyon siring man nin mas hababang pankagabsan na pakamate nin karahayan.”—International Herald Tribune.
Minsan ngani tibaad narerealisar nin mga parasiyasat na an makahulogan na buhay nagkakaipo nin ibang bagay apuera sa kuarta, iba man an iniisip nin dakol na tawo. Bako nanggad ining makangangalas, huling an mga nag-eerok sa mga kadagaan sa Solnopan tibaad pinaooranan nin sagkod sa 3,000 na anunsio kada aldaw. Baga man ini nag-aanunsio nin mga kotse o dulse, an pundamental na ideya: ‘Bumakal ka kan produktong ini, asin magigin kang mas maogma.’
Ano an resulta kan daing ontok na pagpalakop nin mga bagay na may materyal na halaga? Tara, an mga bagay na may espirituwal na halaga parateng iniignoro! Segun sa sarong report sa magasin na Newsweek, an arsobispo sa Colonia, Alemania, nagpahayag kasuarin pa sana na “sa satong sosyedad, an Dios dai na pinag-oolayan.”
Tibaad idinusay na nindo an haros gabos nindong kosog sa paghanap-buhay. Tibaad sa pagmate nindo kadikit na sana an panahon nindo na gibohon an iba pang bagay. Minsan siring, paminsanminsan tibaad namamatean nindo na siertong igwa nin orog pa sa buhay kisa daing katapusan na pagpapagal sagkod na papondohon iyan kan saindong salud o saindong edad.
Puede daw na magtao sa saindo nin dugang na satispaksion an orog na atension sa espirituwal na mga bagay? Ano an matao nin orog na kahulogan sa saindong buhay?