Kun Paano Magkakaigwa nin Orog na Kahulogan an Saindong Buhay

AN SARONG suanoy na talinhaga nagsasabi: “Dai ka magpagal sa pagtipon nin kayamanan. Mag-ontok ka sa saimong sadiring pakasabot. Iyan daw sininyapan kan saimong mga mata, mantang iyan daing halaga? Huli ta sierto na iyan magibo nin mga pakpak para sa saiyang sadiri arog kan sa agila asin malayog pasiring sa kalangitan.” (Talinhaga 23:4, 5) Sa ibang pagtaram, bakong madonong na kita masobrahan sa kapagalan sa paghihingoang magin mayaman, huli ta an kayamanan puedeng lumayog na garo may mga pakpak nin agila.

Siring sa ipinaheheling kan Biblia, an materyal na kayamanan puedeng madaling mawara. Iyan puedeng biglang mawara dahelan sa sarong natural na kalamidad, pagbagsak nin ekonomiya, o iba pang pagkanorongod. Dugang pa, maski an mga nag-aasenso sa materyal sa parate nadedesganar. Helinga an nangyari ki John, na kalabot sa trabaho nia an pag-entertener sa mga politiko, sikat sa isport, asin mahal na mga tawo.

Si John nagsasabi: “Idinusay ko an sakong sadiri sa trabaho. Nag-asenso ako sa pinansial, nag-istar sa maluhong mga otel, asin kun minsan minaduman pa ngani ako sa trabaho na nakasakay sa pribadong eroplano. Kan primero nagustohan ko iyan, alagad luway-luway na nagin desganado ako. An mga tawo na pinaoogma ko garo baga paimbabaw. Mayo nin kahulogan an sakong buhay.”

Siring kan nadiskobre ni John, dai nakakokontento an buhay na mayo nin mga bagay na may espirituwal na halaga. Sa saiyang bantog na Sermon sa Bukid, ipinaheling ni Jesu-Cristo kun paano maeeksperyensiahan an nagdadanay na kaogmahan. Sia nagsabi: “Maogma idtong mga nakamamate kan saindang espirituwal na pangangaipo, huli ta an kahadean kan kalangitan sadiri ninda.” (Mateo 5:3) Malinaw, kun siring, madonong na enoton sa buhay an espirituwal na mga bagay. Minsan siring, may iba pang bagay na makatatabang man na tawan nin orog na kahulogan an buhay.

Talagang Mahalaga an Saindong Pamilya Asin mga Katood

Maoogma daw kamo sa buhay kun kamo mayo nin komunikasyon sa saindong pamilya asin mayo nin dayupot na mga katood? Siempre pa dai. Linalang kita kan satong Kaglalang na igwa nin pangangaipo na mamoot asin kamotan. Iyan an sarong dahelan kun taano ta itinampok ni Jesus an kahalagahan nin ‘pagkamoot sa satong kataed nin siring sa sato man sana.’ (Mateo 22:39) An pamilya sarong balaog nin Dios na tamang-tama an kamugtakan para sa pagpaheling nin daing kaimotan na pagkamoot.—Efeso 3:14, 15.

Paano matatawan kan satong pamilya nin orog na kahulogan an satong buhay? Bueno, an sararong pamilya puedeng iagid sa sarong magayon na hardin na nagigin nakarerepreskong pailihan sa tension kan aroaldaw na buhay. Kaagid kaiyan, sa laog kan pamilya, manonompongan ta an nakarerepreskong pakiibaiba asin mainit na relasyon na nakahahale nin mga pakamate nin kapungawan. Siempre, dai automatikong itinatao nin pamilya an siring na lugar nin proteksion. Minsan siring, mantang pinakokosog ta an bogkos nin pamilya, kita orog na nagigin dayupot sa kada saro, asin an buhay orog na nag-ooswag an kualidad. Halimbawa, an panahon asin atension na itinatao ta sa pagpaheling nin pagkamoot asin paggalang sa satong agom aroaldaw na pagpundar na puedeng may dakulang pakinabang sa huri.—Efeso 5:33.

Kun kita may mga aki, maninigo kitang maghingoa na itao an tamang kamugtakan na padadakulaan sa sainda. An pagtao nin panahon na makaibaiba sinda, pagpapadanay na bukas an komunikasyon, asin pagtao sa sainda nin espirituwal na pagtotokdo tibaad depisil. Alagad an siring na panahon asin paghihingoa puedeng magtao sa sato nin dakulang satispaksion. An mapangganang mga magurang minamansay an mga aki bilang bendisyon, bilang mana hale sa Dios na maninigong atamanon na marhay.—Salmo 127:3.

An marahay na mga katood nakakokontribwir man sa nakakokontento asin makahulogan na buhay. (Talinhaga 27:9) Magkakaigwa kita nin dakol na katood paagi sa pagpaheling nin pakikipagkapwa. (1 Pedro 3:8) An tunay na mga katood nagtatabang na patindogon kita kun kita nasisingkog. (Eclesiastes 4:9, 10) Asin “an tunay na kaibaiba . . . tugang na namundag manongod sa panahon nin kasakitan.”—Talinhaga 17:17.

Puede nanggad na magin nakakokontento an tunay na pagkakatood! An pagsolnop nin saldang mas pambihira, an pagkakan mas masiram, asin an musika mas nakaoogma kun may kaibanan na sarong katood. Siempre, an dayupot na pamilya asin mapagtitiwalaan na mga katood duwa sanang aspekto nin makahulogan na buhay. Ano pang ibang probisyon an itinatao nin Dios na puedeng magtao nin orog na kahulogan sa satong buhay?

Pagpanigo sa Satong Espirituwal na Pangangaipo

Siring kan nasabi kasubago, ikinonektar ni Jesu-Cristo an kaogmahan sa pakamate kan satong espirituwal na pangangaipo. Kita linalang na igwa nin kakayahan sa espirituwal sagkod sa moral. Huli kaini, nasasambitan kan Biblia “an espirituwal na tawo” asin “an natatagong persona kan puso.”—1 Corinto 2:15; 1 Pedro 3:3, 4.

Segun sa An Expository Dictionary of New Testament Words, ni W. E. Vine, an piguratibong puso nagrerepresentar sa “bilog na mental asin moral na aktibidad nin tawo, an mga elemento nin pagrason sagkod emosyon.” Paagi sa pagpaliwanag, sinabi pa ni Vine: “Sa ibang pagtaram, an puso ginagamit sa piguratibong paagi para sa natatagong mga burabod kan panlaog na persona.” An iyo man sanang reperensia nagsasabi man na “yaon sa puso, na nasa kairairaromi, ‘an natatagong persona,’ . . . an tunay na persona.”

Paano ta mapaninigoan an mga pangangaipo kan “espirituwal na tawo,” o kan “natatagong persona,” an boot sabihon, “an natatagong persona kan puso”? Kita naggigibo nin sarong importanteng lakdang sa paggibo kaini asin sa pagpanigo sa satong espirituwal na pangangaipo kun rinerekonoser ta an idinoon kan pinasabngan na salmista na nag-awit: “Arama nindo na si Jehova Dios. Sia an naggibo sa sato, asin bakong kita mismo. Kita an saiyang banwaan asin an mga karnero kan saiyang pasabsaban.” (Salmo 100:3) An pagrekonoser kaini tama sanang magin dahelan na kita magkonklusyon na kita maninimbag sa Dios. Kun boot niatong mapabilang sa “saiyang banwaan asin [sa] mga karnero kan saiyang pasabsaban,” dapat kitang humiro kaoyon kan saiyang Tataramon, an Biblia.

Disbentaha daw iyan? Dai, huli ta an pakaaram na an satong paggawe mahalaga sa Dios nagtatao nin kahulogan sa satong buhay. Dinadagka kita kaiyan na magin mas marahay na mga indibiduwal—tunay nanggad na sarong kapakipakinabang na pasohan. “Maogma an tawo na natatakot ki Jehova, na sa saiyang mga togon nawiwili sia nin labi-labi,” an sabi kan Salmo 112:1. An reberensial na pagkatakot sa Dios asin odok sa pusong pagkuyog sa saiyang mga togon puedeng magtao nin orog na kahulogan sa satong buhay.

Taano ta nagtatao sa sato nin satispaksion an pagkuyog sa Dios? Huli ta kita igwa nin konsensia, sarong balaog na itinao nin Dios sa gabos na tawo. An konsensia sarong moral na parasiyasat na nagpapahayag nin pag-aprobar o pagdesaprobar sa satong ginibo o iniisip na gibohon. Kita gabos nakaeksperyensia na kan kapurisawan nin pagkakonsensia. (Roma 2:15) Alagad puede man kitang balosan kan satong konsensia. Kun kita minahiro na daing kaimotan para sa Dios asin mga kapwa tawo, kita nakamamateng kontento asin may satispaksion. Nadidiskobre ta na “igwang orog na kaogmahan sa pagtao kisa pag-ako.” (Gibo 20:35) Igwa ini nin importanteng dahelan.

Ginibo kita kan satong Kaglalang sa paagi na an mga kamawotan asin pangangaipo nin mga kapwa tawo may epekto sa sato. An pagtabang sa iba nagtatao nin kaogmahan sa sato mismong puso. Saro pa, inaasegurar kita kan Biblia na kun kita nagtatao sa saro na nangangaipo, ibinibilang ini nin Dios na sarong pabor na ginibo sa saiya.—Talinhaga 19:17.

Apuera sa pagtao nin panlaog na satispaksion, matatabangan daw kita sa praktikal na paagi kan pag-asikaso sa satong espirituwal na mga pangangaipo? Bueno, an sarong negosyanteng taga Tahaw na Sirangan na an ngaran Raymond nagtutubod na iyo. “An sakuya sanang pasohan iyo na magkakuarta,” an sabi nia. “Alagad poon kan panahon na inako ko sa sakong puso na igwa nin Dios asin na sinasabi kan Biblia an saiyang mga kamawotan, ako iba na. An paghanap-buhay ngonyan ikaduwa na sana sa sakong buhay. Paagi sa paghihingoang paogmahon an Dios, nalikayan ko an nakagagadan na pakamate nin pagkaongis. Minsan ngani nagadan an sakong ama durante nin sarong paglalaban, dai ko minamawot na bumalos sa mga responsable.”

Siring kan nadiskobre ni Raymond, an igong pag-asikaso sa mga pangangaipo kan “espirituwal na tawo” makakapapila kan hararom na mga lugad sa emosyon. Minsan siring, apuera sana kun makakaya ta an aroaldaw na mga problema, an buhay dai magigin lubos na nakakokontento.

Puedeng Mapasato “an Katoninongan nin Dios”

Sa ribaraw na kinaban na ini, pipira sanang aldaw an minaagi na daing problema. Nangyayari an mga aksidente, napapasala an mga plano, asin nasusudya an linalaoman ta sa mga tawo. Puedeng agawon sa sato kan mga kaolangan na ini an kaogmahan. Pero para sa mga naglilingkod ki Jehova Dios, an Biblia nanunuga nin panlaog na pagkakontento—“an katoninongan nin Dios.” Paano kita nagkakaigwa kan katoninongan na ini?

Si apostol Pablo nagsurat: “Dai kamo maghadit sa ano man na bagay, kundi sa gabos na bagay paagi sa pamibi asin pagngayongayo na may pasalamat ipahayag nindo sa Dios an saindong mga kahagadan; asin an katoninongan nin Dios na minalampas sa gabos na kaisipan mag-iingat kan saindong puso asin kan saindong mga pag-isip paagi ki Cristo Jesus.” (Filipos 4:6, 7) Imbes na hingoahon na pasanon an satong mga problema na kita sana, kita kaipuhan na mamibi nin odok, na itinatao sa Dios an satong mga kagabatan sa aroaldaw. (Salmo 55:22) An pagtubod na sinisimbag nia an siring na pagngayongayo paagi sa saiyang Aki, si Jesu-Cristo, maorog mantang kita nagtatalubo sa espirituwal asin namamansayan ta kun paano kita tinatabangan nin Dios.—Juan 14:6, 14; 2 Tesalonica 1:3.

Pakatapos na mapatalubo ta na an satong kompiansa ki Jehova Dios, an “Paradangog nin pamibi,” mas makakaya ta nang atubangon an mga kasakitan, arog baga nin nagpapadagos na helang, paggurang, o pagkagadan nin namomotan. (Salmo 65:2) Minsan siring, para sa tunay na makahulogan na buhay, dapat man na pensaron ta an ngapit.

Maggayagaya sa Paglaom sa Ngapit

An Biblia nanunuga nin “bagong kalangitan asin sarong bagong daga,” sarong matanos, may pagmakolog na langitnon na gobyerno na namamahala sa makinuyog na pamilya nin tawo. (2 Pedro 3:13) Sa bagong kinaban na iyan na ipinanuga nin Dios, an guerra asin inhustisya sasalidahan nin katoninongan asin hustisya. Ini bako sanang madaling mawara na kamawotan, kundi saro ining kombiksion na puedeng kumosog nang kumosog kada aldaw. Iyan maogmang bareta nanggad asin sierto na sarong dahelan para sa paggayagaya.—Roma 12:12; Tito 1:2.

Si John, na nasambitan sa enotan, nakakamate ngonyan na an saiyang buhay igwa nin orog na kahulogan. “Minsan ngani nungka na ako relihiosong marhay kaidto, ako pirmeng nagtutubod sa Dios,” an sabi nia. “Alagad mayo akong ginibo manongod sa pagtubod na ini sagkod na may duwang Saksi ni Jehova na nagsongko sa sako. Pinaoranan ko sinda nin hapot, arog baga nin, ‘Taano ta yaon kita digdi? Pasaen kita?’ An saindang nakakokontentong simbag sono sa Kasuratan nagtao sa sako nin pakamate nin katuyohan sa kaenot-enote sa sakong buhay. Kapinonan sana idto. Nagkaigwa ako nin pagkapaha sa katotoohan na nagin dahelan kan pagliwat ko kan sakong bilog na mga pamantayan sa buhay. Minsan ngani bako na akong mayaman sa materyal, an pagmate ko garo ako milyonaryo sa espirituwal.”

Arog ki John, tibaad pinabayaan nindo na dai ginagamit an saindong kakayahan sa espirituwal sa laog nin dakol na taon. Minsan siring, paagi sa pagpatalubo nin “puso na may kadonongan,” puede nindo iyan na gamiton liwat. (Salmo 90:12) Paagi sa determinasyon asin paghihingoa, puede kamong magkaigwa nin tunay na kagayagayahan, katoninongan, asin paglaom. (Roma 15:13) Iyo, asin an saindong buhay puedeng magkaigwa nin orog na kahulogan.

[Ritrato sa pahina 6]

An pamibi puedeng magtao sa sato kan “katoninongan nin Dios”

[Mga Ritrato sa pahina 7]

Aram daw nindo kun ano an makahihimo sa buhay pampamilya na magin orog na nakakokontento?