Makinabang sa Pag-aaabot sa mga Bagay na May Espirituwal na Halaga

“An mamomoton sa pirak dai makokontento sa pirak, ni an siisay man na mamomoton sa kayamanan makokontento man sa ginaganar.”​—Eclesiastes 5:10.

AN SOBRANG pagtrabaho puedeng magbunga nin tension, asin an tension puedeng magin dahelan nin mga problema sa salud, na kun beses minasagkod sa kagadanan. Sa dakol na nasyon, an mga pamilya nagkakabaranga huli sa diborsio. Parateng gayo na an sobrang paghadit sa materyal na mga bagay an dahelan kan siring na mamondong mga pangyayari. Imbes na ikaogma an yaon sa saiya, an saro na bangkag sa pagkaigwa nin mga rogaring pirmeng gusto nin orog pa, ano man an magin danyos sa sadiri nia. An sarong libro na giya sa personal na pag-oswag nagsasabi: “An pagmamaigot na makipantay sa pagtaraed sa materyal na paagi iyo na an libangan kan dakol, dawa ngani an kataed na iyan saro na bangkag sa trabaho asin namemeligro nang atakehon sa puso sa edad na kuarenta y tres.”

An paghanap nin orog pa puedeng dai maingustohan, na hinahalean an saro nin ano man na kagayagayahan na puede nia kutanang maeksperyensiahan. Mapadapit digdi an satong kaluyahan bilang tawo sa parate inaaprobetsaran nin sarong makapangyarihan na puersa​—an anunsio! An mga programa sa telebisyon pano nin mga anunsio na sinasadol kamong bumakal nin mga bagay na dai gayod nindo kaipuhan asin na tibaad dai ngani nindo kayang bakalon. Gabos ini puedeng magbunga nin dakulang danyos.

An daing kontrol na pagpanigo sa sadiri puedeng magkaigwa nin daing gayo risa pero nakakapanluya nin biyo na epekto sa sato, sa pisikal sagkod sa moral. Halimbawa, an madonong na si Hadeng Salomon nagkomento: “An trangkilong puso iyo an buhay kan laman.” (Talinhaga 14:30) Sa kabaliktaran, an sobrang pagmamaigot, kahaditan, asin mga pangigipit nin pagtipon nin materyal na kayamanan puedeng raoton an satong salud asin kaogmahan. Naaapektaran man na marhay an mga relasyon kun dinodominar nin materyal na mga pasohan an satong buhay. Asin kun an pamilya asin sosyal na buhay kan saro minaruro, sa pankagabsan minaruro man an kualidad kan saiyang buhay.

Pakalabi kan mga Bagay na May Espirituwal na Halaga

“Dai na kamo magpamolde sa sistemang ini nin mga bagay,” an sadol ni apostol Pablo dakol na siglo na an nakaagi. (Roma 12:2) Namomotan kan kinaban an mga nagsusunod sa mga prinsipyo sa buhay kaiyan. (Juan 15:19) An tendensia iyo na akiton kamo paagi sa naheheling, nadudutaan, nananamitan, napaparong, asin nadadangog nindo​—iyo, na arogon nindo an sarong materyalistikong estilo nin pamumuhay. An idinodoon iyo an “mawot kan mga mata” tanganing kamo asin an iba pa pagmaigotan na kamtan an materyal na pakinabang.​—1 Juan 2:15-17.

Alagad igwa nin mga prinsipyo sa buhay na labi pa an halaga sa kuarta, pagkaprominente, asin materyal na kayamanan. Dakol na siglo na an nakaagi, si Hadeng Salomon nakatipon nin gabos na bagay na puedeng ikatao kan kinaban sa materyal na paagi. Nagtogdok sia nin mga harong asin nagkaigwa nin mga hardin, tatamnan, surugoon, ataman na hayop, lalaki asin babaeng parakanta, kaiba an kadakol na bulawan asin pirak. Dinugangan ni Salomon an saiyang kayamanan na linabihan pa an gabos na nagkaerenot sa saiya. An pagsabi na sia mayaman pagtaram na may pagpakulang. Yaon na ki Salomon an haros gabos na puedeng mawoton. Pero, kan hineling nia an saiyang mga nagibo, sia nagsabi: “An gabos daing kamanungdanan asin paglapag sa doros.”​—Eclesiastes 2:1-11.

Huli sa nakakalabing kadonongan na itinao sa saiya, aram ni Salomon na an mas orog na satispaksion hale sa pag-aaabot sa mga bagay na may espirituwal na halaga. Sia nagsurat: “An konklusyon kan bagay, mantang nadangog na an gabos, iyo ini: Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”​—Eclesiastes 12:13.

Mas mahalaga kisa sa bulawan asin pirak an kayamanan na manonompongan sa mga pahina kan Tataramon nin Dios, an Biblia. (Talinhaga 16:16) Arog sa mga mutya, an hararom na mga katotoohan yaon dian tanganing makua nindo. Hahanapon asin susungkaton daw nindo an mga iyan? (Talinhaga 2:1-6) An satong Kaglalang, an Gikanan kan tunay na mga prinsipyo sa buhay, sinasadol kamong gibohon iyan, asin tatabangan nia kamo. Paano?

Si Jehova nagtatao nin mga mutya nin katotoohan paagi sa saiyang Tataramon, saiyang espiritu, asin saiyang organisasyon. (Salmo 1:1-3; Isaias 48:​17, 18; Mateo 24:45-47; 1 Corinto 2:10) An pagsiyasat sa bihirang mga tampok na ini na dai masokol an halaga nagtatao saindo nin oportunidad na may kadonongan na pumili kan pinakamarahay asin pinakanakakakontentong pamumuhay. Asin dai iyan magigin depisil huli ta aram ni Jehova, an satong Kaglalang, kun ano an kaipuhan niato tanganing magin totoong maogma.

Sinusuportaran kan Biblia an Pinakahalangkaw na mga Prinsipyo sa Buhay

An marahay na hatol, o sadol, na makukua sa Biblia praktikal sagkod daing kaagid. An moral na mga pamantayan na sinusuportaran kaiyan dai mapapantayan. An hatol kaiyan pirmeng kapakipakinabang. Napatunayan na iyan sa halawig na peryodo nin panahon. An mga halimbawa kan marahay na sadol sa Biblia iyo an maghigos sa trabaho, magin onesto, gamiton an kuarta sa madonong na paagi, asin likayan an kahugakan.​—Talinhaga 6:6-8; 20:23; 31:16.

Kaoyon kaiyan, si Jesus nagsabi: “Ontok na kamo sa pagtipon nin mga kayamanan sa daga, na digdi an polilya asin takla nakakaraot, asin igwa nin mga parahabon na nananalakat asin naghahabon. Imbes, magtipon kamo nin mga kayamanan sa langit, na duman an polilya o takla dai nakakaraot, asin an mga parahabon dai nananalakat asin dai naghahabon.”​—Mateo 6:​19, 20.

An napapanahon na konsehong iyan aplikable ngonyan kun paanong aplikable iyan kaidtong 2,000 na taon na an nakaagi. Imbes na mabangkag sa paghanap nin materyal na kayamanan, makikinabang na kita ngonyan sa pag-aaabot sa mas halangkaw na klase nin pamumuhay. An nagdedeterminar na bagay iyo an pagsaray nin espirituwal na kayamanan, na mabunga nin sarong buhay na may tunay na kaogmahan asin pagkakontento. Paano niato magigibo iyan? Paagi sa pagbasa kan Tataramon nin Dios, an Biblia, asin paagi sa pag-aplikar kan itinotokdo kaiyan.

An mga Bagay na May Espirituwal na Halaga Nagtatao nin mga Balos

Kun iaaplikar nin tama, an mga bagay na may espirituwal na halaga papakinabangon kita sa pisikal, emosyonal, asin espirituwal. Kun paanong an ozono na nasa kaitaasan kan daga pinoprotehiran kita sa nakakadanyar na sinag kan saldang, an marahay na mga prinsipyo sa moral nagtatabang na protehiran kita paagi sa pagbuyagyag sa peligrosong mga epekto nin materyalismo. An Kristianong si apostol Pablo nagsurat: “Idtong mga determinadong yumaman nahuhulog sa sugot asin sa siod patin sa dakol na daing isip asin nakakakolog na mawot, na nagdadara sa mga tawo sa kalaglagan asin kapahamakan. Huli ta an pagkamoot sa kuarta gamot nin gabos na klase nin nakakadanyar na bagay, asin sa pag-aabot sa pagkamoot na ini an nagkapira nagkaralagalag parayo sa pagtubod asin sinaksak an bilog nindang sadiri nin dakol na kakologan.”​—1 Timoteo 6:​9, 10.

An pagkamoot sa kayamanan nag-eenganyar sa mga tawo na maghanap nin orog na kayamanan, posisyon, asin kapangyarihan. Parateng marhay na tuso asin madayang mga paagi an ginagamit tanganing magibo an mga pasohan na ini. An pag-aaabot sa materyal na mga bagay puedeng mag-agaw sa saro nin panahon, kosog, asin mga abilidad. Puede nganing dai kaiyan patorogon an saro kun banggi. (Eclesiastes 5:12) An paghanap nin orog pa tunay nanggad na pinopogolan an espirituwal na pag-oswag. An pinakadakulang tawo na nabuhay kasuarin man, si Jesu-Cristo, malinaw na ipinaheling an mas marahay na dalan: “Maogma idtong mga nakakamate kan saindang espirituwal na pangangaipo.” (Mateo 5:3) Aram nia na an espirituwal na kayamanan nagbubunga nin permanenteng mga balos asin mas dakula nanggad an halaga kisa sa temporaryong materyal na pakinabang.​—Lucas 12:13-31.

Kapakipakinabang daw Talaga Iyan?

“An sakong mga magurang naghingoang marhay na kombensiron ako na an mga bagay na may espirituwal na halaga bakong praktikal,” an nagigirumdoman ni Greg. “Pero, nagkaigwa ako nin pambihirang katoninongan nin isip paagi sa pag-aaabot sa espirituwal na mga pasohan huli ta libre ako sa tension na resulta kan pakikipagkompetensia para sa kayamanan.”

An mga bagay na may espirituwal na halaga nagpapatalubo nin mas marahay na personal na mga relasyon. An tunay na mga katood naaakit sa saindo huli sa kun ano kamo, bakong huli sa kun ano an igwa kamo. An Biblia nagrerekomendar: “Makiibaiba ka sa madonong asin ika magigin madonong.” (Talinhaga 13:​20, Today’s English Version) Apuera dian, an mapangganang pamilya napapasikad sa kadonongan asin pagkamoot, bakong sa materyal na mga rogaring.​—Efeso 5:22–​6:4.

Dai kita namundag na may mga prinsipyo na sa buhay. Kaipuhan na manodan niato an mga iyan sa satong mga kairiba o sa mas halangkaw na gikanan. Iyan an dahelan kun taano ta an basado sa Biblia na edukasyon puedeng makapabago sa bilog niatong punto de vista mapadapit sa materyal na mga bagay. “Natabangan ako na mag-isip giraray kan sakong mga prinsipyo sa buhay, asin nakanood akong makontento sa mga pangangaipo sana,” an sabi ni Don, sarong dating nagnenegosyo nin pagbangko.

Pagmaigotan na Kamtan an Nagdadanay na Espirituwal na Kayamanan

Itinatampok kan mga bagay na may espirituwal na halaga an panhaloyan na mga balos, bakong halipot na terminong pagpanigo. Si Pablo nagsurat: “An mga bagay na naheheling [materyal] naagi sana, alagad an mga bagay na dai naheheling [espirituwal] daing katapusan.” (2 Corinto 4:18) Tunay nanggad na an materyal na mga pinag-aaabot tibaad mapanigoan nin madali sana an mga kamawotan, alagad an kahanaban mayo nin ngapit. An mga bagay na may espirituwal na halaga daing sagkod.​—Talinhaga 11:4; 1 Corinto 6:​9, 10.

Kinokondenar kan Biblia an pagigin materyalistiko na risang marhay sa panahon na ini. Tinotokdoan kita kaiyan kun paano popogolan an maimot na paghimuyawot paagi sa pagpapadanay na simple an satong mata, na nakapokus sa mas mahalagang mga bagay, an espirituwal na kayamanan. (Filipos 1:10) Ihinahayag kaiyan kun ano talaga an kahanaban​—pag-idolo sa sadiri. Mantang iinaaplikar niato an satong nanonodan sa Tataramon nin Dios, orog kitang nagigin maogma. An satong kaisipan minabalyo hale sa pag-ako pasiring sa pagtatao. Mapuersa nanggad na pan-enganyar na salidahan nin mga bagay na may espirituwal na halaga an pagpanigo sa sadiri!

Totoo, minsan paano, an kuarta nagseserbing sarong proteksion. (Eclesiastes 7:12) Alagad an Biblia realistikong nagsasabi: “An saimong kuarta puedeng mawara sa panale, na garo baga tinubuan iyan nin mga pakpak asin luminupad na siring sa agila.” (Talinhaga 23:​5, TEV) Dakulaon na an isinakripisyo kan mga tawo huli sa materyalismo​—salud, mga pamilya, sarong marahay na konsensia pa ngani—na nagkaigwa nin kapahapahamak na mga resulta. Sa ibong na lado, an pagkaigwa nin espirituwalidad pinapanigoan an pinakamahalaga niatong mga pangangaipo​—an pangangaipo na mamotan, an pangangaipo na magkaigwa nin katuyohan, asin an pangangaipong sumamba sa mamomoton na Dios, si Jehova. Itinotokdo man kaiyan an dalan sa buhay na daing katapusan sa pagkasangkap bilang tawo sa sarong paraisong daga​—an paglaom na itinatagama nin Dios para sa sato.

Dai na mahahaloy an hinihimuyawot kan katawohan na prosperidad biyo nang maootob sa bagong kinaban nin Dios. (Salmo 145:16) Sa panahon na iyan an bilog na daga ‘mapapano kan kaaraman dapit ki Jehova.’ (Isaias 11:9) An mga bagay na may espirituwal na halaga maoswag. An materyalismo asin an mga epekto kaiyan biyong hahaleon. (2 Pedro 3:13) Dangan an mga bagay na nagpapangyari sa buhay na magin kapakipakinabang na daing katapusan​—sangkap na salud, nakakakontentong trabaho, nakakarahay na libangan, mamomoton na relasyon sa pamilya, asin nagdadanay na pakikikatood sa Dios​—matao sa katawohan nin tunay na kaogmahan sagkod lamang.

[Kahon/Ritrato sa pahina 6]

Gamiton an Saindong Kuarta sa Madonong na Paagi!

Aramon an saindong mga pangangaipo. Tinokdoan kita ni Jesus na mamibi: “Itao mo samo an samong tinapay para sa aldaw na ini segun sa kaipuhan sa aldaw na ini.” (Lucas 11:3) Dai pagtogotan an saindong sadiri na mansayon an mga gusto nindo bilang mga bagay na dapat mapasaindo. Girumdomon na an saindong buhay dai minagikan sa nasasadirihan nindo.​—Lucas 12:16-21.

Gumibo nin badyet. Dai magpadara sa biglaan na pamamakal. An Biblia nagsasabi: “An mga plano kan mahigos seguradong nagbubunga nin bentaha, alagad an gabos na naghuhumari seguradong mapasiring sa pagkatikapo.” (Talinhaga 21:5) Sinadol ni Jesus an mga nagdadangog sa saiya na kuentahon an gastos bago ponan an ano man na pinansial na proyekto.​—Lucas 14:28-30.

Likayan an dai kinakaipuhan na utang. Sagkod na mapupuede, magtipon para sa mga babakalon imbes na utangon iyan. Arog kaini an pagkasabi kan talinhaga: “An nangutang surugoon kan tawo na nagpautang.” (Talinhaga 22:7) Paagi sa pagpopogol sa sadiri asin pagdanay sa kaya kan badyet nindo, puede ngani kamong magin mapanggana sa pagplanong mamakal nin darakulang bagay.

Likayan na may masayang. Ingatan an mga bagay na yaon na saindo tanganing mas haloy nindo iyan na magagamit, sa siring naiinaan an nasasayang. Ipinaheling ni Jesus an tamang pagmansay sa pag-ekonomiya sa mga bagay na ginamit nia.​—Juan 6:10-13.

Enoton an pinakamahalagang mga bagay. An madonong na tawo ‘tutuboson an panahon’ tanganing pag-aaboton an mas mahalagang mga pasohan.​—Efeso 5:​15, 16.

[Kahon/Ritrato sa pahina 7]

Pakanood Paagi sa Eksperyensia​—Igwa nin Mas Marahay na Paagi

An personal na eksperyensia​—magayon sagkod mamondo​—puedeng magtokdo sato nin mahalagang mga leksion. Alagad totoo daw na an eksperyensia an pinakamarahay na paratokdo, siring kan sabi nin sarong kasabihan? Bako, igwa nin nakakalabi sa gabos na gikanan nin paggiya. Minidbid iyan kan salmista kan sabihon nia sa pamibi: “An saimong tataramon ilawan sa sakong bitis, asin liwanag sa sakong dalan.”​—Salmo 119:105.

Taano an pakanood sa instruksion nin Dios ta orog nanggad karahay kisa personal na eksperyensia? An sarong dahelan iyo na an pakanood sana sa eksperyensia​—pagparaeksperimento​—puedeng magin magastos sagkod makolog sa boot. Dai man iyan kaipuhan. “O kun ika sana kutana totoong matao nin atension sa sakong mga togon!” an sabi nin Dios sa suanoy na Israel. “Dangan an saimong katoninongan magigin siring sa salog, asin an saimong katanosan siring sa mga alon kan dagat.”​—Isaias 48:18.

An sarong dahelan na nakakalabi sa iba an Tataramon nin Dios bilang gikanan nin instruksion iyo na igwa iyan kan kaguranggurangi asin pinakaeksaktong kasaysayan kan buhay nin tawo. Tibaad narerealisar nindo na mas marahay an daing kakologan na pakanood sa mga kapangganahan asin pagkasudya nin iba kisa personal nindong maeksperyensiahan an saindang mga sala. (1 Corinto 10:​6-​11) Mas mahalaga, sa Biblia, itinatao sato nin Dios an pinakanangongorog na mga ley asin naggigiyang mga prinsipyo na dai mapapantayan sa pagkamasasarigan. “An ley ni Jehova sangkap . . . An pagirumdom ni Jehova mapagtitiwalaan, na nagpapadonong sa daing eksperyensia.” (Salmo 19:7) Daing duwa-duwa, an pakanood sa kadonongan kan satong mamomoton na Kaglalang an nakakalabi sa gabos na paagi tanganing makanood.

[Mga Ritrato sa pahina 4]

Gusto kan kinaban na arogon nindo an materyalistikong estilo nin pamumuhay kaiyan

[Ritrato sa pahina 5]

Mas mahalaga kisa bulawan o pirak an kayamanan na manonompongan sa Biblia