Ano an Kaipuhan Tanganing Mapaogma Kamo?

AN MGA politiko na inelehir nin mga tawo nagmamaigot na marhay na mapaogma an mga tawong iyan. Total, an saindang mga trabaho nagdedepende dian. Alagad an sarong magasin nin mga bareta nagtataram dapit sa “disganado asin anggot na mga botante” sa Polandia. Ipinaliliwanag nin sarong peryodista na an Estados Unidos sarong sosyedad na “kadakoldakol nin dai nagtitiwala sa pormal na politika.” An saro pang parasurat nagsasabi sato manongod sa “naggagrabeng pagkaindiperente sa politika sa Pransia.” An siring kalakop na pagkaindiperente asin pagkadiskontento​—na bako sanang sa tolong nasyon na ini—​nagsusuherir na an mga politiko nasusudya sa saindang paghihingoa na mapaogma an mga tawo.

An mga poon nin relihiyon nanunuga man nin kaogmahan, kun bakong sa buhay na ini, kun siring minsan paano sa ngapit. Ibinabasar ninda ini sa pagpamugtak na an mga tawo igwa nin inmortal o nagbabalyong kalag, ideya na huli sa manlaenlaen na dahelan isinisikwal nin dakol na tawo asin na malinaw na pinahihimutikan kan Biblia. An daing laog na mga simbahan asin nag-iina na mga listahan nin miembro nagpapaheling na minilyon an dai na ibinibilang an relihiyon na mahalaga sa kaogmahan.​—Ikomparar an Genesis 2:​7, 17; Ezequiel 18:​4, 20.

Diskontentong mga Mamomoton sa Pirak

Kun bakong sa politika o sa relihiyon, saen manonompongan an kaogmahan? Tibaad sa kinaban nin komersio? Naghihingako man iyan na kayang makatao nin kaogmahan. Itinatao kaiyan an mga argumento na apabor dian paagi sa pag-anunsiar, na sinasabing malinaw na: An kaogmahan naggigikan sa pagkakaigwa kan gabos na materyal na bagay asin serbisyo na mababakal nin pirak.

An bilang nin mga tawo na naghahanap nin kaogmahan sa paaging ini garo baga nagdadakol. Ibinareta mga pirang taon na an nakaagi na an kada ikaduwang pamilya sa Alemania dakulaon an utang. Kaya bakong makangangalas na an maimpluwensiang diaryo sa Alemania na Die Zeit naghula na an “dakol [sa mga ini] nungka pang makahahawas sa utang.” Ipinaliwanag kaiyan: “Pasil na marhay na gumibo nin tsekeng sobra sa kuwarta mo sa bangko sagkod sa limiteng perming iinoopresir kan bangko​—asin depisilon na makabutas sa siod.”

Pareho man an situwasyon sa ibang nasyon na maoswag an industriya. Mga pirang taon na an nakaagi, kinarkulo ni David Caplovitz, sosyologo sa Unibersidad kan Siudad nin Nueva York, na sa Estados Unidos, sa pag-oltanan nin 20 milyones asin 25 milyones na pamilya an dakulaon an utang. “An mga tawo natatambonan nin utang,” sabi nia, “asin rinaraot kaiyan an saindang buhay.”

Bako nanggad arog kaiyan an kaogmahan! Alagad maninigo daw niatong laoman an kinaban nin komersio na magibo an malinaw na dai kayang gibohon kan duwa (an politika asin relihiyon)? An mayaman na si Hadeng Salomon nagsurat kaidto: “An mamomoton sa pirak dai makokontento sa pirak, ni makokontento man sa entrada an siisay man na mamomoton sa kayamanan. Ini man daing kamanungdanan.”​—Eclesiastes 5:10.

An paghanap nin kaogmahan sa materyal na mga rogaring nakaaagid sa pagtogdok nin kastilyo sa aire. Tibaad nakaoogma an pagtogdok kaiyan, alagad magkakaigwa kamo nin mga problema kun probaran nindong mamuhay dian.

Nakukua an Kaogmahan Pero Paano?

Inaapod ni apostol Pablo si Jehova na “maogmang Dios.” (1 Timoteo 1:11) Paagi sa paglalang sa mga tawo sa saiyang sadiring ladawan, an maogmang Dios tinawan man sinda nin kakayahan na magin maogma. (Genesis 1:26) Pero an saindang kaogmahan kinakaipuhan na depende sa saindang paglilingkod sa Dios, arog kan ipinaheling kan salmista: “Maogma an banwaan na an Dios iyo si Jehova!” (Salmo 144:​15b) Kun ano an kabale sa satuyang paglilingkod sa Dios asin kun paano an satuyang paglilingkod sa saiya naggigiya sa tunay na kaogmahan puwedeng masabotan nin mas marahay kun pag-olayan niato an pira sa 110 na lugar sa New World Translation kun saen minalataw an mga tataramon na “maogma” asin “kaogmahan.”

Pagmidbid sa Espirituwal na mga Pangangaipo

Si Jesu-Cristo, an Aki nin Dios, nagsabi sa saiyang bantog na Sermon sa Bukid: “Maogma idtong mga nakamamate kan saindang espirituwal na pangangaipo.” (Mateo 5:3) Pinoprobaran kan kinaban nin komersio na dayaon kita sa pag-isip na an pagbakal nin mga luho bastante na para sa kaogmahan. Sinasabi kaiyan sato na an kaogmahan iyo an pagkakaigwa nin komputer sa harong, video camera, telepono, kotse, pinakahuring gamit sa isport, usong gubing. An dai kaiyan sinasabi sato iyo na an manampulong milyon na tawo sa kinaban mayo kan mga bagay na ini alagad bako man na mamondo. Mantang posibleng ginigibo na mas komportable asin kombenyente an buhay, an mga bagay na ini bakong mahalaga sa kaogmahan.

Arog ni Pablo, an mga nakamamate kan saindang espirituwal na pangangaipo nagsasabi: “Kun igwa na nin kakanon asin gubing, manigoan na kita kan mga bagay na ini.” (1 Timoteo 6:8) Taano? Huli ta an pagpanigo sa espirituwal na mga pangangaipo iyo an minagiya pasiring sa buhay na daing sagkod.​—Juan 17:3.

Igwa daw nin sala sa pag-ogma sa mararahay na bagay kun kita igwa nin pirak na ibabakal kaiyan? Posibleng dai. Minsan siring, nagpaparigon sa satuyang espirituwalidad na manodan na dai panigoan an lambang kapritso o bumakal nin sarong bagay huli sana ta kaya niatong bumakal kaiyan. Sa siring nanonodan ta an pagkakontento asin napagdadanay an kaogmahan, arog kan ginibo ni Jesus, minsan ngani an saiyang kamugtakan sa ekonomiya bakong an pinakamarahay sono sa kinabanon na mga pamantayan. (Mateo 8:20) Asin si Pablo dai nagpapahayag nin pagkadaing kaogmahan kan sia sumurat: “Nakanood ako, sa ano man na kamugtakan, na manigoan sa ano man na yaon sa sako. Aram ko nanggad kun paano magkulang nin mga kinakaipuhan, aram ko nanggad kun paano magin abunda. Sa gabos na bagay asin sa gabos na kamugtakan nanodan ko an hilom nin pagigin basog asin nin pagigin gutom, kun paano magin abunda asin kun paano magkulang.”​—Filipos 4:11, 12.

Pagsarig ki Jehova

An pakamate sa espirituwal na pangangaipo nin saro nagpapaheling nin pagigin andam na manarig sa Dios. Ini an nagpapangyari sa kaogmahan, arog kan ipinaliwanag ni Hadeng Salomon: “Maogma sia na nananarig ki Jehova.”​—Talinhaga 16:20.

Alagad, bako daw totoo na an dakol na tawo nagbubugtak nin mas dakulang pananarig sa pirak asin mga rogaring kisa sa Dios? Sa punto-de-vistang ini, mayo na nin mas bakong angay na lugar na ipaheling an sarabihon na kun sa Bicol, “Sa Dios Kami Nananarig” kisa sa pirak, minsan ngani an ekspresyon na iyan naglalataw talaga sa pirak nin E.U.

Si Hadeng Salomon, na dai nagkulang sa mararahay na bagay na puwedeng bakalon nin pirak, nakaaram na an pananarig sa materyal na mga rogaring dai naggigiya sa nagdadanay na kaogmahan. (Eclesiastes 5:​12-15) Puwedeng mawara an pirak sa bangko paagi sa pagkapierde kan bangko o paagi sa implasyon. An mga pagsadiri puwedeng raoton kan makosog na mga bagyo. An mga kontrata sa seguro, mantang sinasalidahan an iba sa nawarang mga materyal, nungka pang ikababalik an emosyonal na kawaran. An mga aksiones asin bono puwedeng magin daing kamanungdanan sa laog nin saro sanang banggi sa biglang pagbagsak kan bakalan nin aksiones. Minsan an trabahong may halangkaw na suweldo puwedeng​—huli sa dakol na rason—​yaon digdi ngonyan asin mawara sa aga.

Huli sa mga dahelan na ini an nananarig ki Jehova naheheling an kadonongan nin paghinanyog sa patanid ni Jesus: “Ontok na kamo sa pagtipon nin mga kayamanan sa daga, na digdi an polilya asin takla nakararaot, asin igwa nin mga parahabon na nananalakat asin naghahabon. Kundi, magtipon kamo nin mga kayamanan sa langit, na duman an polilya ni takla dai nakararaot, asin an mga parahabon dai nananalakat asin dai naghahabon.”​—Mateo 6:​19, 20.

Igwa pa daw nin mas dakulang katiwasayan asin pakamate nin kaogmahan kisa pakaaram na ibinugtak nin saro an saiyang pananarig sa Makakamhan sa gabos na Dios, na perming nagtatao?​—Salmo 94:​14; Hebreo 13:​5, 6.

Pag-ako kan Pagsagwe nin Dios

An sadol, pati pagsagwe, inaako kun itinatao nin tunay na katood sa espiritu nin pagkamoot. An naghihingakong katood kan lingkod nin Dios na si Job may pangangatanosan sa sadiri na nagsabi kaidto saiya: “Maogma an tawo na sinasagwe nin Dios.” Minsan ngani totoo an sinabing iyan, an boot sabihon ni Elifaz sa mga tataramon na ini​—na si Job nagkasala nin grabeng kasalan—​bakong totoo. Kanigoan ‘kanakapariribok na pararanga’! Alagad kan dai nahaloy sinagwe ni Jehova si Job sa mamomoton na paagi, mapakumbabang inako ni Job an pagsagwe asin ibinugtak an saiyang sadiri sa dalan nin mas dakulang kaogmahan.​—Job 5:​17; 16:​2; 42:​6, 10-17.

Ngonyan, an Dios dai nagtataram nin direkta sa saiyang mga lingkod arog kan ginibo nia ki Job. Imbes, sinasagwe nia sinda paagi sa saiyang Tataramon asin sa saiyang organisasyon na ginigiyahan nin espiritu. Minsan siring, an mga Kristiano na naghahanap nin materyalistikong mga interes sa parate dai na nin panahon, kosog, ni kamawotan na mag-adal nin regular kan Biblia asin umatender sa gabos na pagtiripon na itinatao kan organisasyon ni Jehova.

An tawo na sinasagwe nin Dios, oyon sa Talinhaga 3:​11-18, minimidbid an kadonongan nin pag-ako sa siring na pagsagwe: “Maogma an tawo na nakanompong nin kadonongan, asin an tawo na nagkukua nin pakamansay, huli ta an pagkaigwa kaiyan bilang pakinabang mas marahay kisa pagkaigwa nin pirak bilang pakinabang asin an pagkaigwa kaiyan bilang bunga kisa bulawan mismo. Iyan orog na mahalaga kisa mga korales, asin an gabos na ibang kinawiwilihan mo dai ikababaing dian. An kahalawigan nin mga aldaw yaon sa toong kamot kaiyan; asin sa walang kamot kaiyan igwa nin mga kayamanan asin kamurawayan. An mga dalan kaiyan kawiliwiling mga dalan, asin an gabos na dana kaiyan katoninongan. Iyan kahoy nin buhay para sa mga nangangapot kaiyan, asin an mga marigon na nangangapot kaiyan aapodon na maogma.”

Pagigin Malinig Asin Mamomoton sa Katoninongan

Ilinadawan ni Jesus an maogmang mga tawo bilang “malinig sa puso” asin “matoninong.” (Mateo 5:​8, 9) Alagad sa kinaban na nandadagka nin materyalistikong pamumuhay, pasil na gayo para sa paslo, posibleng maati pa, na mga horot na tumubo sa satuyang puso! Kun dai magiyahan kan kadonongan nin Dios, pasil pa ngani para sa sato na madaya pasiring sa paghanap nin pinansial na kaginhawahan paagi sa kustionableng mga paagi na makararaot sa matoninong na mga relasyon sa iba! Bakong sa daing dahelan, an Biblia nagpapatanid: “An pagkamoot sa pirak gamot nin gabos na klase nin karatan, asin sa pag-aabot sa pagkamoot na ini an nagkapira nagkaralagalag sa pagtubod asin sinaksak an bilog nindang sadiri nin dakol na kakologan.”​—1 Timoteo 6:10.

An pagkamoot sa pirak nagpapalakop nin mahambog na punto-de-vista na nagpapatalubo nin pagkadiskontento, pagkadaing utang na boot, asin pagkamahanab. Tanganing maolang an pagtalubo kan siring na salang espiritu, an ibang Kristiano bago gumibo nin dakulang pinansial na mga desisyon hinahapot an saindang sadiri arog nin: Kaipuhan ko daw talaga iyan? Kaipuhan ko daw an mahal na barakalon na ini o ining halangkaw an suweldo, nakauubos nin panahon na trabaho kisa sa minilyon na ibang tawo na kaipuhan na mabuhay na mayo kaiyan? Puwede ko daw na gastoson sa mas marahay an sakuyang pirak o an sakuyang panahon sa pagpapahiwas kan sakong kabtang sa tunay na pagsamba, sa pagsuportar sa pambilog na kinaban na paghuhulit, o sa pagtabang sa mga tawong mas nasasakitan kisa sako?

Pagpapaheling nin Pakatagal

An saro sa mga pagbalo na napiritan na tagalan ni Job iyo an pagkawara nin kabuhayan. (Job 1:​14-17) Arog kan ipinaheheling kan saiyang halimbawa, an pakatagal kahagadan sa lambang kabtang nin buhay. An ibang Kristiano kaipuhan na tagalan an paglamag; an iba, an sugot; an iba pa, an bakong gayong marahay na mga kamugtakan sa ekonomiya. Pero an lambang klase nin pakatagal babalosan ni Jehova, arog kan isinurat kan Kristianong disipulo na si Santiago mapadapit ki Job: “Inaapod tang maogma idtong mga nakatagal.”​—Santiago 5:11.

An pagpabaya sa espirituwal na intereses tanganing mapakarhay an satuyang kamugtakan sa ekonomiya tibaad magdara nin temporaryong kaginhawahan sa ekonomiya, pero makatatabang daw iyan na mapagdanay na maliwanag an satong pananaw sa permanenteng kaginhawahan sa ekonomiya sa irarom kan Kahadean nin Dios? Iyan daw may pakinabang na pag-alasuwerte?​—2 Corinto 4:18.

Pakanompong nin Kaogmahan Ngonyan Asin Sagkod Lamang

An ibang tawo malinaw na kinokontra an punto-de-vista ni Jehova manongod sa kun ano an kaipuhan tanganing mapaogma an mga tawo. Sa pakalingaw sa mas mahalagang halawig na mga pakinabang, sinda dai nakaheheling nin tolos-tolos na personal na pakinabang sa paggibo kan isinasadol nin Dios. Dai ninda narerealisar na an pananarig sa materyal na mga bagay daing kamanungdanan asin naggigiya sa kabigoan. Tama an pagkakahapot kan parasurat sa Biblia: “Kun nagdadakol an marahay na mga bagay, nagdadakol man an mga nagkakakan kaiyan. Asin ano an pakinabang kan dakulang kagsadiri kaiyan, puwera sa pagheling dian kan saiyang mga mata?” (Eclesiastes 5:​11; helingon man an Eclesiastes 2:​4-11; 7:12.) Gurano kadaling mawara kan interes asin an mga bagay na hinona niatong kaipuhan na mapasatuya sa katapustapusi nakapapano na sana sa estante asin nagkokolekta nin alpog!

An tunay na Kristiano nungka na totogotan an saiyang sadiri na gipiton sa pakipapantay sa pagtaraed sa materyal na paagi. Aram nia na an tunay na pakinabang sinosokol, bakong sa kun ano igwa an saro, kundi sa kun ano an saro. Mayo nin pagduda sa saiyang isip manongod sa kun ano an kaipuhan tanganing mapaogma an saro​—tunay na maogma: an pagkakamit nin marahay na relasyon ki Jehova asin pagdadanay na sibot sa paglilingkod sa Saiya.

[Ritrato sa pahina 20]

An materyal na mga bagay sana nungka na makatatao nin nagdadanay na kaogmahan

[Ritrato sa pahina 22]

An Biblia nagsasabi: “Maogma idtong mga nakamamate kan saindang espirituwal na pangangaipo”