Puede Nindong Mapaglabanan an Panluluya nin Boot!

SARONG beses sinabi nin sarong madonong na tawo: “Ika daw nanluya an boot sa aldaw nin kasakitan? An saimong kosog magigin kadikit.” (Talinhaga 24:10) Kun naeksperyensiahan na nindong manluya an boot, tibaad mag-oyon kamo sa mga tataramon na iyan.

Mayo nin nakakalibre sa mga epekto nin panluluya nin boot. An pag-atake nin kadikit na panluluya nin boot tibaad maglawig nin saro o duwang aldaw dangan mawara na. Alagad kun kalabot an kolog sa boot o paghinanakit, an problema tibaad magdanay nin mas halawig. An nagkapirang Kristiano na nagin fiel sa dakol na taon pinanluyahan na marhay nin boot kaya puminondo pa ngani sinda sa pag-atender sa mga pagtiripon kan kongregasyon asin sa pakikikabtang sa ministeryo sa langtad.

Kun kamo pinanluluyahan nin boot, magpakapusoan kamo! An fiel na mga lingkod kan suanoy na panahon mapangganang napaglabanan an panluluya nin boot, asin sa tabang nin Dios, iyo man kamo.

Kun Kinolgan nin Iba an Saindong Boot

Dai nindo puedeng laoman na kamo protektado sa gabos na daing konsiderasyon na tataramon o dai iniisip na gibo. Minsan siring, puede nindong dai pagtogotan an mga pagkabakong sangkap nin iba na makaolang sa saindong paglilingkod ki Jehova. Kun may nakakolog sa saindong boot, tibaad makatabang sa saindo an paghorophorop sa kun paano inatubang ni Ana, an ina ni Samuel, an sarong nakapanluluya sa boot na situwasyon.

Gustohon ni Ana na magkaigwa nin mga aki, alagad sia baog. An panduwang agom na babae kan saiyang agom, si Penina, nagkaigwa na nin mga aking lalaki asin babae sa saiyang agom. Imbes na magin sensitibo sa mamondong kamugtakan ni Ana, minansay sia ni Penina bilang sarong karibal asin ipinaheling an siring na aktitud sa saiya kaya si Ana “naghihibi asin dai nagkakakan.”​—1 Samuel 1:​2, 4-7.

Sarong aldaw si Ana nagduman sa tabernakulo tanganing mamibi. Si Eli, an halangkaw na saserdote nin Israel, napagmasdan na naghihiro an saiyang ngabil. Dai aram na namimibi si Ana, si Eli nagkonklusyon na sia burat. “Sagkod noarin ka magaweng burat?” an hapot nia. “Halea an arak sa saimo.” (1 Samuel 1:​12-​14) Maiimahinar daw nindo kun ano an siertong namatean ni Ana? Sia nagduman sa tabernakulo tanganing makanompong nin pamparigon sa boot. Dai nia nanggad linalaoman na sahotan sia nin bakong tama kan saro sa pinakamaimpluwensiang tawo sa Israel!

An situwasyon na ini puedeng makapanluyang marhay sa boot ni Ana. Puede kutana niang basta na sana bayaan an tabernakulo, na isinusumpa na nungka nang bumalik sagkod na si Eli naglilingkod bilang halangkaw na saserdote duman. Minsan siring, malinaw na pinahalagahan ni Ana an saiyang relasyon ki Jehova. Aram nia na si Jehova dai maoogma kun gibohon nia an siring. An tabernakulo iyo an sentro nin dalisay na pagsamba. Ibinugtak ni Jehova an saiyang ngaran duman. Asin dawa sia bakong sangkap, si Eli an piniling representante ni Jehova.

An diosnon na simbag ni Ana sa sahot ni Eli nagtatao nin marahayon na halimbawa para sa sato ngonyan. Dai nia tinogotan na sia sahotan nin bakong tama, alagad sia nagsimbag sa magalang na marhay na paagi. “Bako, kagurangnan ko!” an simbag nia. “Ako sarong babaeng nagsasakit an espiritu; asin dai ako nag-inom nin arak asin inomon na nakabuburat, kundi ipinahahayag ko nin biyo an sakuyang kalag sa atubangan ni Jehova. Dai mo paggibohon na siring sa daing kamanungdanan na babae an saimong oripon na babae, huli ta sa kadakolan kan sakong kapurisawan asin pagkauyam na ako nagtataram sagkod ngonyan.”​—1 Samuel 1:​15, 16.

Ikinadoon daw ni Ana an gusto niang sabihon? Iyo nanggad. Pero, sia mataktikang nagtaram ki Eli, na dai nangangahas na tatsaran sia huli sa saiyang bakong totoong sahot. Dangan sia nagsimbag sa maboot na paagi sa saiya, na nagsasabi: “Lakaw sa katoninongan, asin itao logod kan Dios nin Israel an saimong pakimaherak na hinagad mo sa saiya.” Kan mahusay na an bagay-bagay, si Ana “nagpadagos sa saiyang paglakaw asin nagkakan, asin an saiyang lalauogon bako nang hadit sa sadiring kamugtakan.”​—1 Samuel 1:​17, 18.

Ano an manonodan niato sa pagkasaysay na ini? Si Ana naghiro tolos tanganing husayon an dai pagkasinabotan, alagad ginibo nia iyan na may hararom na paggalang. Bilang resulta, naingatan nia an sarong marahay na relasyon ki Jehova asin ki Eli. Parate nanggad na an marahay na komunikasyon asin kadikit sanang pagkamataktika puedeng olangon na dumakula an saradit na problema!

Dapat na rekonoseron na an paghusay nin mga dai pagkaintindihan sa iba nangangaipo nin kapakumbabaan asin nin pagkamapagpahunod sa mag-ibong na lado. Kun an sarong kapagtubod dai maghimate sa saindong mga paghihingoa na resolberan an dai pagkaintindihan, tibaad kaipuhan nindong ipabaya sa kamot ni Jehova an bagay, na nagtitiwala na aasikasohon nia iyan sa sadiri niang panahon asin sa sadiri niang paagi.

Nawaran daw Kamo nin Pribilehio sa Paglilingkod?

May nagkapira na namondo nin makuri huli ta kinaipuhan nindang butasan an sarong mahal na pribilehio sa paglilingkod sa Dios. Ikinaogma ninda an paglilingkod sa saindang mga tugang, asin kan mawara an pribilehio, nagsasaboot sinda na bako na sindang kapakipakinabang ki Jehova o sa saiyang organisasyon. Kun arog kaiyan an saboot nindo, tibaad makakua kamo nin pakarorop paagi sa pag-estudyar kan halimbawa kan kagsurat nin Biblia na si Marcos, na inaapod man na Juan Marcos.​—Gibo 12:12.

Inibanan ni Marcos si Pablo asin Bernabe sa saindang enot na pagbiahe sa pagmimisyonero, alagad sa sarong kabtang kan biahe, binayaan nia sinda asin nagbalik sa Jerusalem. (Gibo 13:13) Kan huri, gusto ni Bernabe na iiba ninda si Marcos sa saro pang biahe. Minsan siring, an Biblia nagsasabi: “Si Pablo naghona na bakong marahay na ipag-iba an sarong ini, mantang sia buminulag sa sainda sa Pamfilia asin dai uminiba sa sainda sa gibohon.” Dai nag-oyon si Bernabe. “Dangan,” an sabi pa kan pagkasaysay, “nangyari an matarom na pagputok nin kaanggotan, kaya [si Pablo asin Bernabe] nagbulag; asin ipinag-iba ni Bernabe si Marcos asin sinda nagsakay pa-Chipre. Pinili ni Pablo si Silas asin naghale.”​—Gibo 15:​36-40.

Si Marcos seguradong nanluyang marhay an boot kan maaraman na an iginagalang na si apostol Pablo habo siang makaibanan asin na an pagpasuruhay manongod sa saiyang mga kualipikasyon nagbunga nin pagkarayo ni Pablo asin Bernabe. Alagad dai dian natapos an estorya.

Kaipuhan pa giraray ni Pablo asin Silas nin kaibaiba sa pagbiahe. Kan makaabot sinda sa Listra, nakanompong sinda nin ikakasangli ki Marcos, an hoben na lalaking si Timoteo. Ngonyan si Timoteo tibaad duwa o tolong taon pa sanang bautisado kan panahon na pilion sia. Sa ibong na lado, si Marcos asosyado sa Kristianong kongregasyon poon kan kapinonan kaiyan​—sa katunayan, mas halawig pa kisa ki Pablo mismo. Pero, si Timoteo an nag-ako kan pribilehiadong asignasyon.​—Gibo 16:​1-3.

Ano an reaksion ni Marcos kan maaraman nia na sinalidahan sia nin sarong mas hoben, mas kadikit an eksperyensia na lalaki? Dai iyan sinasabi kan Biblia. Minsan siring, ipinaririsa nanggad kaiyan na si Marcos nagdanay na aktibo sa paglilingkod ki Jehova. Inaprobetsaran nia an mga pribilehio na makukua nia. Minsan ngani dai nakapaglingkod kaiba ni Pablo asin Silas, sia nakabiahe kaiba ni Bernabe pasiring sa Chipre, na propiong teritoryo ni Bernabe. Naglingkod man si Marcos kaiba ni Pedro sa Babilonya. Sa kahurihurihi, talagang nagkaoportunidad sia na makaibanan si Pablo sa gibohon​—asin si Timoteo​—sa Roma. (Colosas 1:​1; 4:​10; 1 Pedro 5:13) Kan huri si Marcos pinasabngan pa ngani na isurat an saro sa apat na Ebanghelyo!

Igwa nin mahalagang leksion sa gabos na ini. Si Marcos dai naghadit na marhay manongod sa nawarang pribilehio na huli kaini mawara an saiyang pag-apresyar sa mga pribilehio na kaya nia pang aboton. Si Marcos nagpadagos na sibot sa paglilingkod ki Jehova, asin binendisyonan sia ni Jehova.

Kaya kun kamo nawaran nin pribilehio, dai manluya an boot. Kun papagdadanayon nindo an positibong aktitud asin magdanay na sibot, an ibang pribilehio puedeng mapasaindo. Dakol an gigibohon sa gibohon kan Kagurangnan.​—1 Corinto 15:58.

Nanluya an Boot kan Sarong Fiel na Lingkod

Bakong pasil na makipaglaban nin maigot para sa pagtubod. Kun beses, tibaad manluya an boot nindo. Dangan tibaad makamate pa ngani kamo nin kasalan huli sa panluluya nin boot, na nagkokonklusyon na an fiel na lingkod nin Dios maninigo na nungkang makamate nin arog kaiyan. Isipon an manongod ki Elias, saro sa bantog na mga propeta sa Israel.

Kan maaraman ni Reyna Jezabel nin Israel, sarong panatikong parasuportar sa pagsamba ki Baal, na ginadan ni Elias an mga propeta ni Baal, suminumpa siang ipagadan si Elias. Si Elias napaatubang na sa mga kaiwal na mas grabe pa kisa ki Jezabel, alagad bigla na sanang nanluyang marhay an boot nia kaya gusto na niang magadan. (1 Hade 19:​1-4) Paano iyan nangyari? May nalingawan sia.

Nalingawan ni Elias na umasa ki Jehova bilang Gikanan kan saiyang kosog. Siisay an nagtao ki Elias nin kapangyarihan na ibangon an mga gadan asin atubangon an mga propeta ni Baal? Si Jehova. Tunay nanggad, kayang itao ni Jehova sa saiya an kosog tanganing atubangon an grabeng kaanggotan ni Reyna Jezabel.​—1 Hade 17:​17-​24; 18:​21-​40; 2 Corinto 4:7.

Dawa siisay puedeng mag-urong-sulong sa kadikit na panahon sa saiyang pagtitiwala ki Jehova. Arog ki Elias, may beses na tibaad mansayon nindo sa punto de vista nin tawo an sarong problema imbes na gamiton “an kadonongan hale sa itaas” sa pag-atubang kaiyan. (Santiago 3:17) Minsan siring, dai binayaan ni Jehova si Elias huli sa temporaryong pagluyang ini.

Si Elias nagdulag pasiring sa Beer-seba dangan nagpasiring sa kaawagan, na duman inisip nia na mayo nin makakanompong sa saiya. Alagad nanompongan sia ni Jehova. Nagsugo sia nin anghel tanganing rangahon sia. Sinegurado kan anghel na si Elias igwang makakakan na tinapay na bagong luto sa horno asin nakarerepreskong tubig na maiinom. Pakapahingalo ni Elias, sinabihan sia kan anghel na magbaklay nin mga 300 kilometros pasiring sa Bukid nin Horeb, na duman pakokosogon pa sia ni Jehova.​—1 Hade 19:​5-8.

Sa Bukid nin Horeb, naheling ni Elias an nakapakokosog sa pagtubod na patunay kan kapangyarihan ni Jehova. Dangan, sa kalmado, maluyang boses, sinierto sa saiya ni Jehova na dai sia nagsosolo. Si Jehova nasa kaibahan nia, asin an 7,000 kan saiyang mga tugang nasa kaibahan man nia, dawa ngani dai aram ni Elias. Sa katapustapusi, tinawan sia ni Jehova nin gibohon. Dai nia isinikwal si Elias bilang saiyang propeta!​—1 Hade 19:​11-18.

May Makukuang Tabang

Kun kamo paminsanminsan inaatake nin kadikit na panluluya nin boot, tibaad magrahay an saindong pagmate kun kamo magkaigwa nin dagdag na pahingalo o masustansiang kakanon. Si Nathan H. Knorr, na naglingkod bilang miembro kan Namamahalang Grupo kan Mga Saksi ni Jehova sagkod na sia magadan kaidtong 1977, sarong beses nagsabi na an dakulang mga problema sa parate minaluwas na mas sadit pakatapos na magkaigwa nin igong torog sa banggi. Minsan siring, kun an problema mas naghahaloy, tibaad bakong igo an siring na remedyo​—kakaipuhanon nindo nin tabang na labanan an panluluya nin boot.

Si Jehova nagsugo nin anghel tanganing pakosogon si Elias. Ngonyan, an Dios nagtatao nin pamparigon sa boot paagi sa kamagurangan asin iba pang maygurang na mga Kristiano. An kamagurangan puede nanggad na “magin siring sa pailihan sa doros.” (Isaias 32:​1, 2) Alagad tanganing makakua nin pamparigon nin boot hale sa sainda, tibaad kaipuhan nindong gumibo nin inisyatiba. Baga man nanluluya an boot ni Elias, sia nagbaklay pasiring sa Bukid nin Horeb tanganing mag-ako nin instruksion hale ki Jehova. Kita nag-aako nin nakapakokosog na instruksion paagi sa Kristianong kongregasyon.

Kun inaako niato an tabang asin makosog an boot na inaatubang an mga pagbalo, arog nin kolog sa boot o pagkawara nin mga pribilehio, sinusuportaran ta an lado ni Jehova sa mahalagang isyu. Anong isyu? Si Satanas nakidiskutir na an mga tawo naglilingkod sana ki Jehova huli sa sadiring interes. Dai irinirirong ni Satanas na paglilingkodan ta an Dios kun marahay an dalagan kan satong buhay, alagad sia nakikidiskutir na kita maontok sa paglilingkod sa Dios kun kita magkaproblema. (Job, kapitulo 1 asin 2) Paagi sa marigon na pagpapadagos sa paglilingkod ki Jehova sa ibong nin panluluya nin boot, makatatabang kita sa pagtao nin simbag sa mapagbalobaging akusasyon kan Diablo.​—Talinhaga 27:11.

Si Ana, Marcos, asin Elias gabos nagkaigwa nin mga problema na sa halipot na panahon hinale sa sainda an saindang kagayagayahan. Minsan siring, napaglabanan ninda an saindang mga problema asin nagkaigwa nin mabungang pamumuhay. Sa tabang ni Jehova, mapaglalabanan man nindo an panluluya nin boot!