An Paglakaw sa mga Dana ni Jehova Nagtatao nin Abundang Balos
NAPROBARAN na daw nindong magbaklay sa kabukidan? Kun iyo, posibleng marhay na namatean nindo na kamo garo nasa bubongan kan kinaban. Kanigoan kanakaoogmang marhay na maghangos nin preskong aire, magtanaw sa harayo, mawili sa natural na kagayonan! Tibaad an mga kahaditan sa harong garo baga bako nang gayong importante.
Para sa kadaklan na tawo an siring na mga pagpasyar bihira, alagad kun kamo sarong nagdusay na Kristiano, tibaad kamo harohalawig nang naglalakaw sa kabukidan—sa espirituwal na sentido. Siring kan salmista kan suanoy, daing duwa-duwa na kamo namibi: “Paaraman sa sako an saimong mga dalan, O Jehova; tokdoi ako kan saimong mga dana.” (Salmo 25:4) Nagigirumdoman daw nindo an namatean nindo kan kamo enot na tumukad sa bukid kan harong ni Jehova asin nagpoon na lumakaw sa mga kalangkawan? (Miqueas 4:2; Habacuc 3:19) Daing duwa-duwa, biyong naaraman tolos nindo na an paglakaw sa halangkaw na mga danang ini nin dalisay na pagsamba nagtao sa saindo nin proteksion asin kagayagayahan. Naeksperyensiahan nindo an mga saboot kan salmista: “Maogma an banwaan na tataong magkurahaw sa kagayagayahan. O Jehova, sa liwanag kan saimong lalauogon padagos sindang nagraralakaw.”—Salmo 89:15.
Pero kun minsan, kaipuhan na pangganahan kan mga parabaklay sa kabukidan an haralawig, tugdok na mga bakilid. An saindang mga tabay nagpopoon na magkolog, asin sinda kinakapoy. Kita man puedeng makaeksperyensia nin mga kadepisilan sa satong paglilingkod sa Dios. Kasuarin pa sana, tibaad medyo magabat an satong mga lakad. Paano niato mababawi an satong bagsik asin an satong kagayagayahan? An sarong enot na lakdang iyo na rekonoseron an supremasiya kan mga dalan ni Jehova.
An Halangkaw na mga Ley ni Jehova
An mga dalan ni Jehova ‘mas halangkaw kisa mga dalan nin tawo,’ asin an pagsamba sa saiya ‘marigon na napatindog nin halangkaw pa sa alitoktok kan mga bukid asin ilinangkaw nin mas halangkaw pa sa mga bulod.’ (Isaias 55:9; Miqueas 4:1) An kadonongan ni Jehova iyo “an kadonongan hale sa itaas.” (Santiago 3:17) An saiyang mga ley nakalalabi sa gabos na iba pa. Halimbawa, kan panahon na ginigibo kan mga Cananeo an maringis na pag-atang nin aki, si Jehova nagtao nin mga ley sa mga Israelita na halangkaw an moral asin risang marhay an pagkaludok. Sinabihan nia sinda: “Dai mo pagtrataron na may pagpaorog an dukha, asin dai mo ipaorog an pagkatawo kan mapangyari. . . . An nakikihimanwa . . . maninigong ibilang nindo na propiong taga dian sa saindo; asin kamotan mo sia nin siring sa saimo man sana.”—Levitico 19:15, 34.
Pakalihis nin kaglimang siglo, si Jesus nagtao nin dugang pang mga halimbawa kan ‘mamuraway na ley’ ni Jehova. (Isaias 42:21) Sa Sermon sa Bukid, sinabi nia sa saiyang mga disipulo: “Padagos na kamotan an saindong mga enemigo asin ipamibi idtong mga naglalamag sa saindo; tanganing mapatunayan nindo na kamo mga aki kan saindong Ama na nasa kalangitan.” (Mateo 5:44, 45) “Kun siring, an gabos na boot nindong gibohon sa saindo nin mga tawo, gibohon man nindo sa sainda,” an idinugang nia. “Sa katotoohan, iyo ini an boot sabihon kan Ley asin kan Mga Propeta.”—Mateo 7:12.
An halangkaw na mga ley na ini may epekto sa puso kan mga tawong naghihimate, na nagmomotibar sa sainda na arogon an Dios na saindang sinasamba. (Efeso 5:1; 1 Tesalonica 2:13) Isip-isipa an pagkaliwat na nangyari ki Pablo. Kan enot na lumataw an saiyang ngaran sa Biblia, sia “oyon sa paggadan” ki Esteban asin tinatratar “nin madahas an kongregasyon.” Pakalihis sana nin pirang taon, tinatratar na nia na may kabootan an mga Kristiano sa Tesalonica na siring sa ‘nagpapasusong ina na nagmamahal sa saiyang mga aki.’ Si Pablo liniwat kan pagtotokdo nin Dios hale sa pagigin sarong paralamag pasiring sa sarong may pagmakolog na Kristiano. (Gibo 8:1, 3; 1 Tesalonica 2:7) Sia nagpapasalamat nanggad na an saiyang personalidad naimpluwensiahan kan katokdoan ni Cristo. (1 Timoteo 1:12, 13) Paano an kaagid na pag-apresyar makatatabang sa sato na padagos na maglakaw sa halangkaw na mga dana nin Dios?
Paglakaw na May Pag-apresyar
Ikinaoogmang marhay kan mga parabaklay an pambihirang mga tanawon sa kabukidan. Nanonodan man nindang malinga sa saradit na bagay sa inaagihan ninda, siring sa sarong pambihirang dakulang gapo, magayon na burak, o pagsiklap sa sarong layas na hayop. Sa espirituwal na paagi, kaipuhan na kita magin marigmat sa mga balos—dakula asin sadit—na nakukua sa paglakaw sa kaibahan nin Dios. An pakamansay na ini puedeng magtao nin puersa sa satong lakad asin gibohon na nagpapabagsik na paglakaw an nakapapagal na pagbaklay. Aarogon niato an mga tataramon ni David: “Sa aga padangogan sa sako an saimong mamomoton na kabootan, huli ta sa saimo ibinugtak ko an sakong pagtitiwala. Paaraman sa sako an dalan na maninigo kong lakawan.”—Salmo 143:8.
Si Mary, na dakol na taon nang naglalakaw sa mga dana ni Jehova, nagsasabi: “Kun pinagmamasdan ko an linalang ni Jehova, naheheling ko bako sana an komplikadong disenyo kundi an mamomoton na personalidad nin Dios. Baga man iyan sarong hayop, gamgam, o insekto, an balang saro may kanya-kanyang mga kalaenan, pano nin pan-akit. An siring man sanang kaogmahan nakakamtan paagi sa espirituwal na mga katotoohan na orog na nagigin malinaw sa pag-agi nin mga taon.”
Paano niato maparararom an satong pag-apresyar? Sa sarong kabtang, paagi sa dai pagbaliwala kan ginigibo ni Jehova para sa sato. “Mamibi nin daing ontok,” an isinurat ni Pablo. “Magpasalamat kamo para sa gabos na bagay.”—1 Tesalonica 5:17, 18; Salmo 119:62.
An personal na pag-adal nakakokontribwir sa espiritu nin pagkamapagpasalamat. Sinadol ni Pablo an mga Kristiano sa Colosas: “Padagos kamong maglakaw na kasaro [ni Cristo Jesus], . . . na nagsosopay sa pagtubod na may pagpasalamat.” (Colosas 2:6, 7) An pagbasa kan Biblia asin paghorophorop sa satong binabasa nagpapakosog sa satong pagtubod asin orog kitang irinarani sa Autor kan Biblia. Yaon sa enterong pahina kaiyan an mga kayamanan na puedeng dumagka sa sato na ‘magsopay sa pagpasalamat.’
An paglilingkod ki Jehova kaabay kan satong mga tugang pinangyayari man na magin mas pasil an dalan. An salmista nagsabi dapit sa saiya man sana: “Kaibaiba ako kan gabos na natatakot sa saimo.” (Salmo 119:63) An nagkapira sa satong pinakamaogmang mga oras ginagamit sa Kristianong mga asamblea o sa ibang okasyon na kaiba an satong mga tugang. Rinerekonoser niato na an satong mahal na marhay na pambilog na kinaban na Kristianong pamilya nag-eeksister huli ki Jehova asin sa saiyang halangkaw na mga dana.—Salmo 144:15b.
Apuera sa pag-apresyar, an pakamate nin paninimbagan pakokosogon kita na padagos na umabante sa halangkaw na mga dana ni Jehova.
Paglakaw na May Pakamate nin Paninimbagan
Rinerekonoser kan mga parabaklay na may pakamate nin paninimbagan an pangangaipo na magin maingat sa paglakaw tanganing dai sinda mawara o malagalag parani sa tugdok na mga kantil. Bilang mga libre ahente moral, tinatawan kita ni Jehova nin relatibong sokol nin katalingkasan asin inisyatiba. Alagad an siring na katalingkasan naghahagad nin pakamate nin paninimbagan mantang inootob niato an satong Kristianong mga obligasyon.
Halimbawa, si Jehova nagtitiwala na ootobon kan saiyang mga lingkod an saindang mga obligasyon na may pakamate nin paninimbagan. Dai nia sinasabi kun guranong kosog asin panahon an maninigo niatong gamiton sa Kristianong mga aktibidad o kun gurano an maninigo niatong ikontribwir sa pinansial o sa iba pang paagi. Imbes, an mga tataramon ni Pablo sa mga taga Corinto minaaplikar sa sato gabos: “Gumibo an lambang saro nin oyon sa napagdesisyonan nia sa saiyang puso.”—2 Corinto 9:7; Hebreo 13:15, 16.
Kaiba sa responsableng Kristianong pagtatao an paghiras kan maogmang bareta sa iba. Ipinaheheling man niato na kita responsable paagi sa pagkontribwir sa pambilog na kinaban na gibong pan-Kahadean. Si Gerhardt, sarong magurang sa kongregasyon, nagpaliwanag na dinagdagan ninda mag-agom an saindang mga kontribusyon nin awad-awad pakatapos na makaatender sa sarong asamblea sa Europa Oriental. “Naheling niamo na an satong mga tugang duman tikapong marhay sa materyal; pero inaapresyar na marhay ninda an satong mga babasahon sa Biblia,” an sabi nia, “kaya nagdesisyon kami na gusto niamong magtao nin mas dakol na suporta sagkod sa kaya niamong ikatao sa satong daing sukat na mga tugang sa ibang kadagaan.”
Pagdugang sa Satong Pakatagal
An paglakaw sa kabukidan naghahagad nin kosog na makaagwanta. An mga parabaklay nag-eehersisyo basta magkapanahon sinda, asin an dakol naglalakaw nin haralipot na distansia tanganing andamon an saindang sadiri sa haralawig na pagbaklay. Kaagid kaiyan, irinekomendar ni Pablo na padagos kitang magin sibot sa teokratikong mga aktibidad tangani na mapagdanay niato an satong marahay na kamugtakan sa espirituwal. An mga gustong “maglakaw na angay ki Jehova” asin magin ‘makosog,’ an sabi ni Pablo, maninigong “padagos na namumunga sa lambang marahay na gibo.”—Colosas 1:10, 11.
An motibasyon may epekto sa pakatagal nin sarong parabaklay. Paano? An pagdadanay na nakapokus sa sarong malinaw na obheto, siring sa sarong harayong bukid, igwa nin nakaaanimar na epekto. Asin kun an parabaklay makaabot sa tinandaanan na mga lugar sa mga pag-oltanan, masosokol nia an saiyang pag-abante pasiring sa saiyang pinakapasohan. Mantang sinasalingoy nia an nabaklay nang distansia, nakakamate sia nin satispaksion.
Kaagid kaiyan, an satong paglaom na buhay na daing katapusan nagsusustenir asin nagtutulod sa sato. (Roma 12:12) Mientras tanto, mantang kita naglalakaw sa mga dalan ni Jehova, nanonompongan ta na kita may nagibo sa pagbugtak dangan pag-abot sa Kristianong mga pasohan. Asin kanigoan na kagayagayahan an satong namamatean kun sinasalingoy niato an dakol na taon nin fiel na paglilingkod o naheheling an nagibo niatong mga pagbabago sa satong personalidad!—Salmo 16:11.
Tanganing harayo an aboton asin dai tolos maubosan nin kosog, an mga parabaklay naghihiro sa dagos-dagos na rikas. Kaagid kaiyan, an sarong marahay na rutina na kaiba an regular na mga pagtiripon asin paglilingkod sa langtad mapangyari sa sato na humiro nin konsentrado pasiring sa satong pasohan. Sa siring, si Pablo nag-enkaminar sa mga kapwa Kristiano: “Magpadagos kitang maglakaw na husay sa iyo man sanang pinagkatodan na ini.”—Filipos 3:16.
Siempre, dai kita naglalakaw nin solo sa mga dana ni Jehova. “Konsideraron niato kun paano niato mapahihiro an lambang saro sa pagkamoot asin marahay na mga gibo,” an isinurat ni Pablo. (Hebreo 10:24, New International Version) An marahay na espirituwal na asosasyon gigibohon na mas pasil na papagdanayon an rikas mantang kita naglalakaw kaiba kan mga kapagtubod.—Talinhaga 13:20.
Sa katapustapusi, asin pinakaimportante, dapat na nungka niatong lingawan an puersa na itinatao ni Jehova. An mga an kosog nasa ki Jehova “maglalakaw . . . sa sunod-sunod na kosog nin buhay.” (Salmo 84:5, 7) Minsan ngani kun beses kaipuhan niatong bagtason an masakit na mga agihan, sa tabang ni Jehova makakaya niato iyan.