Bareta kan mga Parabalangibog kan Kahadean

An Sarong Programa sa Telebisyon Nagmotibar sa Saiya na Pamurawayon an Dios

AN APOSTOL na si Pablo nagsabi na “may mga naghuhulit kan Cristo sa pagkauri asin pagriribal, alagad an iba man sa marahay na boot.” (Filipos 1:15) May beses na maski idtong mga nagpoprobar na pakaraoton an banwaan ni Jehova dai tinutuyong nagpangyari sa mga may tamang kamugtakan nin puso na maakit sa katotoohan.

Kan Nobyembre 1998, sarong programa manongod sa aktuwal na mga pangyayari na nagtatampok kan mga retrato kan Bethel, an mga pasilidad kan sangang opisina nin Mga Saksi ni Jehova sa Louviers, Pransia, an nagluwas sa nasyonal na telebisyon sa Pransia. Sa ibong kan manlaenlaen na reaksion na inako kaiyan, an programa nagbunga nin positibong mga resulta sa dai linalaoman na mga paagi.

Kabilang sa mga nagdalan kan programa iyo si Anna-Paula, na nag-iistar mga 60 kilometros sana hale sa Bethel. Si Anna-Paula, na sarong diborsiadang ina na may duwang aki, naghahanap nin trabaho. Kaya pagkaaga, nag-apod sia sa Bethel tanganing makihumapot kun may makukua siang trabaho duman. “Nagkaigwa ako kan impresyon na iyan sarong marahay na lugar asin na an trabahong ginigibo dian kapakipakinabang,” an sabi nia. Nagngalas siang marhay na maaraman na an gabos na naglilingkod sa Bethel mga ministro na nagboboluntaryo kan saindang panahon! Pagkatapos nin halipot na pag-orolay mapadapit sa mga aktibidad kan Mga Saksi ni Jehova, sia uminoyon na dalawon sia nin Saksi.

Kan si Léna, sarong bilog na panahon na ministro sa lokal na kongregasyon, dumalaw, nagkaigwa nin halawig na pag-orolay, asin inako ni Anna-Paula an librong Kaaraman na Minagiya Pasiring sa Buhay na Daing Katapusan.a Kan suminunod na pagsongko, nabasa na ni Anna-Paula an bilog na libro asin nagkaigwa sia nin kadakoldakol na hapot. Tolos niang inako an pag-adal sa Biblia. Sinabi ni Anna-Paula: “Para sa sako, idto oportunidad na aramon an Tataramon nin Dios. Dai pa ako nakakapot nin Biblia kaidto.”

Pag-abot nin Enero, nagbisita si Anna-Paula sa Bethel, asin kan suminunod na semana sia nag-atender sa enot niang pagtiripon Kristiano. Dai nahaloy pagkatapos kaiyan, pinonan niang adalan sa Biblia an saiyang mga aki asin magpatotoo sa saiyang mga katood. “Dai ko kayang sadirihon na sana an sakuyang nanonodan,” an sabi nia. “Gusto kong ipaabot an mga katotoohan kan Biblia sa mga tawo asin rangahon sinda.” Pagkatapos nin maigot na paghihingoang mapangganahan an nagkapirang personal na problema, si Anna-Paula nagpoon nang mag-atender sa mga pagtiripon nin regular. Sia marikas na uminoswag asin nabautismohan kan Mayo 5, 2002.

Dugang pa, bilang resulta kan marahay na halimbawa asin maigot na paghuhulit ni Anna-Paula, an saiyang ina nagpoon na mag-adal kan Biblia asin dai nahaloy nabautismohan. “Dai kayang ipahayag nin mga tataramon an kagayagayahan na namamatean ko,” an sabi ni Anna-Paula. “Pinasasalamatan ko si Jehova aroaldaw huli ta sia nagin kabtang kan sakong buhay asin huli sa gabos na bendisyon na itinao nia sa sako.”

[Nota sa Ibaba]

[Mga Ritrato sa pahina 8]

Sa itaas: Si Anna-Paula

Sa ibaba: Entrada kan sangang opisina sa Pransia