Taano ta Depisil na Magin Mapakumbaba?
PARA sa dakol, an kapakumbabaan tibaad garo baga mayong lugar sa kinaban ngonyan. An mga mapangganang nangengenot sa iba asin garo baga pinakaasensado iyo an mga ilinalangkaw an sadiri, orgolyoso, saka an mga ipinipirit an gusto ninda. An sosyedad sa pangkagabsan naaara sa mga estilo nin pamumuhay kan mga mayaman asin bantog, bakong kan mga mapakumbaba saka mahoyo. Sa parate, an mga mapanggana gustong ipaghambog na sinda nag-asenso huli sa sadiri nindang paghihingoa. Imbes na magin mapakumbaba, orgolyoso nindang kinukua an bilog na kredito para sa saindang kapangganahan.
An sarong parasiyasat na taga Canada nagtaram manongod sa “paglataw nin maimot asin orgolyosong kaisipan” sa saiyang nasyon. An iba naniniwala na nabubuhay kita sa sarong sosyedad na an pagpanigo sa sadiri mas importante kisa sa responsabilidad asin nagkokomento na an mga tawo ngonyan paorog nang paorog na sadiri na sana an iniintindi. Sa siring na kinaban, an kapakumbabaan tibaad garo baga bakong kawiliwiling kualidad.
Siempre, pira sana an dai maoyon sa ideya na an kapakumbabaan kagalanggalang na kualidad para sa iba, huling an mga mapakumbaba pasil na pakiibanan. Minsan siring, sa satong kinaban na may kompetisyon, may mga natatakot na kun sinda mismo magawe nin mapakumbaba, an iba mamansayon sinda na maluya.
Ihinula kan Tataramon nin Dios, an Biblia, na sa satong panahon an mga tawo magigin “mga mapagpasikat sa sadiri, mga maabhaw.” (2 Timoteo 3:1, 2) Dai daw kamo maoyon na naootob na an hulang ini? May naheheling daw kamong ano man na kahalagahan sa pagigin mapakumbaba? O iniisip daw nindo na an mapakumbabang tawo mamansayon na maluya asin madaling aprobetsaran?
An totoo iyo na an Biblia nagtatao nin marahay na mga dahelan sa pagpahalaga asin pagpatalubo nin kapakumbabaan. Iyan nagtatao nin timbang asin positibong pagmansay sa kualidad na iyan asin nagpapaheling na an tunay na kapakumbabaan tanda nin kakosogan, bakong nin kaluyahan. Ipapaliwanag kan sunod na artikulo kun taano.
[Ritrato ha pahina 3]
Ano an maninigong magin saboot niato manongod sa satong mga nagibo?