Maogma an mga Mapakumbaba

“Tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.”​—1 PEDRO 5:5.

1, 2. Sa saiyang Sermon sa Bukid paano ikinonektar ni Jesus an pagigin maogma sa pagigin mapakumbaba?

KONEKTADO daw an pagigin maogma sa pagigin mapakumbaba? Sa saiyang pinakabantog na sermon, si Jesu-Cristo, an pinakadakulang tawo na nabuhay kasuarin pa man, ilinaladawan an siyam na kaogmahan, o felicidad. (Mateo 5:​1-12) Ikinonektar daw ni Jesus an pagigin maogma sa pagigin mapakumbaba? Iyo nanggad, huli ta an pagigin mapakumbaba kalabot sa nagkapirang kaogmahan na sinambit nia. Halimbawa, an sarong tawo dapat na magin mapakumbaba tanganing makamate kan saiyang espirituwal na pangangaipo. Solamente an mga mapakumbaba an nagugutom asin napapaha sa katanosan. Asin an mga mapalangkaw bakong mahoyo asin bakong maheherakon, ni sinda man mga parapatoninong.

² An mga mapakumbaba maogma huli ta tama asin sadiosan na magin mapakumbaba. Dugang pa, maogma an mga mapakumbaba huli ta madonong na magin mapakumbaba; nakakokontribuwir iyan sa marahay na relasyon ki Jehova Dios asin sa mga kapwa Kristiano. Saro pa, an mapakumbabang mga tawo maogma huli ta para sa sainda pagpahayag nin pagkamoot an magin mapakumbaba.

3. Taano an pagkasadiosan ta inoobligar kitang magin mapakumbaba?

³ Taano ta hinahagad sato kan pagkasadiosan na magin mapakumbaba? Enot, huli ta kita gabos nagmamana nin pagkabakong sangkap asin perming nasasala. Si apostol Pablo nagsabi dapit sa saiya man sana: “Aram ko na sa sako, an boot sabihon, sa sakong laman, mayo nin marahay na nag-eerok; huli ta an kakayahan na magmawot nasa sako, alagad an kakayahan na gumibo kan marahay mayo.” (Roma 7:18) Iyo, kita gabos nagkasala asin nagkulang sa kamurawayan nin Dios. (Roma 3:23) An pagkamakatanosan popogolan kita sa pagigin mapalangkaw. An pag-ako nin sala nagkakaipo nin kapakumbabaan, asin an pagkasadiosan tatabangan kita na akoon an pagbasol kun kita nasasala. Mantang parateng dai niato naaabot an pinagmamaigotan tang gibohon, igwa kita nin tamang dahelan na magin mapakumbaba.

4. Anong mapuwersang dahelan an itinatao sa 1 Corinto 4:​7 sa satong pagigin mapakumbaba?

⁴ Tinatawan kita ni apostol Pablo nin saro pang dahelan kun taano an pagkasadiosan ta maninigong magpangyari sato na magpakumbaba. An sabi nia: “Siisay an nagpapalaen sa saimo? Sa katunayan, ano an rogaring mo na dai mo inako? Ngonyan, kun iyan inako mo, tadaw ta nagpapaabaw-abaw ka na garo baga dai mo iyan inako?” (1 Corinto 4:7) Mayong duda manongod kaiyan, an pag-omaw niato sa sadiri, paghambog kan satong mga rogaring, abilidad, o mga naabot, bakong sadiosan. An pagkasadiosan nakakokontribuwir sa pagkaigwa niato nin marahay na konsensia sa atubangan nin Dios, tanganing kita ‘makagawe nin sadiosan sa gabos na bagay.’​—Hebreo 13:18.

5. Paano man kita tatabangan nin pagkasadiosan kun kita nakagibo nin sala?

⁵ An pagkasadiosan nakatatabang sato na magin mapakumbaba kun nakakagibo kita nin sala. Gigibohon kita kaiyan na mas andam na akoon an pagbasol, imbes na probaran na ipangatanosan an sadiri o ipasa sa iba an pagbasol. Kaya, minsan ngani binasol ni Adan si Eva, si David dai binasol si Bat-seba, na sinasabing, ‘Dai kutana sia dapat na nagkarigos na helingon na marhay. Dai logod ako nakapogol na masugotan.’ (Genesis 3:​12; 2 Samuel 11:​2-4) Tunay nanggad, puwedeng sabihon na sa sarong kampi, an pagigin sadiosan nakatatabang sato na magin mapakumbaba; sa ibong na kampi, an pagigin mapakumbaba nakatatabang sato na magin sadiosan.

An Pagtubod ki Jehova Tinatabangan Kita na Magin Mapakumbaba

6, 7. Paano an pagtubod sa Dios nagtatabang sato na magin mapakumbaba?

⁶ Tatabangan man kita kan pagtubod ki Jehova na magin mapakumbaba. An pag-apresyar kun gurano tunay nanggad kadakula kan Kaglalang, an Unibersal na Soberano, malikay sato sa labi-labing pagpahalaga sa sadiri. Pinagigirumdom nanggad kita ni propeta Isaias dapit kaini! Sa Isaias 40:​15, 22, mababasa niato: “Uya! An mga nasyon siring sana sa sarong toro sa timba; asin siring sa kabokabo sa timbangan na sinda ibinibilang. . . . Igwa nin Saro na nag-eerok sa ibabaw kan katalidongan kan daga, na an mga nag-eerok dian garo mga lukton.”

⁷ Tatabangan man kita kan pagtubod ki Jehova kun nakakamate kitang ginibohan nin inhustisya. Imbes na mapungot sa nangyari, mapakumbaba kitang mahalat ki Jehova, siring kan ipinagigirumdom sato kan salmista sa Salmo 37:​1-3, 8, 9. Arog man kaiyan an idinodoon ni apostol Pablo: “Dai kamo magbalos, mga namomotan, kundi magtao nin lugar sa karatan; huli ta nasusurat: ‘Sako an pagbalos; ako an mabalos,’ sabi ni Jehova.”​—Roma 12:19.

Kapakumbabaan​—An Dalan nin Kadonongan

8. Taano an kapakumbabaan ta nakakokontribuwir sa marahay na relasyon ki Jehova?

⁸ Dakol an dahelan kun taano an pagigin mapakumbaba ta iyo an dalan nin kadonongan. An saro iyo na, siring sa ipinaheling na, nakakokontribuwir iyan sa marahay na relasyon sa satong Kaglalang. Malinaw an pagkasabi kan Tataramon nin Dios sa Talinhaga 16:​5: “An gabos na mapaabaw-abaw sa puso bagay na ikinaoongis ni Jehova.” Mababasa ta man sa Talinhaga 16:​18: “An kapalangkawan naeenot sa kapahamakan, asin an espiritu nin kapaabaw-abawan naeenot sa pagkapukan.” Dai mahaloy an mapalangkaw nag-aagi nin kamondoan. Kaipuhan nanggad na siring an mangyari huli kan satong mababasa sa 1 Pedro 5:​5: “Gabos kamo maghagkos nin kababaan nin boot sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.” Maririsa nindo an iyo man sanang punto sa itinaong ilustrasyon ni Jesus dapit sa Fariseo asin sa parasingil nin buhis na kada saro namimibi. An mapakumbabang parasingil nin buhis an napatunayan na orog na matanos.​—Lucas 18:​9-14.

9. Ano an ikakatabang nin kapakumbabaan sa mga panahon nin kasakitan?

⁹ An kapakumbabaan iyo an dalan nin kadonongan huli ta mas pinapapasil kan kapakumbabaan an paghimate niato sa hatol na yaon sa Santiago 4:​7: “Kaya pumasakop kamo sa Dios.” Kun kita mapakumbaba, dai kita magrerebelde kun itinotogot nin Dios na kita mag-agi nin kasakitan. Papangyayarihon kita kan kapakumbabaan na manigoan sa satong mga kamugtakan asin magtagal. An tawong mapalangkaw diskontento, perming gusto nin mas dakol pa, asin nagrerebelde sa masakit na mga kamugtakan. Sa ibong na kampi, an tawong mapakumbaba tinatagalan an mga kasakitan asin pagbalo, siring sa ginibo ni Job. Si Job nawaran kan gabos niang rogaring asin dinamat nin makologon na helang, dangan an saiyang agom sinadol pa ngani sia na magpalangkaw, na sinasabi: “Sumpaa an Dios asin magadan ka!” Paano sia suminimbag? Sinasabi sato kan tala sa Biblia: “Sia nagsabi sa saiya: ‘Ika nagtataram siring sa pagtaram nin saro sa mga babaeng lolong. Aakoon sana daw niato an marahay hale sa tunay na Dios asin dai man akoon an maraot?’ Sa gabos na ini si Job dai nagkasala sa saiyang mga ngabil.” (Job 2:​9, 10) Huling mapakumbaba si Job, dai sia nagrebelde kundi madonong na inako an ano man na itinogot ni Jehova na mangyari sa saiya. Asin sa katapustapusi sia nagkamit nin mayaman na balos.​—Job 42:​10-16; Santiago 5:11.

An Kapakumbabaan Nakakokontribuwir sa Marahay na Relasyon sa Iba

10. Paano pinaooswag nin kapakumbabaan an satong relasyon sa mga kapwa Kristiano?

¹⁰ An kapakumbabaan iyo an dalan nin kadonongan huli ta nakakokontribuwir iyan sa marahay na relasyon sa satong mga kapwa Kristiano. Marahay nanggad an sadol sato ni apostol Pablo: ‘Dai kamo gumibo nin ano man huli sa iriwal o huli sa kapalangkawan, kundi sa kapakumbabaan nin pag-isip na ibinibilang an iba na mas halangkaw kisa saindo, na nagririsa, bako sanang sa personal na interes sa saindong sadiri, kundi siring man sa personal na interes kaidto man na iba.’ (Filipos 2:​3, 4) An kapakumbabaan may kadonongan kitang ililikay sa pakipagkompetensia sa iba o sa paghingoang malabawan an iba. An siring na mga kaisipan nagkacausa nin problema sa sato asin sa satong mga kapwa Kristiano.

11. Taano an kapakumbabaan ta makatatabang sa sato sa paglikay na masala?

¹¹ Sa dakol na pangyayari an kapakumbabaan tatabangan kita sa paglikay na masala. Paano? Huli ta an kapakumbabaan ililikay kita sa sobrang pagkompiar. Imbes, pahahalagahan niato an hatol ni Pablo sa 1 Corinto 10:​12: “Mag-ingat an siisay man na naghohona na nagtitindog na dai sia mapukan.” An tawong mapalangkaw sobra an pagkompiar sa sadiri, sa siring mas madali siang nasasala huli sa panluwas na mga impluwensia o sa saiyang sadiring mga kaluyahan.

12. An kapakumbabaan pahihiroon kita na maotob an anong Makakasuratan na obligasyon?

¹² An kapakumbabaan matabang sato na maabot an kahagadan sa pagpapasakop. Sa Efeso 5:21, sinasadol kita: “Magpasarakopsakop kamo huli sa pagkatakot ki Cristo.” Tunay nanggad, bako daw na kita gabos kaipuhan na magpasakop? An mga aki kaipuhan na pumasakop sa saindang mga magurang, mga agom na babae sa saindang agom na lalaki, asin mga agom na lalaki ki Cristo. (1 Corinto 11:​3; Efeso 5:​22; 6:1) Dangan, sa arin man na Kristianong kongregasyon, an gabos, kabale na an mga ministeryal na lingkod, dapat na magpaheling nin pagpapasakop sa kamagurangan. Bako daw totoo man na an kamagurangan sakop kan grupong maimbod na oripon, na espesyalmenteng irinirepresentar kan paraataman sa sirkito? Dangan man, an paraataman sa sirkito kaipuhan na magpasakop sa paraataman sa distrito, asin an paraataman sa distrito sa Komite kan Sanga kan nasyon kun saen sia naglilingkod. Kumusta man an mga miembro kan Komite kan Sanga? Kaipuhan sindang ‘magpasakop sa lambang saro’ asin siring man sa Namamahalang Grupo na nagrerepresentar sa grupong maimbod asin madonong na oripon, na maninimbag man ki Jesus, an natutukaw nang Hade. (Mateo 24:​45-47) Siring sa arin man na grupo nin kamagurangan, an mga miembro kan Namamahalang Grupo dapat na igalang an mga punto-de-vista kan iba. Halimbawa, an saro tibaad nag-iisip na marahay an ideya nia. Alagad sagkod na an igong bilang nin ibang miembro dai oyon sa saiyang suhestion, dapat na ipagilid na sana nia an bagay. Tunay nanggad, kita gabos nangangaipo nin kapakumbabaan, huling kita gabos nasasakopan.

13, 14. (a) Sa anong partikular na kamugtakan tatabangan kita kan kapakumbabaan? (b) Anong halimbawa an itinao ni Pedro kun manongod sa pag-ako nin hatol?

¹³ Nangorognang naheheling an kapakumbabaan bilang dalan nin kadonongan sa paagi na pinagigin mas pasil sato kan kapakumbabaan an pag-ako nin hatol asin disiplina. Lambang saro sa sato nagkakaipo nin disiplina sa panapanahon, asin maninigo na himateon niato an hatol sa Talinhaga 19:​20: “Hinanyoga an hatol asin akoa an disiplina, tanganing magin ka madonong sa saimong kaaabtan sa ngapit.” Siring sa malinaw nang sinabi, hinahale nin kapakumbabaan an kolog nin pagsagwe o disiplina. Dugang pa, si apostol Pablo, sa Hebreo 12:​4-11, sinasadol kita dapit sa kadonongan nin mapakumbabang pag-ako nin disiplina. Sa paagi sanang ini na makalalaom kitang magiyahan na may kadonongan an satong kaaabtan sa ngapit asin sa siring kamtan an premyo nin buhay na daing katapusan. Kanigoan kaogmang kaaabtan iyan!

¹⁴ Sa bagay na ini puwede tang itokdo an halimbawa ni apostol Pedro. Makosog na hatol an inako nia hale ki apostol Pablo, arog kan manonodan niato sa tala kan Galacia 2:​14: “Kan maheling ko na dai sinda naglalakaw nin tanos sono sa katotoohan kan maogmang bareta, sinabihan ko si Cefas [si Pedro] sa atubang ninda gabos: ‘Kun ika, minsan ngani ika Judio, namumuhay siring sa mga nasyon, asin bakong siring sa mga Judio, taano man ta pinipirit mo an mga tawo kan mga nasyon na mamuhay sono sa ugaleng Judio?’” Nakolgan daw an boot ni apostol Pedro? Dai luminawig, kun iyo man, siring kan maririsa sa nahuri niang pagkasambit sa “satong namomotan na tugang na si Pablo” sa 2 Pedro 3:​15, 16.

15. Ano an koneksion kan satong pagigin mapakumbaba asin kan satong pagigin maogma?

¹⁵ Yaon man an bagay nin pagigin naninigoan sa sadiri, kontento. Dai nanggad kita magigin maogma kun bako kitang kontento sa kamugtakan ta sa buhay, sa satong mga pribilehiyo, sa satong mga biyaya. An isip kan mapakumbabang Kristiano: “Kun an Dios itinotogot iyan, kaya ko iyan,” na iyong gayo an sinasabi ni apostol Pablo, arog kan mababasa niato sa 1 Corinto 10:​13: “Mayong sugot na maabot saindo kundi idto sanang dating namamatean nin tawo. Alagad an Dios maimbod, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” Kaya naheheling liwat niato kun paano na an kapakumbabaan iyo an dalan nin kadonongan, huling tinatabangan kita kaiyan na magin maogma ano man an kamugtakan ta sa buhay.

An Pagkamoot Tatabangan Kita na Magin Mapakumbaba

16, 17. (a) Anong Makakasuratan na halimbawa an nagtatampok kan pinakanangongorog na kuwalidad sa pagtabang sato na magin mapakumbaba? (b) Anong sekular na halimbawa an nag-iilustrar man kan puntong ini?

¹⁶ Orog kisa arin pa man, an daing kapasloan na pagkamoot, an a·ga΄pe, tatabangan kitang magin mapakumbaba. Taano ta mapakumbabang natagalan ni Jesus an inagihan nia sa hariging pasakitan na ilinaladawan ni Pablo sa mga taga-Filipos? (Filipos 2:​5-8) Taano ta dai nia inisip an pagigin kapantay nin Dios? Huli ta, arog kan sabi nia mismo: “Ako namomoot sa Ama.” (Juan 14:31) Iyan an dahelan na sa gabos na panahon itinatao nia an kamurawayan asin onra ki Jehova, an saiyang langitnon na Ama. Kaya, sa saro pang pangyayari idinoon nia na solamente an saiyang langitnon na Ama an marahay.​—Lucas 18:​18, 19.

¹⁷ Nag-iilustrar kan puntong ini an sarong pangyayari sa buhay kan saro sa mga enot na poeta sa Amerika, si John Greenleaf Whittier. An lalaking ini nagkaigwa nin kailusyon kan hoben pa, asin sarong beses sa kompetisyon sa pagdeletriya, an daragita tama an pagkadeletriya sa sarong termino, pero sia sala an pagkadeletriya. Namondong marhay an daragita huli kaiyan. Taano? Siring sa paggirumdom kan poeta, an daragita nagsabi: “Patawad ta nadeletriya ko an terminong idto. Habo ko nanggad na madaog ka . . . huli ta aram mo, namomotan taka.” Iyo, kun may namomotan kita, gugustohon ta na an sarong iyan halangkaw, bakong hababa, sato huling an pagkamoot mapakumbaba.

18. An kapakumbabaan tatabangan kitang sunodon an anong Makakasuratan na hatol?

¹⁸ Sarong marahay na leksion ini para sa gabos na Kristiano, nangorogna sa mga tugang na lalaki. Kun manongod sa espesyal na pribilehiyo nin paglilingkod, mag-oogma daw kita na nagkamit kaiyan an satong tugang imbes na kita, o makakamate daw kita nin kadikit na pag-imon asin pagkauri? Kun tunay tang namomotan an satong tugang, maggagayagaya kita na nakaako sia kan espesyal na asignasyon o pagmidbid o pribilehiyong iyan nin paglilingkod. Iyo, pinapapasil kan kapakumbabaan an paghimate sa hatol na: “Sa pagpaheling nin onra sa lambang saro mangenot kamo.” (Roma 12:10) An saro pang traduksion nagsasabi: “Tawan nin onra an lambang saro nin orog kisa saindo man sana.” (New International Version) Sa giraray, kita sinasadol ni apostol Pablo: “Paagi sa pagkamoot maglingkod kamo sa lambang saro.” (Galacia 5:13) Iyo, kun kita may pagkamoot, maoogma kitang makapaglingkod sa satong mga tugang, magtrabaho para sa sainda, na ipinaoorog kisa sato an intereses asin ikararahay ninda, na nagkakaipo nin kapakumbabaan. An kapakumbabaan ililikay man kita sa paghambog asin sa siring lilikayan na mapukaw sa iba an espiritu nin pag-imon o pagkauri. Si Pablo nagsurat na an pagkamoot “dai nagpapalangkaw, dai nagpapaabhaw.” Taano ta dai? Huli ta an motibo sa likod kan pagpalangkaw asin pagpaabhaw paslo, mahambog, mantang an pagkamoot iyo an pinakaubod nin pagkabakong paslo.​—1 Corinto 13:4.

19. Anong mga halimbawa sa Biblia an nag-iilustrar na an kapakumbabaan asin pagkamoot konektadong marhay, siring man an kapalangkawan asin kapasloan?

¹⁹ An relasyon ni David ki Hadeng Saul asin sa aki kaining si Jonatan sarong pambihirang halimbawa kun paano konektadong marhay an pagkamoot asin kapakumbabaan saka kun paano man konektadong marhay an kapalangkawan asin kapasloan. Huli sa mga panggagana ni David sa ralaban, an mga babae sa Israel nag-arawit: “Nagadan ni Saul an saiyang mga rinibo, asin ni David an saiyang manampulong ribo.” (1 Samuel 18:7) Dai nanggad nagin mapakumbaba kundi, imbes, napano nin kapalangkawan, magpoon kaidto si Saul pinatalubo an mapangadan na pagkaongis ki David. Laen na marhay ini sa espiritu kan saiyang aking si Jonatan! Mababasa ta na namotan ni Jonatan si David nin siring sa saiya man sana. (1 Samuel 18:1) Kaya paano guminawe si Jonatan kan, pag-abot nin panahon, malinaw na si Jehova binibendisyonan si David asin na sia, bakong si Jonatan, an masalihid ki Saul bilang hade nin Israel? Nag-imon daw o nauri si Jonatan? Dai nanggad! Huli sa makosog niang pagkamoot ki David, nakapagsabi sia, arog kan mababasa ta sa 1 Samuel 23:​17: “Dai ka matakot; huli ta dai ka makukua kan kamot ni Saul na sakuyang ama, asin ika maghahade sa Israel, asin ako magigin ikaduwa sa saimo; asin iyan naiisihan ni Saul na sakuyang ama.” An makosog na pagkamoot ni Jonatan ki David nagpangyari sa saiya na mapakumbabang akoon an namansayan nia na kabotan nin Dios sa kun siisay an masalihid sa saiyang ama bilang hade nin Israel.

20. Paano ipinaheling ni Jesus na konektadong marhay an pagkamoot asin kapakumbabaan?

²⁰ An dugang pang nagdodoon kan pagigin konektado kan pagkamoot asin kapakumbabaan iyo an nangyari kan huring banggi na si Jesu-Cristo kaibanan kan saiyang mga apostol bago sia nagadan. Sa Juan 13:​1, mababasa ta na si Jesus, huling “namoot sa saiyang mga sadiri digdi sa kinaban, namoot sainda sagkod sa katapusan.” Kasunod kaiyan, mababasa ta, hinanawan ni Jesus an mga bitis kan saiyang mga apostol, na minagawe nin siring sa sarong hababang oripon. Kanigoan kamapuwersang leksion sa kapakumbabaan!​—Juan 13:1-11.

21. Bilang sumaryo, taano ta maninigo kitang magin mapakumbaba?

²¹ Tunay nanggad, kadakol kan dahelan na magin mapakumbaba. Tama, sadiosan na bagay an magin mapakumbaba. Iyan an dalan nin pagtubod. Nakakokontribuwir iyan sa marahay na relasyon ki Jehova Dios asin sa satong mga kapagtubod. Dalan iyan nin kadonongan. Orog sa gabos, iyan an dalan nin pagkamoot asin nagtatao nin tunay na kaogmahan.

Ano an Saindong Simbag?

◻ Sa anong mga paagi nakatatabang an pagkasadiosan sa pagigin mapakumbaba?

◻ Taano an pagtubod ki Jehova ta makatatabang sato na magin mapakumbaba?

◻ Ano an nagpapaheling na an pagigin mapakumbaba iyo an dalan nin kadonongan?

◻ Taano an pagkamoot ta espesyalmenteng nakatatabang sa satong pagigin mapakumbaba?

[Ritrato sa pahina 21]

Si Job mapakumbabang puminasakop ki Jehova. Dai nia ‘isinumpa an Dios asin nagadan’

[Ritrato sa pahina 23]

Si Pedro mapakumbabang nagpasakop kan hinatolan sia ni Pablo sa publiko