Paano Nindo Ikapaheheling an Tunay na Kapakumbabaan?
AN TUNAY na kapakumbabaan dakula an halaga sa pagheling nin Dios. Si Santiago nagsurat: “An Dios minatumang sa mga mapaabaw-abaw, alagad sia minatao nin dai na kutana maninigong kabootan sa mga mapakumbaba.” (Santiago 4:6) Puedeng nasasambitan digdi ni Santiago an nagkapirang saboot na ipinahayag sa Hebreong Kasuratan. “Si Jehova halangkaw, alagad naheheling nia an mapakumbaba; alagad harayo an pagheling nia sa mapalangkaw.” “An mapaabaw-abaw na mga mata nin daganon na tawo kaipuhan na pakababaon, asin an kahalangkawan nin mga tawo kaipuhan na pakumbabaon; asin si Jehova sana an kaipuhan na pakahalangkawon.” “Kun manongod sa mga paraolog-olog, sia [an Dios] mismo an mag-oolog-olog; alagad sa mga mahoyo sia magpapaheling nin pabor.”—Salmo 138:6; Isaias 2:11; Talinhaga 3:34.
Inanimar man ni apostol Pedro an kapakumbabaan. Sia nagsurat: “Gabos kamo maghagkos nin kababaan nin isip sa lambang saro, huli ta tinutumang nin Dios an mga maabhaw, alagad ta tinatawan nia nin dai na kutana maninigong kabootan an mga mapakumbaba.”—1 Pedro 5:5.
An Halimbawa nin Kapakumbabaan ni Cristo
Tibaad ihapot nindo, Ano an pakinabang o bentaha sa pagigin mapakumbaba? Para sa tawo na naghihingoang magin tunay na Kristiano an simbag pundamental—an pagigin mapakumbaba pagigin arog ki Cristo. Ipinaheling ni Jesus an saiyang kapakumbabaan paagi sa pag-ako nin daing kaagid na asignasyon na magdigdi sa daga hale sa langitnon na rona asin magin hamak na tawo, na mas hababa kisa sa mga anghel. (Hebreo 2:7) Minsan ngani sia an Aki nin Dios, tinios nia an mga pagsopog sa saiya kan saiyang relihiosong mga kaiwal. Nagdanay siang kalmado durante kan mga pagbista sa saiya, minsan ngani kaya niang magpasukoro sa mga hukbo nin anghel.—Mateo 26:53.
Sa katapustapusi, si Jesus ibinitin sa kasosopgan sa hariging pasakitan, pero nagdanay na fiel sa saiyang Ama. Sa siring, si Pablo puedeng sumurat manongod sa saiya: “Papagdanayon sa saindo an kaisipan na ini na yaon man ki Cristo Jesus, na minsan ngani sia kabaing nin Dios, dai nag-isip na man-agaw, an boot sabihon, na sia makapantay sa Dios. Dai, kundi sia nagpakang-daing halaga asin buminaing sa sarong oripon asin nagin kaagid nin mga tawo. Orog pa kaiyan, kan makua nia an saiyang sadiri na kabaing nin tawo, sia nagpakumbaba asin nagin makinuyog sagkod sa kagadanan, iyo, kagadanan sa hariging pasakitan.”—Filipos 2:5-8.
Kaya paano niato ikapaheheling an tunay na kapakumbabaan? Sa praktikal na mga situwasyon, paano kita magawe sa mapakumbaba imbes na sa orgolyosong paagi?
An Reaksion nin Tawong Mapakumbaba
Pag-olayan niato an kapakumbabaan sa trabaho, baga man sa pinagtatrabawohan o sa Kristianong paglilingkod. Tanganing magibo nin mapanggana an trabaho, puedeng kaipuhan an mga paraataman, manedyer, asin superbisor. May saro na dapat gumibo nin mga desisyon. Paano an reaksion nindo? Kamo daw nangangatanosan, “Siisay man sia sa paghona nia tanganing sabihan ako kan dapat kong gibohon? Mas haloy na ako sa trabahong ini kisa sa saiya.” Iyo, kun kamo orgolyoso, kamo mareklamo kun nasasakopan. Sa ibong na kampi, an tawong mapakumbaba nagmamaigot na ‘dai maggibo nin ano man huli sa iriwal o huli sa kapalangkawan, kundi sa kababaan nin pag-isip na ibinibilang an iba na mas halangkaw.’—Filipos 2:3.
Paano an reaksion nindo kun an suhestion maghale sa saro na mas ngohod o sa sarong babae? Kun kamo mapakumbaba, kisuerra kokonsideraron nindo iyan. Kun kamo orgolyoso, tolos-tolos nindong ikaaanggot o sasayumahan iyan. Mas gusto daw nindo an omawon asin bolahon kamo na magiya sa pagkalaglag nindo o an nakararahay na hatol para sa ikaririgon nindo?—Talinhaga 27:9; 29:5.
Kaya daw nindong atubangon an angat nin kasakitan? An kapakumbabaan an mapangyari sa saindo na atubangon an masakit na mga kamugtakan asin magtagal, siring kan ginibo ni Job. Kun kamo orgolyoso, kamo magkakaigwa nin tendensiang madesganar asin tibaad magrebelde sa masakit na marhay na mga kamugtakan asin pinaghohonang mga pagdespresyar.—Job 1:22; 2:10; 27:2-5.
An Kapakumbabaan Mamomoton Asin Mapagpatawad
May mga tawo na nadedepisilan magsabing, “Patawadon mo ako. Nasala ako. Ika an tama.” Taano? Sobrang pag-orgolyo! Pero, parateng marhay na an tunay na paghagad nin tawad madaling makapapondo sa pagpasuruhay nin mag-agom.
Kamo daw andam na magpatawad kun may magkasala sa saindo? O, huli sa pag-orgolyo nindo, kamo daw nagtatanom nin raot nin boot, tibaad sa laog nin dakol na aldaw asin bulan, na habong makipag-olay sa soboot nagkasala? Kamo daw nakikipag-iwal pa ngani nin makuri sa paghingoang makabalos? May mga tawong ginadan sa nagkapirang mapait na iriwal. Sa iba, pagpakaraot sa dangog nin iba an ginigibo. Sa kabaliktaran, an tawong mapakumbaba mamomoton asin mapagpatawad. Taano? Huli ta an pagkamoot dai nagkukuenta kan danyos. Si Jehova andam na patawadon an mga Israelita kun hahalonon ninda an saindang pag-orgolyo. An mapakumbabang parasunod ni Jesus andam na magpatawad, dawa paorootro!—Joel 2:12-14; Mateo 18:21, 22; 1 Corinto 13:5.
An tawong mapakumbaba ‘nangengenot sa pagpaheling nin onra sa iba.’ (Roma 12:10) An New International Version nagsasabi: “Tawan nin onra an lambang saro nin orog kisa sa saindong sadiri.” Inoomaw daw nindo an iba asin inaapresyar an saindang mga kakayahan asin talento? O pirme daw nindong kaipuhan na humanap nin diperensia tanganing mantsahan an saindang marahay na dangog? Iyo, tatao daw kamong magtao nin tunay na pag-omaw sa ibang tawo? Kun nadedepisilan kamo sa bagay na ini, tibaad personal na kadaihan nin seguridad asin pag-orgolyo an problema nindo.
An tawong mapalangkaw bakong mapasensia. An tawong mapakumbaba mapasensia asin matinios. Kumusta man kamo? Nakokolgan daw kamo sa ano man na naririsang bakong paborableng tratamiento? An reaksion na iyan iyo an kabaliktaran nin pagigin matinios. Kun kamo mapakumbaba, dai kamo labi-labing magpapahalaga sa saindong sadiri. Girumdoma an nangyari kan pahalagahan nin labi-labi kan mga disipulo ni Jesus an saindang sadiri—sinda mainit na nagpasuruhay manongod sa kun siisay an pinakaimportante sa sainda. Nalingawan ninda na sinda gabos “mga oripon na daing kamanungdanan”!—Lucas 17:10; 22:24; Marcos 10:35-37, 41.
An parasurat na Pranses na si Voltaire ilinadawan an kapakumbabaan bilang “an kababaan nin boot kan kalag . . . an pangontra sa pag-orgolyo.” Iyo, an kapakumbabaan kababaan nin pag-iisip. An tawong mapakumbaba hababa an boot, bakong orgolyoso. Sia magalang na marhay asin makonsiderasyon.
Kaya taano ta maghingoang magin mapakumbaba? Huli ta an kapakumbabaan inooyonan nin Dios asin nagtatabang sa sato na akoon an paggiya nin Dios. Sa sarong kabtang huli sa kapakumbabaan ni Daniel, ibinilang ni Jehova an propeta na saro na “kawiliwiling gayo” asin nagsugo nin anghel sa saiya na may darang bisyon! (Daniel 9:23; 10:11, 19) An kapakumbabaan nagbubunga nin dakol na balos. Iyan nagbubunga nin tunay na mga katood na namomoot sa saindo. Orog pa kaiyan, iyan nagbubunga kan bendisyon ni Jehova. “An bunga nin kapakumbabaan asin pagkatakot ki Jehova kayamanan asin kamurawayan patin buhay.”—Talinhaga 22:4.
[Retrato sa pahina 7]
An mapakumbabang paghagad nin tawad puedeng gibohon na mas pasil an buhay