Maninigo daw Nindong Iinsistir an Saindong Personal na mga Gusto?

MAY duwang aki na nagkakawat. Hinakbot nin saro parayo sa sarong aki an saiyang paboritong kawatan asin nagkuragrit, “Sakuya ini!” Poon sa amay na edad, nagpapaheling na nin kaimotan an bakong sangkap na mga tawo. (Gen. 8:21; Roma 3:23) Dugang pa, an kinaban sa pangkagabsan nagpapalakop nin ugaleng ako nguna. Tanganing malikayan niato an ugale na ini, dapat niatong maigot na labanan an maimot na mga tendensia. Kun dai niato gigibohon iyan, madali kitang makakapasingkog sa iba asin mapapaluya niato an satong relasyon ki Jehova.​—Roma 7:21-23.

Sa pagdagka sa sato na isip-isipon an epekto sa iba kan satong paggawe, si apostol Pablo nagsurat: “An gabos na bagay makatanosan; alagad bakong gabos na bagay nakakarahay. An gabos na bagay makatanosan; alagad bakong gabos na bagay nakakaparigon.” Si Pablo nagsabi man: “Dai kamo magin mga dahelan nin pagkasingkog.” (1 Cor. 10:23, 32) Kun siring, sa mga bagay na may koneksion sa personal na mga gusto, madonong na hapoton an satong sadiri: ‘Andam daw akong lingawan nguna an nagkapira kong mga deretso kun nasasapeligro an katoninongan kan kongregasyon? Andam daw ako na sumunod sa mga prinsipyo sa Biblia, dawa kun iyan bakong kombenyenteng gibohon?’

Sa Pagpili nin Trabaho

Para sa kadaklan na tawo, an saindang pagpili nin trabaho sarong personal na desisyon na kadikit​—kun igwa man—​an epekto sa iba. Alagad estudyare an eksperyensia nin sarong negosyante sa sadit na banwaan sa Timog Amerika. Midbid sia na parasugal asin parainom. Minsan siring, bilang resulta kan pakikipag-adal sa Biblia sa mga Saksi ni Jehova, nag-oswag sia sa espirituwal asin binago nia an saiyang pamumuhay. (2 Cor. 7:1) Kan sabihon nia na interesado siang maghulit sa publiko kaiba kan kongregasyon, sarong magurang sa kongregasyon an mataktikang nagdagka sa saiya na pag-isipan an manongod sa klase kan saiyang sekular na trabaho. Sa harohalawig na panahon, an lalaking iyan an nagin pangenot na distributor nin purong alkohol hale sa tubó​—produktong dakol an gamit, alagad sa lugar na iyan parateng isinasalak sa soft drinks asin iniinom tangani sanang maburat.

Nabatid kan lalaki na kun sia mahulit sa publiko alagad matinda pa man giraray kan siring na produkto, mararaot an dangog kan kongregasyon asin an saiyang relasyon sa Dios. Minsan ngani igwa sia nin dakulang pamilya na kaipuhan sustentohan, nagpondo sia sa pagtinda nin alkohol. Sinusustentohan na nia ngonyan an saiyang pamilya paagi sa pagtinda nin mga produktong gibo sa papel. An lalaking ini, an saiyang agom, asin an duwa sa limang aki ninda bautisado na ngonyan. Maigot nindang ihinuhulit an maogmang bareta na may katalingkasan sa pagtaram.

Sa Pagpili nin mga Kaibaiba

An pakikiibaiba daw sa bako niatong mga kapagtubod sarong bagay na depende na sa satong personal na gusto, o may mga prinsipyo daw sa Biblia na kalabot? Gusto nin sarong Kristiana na magduman sa sarong parti kaiba an hoben na lalaking bakong tunay na Kristiano. Minsan ngani pinatanidan dapit sa mga peligro, inisip nia na deretso nia na umatender kaya nagduman sia sa parti. Dai nahaloy pakaabot nia, tinawan sia nin inomon na sinalakan nin makosog na pampatorog. Napagmata sia pakalihis nin pirang oras asin naaraman nia na linugos sia kan amigo daa nia.​—Ikomparar an Genesis 34:2.

Minsan ngani an pakikiibaiba sa mga daing pagtubod tibaad dai man pirmeng maresulta sa trahedya na siring kaiyan, an Biblia nagpapatanid: “Sia na naglalakaw na kaiba nin mga madonong magigin madonong, alagad sia na nakikiiba sa mga mangmang maraot an aabotan.” (Tal. 13:20) Malinaw nanggad​—isinasapeligro kita kan pagpili nin maraot na mga kaibaiba! “Alisto an isip kan saro na nakakaheling kan kapahamakan asin minatago,” an sabi kan Talinhaga 22:3, “alagad an daing kabatidan minaagi asin nagdudusa kan penalidad.” An satong mga kaibaiba puedeng makaapektar sa sato asin sa relasyon niato sa Dios.​—1 Cor. 15:33; Sant. 4:4.

Sa Paggubing Asin Pagpakarhay sa Sadiri

An estilo asin moda parateng nagbabago. Minsan siring, dai nagliliwat an mga prinsipyo sa Biblia manongod sa paggubing asin pagpakarhay sa sadiri. Sinadol ni Pablo an mga Kristiana na “magsamno sa saindang sadiri nin husay na gubing, na may kabinian asin toltol na isip”​—sarong prinsipyo na aplikado man sa mga lalaki. (1 Tim. 2:9) Dai nagrerekomendar si Pablo nin sobra man kasimpleng estilo nin gubing, ni sinasabi man nia na dapat parareho an gustong estilo nin gabos na Kristiano. Alagad kumusta an manongod sa kabinian? Segun sa sarong diksionaryo, an kabinian nangangahulogan na “bakong mahambog o mapalangkaw . . . angay an gubing, pagtaram, o paggawe.”

Kaipuhan niatong hapoton an satong sadiri: ‘Masasabi ko daw talaga na mabini ako kun iiniinsistir ko an sakong deretso na maggubing sa paaging nakakaapod nin bakong maninigong atension sa sako? An sako daw na paagi nin paggubing nagtatao nin salang impresyon manongod sa sako o sa moral na pamumuhay ko?’ Malilikayan niato na ‘makatao nin ano man na dahelan nin pagkasingkog’ sa bagay na ini paagi sa “pagrisa bakong sa personal na interes sa sadiri sana [niatong] mga bagay-bagay, kundi siring man sa personal na interes sa mga bagay-bagay kan iba.”​—2 Cor. 6:3; Fil. 2:4.

Sa Negosyo

Kan maglataw an seryosong mga isyu mapadapit sa sala o mapandayang mga transaksion sa kongregasyon sa Corinto, si Pablo nagsurat: “Taano ta dai na sana nindo pabayaan na kamo pagkasalaan? Taano ta dai na sana nindo pabayaan na kamo dayaon?” Sinadol ni Pablo an mga Kristiano na magin andam na ipahunod an pirang bagay imbes na idemanda an sarong tugang. (1 Cor. 6:1-7) Sarong tugang sa Estados Unidos an nagsapuso kan konsehong ini. Dai nagkasundo an opinyon nia asin kan saiyang among na Kristiano manongod sa sueldong maninigong bayadan sa saiya. Sa pagsunod sa sono sa Kasuratan na mga giya, paorootrong nag-olay an duwa alagad dai naresolberan an problema. Sa katapustapusi, dinara ninda an problema “sa kongregasyon,” na irinerepresentar kan Kristianong kamagurangan.​—Mat. 18:15-17.

Makamomondo, dai pa man giraray maresolberan an isyu. Pagkatapos nin dakol na pamibi, nagdesisyon an empleyado na lingawan na sana an dakulang kabtang kan kuarta na iniisip niang dapat bayadan sa saiya. Taano? Sa huri sia nagsabi, “Hinahale kan dai pagkakaoyon na ini an kagayagayahan ko asin an mahalagang marhay na panahon na puedeng gamiton sa espirituwal na mga gibohon.” Pagkatapos na magibo an desisyon na iyan, namatean kan tugang na nagbabalik na an saiyang kagayagayahan asin na binebendisyonan ni Jehova an saiyang paglilingkod.

Dawa sa Saradit na Bagay

An dai pag-insistir kan satong personal na mga gusto nagtatao man nin mga bendisyon sa saradit na bagay. Sa enot na aldaw nin sarong pandistritong kombension, an sarong mag-agom na payunir nag-abot nin amay asin nagtukaw sa talagang gusto nindang tukawan. Kan nagpopoon na an programa, sarong dakulang pamilya na may nagkapirang aki an naghihidali na makalaog sa matawong koliseo. Huling narisa kan mag-agom na payunir na an pamilya naghahanap nin igong tukawan, itinao ninda an saindang duwang tukawan. Pinagin posible kaiyan na makatukaw na magkairibanan an enterong pamilya. Pirang aldaw pagkatapos kan kombension, an mga payunir na iyan nakaresibi nin surat nin pasasalamat hale sa pamilyang ini. Ipinaliwanag sa surat na nadesganar sindang gayo kan sinda mag-abot nin huri sa kombension. Dai nahaloy naribayan nin kagayagayahan asin pasasalamat an pagmateng iyan huli sa kabootan kan mag-agom na payunir.

Kun igwa kita nin oportunidad, magin andam kita na lingawan nguna an satong mga gusto para sa iba. Paagi sa pagpaheling nin pagkamoot na “dai naghahanap kan sadiring kapakanan kaiyan,” nakakatabang kita na mapagdanay an katoninongan sa laog kan kongregasyon asin sa satong mga kataed. (1 Cor. 13:5) Alagad an pinakamahalaga sa gabos, napapagdanay niato an satong pakikikatood ki Jehova.

[Ritrato sa pahina 20]

Andam daw kamong lingawan nguna an saindong personal na mga gusto sa pagpili nin moda?

[Ritrato sa pahina 20, 21]

Andam daw kamong itao an saindong tukawan para sa mga tugang nindo?