Lakop an mga Nangyayaring Maraot!

Si Smita,a sarong 35 anyos na babaying taga Dhaka, Bangladesh, bistadong mamumuton asin maasikaso. Midbid man siyang mahigos na agom, pirming maugma, asin gustong tabangan an iba na makanuod manungod sa Diyos. Grabe an pagkabigla kan pamilya saka mga kamidbid ni Smita kan bigla ining magadan kan mismong semana na nagkahilang siya!

Si James saka an agom kaini na labi nang 30 an mga edad, midbid man na arog ki Smita. Tigsuli kaidto (springtime) kan magbisita sinda sa mga amigo ninda sa West Coast kan Estados Unidos. Dai na sinda nakapuli sa New York. Nagadan sinda sa aksidente sa lunadan. Grabeng kawaran ini para sa mga mahal ninda sa buhay asin mga katrabaho.

Dai mo na kaipuhan magrayo pa tanganing mapatunayan na talagang lakop ngunyan an maraot na mga bagay asin pagdusa. Nagagadan sa giyera an mga sibilyan saka mga suldados. Nabibiktima nin krimen saka kadahasan an mga inosente. An mga tawo naaaksidente asin nagkakahilang nin malala ano man an edad o estado sa buhay. Daing pinipiling lugar an natural na mga kalamidad pag nandedestroso iyan. Lakop an diskriminasyon asin inhustisya. Tibaad ika ngani mismo nagin biktima na kaiyan.

Natural sanang maghapot:

• Taano ta may nangyayaring maraot sa marahay na mga tawo?

• An Diyos daw an dapat basulon?

• Nagkataon sana daw an mga kalamidad, o dahil iyan sa mga tawo?

• Posible kayang huli sa Karma​—pagtubod na nagdudusa an sarong tawo dahil sa nakaagi niyang buhay?

• Kun may Diyos na makapangyarihan sa gabos, ta’no ta dai niya pinoprotektaran an marahay na mga tawo sa kapahamakan?

• Mawawara pa daw an karatan asin pagdusa?

Tanganing masimbag an mga hapot na iyan, kaipuhan ta ngunang masabutan an simbag sa duwang mahalagang hapot na ini: Taano man nanggad ta may nangyayaring maraot, asin ano an gigibuhon diyan nin Diyos?