Abundang Binebendisyunan ni Jehova an mga Gikan sa Buot na Nagtatao

TINAWAN nin dignidad kan satong Kaglalang an mga tawo paagi sa mahalagang marhay na regalo na katalingkasan na magdesisyon. Abunda man niyang binebendisyunan an mga daing kaimutan na ginagamit an katalingkasan na iyan tanganing ipalakop an tunay na pagsamba asin ginigibo an kabtang ninda sa pagpakangbanal kan pangaran niya saka pagsuportar sa saiyang marahayon na katuyuhan. Habo ni Jehova na nagkukuyog sana kita huling tinatakot o pinipirit kita. Imbes, pinapahalagahan niyang marhay an gikan sa buot na debosyon na motibado nin tunay na pagkamuot asin hararom na pag-apresyar.

Halimbawa, kan nasa kaawagan nin Sinai an mga Israelita, pinagbutan sinda ni Jehova na magtugdok nin sarong lugar nin pagsamba. Sinabi niya: “Kun ano an yaon sa saindo, kumua kamo diyan sa saindo nin kontribusyon para ki Jehova. An lambang may andam na puso magdara nin kontribusyon para ki Jehova.” (Ex. 35:5, NW) Makakapagtao an lambang Israelita nin ano man na kaya ninda, asin an kada boluntaryong kontribusyon—ano man o gurano man iyan—gagamiton sa tamang paagi tanganing maisagibo an katuyuhan nin Diyos. Ano an nagin reaksiyon ninda?

“An lambang saro na pinahiro kan saiyang puso” asin “an gabos na pinukaw kan saiyang espiritu” gikan sa buot na nagdulot, an lambang may andam na puso. Gikan sa buot na nagdara an mga lalaki asin babayi nin mga bagay para sa gibuhon ni Jehova: alpiler, hikaw, singsing, bulawan, pirak, tanso, asul na torsido, lilang lana, eskarlatang torsido, pinong lino, buhok nin kanding, anit nin karnero na tinina nin pula, anit nin foca, kahoy na akasya, gapong mutya, balsamo, asin lana. Sa kahuri-hurihi, “an mga bagay nagin igo na para sa gabos na gibuhon na dapat na magibo, asin nagsobra pa.”—Ex. 35:21-24, 27-29; 36:7, NW.

An mas nakapaugma ki Jehova, bako an mga bagay na idinulot ninda, kundi an gikan sa buot na pagsuportar ninda sa tunay na pagsamba. Napahiro man sindang itao an saindang panahon asin kusog. Nagpuron ‘an mga babayi na marahay magpuron,’ an sabi kan pagkasaysay. Iyo, ‘an gabos na babayi na hiniro kan saindang puso huli ta may katibayan, nagpuron man nin balukag nin kanding.’ Apuwera diyan, tinawan ni Jehova si Bezalel nin ‘kadunungan, katalian, kaaraman, asin katibayan para sa manlain-lain na gibo.’ Sa katunayan, pinano nin Diyos si Bezalel asin Oholiab nin abilidad na kaipuhan tanganing mahaman an gabos na ipinagibo niya sa sainda.—Ex. 35:25, 26, 30-35, An Banal na Biblia.

Kan agdahon ni Jehova an mga Israelita na magdonar, lubos an pagtitiwala niya na “an lambang may andam na puso” masuportar sa tunay na pagsamba. Bilang balos, abunda niyang binendisyunan nin paggiya asin daing sagkod na kagaya-gayahan an mga gikan sa buot na nagtao. Sa siring, ipinahiling ni Jehova na pag binebendisyunan niya an gikan sa buot na pagtao kan mga lingkod niya, sinisigurado niya na dai sinda kukulangon nin mga kakaipuhanon o abilidad tanganing magibo an saiyang kabutan. (Sal. 34:9) Kun daing kaimutan mong pinaglilingkudan si Jehova, siyertong bebendisyunan niya an gikan sa buot na pagtao mo.

KUN PAANO NAGKOKONTRIBWIR AN IBA PARA SA PAMBILOG NA KINABAN NA GIBUHON

Arog kan panahon ni apostol Pablo, dakul ngunyan an ‘naglalain,’ o nagtatagama, nin kuwarta para ihulog sa mga kahon nin kontribusyon na may nakasurat na “Worldwide Work.” (1 Cor. 16:2) Kada bulan, ipinapadara kan mga kongregasyon an mga kontribusyon na ini sa opisina kan mga Saksi na nakakasakop sa nasyon ninda. Puwede ka man na direktang magpadara nin donasyon sa sarong legal na korporasyon na ginagamit kan mga Saksi sa nasyon nindo. Para maaraman an ngaran kan panginot na legal na korporasyon kan mga Saksi sa nasyon nindo, kontakon tabi an sangang opisina na nakakasakop diyan. An adres kaiyan puwedeng makua sa www.jw.org. An mga klase nin donasyon na puwede mong direktang ipadara iyo an minasunod:

DIREKTANG DONASYON

Donasyon paagi sa electronic bank transfer, debit card, o credit card. Sa ibang sangang opisina, posible man ini gamit an jw.org o iba pang designadong Web site.
Donasyon na kuwarta, alahas, o iba pang mahalagang personal na pagsadiri. Iiba an sarong surat na nagsasabing an kuwarta o an mga bagay na iyan direktang donasyon.

AREGLO SA KONDISYONAL NA DONASYON

Donasyon na kuwarta na may kondisyon na puwedeng ibalik iyan enkaso kaipuhanon kan nagdonar.
Iiba an sarong surat na nagsasabi na iyan kondisyonal na donasyon.

PLANO PARA SA PAG-ABULOY

Apuwera sa mga regalong kuwarta asin mahalagang personal na pagsadiri, may iba pang paagi nin pagdonar para makatabang sa gibuhon na pang-Kahadian sa bilog na kinaban. Nakalista iyan digdi. Ano man na paagi o mga paagi an gusto mo, kontakon nguna tabi an sangang opisina na nakakasakop sa nasyon nindo para maaraman kun arin diyan an puwede sa nasyon nindo. Huling nagkakalain-lain an legal na kahagadan saka ley sa buhis, mahalagang kumonsulta sa kuwalipikadong mga parakonseho sa buhis asin sa ley bago pumili nin pinakamarahay na paagi nin pagdonar.

Insurance: Donasyon na espesipikong sinasabi an ngaran kan korporasyon kan mga Saksi bilang benepisyaryo nin life insurance policy o retirement/pension plan.

Deposito sa Bangko: Deposito sa bangko, sertipiko nin deposito, o indibidwal na deposito sa pagretiro na ibinugtak sa sarong trust para sa korporasyon kan mga Saksi o ginigibong payable sa korporasyon na iyan pagkagadan kan nagdeposito sigun sa lokal na kahagadan kan bangko.

Stocks Asin Bonds: Idinodonar ini sa korporasyon kan mga Saksi bilang direktang regalo o paagi sa nasusurat na kasunduan na ibabalyo an mga ini pagkagadan kan nagdonar.

Daga Asin Harong: Madaling ikapabakal na daga asin harong na idinodonar sa korporasyon kan mga Saksi, puwedeng paagi sa direktang pagregalo o, kun residensiyal na propyedad, paagi sa pagkaigwa nin kontrata na puwedeng padagos na mag-istar diyan an nagdonar sagkod na siya nabubuhay (life estate).

Gift Annuity: Kuwarta o securities na idinodonar sa korporasyon kan mga Saksi paagi sa sarong kontrata na an nagdonar, o an saro na dinesignaran kan nagdonar, maresibi nin espesipikong annuity payment kada taon sagkod na siya nabubuhay. An buhis sa ginaganar kan nagdonar binabawasan para sa taon na naestablisar an gift annuity.

Testamento Asin Trust: Propyedad o kuwarta na puwedeng ipamana sa korporasyon kan mga Saksi paagi sa sarong legal na testamento o trust agreement na nagsasabing an korporasyon an benepisyaryo kaiyan. An areglong ini puwedeng magtao nin nagkapirang bentaha sa pagbuhis.

Siring kan ipinaparisa kan terminong “plano para sa pag-abuloy,” an mga klaseng ini nin donasyon nangangaipong pagplanuhan kan madonar. Para matabangan an mga indibidwal na gustong magkontribwir sa pambilog na kinaban na gibuhon kan mga Saksi paagi sa sarong klase nin pag-abuloy, may brosyur na Charitable Planning to Benefit Kingdom Service Worldwide sa Ingles asin Kastila. Ginibo ini para magtao nin impormasyon dapit sa lain-lain na paagi nin pagtao nin regalo ngunyan o pag-abot nin panahon, arog nin pagpamana pag nagadan. An impormasyon diyan tibaad bako gabos aplikado sa sitwasyon mo huli sa ley sa saindong nasyon dapit sa buhis o iba pa. Huli kaini, pakabasa kan brosyur, maghapot sa mga kinokonsulta mo dapit sa ley o buhis. Sa paggamit kan siring na mga paagi nin pag-abuloy, dakul an nakatabang sa pagsuportar sa satong relihiyoso saka humanitaryong mga aktibidad sa bilog na kinaban asin lubos nindang naaprobetsaran an itinataong diskuwento sa buhis. Kun igwa kan brosyur na iyan sa saindong nasyon, puwedeng maghagad nin kopya sa sekretaryo kan kongregasyon nindo.

Para sa dugang pang impormasyon, makikomunikar sa sangang opisina na nakakasakop sa nasyon nindo.