TEMA SA COVER | PUWEDE MONG MASABUTAN AN BIBLIYA
Taano ta Dapat Sabuton an Bibliya?
“An Bibliya sarong popular na librong pangrelihiyon. Pero hali iyan sa ibang nasyon kaya dai iyan nin koneksiyon sa mga Chinese.”—LIN, CHINA.
“Dai ko ngani masabutan an banal na mga libro mi sa relihiyon na Hindu, kaya paano pa daw an Banal na Bibliya?”—AMIT, INDIA.
“Iginagalang ko an Bibliya bilang sarong haluyon nang libro asin nadangog ko na best seller iyan, pero dai pa ako aktuwal na nakahiling kaiyan ni minsan.”—YUMIKO, JAPAN.
Dakul na tawo sa bilog na kinaban an may halangkaw na paghiling sa Bibliya. Pero tibaad dikit sana, kun igwa man, an aram ninda manungod sa laog kaiyan. Totoo nanggad iyan sa minilyon na nakaistar sa Asia, pero totoo man iyan sa dakul na kadagaan na lakop na marhay an Bibliya.
Pero, tibaad maihapot mo, ‘Taano man ta gugustuhon kong masabutan an Bibliya?’ Pag nasabutan mo an laog kan banal na librong ini, matatabangan ka kaiyan na:
Magin kontento asin maugma
Maatubang an mga problema sa pamilya
Makayanan an mga kahaditan
Magkaigwa nin marahay na relasyon sa iba
Magin madunong sa pagkapot nin kuwarta
Kuanon tang halimbawa si Yoshiko na taga Japan. Pig-iisip-isip niya kun ano man nanggad talaga an laog kan Bibliya kaya nagdesisyon siyang basahon iyan. Ano an nagin resulta? Ini an sabi niya: “Natabangan ako kan Bibliya na magkaigwa nin direksiyon an buhay ko asin maglaom para sa sarong magayon na puturo.” Idinagdag pa niya: “Dai ko na namamatian na mayo akong halaga, na may kulang sa buhay ko.” Si Amit, na nasambitan sa inutan, nagdesisyon na personal na siyasaton an Bibliya. “Napangalas ako,” an sabi niya. “May praktikal na impormasyon an Bibliya para sa gabos.”
Nagkaigwa nin dakulang epekto an Bibliya sa buhay nin minilyon na tawo. Ano daw kun siyasaton mo man mismo iyan para mahiling mo kun paano ka makikinabang diyan?